|
ຕົ້ນປີນີ້,ບໍລິສັດທ່ອງທ່ຽວຈີນໄດ້ປະກາດລາຍການທ່ອງທ່ຽວປີນີ້ຄືດັ່ງລຸ່ມນີ້:"ຊົນນະບົດໃໝ່,ທ່ອງທ່ຽວໃໝ,ສຳຜັດໃໝ່,ຄວາມນິຍົມໃໝ່".
ທ່ຽວຊົນນະບົດ,ກໍແມ່ນຈັດລາຍການທ່ອງທ່ຽວທີ່ຖືເຂດຊົນນະບົດເປັນຈຸດໝາຍປາຍທາງ,ແຕ່ຫາກບໍ່ພຽງແຕ່ໄປຊົນນະບົດຈີນຊື່ໆ.
ໃຜໆກໍຮູ້ແລ້ວວ່າ,ຈີນແມ່ນປະເທດອາລະຍະທຳບູຮານທີ່ມີປະຫວັດ 5 ພັນປີ,ທີ່ຈິງແລ້ວ,ປະຫວັດອັນເກົ່າແກ່ນີ້ກໍແມ່ນປະຫວັດວິວັດທະນາການແຫ່ງອາລະຍະທຳກະສິກຳ.ວັດທະນະທຳມູນເຊື້ອຂອງຈີນມີພື້ນຖານອັນໜາແໜ້ນໃນເຂດຊົນນະບົດ,ເມື່ອທຽບກັບຕົວເມືອງແລ້ວ,ຊົນນະບົດຖືກອາລະຍະທຳສະໄໝປະຈຸບັນກະໜ່ຳຈໜ້ອຍ,ດັ່ງນັ້ນ,ວັດທະນະທຳມູນເຊື້ອຈຶ່ງໄດ້ຖືກຮັກສາໄວ້ຫຼາຍກວ່າ.
ໃນເຂດຊົນນະບົດຫຼາຍແຫ່ງ,ບໍ່ວ່າຈະແມ່ນຮີດຄອງປະເພນີ,ຫຼືແມ່ນສິລະປະພື້ນເມືອງຄືງີ້ວດັ້ງເດີມແລະເພງພື້ນເມືອງ,ຫຼືໝູ່ບ້ານ ເຮືອນຢູ່ປະຊາຊົນແລະວັດວາອາຮາມທີ່ມີໂສມໜ້າບູຮານນັ້ນ,ລ້ວນແຕ່ຖືກປົກປັກຮັກສາໄວ້ຂ້ອນຂ້າງດີ.ໄປທ່ຽວເຂດຊົນນະບົດທີ່ມີຈຸດພິເສດດັ່ງກ່າວ,ອາດເວົ້າໄດ້ວ່າແມ່ນລາຍການທີ່ແຂກທ່ອງທ່ຽວຕ່າງປະເທດຮູ້ຈັກສະພາບຂອງຈີນຢ່າງເລິກເຊິ່ງ.
ທ່ານຜູ້ຟັງ,ທີ່ທ່ານພວມຟັງຢູ່ນີ້ແມ່ນງີ້ວຈີ້ງ ງີ້ວທ້ອງຖິ່ນຂອງຈີນ.ງີ້ວຈີ້ງມີປະຫວັດ 300 ກວ່າປີແລ້ວ,ຊຶ່ງມີປະຫວັດດົນກວ່າງີ້ວປັກກິ່ງທີ່ມີຊື່ສຽງ.ງີ້ວຈິ້ງມີຊື່ລືນາມຍ້ອນສຽງຮ້ອງດັງແລະໄວ,ຈິ້ງແມ່ນຊື່ຫຍໍ້ຂອງແຂວງຊ່ານຊີ່,ເປັນບ່ອນກຳເນີດແລະເຜີຍແຜ່,ສະນັ້ນ ເອົາຄຳວ່າ"ຈິ້ງ"ເປັນຊື່ຂອງງີ້ວນີ້.
 ປະຈຸບັນ,ງີ້ວຈີ້ງຍັງເຜີຍແຜ່ຢ່າງກວ້າງຂວາງຢູ່ເຂດຊົນນະບົດແຂວງຊ່ານຊີ່,ແມ່ນລາຍການບັນເທີງຂອງປວງຊົນທີ່ຂາດເຂີນບໍ່ໄດ້ໃນວັນພັກວັນບຸນ.ແຂວງຊ່ານຊີ່ບໍ່ພຽງແຕ່ມີງີ້ວຈີ້ງທໍ່ນັ້ນ,ຍັງມີບ້ານຂອງພໍ່ຄ້າເສດຖີສະໄໝບູຮານກໍມີຊື່ສຽງດົ່ງດັງຫຼາຍ,ເຊັ່ນ:ບ້ານວົງຕະກຸນຊຽວກໍແມ່ນແຫ່ງໜຶ່ງ.ໃນຊຸມປີ 90 ສັດຕະວັດທີແລ້ວ,ທ່ານຈັ່ງອີ້ໂມວ ນັກກຳກັບການສະແດງໄດ້ຖ່າຍຮູບເງົາ"ໂຄມລະຍ້າສີແດງ"ຢູ່ບ້ານນີ້,ຮູບເງົານີ້ໄດ້ຮັບຄວາມຍ້ອງຍໍຢ່າງກວ້າງຂວາງໃນສາກົນ.
ຕົ້ນປີນີ້,ນັກຂ່າວຕັ້ງໄປຢາມບ້ານວົງຕະກຸນຊຽວ.ຜູ້ທີ່ໄປຮອດໃນມື້ດຽວກັນນັ້ນ ນອກຈາກນັກຂ່າວແລ້ວ ຍັງມີແຂກທ່ອງທ່ຽວຈີນແລະຕ່າງປະເທດ 500 ກວ່າຄົນ. ແຂກທ່ອງທ່ຽວຊອກຫາເລື່ອງອັດສະຈັນທີ່ເຄີຍເກີດຂຶ້ນຢູ່ໃນບ້ານນີ້,ພ້ອມກັນນັ້ນ ລາຍການທີ່ສ່ອງແສງຮີດຄອງປະເພນີແລະງີ້ວທ້ອງຖິ່ນພວມສະແດງຢູ່ແຫ່ງນີ້ທັງໄດ້ດູດດຶງແຂກທ່ອງທ່ຽວຢ່າງເລິກເຊິ່ງ.
ທ່ານມາເຊີ້ງ ຜູ້ນຳທ່ຽວແຫ່ງນັ້ນມີຄວາມເຊື່ອໝັ້ນທີ່ສຸດຕໍ່ການທ່ອງທ່ຽວຊົນນະບົດຢູ່ແຂວງຊ່ານຊີ່,ທ່ານເວົ້າຕໍ່ນັກຂ່າວວ່າ:
"ວັດທະນະທຳຊົນນະບົດຂອງແຂວງຊ່ານຊີ່ມີພື້ນຖານອັນໜາແໜ້ນ,ມັນບໍ່ພຽງແຕ່ໄດ້ມີຮີດຄອງປະເພນີ ງີ້ວ ແລະການຟ້ອນລຳຫຼາຍຮູບຫຼາຍແບບທໍ່ນັ້ນ,ຂ້າພະເຈົ້າຄຶດວ່າ ບ້ານຊົນນະບົດເກົ່າແກ່ ເຮືອນຢູ່ປະຊາຊົນເກົ່າແກ່ແລະພາບວິວທິວທັດກໍມີໂສມໜ້າພິເສດແລະມີເນື້ອໃນອຸດົມສົມບູນ."
ຢູ່ຈີນ,ເຂດທີ່ມີຊັບພະຍາກອນທ່ອງທ່ຽວຊົນນະບົດເໝືອນແຂວງຊ່ານຊີ່ນັ້ນຍັງມີຫຼາຍແຫ່ງ.ຢູ່ລ້ອງແມ່ນ້ຳຢາງເຊພາກໃຕ້ຂອງຈີນ,ເມືອງອີຊ່າງໄດ້ກາຍເປັນເຂດທ່ອງທ່ຽວຈຸດຮ້ອນ ຍ້ອນໄດ້ສ້າງເຂື່ອນຊ່ານເຊຍ ຊຶ່ງເປັນກິດຈະການຊຸມຊົນລະປະທານຂະໜາດໃຫຍ່,ໃນຫຼາຍປີມານີ້,ເສັ້ນທາງທ່ອງທ່ຽວຊ່ານເຊຍໄດ້ມີລາຍການໃໝ່ທີ່ສຳຜັດຮີດຄອງປະເພນີແລະຊົມທິວທັດໄຮ່ສວນທົ່ງນາ,ແລ້ວຈໍ່ຕົວຂຶ້ນເປັນເຂດທ່ອງທ່ຽວແລະພັກຜ່ອນທີ່ຖືການທ່ອງທ່ຽວຊົນນະບົດເປັນລາຍການຕົ້ນຕໍຢູ່ເຂດອ້ອມແອ້ມເຂື່ອນຊ່ານເຊຍ,ປີກາຍນີ້ໄດ້ຮັບຕ້ອນແຂກທ່ອງທ່ຽວຫຼາຍກວ່າ 1 ລ້ານເທື່ອຄົນ.
ພ້ອມກັນນັ້ນ,ຮີດຄອງປະເພນີຊົນເຜົ່າສ່ວນໜ້ອຍແລະພາບວິວທິວທັດທຳມະຊາດໃນຊົນນະບົດ,ກໍແມ່ນຈຸດຮ້ອນຈຸດໜຶ່ງໃນການທ່ອງທ່ຽວຊົນນະບົດ.ໃນເວລາຍາວນານມານີ້,ເຂດຕິເບດ ແຂວງກຸ້ຍໂຈ່ວແລະແຂວງຢຸນນານທີ່ມີປະເພນີຊົນເຜົ່າອັນເຂັ້ມຂຸ້ນແລະທິວທັດທຳມະຊາດທີ່ສວຍງາມອັດສະຈັນຢູ່ພາກຕາເວັນຕົກສຽງໃຕ້ຂອງຈີນແມ່ນຈຸດຮ້ອນຂອງການທ່ອງທ່ຽວໂດຍຕະຫຼອດ.ແຂກທ່ອງທ່ຽວນິຍົມໄປທ່ຽວເສັ້ນທາງນີ້ຢ່າງບໍ່ຂາດສາຍ,ປັດໄຈຕົ້ນຕໍອັນໜຶ່ງກໍແມ່ນຊົນນະບົດ.ໃນຫຼາຍປີມານີ້,ເຂດພາກເໜືອຂອງຈີນ,ແມ່ນຖືການທ່ອງທ່ຽວທົ່ງຫຍ້າ ທະເລຊາຍເປັນລາຍການຕົ້ນຕໍ,ທັງໄດ້ຮັບຄວາມມັກຂອງແຂກທ່ອງທ່ຽວ.
ໃນເວລາເວົ້າເຖິງພາບອະນາຄົດຂອງການທ່ອງທ່ຽວຊົນນະບົດ,ທ່ານຈ້າວຈິນລົງ ຜູ້ອຳນວຍການພະແນກຕະຫຼາດບໍລິສັດຈີນຄ່າງຫຸ່ຍທ່ອງທ່ຽວຄາດຄະເນວ່າ:
"ການທ່ອງທ່ຽວຊົນນະບົດຈະມີເນື້ອໃນວັດທະນະທຳ ປະຫວັດສາດແລະທິວທັດທຳມະຊາດເປັນຕົ້ນ,ດັ່ງນັ້ນ ໄປທ່ຽວແຫ່ງໜຶ່ງຈະໄດ້ຫຼາຍເນື້ອໃນ.ປີ 2006,ບໍລິສັດທ່ອງທ່ຽວຈະຕັ້ງເສັ້ນທາງທ່ອງທ່ຽວຊົນນະບົດໂດຍໝູນອ້ອມປະເພນີບ້ານຊົນນະບົດແລະໜີດຄອງປະເພນີຊົນເຜົ່າສ່ວນໜ້ອຍ,ແຂວງຢຸນນານແລະແຂວງກຸ້ຍໂຈ່ວຢູ່ເຂດພາກຕາເວັນຕົກມີຖານະສຳຄັນຄືເກົ່າ,ແຕ່ເຂດຊິນຈ່ຽງ ເຂດມົງໂກໃນແລະເຂດຕິເບດເປັນຕົ້ນ,ຈະນັບມື້ນັບໄດ້ຮັບຄວາມສົນໃຈຈາກປະຊາຊົນສົນຍ້ອນເປັນແຫຼ່ງທ່ອງທ່ຽວໃໝ່."
ການທ່ອງທ່ຽວຊົນນະບົດນອກຈາກຈະນຳເອົາຄວາມອັດສະຈັນສູ່ຄົນແລ້ວ,ຍັງອີກອັນໜຶ່ງກໍແມ່ນແຂກທ່ອງທ່ຽວສາມາດພັກຜ່ອນຢ່ອນອາລົມໄດ້.ໄປພັກຢູ່ເຂດຊົນນະບົດຊານເມືອງໃຫຍ່ບໍ່ເທົ່າໃດມື້,ເຖິງວ່າບໍ່ມີແຫ່ງທ່ອງທ່ຽວທີ່ມີຊື່ສຽງເປັນໜ້າທ່ຽວໄດ້,ແຕ່ວ່າຢູ່ແຫ່ງນັ້ນມີອາກາດສົດໄສ,ໄປກິນອາຫານຊາວໄຮ່ຊາວນາ,ຫຼືໄປເກັບຜັກແລະໝາກໄມ້ທີ່ບໍ່ເຄີຍເຮັດຈັກເທື່ອ,ໄດ້ກາຍເປັນການເລືອກເອົາຊະນິດໜຶ່ງຂອງໄທເມືອງໃຫຍ່ໃນເວລາພັກວັນສິ້ນສັບປະດາ.ສ່ວນການທ່ອງທ່ຽວສຳຜັດຊີວິດຊາວກະສິກອນ ຊຶ່ງຖື"ການພັກແຮມຢູ່ເຮືອນຊາວກະສິກອນ,ກິນເຂົ້າຂອງຊາວກະສິກອນ,ແລະເຮັດວຽກສວນການນາ"ເປັນລາຍການຕົ້ນຕໍນັ້ນ,ໄດ້ກາຍເປັນຄວາມນິຍົມໃໝ່ຊະນິດໜຶ່ງແລ້ວ.
|
