|
|
 |
| (GMT+08:00)
2006-02-09 14:09:08
|
 |
|
ງານດົນຕີຮູບເງົາຂະໜາດໃຫຍ່ທີ່ລະລຶກຮູບເງົາຈີນກຳເນີດຄົບຮອບ100ປິ(ສຽງ)
cri
Author: shuo
|
ແຕ່ຮູບເງົາເລື່ອງທຳອິດຂອງຈີນກຳເນີດເກີດຂຶ້ນໃນປີ1905ຈົນຮອດປະຈຸບັນນີ້,ຮູບເງົາຂອງຈີນໄດ້ມີປະຫວັດຮ້ອຍປີແລ້ວ.ວັນທີ28ທັນວາປີ2005,ປັກກິ່ງໄດ້ຈັດງານດົນຕີຮູບເງົາຂະໜາດໃຫຍ່ທີ່ຊື່ວ່າ ຄວາມຝັນແຫ່ງສັດຕະວັດ,ລະລຶກຮູບເງົາຈີນກຳເນີດຄົບຮອບ 100ປີ.ໃນລາຍການພາກນີ້,ຂ້າພະເຈົ້າຈະຈັດເພງຮູບເງົາຫຼາຍເພງໃນງານດົນຕີຄັ້ງນີ້ສູ່ທ່ານຟັງ.
ງານດົນຕີ"ຄວາມຝັນແຫ່ງສັດຕະວັດ"ໄດ້ໃຊ້ຮູບການສິລະປະຕ່າງໆ ເຊັ່ນເພງຮູບເງົາ ດົນຕີ ການອ່ານກອນແລະຮູບການອື່ນມາສະແດງປະຫວັດສາດຮູບເງົາຈີນໃນຮ້ອຍປີມານີ້.ງານດົນຕີແບ່ງອອກເປັນສີ່ພາກ,ພາກທີໜຶ່ງເລີ່ມແຕ່ສະໄໝຮູບເງົາທີ່ບໍ່ມີສຽງຂອງຈີນ,ເຊິ່ງໄດ້ສ້າງຜົນສິລະປະອັນພິເສດທີ່ກະຕຸ້ນໃຈຄົນບົນເວທີການສະແດງ,ໂດຍຜ່ານຈາກການສາຍຮູບເງົາອັນລ້ຳຄ່າໃນໄລຍະຕົ້ນເປັນຈຳນວນຫຼວງຫຼາຍ,ແລະມີຄະນະດົນຕີເຄື່ອງສາຍແລະເຄື່ອງເປົ່າປະສານສຽງ.ທີ່ທ່ານພວມຟັງຢູ່ນີ້ແມ່ນເພງ wan li xun xiong ge"ຊອກຫາອ້າຍຢູ່ທາງໄກ"ທີ່ຂັບຮ້ອງໂດຍທ່ານລ້ຽວຊ່າງຢົງແລະນາງທານຈິ່ງ.ເພງນີ້ແມ່ນເພງ ສະຫຼັບໃນຮູບເງົາເລື່ອງye cao xian hua "ຫຍ້າແລະດອກໄມ້ປ່າ" ເຊິ່ງເປັນເພງສະຫຼັບຮູບເງົາເພງທຳອິດຂອງຈີນ.ເນື້ອເພງໂສກເສົ້າເຫງົາໃຈ,ທຳນອງອອນຊອນ,ມີສີສັນດົນຕີລັດເຊຍຢ່າງເຂັ້ມຂຸ້ນ.
"ເພງເດີນກອງທັບກ້າຫານ"ທີ່ສະແດງໃນພາກທີໜຶ່ງ,ແຕ່ງເນຶ້ອຮ້ອງໂດຍທ່ານທຽນຮ້ານແລະແຕ່ງທຳນອງໂດຍທ່ານເນ້ຍເອີ.ເພງນີ້ແມ່ນເພງເອກໃນຮູບເງົາເລື່ອງ "ລູກຫຼານຜູ້ພິລະອາດຫານ".ຮູບເງົາເລື່ອງນີ້ໄດ້ບັນລະຍາຍເລື່ອງ:ໃນຕົ້ນຊຸມປີ30ສັດຕະວັດແລ້ວນີ້,ປັນຍາຊົນຂອງຈີນທີ່ຖືທ່ານຊິ່ນໄປຮວາ ນັກກະວີເປັນຕົວແທນ,ປະລະຊີວິດປັນຍາຊົນ,ເຂົ້າຮ່ວມກອງທັບ,ມຸ່ງໄປສູ່ແນວໜ້າ,ຕໍ່ຕ້ານຍີ່ປຸ່ນເພື່ອກອບກູ້ປະເທດຊາດ.ເພງນີ້ໄດ້ສ້າງພາບພົດອັນເລິກເຊິ່ງທີ່ສຸດໃຫ້ຜູ້ຊົມທັງຫຼາຍ,ຈຶ່ງໄດ້ກາຍເປັນເພງຕໍ່ຕ້ານການຮຸກຮານຂອງຍີ່ປຸ່ນທີ່ມີຊື່ສຽງດົງດັງທີ່ສຸດຢູ່ຈີນ.ພາຍຫຼັງປະເທດຈີນໃໝ່ສ້າງຕັ້ງຂຶ້ນແລ້ວ,ໄດ້ກຳນົດເພງນີ້ເປັນເພງຊາດຈີນ.ໃນງານດົນຕີເທື່ອນີ້,ສິລະປິນຮູບເງົາຮຸ້ນອາວຸໂສ ຄື ທ່ານວາງທຽນຮວາ ທ່ານນາງເຊ້ຟ່າງແລະທ່ານເກີຊຸນຈ້ວງເປັນຕົ້ນໄດ້ຮ່ວມກັນຮ້ອງເພງນີ້,ແລ້ວໄດ້ຮັບຄວາມຊົມເຊີຍດ້ວຍສຽງຕົບມືອັນຟົດຟື້ນຂອງຜູ້ຊົມ.
ຊຸມປີ50,60ສະຕະວັດແລ້ວນີ້,ຮູບເງົາຂອງຈີນໄດ້ຂະຫຍາຍຕົວຢ່າງເປັນກະແສສູງ.ພາກທີສອງຂອງງານດົນຕີໄດ້ເລືອກເອົາເພງຮູບເງົາທີ່ໄດ້ຮັບຄວາມຊົມຊອບຈາກຜູ້ຊົມໃນໄລ ຍະນີ້,ເມື່ອໄດ້ຮຽບຮຽງໃໝ່ແລ້ວ,ໄດ້ນຳອອກສະເໜີຕໍ່ຜູ້ຊົມທັງຫຼາຍດ້ວຍຮູບການໃໝ່.
ເພງhong hu shui lang da lang "ນ້ຳໜອງຫົງຫູກະທົບກັນເປັນຟອງ"ແມ່ນເພງສະຫຼັບຂອງຮູບເງົາເລື່ອງhong hu chi wei dui "ກອງປ້ອງກັນແດງໜອງຫົງຫູ",ເພງນີ້ໄດ້ສັນລະເສີນບ້ານເກີດເມືອງນອນແລະພັກກອມມູນິດຈີນດ້ວຍອາລົມຈິດອັນເຂັ້ມຂຸ້ນແລະດ້ວຍທຳນອງທີ່ມ່ວນຊື່ນ ແຈ່ມໃສ.
ທ້າຍຊຸມປີ70ສັດຕະວັດແລ້ວນີ້,ຮູບເງົາຈີນໄດ້ກ້າວເຂົ້າສູ່ໄລຍະໃໝ່.ສິນລະປິນຈີນໄດ້ສ້າງຮູບເງົາປະເພດຕ່າງໆ ຄື ຮູບເງົາເລື່ອງປະຫວັດສາດສຳຄັນ ຮູບເງົາສ່ອງແສງຊີວິດການເປັນຢູ່ ຮູບເງົາລື້ນເລີງແລະຮູບເງົາຕ່າງປະເທດທີ່ພາກເປັນພາສາຈີນເປັນຕົ້ນ,ອັນໄດ້ມີສະພາບຈະເລີນຮຸ່ງເຮືອງຈໍ່ຕົວຂຶ້ນ ຄື ມີເນື້ອໃນແລະລັກສະນະຫຼາຍຢ່າງຫຼາຍແນວ.ພາກທີສາມຂອງງານດົນຕີໄດ້ບັນລະຍາຍຮູບເງົາສະໄໝປະຈຸບັນຂອງຈີນກ້າວໄປສູ່ຄວາມຈະເລີນຮຸ່ງເຮືອງ.
ທີ່ທ່ານພວມຟັງຢູ່ນີ້ແມ່ນເພງwo men de sheng huo chong man yang guang"ຊີວິດພວກເຮົາເຕັມໄປດ້ວຍແສງຕາເວັນ"ຂັບຮ້ອງໂດຍນັກສະແດງຮູບເງົາ6ຄົນ ເຊັ່ນນາງຈ່ຽງລີລີແລະນາງຈ່າງຈິ່ນລີງເປັນຕົ້ນ,ເພງນີ້ເປັນເພງສະຫຼັບໃນຮູບເງົາເລື່ອງtian mi de shi ye"ພາລະກິດທີ່ສຸກສຳລານ".ເພງນີ້ມີທຳນອງມ່ວນຊື່ນ,ແລະມີຈຸດພິເສດຂອງຊົນເຜົ່າສ່ວນໜ້ອຍຢ່າງເຂັ້ມຂຸ້ນ,ເຊິ່ງໄດ້ສະແດງໃຫ້ເຫັນໂສມໜ້າດ້ານຈິດໃຈທີ່ຂະຫຍັນຫ້າວຫັນຂອງຄົນທັງຫຼາຍ.ເນື້ອເພງຮ້ອງວ່າ:"ວຽກງານສຸກສຳລານຈັ່ງແມ່ນດີ,ເພງອ່ອນຫວານກໍຫຼາຍແທ້ໆ.ຄູ່ຮັກເກາະແຂນກັນກ້າວໄປໜ້າ,ຊີວິດພວກເຮົາເຕັມໄປດ້ວຍແສງຕາເວັນ."
ໃນພາກທີສີ່ຂອງງານດົນຕີ,ໄດ້ມີພາບທີ່ສະແດງໃຫ້ເຫັນຜົນສຳເລັດຂອງຮູບເງົາຈີນທີ່ ກ້າວໄປສູ່ໂລກແລະໄດ້ຮັບລາງວັນຫຼາຍເທື່ອໃນສາກົນ,ເພງຮູບເງົາທີ່ດີເດັ່ນຫຼາຍເພງໄດ້ຮັບຄວາມຊົມເຊີຍດ້ວຍສຽງຕົບມືເປັນເວລາຍາວນານຂອງຜູ້ຟັງ.
ຮູບເງົາເລື່ອງhong gao liang "ເຂົ້າຝ້າງແດງ"ແມ່ນຮູບເງົາເລື່ອງທຳອິດຂອງທ່ານຈ່າງອີ້ໂມ ຜູ້ກຳກັບການສະແດງຮູບເງົາທີ່ມີຊື່ສຽງດົງດັງຂອງຈີນ,ໃນງານຮູບເງົາສາກົນແບກແລງປີ1988,ຮູບເງົາເລື່ອງນີ້ໄດ້ຮັບລາງວັນໝີຄຳ,ເຊິ່ງເປັນຮູບເງົາຈີນເລື່ອງທຳອິດທີ່ໄດ້ຮັບລາງວັນໃນງານຮູບເງົາຝ່າຍຕາເວັນຕົກ.ເພງmei mei ni da dan di wang qian zou "ນ້ອງສາວ,ເຈົ້າຈົ່ງກ້າວໄປໜ້າຢ່າງກ້າຫານ" ເພງສະຫຼັບໃນຮູບເງົາເລື່ອງນີ້ມີເນື້ອຮ້ອງເວົ້າແບບຊື່ກົງ,ທຳນອງມີຈຸດພິເສດຂອງເພງພື້ນເມືອງພາກຕາເວັນຕົກສຽງເໜືອຂອງຈີນ,ເຕັມໄປດ້ວຍອາລົມທີ່ອົງອາດສະຫງ່າ.ຕໍ່ໄປເຊີນຟັງເພງ mei mei ni da dan di wang qian zou"ນ້ອງສາວ,ເຈົ້າຈົ່ງກ້າວໄປໜ້າຢ່າງກ້າຫານ"ທີ່ຂັບຮ້ອງໂດຍທ່ານອູຈຸ່ນ.
ໃນພາກສຸດທ້າຍຂອງງານດົນຕີ,ທ່ານໄຕ້ຢູ້ຊຽງແລະນາງວາງລີ້ໄດ້ຮ່ວມກັນຮ້ອງເພງ wu jin de ai"ຄວາມຮັກທີ່ບໍ່ມີວັນສຸດສ້ຽງ",ນີ້ແມ່ນເພງສະຫຼັບຂອງຮູບເງົາເລື່ອງshen hua "ເທບນິຍາຍ"ເຊິ່ງຫາກໍນຳອອກສາຍຢູ່ຈີນໃນຫວ່າງກ່ອນນີ້ບໍ່ດົນ.ໃນທ່າມກາງສຽງເພງຂອງທ່ານໄຕ້ຢູ້ຊຽງແລະນາງວາງລີ້,ງານດົນຕີຄວາມຝັນແຫ່ງສັດຕະວັດໄດ້ປິດສາກໃນບັນຍາກາດທີ່ຟົດຟຶ້ນທີ່ມຸ່ງໝາຍອີກຮ້ອຍປີຂອງຮູບເງົາຈີນ.
|
|
|
