|
|
 |
| (GMT+08:00)
2006-02-08 17:09:44
|
 |
|
ຊີວິດວັດທະນະທຳເຂດຄຸ້ມທີ່ມີຫຼາຍຢ່າງຫຼາຍແນວແລະຫຼາຍສີຫຼາຍສັນ(ສຽງ)
cri
Author: da
|
ແຕ່ຈີນດຳເນີນການປະຕິຮູບແລະໄຂປະຕູສູ່ພາຍນອກມານີ້,ຄຽງຄູ່ກັບລະດັບຊີວິດການເປັນຢູ່ສູງຂຶ້ນຢ່າງບໍ່ຢຸດຢັ້ງ,ຄົນທັງຫຼາຍມີຄວາມຮຽກຮ້ອງຕ້ອງການຍິ່ງແຮງກ້າກວ່າເກົ່າຕໍ່ຊີວິດວັດທະນະທຳແລະຊີວິດດ້ານຈິດໃຈ.ປະຈຸບັນຢູ່ປັກກິ່ງ,ເຂດຄຸ້ມຫຼາຍແຫ່ງໄດ້ພາກັນຈັດການເຄື່ອນໄຫວວັດທະນະທຳດ້ວຍຫຼາຍຮູບຫຼາຍແບບແລະມີເນື້ອໃນອຸດົມສົມບູນເພື່ອເຮັດໃຫ້ຊີວິດວັດທະນະທຳຂອງປະຊາຊົນອຸດົມສົມບູນຂຶ້ນ.
ຕອນຮຸ່ງເຊົ້າທຸກມື້,ຟ້າຫາກໍ່ແຈ້ງ,ຢູ່ສະໜາມຫຼວງເຂດຄຸ້ມສວນໄຫເທີ້ ພາກຕາເວັນຕົກປັກກິ່ງ,ກໍ່ມີຜູ້ເຖົ້າຜູ້ແກ່ເກືອບຮ້ອຍຄົນມາເຕົ້າໂຮມກັນຢູ່ແຫ່ງນີ້,ເຕັ້ນລຳຢ່າງເບີກບານມ່ວນຊື່ນຕາມຈັງຫວະດົນຕີທີ່ອອນຊອນ.ເຖິງວ່າຜູ້ເຖົ້າເຫຼົ່ານີ້ຜົມຫງອກແລ້ວກໍຕາມ,ແຕ່ຮ່າງກາຍຍັງແຂງແຮງໝົດທຸກຄົນ,ພວກເພິ່ນລາງເທື່ອຊູວີສີໃນມືຂຶ້ນ,ລາງເທື່ອແກວ່ງແຖບຜ້າສີ,ສ່ອງແສງໃຫ້ເຫັນສະເໜ່ຂອງຜູ້ເຖົ້າຜູ້ແກ່ໃນທ່າມກາງການເຕັ້ນລຳ.ນີ້ແມ່ນທິມເຕັ້ນລຳຫັດຂອງເຂດຄຸ້ມສວນໄຫເທີ້,ມັນໄດ້ກາຍເປັນທິວທັດສວຍງາມຢູ່ເຂດຄຸ້ມດັ່ງກ່າວແລ້ວ.
ແມ່ປ້າເຢ້ຕ້າວເຊຍແມ່ນຜູ້ລິເລີ່ມສ້າງຕັ້ງທິມຟ້ອນກອງນີ້,ກ່ອນອອກກິນເບ້ຍບຳນານ,ເພິ່ນກໍມັກເຕັ້ນລຳແລ້ວ,ປີ2000,ແມ່ປ້າເຢ້ໄດ້ຮຽກໂຮມຜູ້ເຖົ້າຜູ້ແກ່ຢູ່ເຂດຄຸ້ມນີ້,ຈັດຕັ້ງທິມເຕັ້ນລຳຮຸ້ນຜູ້ເຖົ້າ,ແລະສອນການເຕັ້ນລຳໃຫ້ໂດຍບໍ່ເກັບຄ່າ.ປະຈຸບັນ,ທິມເຕັ້ນລຳກອງນີ້ໄດ້ຈາກສິບກວ່າຄົນໃນເມື່ອກ່ອນເພີ່ມຂຶ້ນຮອດເກືອບຮ້ອຍຄົນ,ໄດ້ຮັບຄວາມຊົມເຊີຍຫຼາຍຈາກຜູ້ເຖົ້າຜູ້ແກ່ໃນເຂດຄຸ້ມ.
"ຜູ້ເຖົ້າໃນເກນອາຍຸ 50 ປີຄືພວກເຮົານີ້,ຖ້າບໍ່ຫັດກາຍ,ຈະມັກເປັນພະຍາດໄດ້ງ່າຍ,ຄົນເຖົ້າແລ້ວ ຂາຈະເຖົ້າກ່ອນ,ການເຄື່ອນໄຫວຫັດກາຍ,ຈະເຮັດໃຫ້ສຸຂະພາບທັງກາຍແລະໃຈແຂງແຮງດີ."
ທິມເຕັ້ນລຳເຂດຄຸ້ມໄຫເທີ້ ບໍ່ພຽງແຕ່ໄດ້ຕັ້ງໜ້າເຂົ້າຮ່ວມການສະແດງສິລະປະທີ່ເຂດຄຸ້ມຈັດຂຶ້ນທໍ່ນັ້ນ,ຍັງຕາງໜ້າເຂດຄຸ້ມໄປເຂົ້າຮ່ວມການສະແດງແລະການແຂ່ງຂັນປະເພດຕ່າງໆຂອງສັງຄົມເລື້ອຍໆ.
ທີ່ທ່ານພວມຟັງຢູ່ນີ້ແມ່ນສຽງດົນຕີທີ່ວົງດົນຕີຣອກແອນໂຣນທີ່ຊື່ວ່າ"ຈີຕູ້ຕ້ຽນຈູ"ສະແດງໃຫ້ໄທເມືອງເບິ່ງ.ນີ້ແມ່ນງານຄອນເສີດຣອກແອນໂຣນໂດຍຈຳເພາະທີ່ເຂດຄຸ້ມຊີ່ໂລຢວນ ພາກໃຕ້ເມືອງປັກກິ່ງຈັດຂຶ້ນ,ຊາວໜຸ່ມຢ່າງຫຼວງຫຼາຍເປັນເຈົ້າການຮ້ອງເພງປະສານສຽງກັບວົງດົນຕີຕາມຈັງຫວະດົນຕີ,ກາຍເປັນສະພາບມ່ວນຊື່ນຟົດຟື້ນ.
ວົງດົນຕີ"ຈີຕູ້ຕ້ຽນຈູ"ປະກອບດ້ວຍຊາວໜຸ່ມ 4 ຄົນຂອງເຂດຄຸ້ມ,ພວກຂະເຈົ້າລ້ວນແຕ່ມີວຽກຂອງຕົນ,ແຕ່ພັດມາເຕົ້າໂຮມກັນຍ້ອນມັກດົນຕີຣອກແອນໂຣນ.ຊາວໜຸ່ມເຫຼົ່ານີ້ມັກເຂົ້າຮ່ວມການເຄື່ອນໄຫວຢູ່ເຂດຄຸ້ມຫຼາຍ,ເຊັ່ນບຸນຊາວໜຸ່ມ ງານລາຕີໃນຍາມຮ້ອນ ແລະການຢື້ຢາມຖາມຂ່າວໃນວັນບຸນ,ພວກຂະເຈົ້າຈະສະແດງລາຍການອັນໂລດໂຜນໃຫ້ແກ່ໄທເມືອງ.ແມ່ປ້າເມິ້ງຊີ ຫົວໜ້າຄະນະກຳມະການເຂດຄຸ້ມເວົ້າວ່າ:
"ຂ້າພະເຈົ້າຮູ້ສຶກວ່າ ຮູບການການເຄື່ອນໄຫວຂອງພວກຂະເຈົ້າດີຫຼາຍ,ໃນເວລາພວກຂະເຈົ້າມາສະແດງຢູ່ເຂດຄຸ້ມຂອງພວກເຮົາເທື່ອໃດ,ກໍ່ລ້ວນແຕ່ສາມາດດູດດຶງຊາວໜຸ່ມຢ່າງຫຼວງຫຼາຍ,ຖ້າຫາກປຸກລະດົມຄວາມຫ້າວຫັນຂອງຊາວໜຸ່ມເຫຼົ່ານີ້ໄດ້,ຈະເຮັດໃຫ້ເຂດຄຸ້ມມີຊີວິດຊີວາກວ່າເກົ່າ."
ເຂດຄຸ້ມຊີ່ໂລຢວນຍັງໄດ້ຈັດຊຸດອົບຣົມພາສາອັງກິດໃຫ້ຜູ້ເຖົ້າຜູ້ແກ່ຢູ່ເຂດຄຸ້ມຂອງຕົນ,ຄູສອນລ້ວນແຕ່ແມ່ນມາຈາກໂຮງຮຽນອ້ອມຂ້າງເຂດຄຸ້ມ,ພວກເພິ່ນສອນໄທເມືອງໂດຍບໍ່ເກັບຄ່າ,ໄດ້ຮັບຄວາມຊົມເຊີຍຈາກໄທເມືອງຫຼາຍ.ປະຈຸບັນ ຜູ້ທີ່ເຂົ້າຮ່ວມຊຸດຮຽນພາສາອັງກິດມີເຖິງ 600 ກວ່າຄົນ.ແມ່ປ້າເຊ້ຊູ່ຢ້ຽນ ທີ່ອາໄສຢູ່ເຂດຄຸ້ມຊີ່ໂລຢວນເຂດທີ 4 ,ປີນີ້ອາຍຸ 51 ປີແລ້ວ,ຕັ້ງແຕ່ເຂດຄຸ້ມຈັດຕັ້ງຊຸດຮຽນພາສາອັງກິດເມື່ອປີ 2002 ເປັນຕົ້ນມາ,ເພິ່ນກໍໄດ້ຍຶດໝັ້ນໄປຮຽນ,ຕັ້ງໜ້າເຮັດວຽກບ້ານຂອງຄູສອນ,ບໍ່ເຄີຍຂາດຮຽນຈັກເທື່ອ.ປະຈຸບັນ,ເພິ່ນສາມາດລົມກັບແຂກຕ່າງປະເທດດ້ວຍພາສາອັງກິດແບບງ່າຍໆແລ້ວ.ເມື່ອເວົ້າເຖິງການຮຽນພາສາອັງກິດ,ເພິ່ນເວົ້າວ່າ:
"ເຂົ້າຮ່ວມຊຸດຮຽນພາສາອັງກິດ ຕົ້ນຕໍແມ່ນຢາກເຮັດວຽກເລັກໆນ້ອຍໆໃຫ້ແກ່ສັງຄົມໃນຍາມງານກິລາໂອລິມປິກປີ 2008 ວຽນມາເຖິງ,ເຮັດໃຫ້ນັກກິລາຕ່າງປະເທດໄດ້ຮັບຄວາມເອົາໃຈໃສ່ເບິ່ງແຍງຄືກັນກັບໃນຄອບຄົວຂອງຕົນ,ທັງເຮັດໃຫ້ປະຊາຊົນໃນໂລກຮູ້ວ່າ ຈີນແມ່ນປະເທດທີ່ມີໄມຕີຈິດ."
ເຂດຄຸ້ມຊິ່ງຊິ່ງເຈ່ຍຢວນທີ່ຢູ່ພາກຕາເວັນອອກຂອງປັກກິ່ງ,ມີຕຶກເຮືອນຢູ່ 27 ຕຶກ,ມີປະຊາຊົນເກືອບ 2 ພັນຄອບຄົວ.ໃນເຂດຄຸ້ມ ມີສູນເຄື່ອນໄຫວ,ມີຫ້ອງອ່ານໜັງສື,ຢູ່ນອກຫ້ອງ ມີສະໜາມຫຼວງວັດທະນະທຳທີ່ກວ້າງ 2 ໝື່ນກິໂລແມັດມົນທົນ,ໄດ້ສະໜອງເວທີໃຫ້ແກ່ການເຄື່ອນໄຫວວັດທະນະທຳຂອງໄທເມືອງໃນເຂດຄຸ້ມ.ຄະນະກຳມະການເຂດຄຸ້ມໄດ້ຕັ້ງຫ້ອງສຳລັບຜູ້ມັກການຂຽນງາມຢູ່ຫ້ອງເຄື່ອນໄຫວຂອງເຂດຄຸ້ມ,ໄທເມືອງຢູ່ເຂດຄຸ້ມທີ່ມັກການຂຽນງາມສາມາດມາຫັດຂຽນຢູ່ແຫ່ງນີ້ທຸກມື້.ໃນວັນທຳມະດາ,ຜູ້ທີ່ມາຫຼິ້ນຢູ່ແຫ່ງນີ້ສ່ວນຫຼາຍແມ່ນຜູ້ເຖົ້າຜູ້ແກ່,ເມື່ອຮອດວັນສຸດສັບປະດາ,ຊາວໜຸ່ມແລະເດັກນ້ອຍຈຳນວນຫຼວງຫຼາຍກໍມັກມາຫຼິ້ນຢູ່ແຫ່ງນີ້. ລຸງອີເຕີລີ້ ຜູ້ເຖົ້າທີ່ມັກມາຫັດຂຽນງາມຢູ່ແຫ່ງນີ້ເລື້ອຍໆໄດ້ເວົ້າວ່າ:
"ຜູ້ເຖົ້າຜູ້ແກ່ຫັດຂຽນງານ,ຈະພາໃຫ້ທົ່ວຮ່າງກາຍໄດ້ຮັບການໜັງຕີງ,ທັງໄດ້ອອກກຳລັງກາຍ,ທັງໄດ້ຍົກສີມືຂຽນງາມໃຫ້ສູງຂຶ້ນ,ທັງໄດ້ຫຼໍ່ຫຼອມອາລົມຈິດ,ແມ່ນຮູບການດີທີ່ສຸດໃນການລື້ນເລີງແລະພັກຜ່ອນຢ່ອນອາລົມ."
ຢູ່ປັກກິ່ງ,ເຂດຄຸ້ມຄ້າຍຄືດັ່ງກ່າວນີ້ຍັງມີຫຼາຍໆແຫ່ງ,ລ້ວນແຕ່ໄດ້ຈັດການເຄື່ອນໄຫວວັດທະນະທຳດ້ວຍຫຼາຍຮູບຫຼາຍແບບ,ເພື່ອໃຫ້ຊີວິດວັດທະນະທຳຂອງໄທເມືອງອຸດົມສົມບູນຂຶ້ນ.
|
|
|
