|
ທ່ານຜູ້ຟັງທີ່ໂຄລົບ,ຊົມເຊີຍທ່ານຮັບຟັງລາຍການວັດທະນະທຳຈີນ.ເມື່ອຮອດວັນບຸນປະເພນີຂອງຈີນເທື່ອໃດ,ທ່ານສາດສະດາຈານທາວລີ້ຟານກໍ່ຂຸ້ນນຳວຽກຫຼາຍທີ່ສຸດ.ໃນຖານເປັນຮອງຫົວໜ້າສະມາຄົມວິທະຍາຮີດຄອງປະເພນີຊົນເຜົ່າຂອງຈີນ,ມີນັກຂ່າວສື່ມວນຊົນຢ່າງຫຼວງຫຼາຍຫວັງຢ່າກສຳພາດທ່ານ,ຂໍໃຫ້ທ່ານລົມເລື່ອງກ່ຽວກັບວັດທະນະທຳນັກສັດ,ວັດທະນະທຳຮີດຄອງປະເພນີບຸນກຸດຈີນເປັນຕົ້ນ.ໃນລາຍການພາກນີ້,ຂ້າພະເຈົ້າຈະແນະນຳນັກປາດທີ່ມີຊື່ສຽງຜູ້ນີ້ສູ່ທ່ານຟັງ.
ຮີດຄອງປະເພນີຊົນເຜົ່າແມ່ນຄວາມຊົງຈໍາດ້ານວັດທະນະທຳຂອງຊົນເຜົ່າໃດໜຶ່ງ.ຄ່ຽງຄູ່ກັບການພັດທະນາຂອງເສດຖະກິດຈີນ,ຄົນທັງຫຼາຍນັບມື້ນັບເອົາໃຈໃສ່ນຳວັດທະນະທຳຮີດຄອງປະເພນີຊົນເຜົ່າ,ຕໍ່ເລື່ອງນີ້,ທ່ານທາວລີ້ຟານຮູ້ສຶກດີໃຈຫຼາຍ.ທ່ານທາວລີ້ຟານເກີດຢູ່ນະຄອນລານໂຈ່ວ ແຂວງການຊູ້ໃນປີ1938,ພາຍຫຼັງທ່ານຮຽນຈົບຈາກມະຫາວິທະຍາໄລສ້າງຄູປັກກິ່ງແລ້ວ,ໄດ້ເປັນອາຈານໃນມະຫາວິທະຍາໄລຊົນເຜົ່າສູນກາງຈີນ,ມີຊື່ສຽງດົ່ງດັງດ້ວຍການຄົ້ນຄວ້າທິດສະດີພື້ນຖານຂອງວິທະຍາຮີດຄອງປະເພນີຊົນເຜົ່າແລະວັນນະຄະດີພື້ນເມືອງຂອງຊົນເຜົ່າສ່ວນໜ້ອຍ.ປະຈຸບັນ,ທ່ານທາວລີ້ຟານເປັນປະທານສະມາຄົມວິທະຍາຮີດຄອງປະເພນີຊົນເຜົ່າອາຊີສາກົນ,ຮອງປະທານຂອງສະມາຄົມວິທະຍາຮີດຄອງປະເພນີຊົນເຜົ່າຈີນເປັນຕົ້ນ.
ໃນຖານເປັນນັກປາດວິທະຍາສາດຮີດຄອງປະເພນີຊົນເຜົ່າ,ທ່ານທາວລີ້ຟານເຕັມໄປດ້ວຍຄວາມຮັກແພງອັນເລິກເຊິ່ງຕໍ່ວັດທະນະທຳດັ້ງເດີມຂອງຈີນ.ໃນຊີວິດຄົ້ນຄວ້າແລະສິດສອນເປັນເວລາ40ກວ່າປີ,ທ່ານໄປສຳຫຼວດແລະຊອກຮູ້ສະພາບສືບທອດແລະຜັນປ່ຽນຂອງຮີດຄອງປະເພນີຊົນເຜົ່າຢູ່ເຂດຊົນເຜົ່າສ່ວນໜ້ອຍຕັ້ງຫຼາຍເທື່ອ.ທ່ານທາວລີ້ຟານເວົ້າວ່າ:
"ໃນຖານເປັນນັກປາດ,ການຊອກຮູ້ປະເພນີຂອງພວກເຮົານັ້ນແມ່ນສຳຄັນທີ່ສຸດ.ຂ້າພະເຈົ້າໄດ້ສຳຜັດຊົນເຜົ່າສ່ວນໜ້ອຍຢ່າງຫຼວງຫຼາຍ,ໄປສຳຫຼວດຢູ່ເຂດຊົນເຜົ່າສ່ວນໜ້ອຍຫຼາຍແຫ່ງ.ໃນດ້ານສຳຫຼວດພາກສະໜາມແລະອະນຸລັກນັ້ນມີວຽກເຮັດຢ່າງຫຼວງຫຼາຍ,ຍ້ອນວ່າວັດທະນະທຳຢ່າງຫຼວງຫຼາຍສາມາດຮັກສາມາຮອດປະຈຸບັນນີ້ແມ່ນຍ້ອນມະມວນຊົນອະນຸລັກໄວ້.ຕົວຢ່າງຄືວັດທະນະທຳຂອງໝູ່ບ້ານແຫ່ງໜຶ່ງຕ້ອງອາໄສໝູ່ບ້ານມາອະນຸລັກໄວ້,ຄວາມຊົງຈຳຊະນິດໜຶ່ງຕ້ອງການຂອງຜູ້ສືບທອດເອງມາອະນຸລັກໄວ້."
ເພື່ອເຜີຍແບກົດເກນໃນການພັດທະນາແລະປ່ຽນແປງຂອງຮີດຄອງປະເພນີຊົນເຜົ່າແລະວັນນະຄະດີພື້ນເມືອງ,ທ່ານທາວລີ້ຟານໄດ້ເສຍກຳລັງວັງຊາຢ່າງຫຼວງຫຼາຍໃນການຄົ້ນຄວ້າ,ປະຈຸບັນໄດ້ພິມຈຳໜ່າຍບົດນິພົນ20ກວ່າຊະນິດແລ້ວ.ທ່ານໄດ້ໄປບັນລະຍາຍແລະສຳຫຼວດກັບບ່ອນຢູ່ປະເທດອາຊີອາຄະເນຕັ້ງຫຼາຍເທື່ອ.ປີ1996,ທ່ານທາວລີ້ຟານໄດ້ວາງແຜນຈັດກອງປະຊຸມສຳມະນາວິຊາການສາກົນກ່ຽວກັບວັດທະນະທຳຮີດຄອງປະເພນີຊົນເຜົ່າຂອງອາຊີຕາເວັນອອກ,ໄດ້ລິເລີ່ມຕັ້ງສະມາຄົມວິທະຍາຮີດຄອງປະເພນີຊົນເຜົ່າອາຊີສາກົນແລະຮັບຕໍ່າແໜ່ງເປັນປະທານ.ທ່ານເວົ້າວ່າ:
"ໂດຍຜ່ານຈາກສະມາຄົມວິທະຍາຮີດຄອງປະເພນີຊົນເຜົ່າອາຊີສາກົນ,ພວກເຮົາໄດ້ກ່າຍຂົວແລກປ່ຽນຂຶ້ນ,ມີບົດບາດດີຫຼາຍຕໍ່ການຊຸກຍູ້ການຄົ້ນຄວ້າວິທະຍາສາດຮີດຄອງປະເພນີຊົນເຜົາອາຊີແລະຊອກຮູ້ບັນດາປະເທດ."
ທ່ານທາວລີ້ຟານເວົ້າວ່າ,ຊົນເຜົ່າອາຊີມີຮີດຄອງປະເພນີຄ້າຍໆກັນຫຼາຍ,ທ່ານຫວັງວ່າໂດຍຜ່ານຈາກຄວາມພະຍາຍາມຂອງນັກປາດວິທະຍາຮີດຄອງປະເພນີຊົນເຜົ່າທັງຫຼາຍ,ເສີມຂະຫຍາຍບົດບາດສາຍພານແລະລຸໂລ່ງກັນຂອງຮີດຄອງປະເພນີເຫຼົ່ານີ້,ເພີ່ມທະວີຄວາມເຂົ້າໃຈແລະມິດຕະພາບລະຫວ່າງປະຊາຊົນຊົນເຜົ່າຕ່າງໆ.ນັບຮອດປະຈຸບັນ,ສະມາຄົມ ວິທະຍາຮີດຄອງປະເພນີຊົນເຜົ່າອາຊີໄດ້ຈັດກອງປະຊຸມວິຊາການ8ຄັ້ງແລ້ວ,ກອງປະຊຸມແຕ່ລະຄັ້ງລ້ວນແຕ່ໄດ້ພິມຈຳໜ່າຍຊຸມນຸມບົດປະພັນວິຊາການສະເພາະ,ໄດ້ຊຸກຍູ້ການແລກປ່ຽນແລະການຄົ້ນຄວ້າວິທະຍາຮີດຄອງປະເພນີຊົນເຜົ່າລະຫວ່າງປະເທດອາຊີຢ່າງຫຼວງຫຼາຍ.
ເສດຖະກິດຈີນພວມພັດທະນາຢ່າງວ່ອງໄວ,ອົງປະກອບສັງຄົມດັ້ງເດີມຖືກກະທົບຢ່າງໃຫຍ່ຫຼວງ.ທ່ານທາວລີ້ຟານວິຕົກກັງວົນຫຼາຍນຳຂະບວນການຫັນເປັນທັນສະໄໝທີ່ນັບມື້ນັບມີຄວາມຄືບໜ້າ.ທ່ານຍົກຕົວຢ່າງມາເວົ້າວ່າ,ຄົນທັງຫຼາຍຢູ່ເຂດພັດທະນາມັກມີຄວາມເຂົ້າໃຈຜິດຊະນິດໜຶ່ງ,ເຫັນວ່າຊີວິດການເປັນຢູ່ຂອງຄົນທັງຫຼາຍທີ່ວັດຖຸບໍ່ພັດທະນານັ້ນແມ່ນບໍ່ມ່ວນຊື່ນ.ທີ່ຈິງແລ້ວ,ຄົນຢູ່ຕົວເມືອງໃຫຍ່ກໍບໍ່ຮູ້ສຶກມີຄວາມສຸກກວ່າຄົນຢູ່ໃນບ້ານອັດຕັນ.ທ່ານເວົ້າວ່າ:
"ໃນຖານເປັນນັກປາດວິທະຍາຮີດຄອງປະເພນີຊົນເຜົ່າ,ຈຸດທີ່ສຳຄັນທີ່ສຸດແມ່ນຕ້ອງມີຄວາມຮັກແພງ.ຄວນເຫັນວ່າ,ເຖິງແມ່ນວ່າບາງບ່ອນຂອງຊົນເຜົ່າສ່ວນໜ້ອຍແມ່ນກວງໄກແລະອັດຕັນທີ່ສຸດກໍ່ຕາມ,ແຕ່ເວົ້າໃນດ້ານສິ່ງແວດລ້ອມດຳລົງຊີວິດຂອງພວກເພິ່ນແລ້ວ,ເຖິງວ່າລຳບາກຫຼາຍ,ແຕ່ພວກເພິ່ນມີວັດທະນະທຳທີ່ພວກເພິ່ນປະດິດສ້າງເອງ,ຊີວິດການເປັນຢູ່ຂອງພວກເພິ່ນແມ່ນມ່ວນຊື່ນທີ່ສຸດ.ນີ້ແມ່ນພວກເຮົາຄວນເອົາໃຈໃສ່.ໂດຍຜ່ານຈາກກຳລັງຂອງພວກເຮົາ,ແນະນຳວັດທະນະທຳຂອງພວກເພິ່ນໃຫ້ຊົນເຜົ່າອື່ນໆ,ນີ້ກໍ່ແມ່ນໜ້າທີ່ອັນສຳຄັນອັນໜຶ່ງ."
ປີ1999,ທ່ານທາວລີ້ຟານພ້ອມກັບທ່ານເຊີນໄພ້ຊື່ ສີລະປິນດ້ານການສະແດງທີ່ມີຊື່ສຽງໄດ້ຮ່ວມກັນລິເລີ່ມແລະສ້າງເວບໄຊ້ທີ່ມີຊື່ວ່າ"ຮີດຄອງປະເພນີຊົນເຜົ່າຂອງຈີນ"ແລະເປັນພິທີກອນຜູ້ທຳອິດຂອງເວບໄຊ້ດັ່ງກ່າວ.ປະຈຸບັນ,ເວບໄຊ້ນີ້ໄດ້ກາຍເປັນປ່ອງຢ້ຽມອັນສຳຄັນຂອງວິທະຍາຮີດຄອງປະເພນີຊົນເຜົ່າຈີນແລ້ວ.
ທ່ານທາວລີ້ຟານແມ່ນບຸກຄົນວັດທະນະທຳຈີນທີ່ມີມູນເຊື້ອ,ຮັກແພງວັດທະນະທຳດັ້ງເດີມຂອງຈີນ,ທ່ານໄດ້ທຸ່ມເທຄວາມຈູບຈ້າວອັນໃຫຍ່ຫຼວງໃນຂົງເຂດປະຫວັດສາດ,ວັນນະຄະດີ,ຮີດຄອງປະເພນີຊົນເຜົ່າ,ການຂຽນງາມແລະຮູບແຕ້ມຂອງຈີນເປັນຕົ້ນ.ທ່ານທາວລີ້ຟານເວົ້າວ່າ,ການຮໍ່າຮຽນແລະສືບທອດສິ່ງໃດລ້ວນແຕ່ຄວນແມ່ນສັດຈະວິພາກແລະພາວະວິໄສ,ຍ້ອນວ່າໃນວັດທະນະທຳດັ້ງເດີມຂອງຈີນກໍ່ມີສິ່ງຫຼ້າຫຼັງຈົນກະທັ້ງບໍ່ດີຈຳນວນໜຶ່ງ,ການຮໍ່າຮຽນແລະສືບທອດວັດທະນະທຳດັ້ງເດີມຂອງຈີນ,ມີແຕ່ເດັດເອົາແຕ່ສິ່ງທີ່ດີ,ປະຖິ້ມສິ່ງທີ່ບໍ່ດີຂອງມັນເທົ່ານັ້ນຈຶ່ງສາມາດເຮັດໃຫ້ມັນໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ.
|
