|
|
 |
| (GMT+08:00)
2006-02-21 15:35:47
|
 |
|
ໄປສະນີດ່ວນພິເສດຂອງຈີນໄດ້ພັດທະນາຢ່າງບໍ່ຢຸດຢັ້ງ(ສຽງ)
cri
Author: min
|
ຄຽງຄູ່ກັບເສດຖະກິດພາຍໃນປະເທດແລະການຄ້າກັບຕ່າງປະເທດຂອງຈີນໄດ້ມີການພັດທະນາຢ່າງວ່ອງໄວ, ໄປສະນີດ່ວນພິເສດຂອງຈີນກໍ່ໄດ້ມີການພັດທະນາຢ່າງວ່ອງໄວ. ດຽວນີ້, ຈີນໄດ້ມີບໍລິສັດໄປສະນີດ່ວນພິເສດປະເພດຕ່າງໆຫຼາຍແສນແຫ່ງ. ບຸກຄົນໃນຂະແໜງການນີ້ກ່າວວ່າ, ພາຍຫຼັງບໍລິສັດໄປສະນີດ່ວນພິເສດຕ່າງປະເທດໄດ້ເຂົ້າຕະຫຼາດໄປສະນີດ່ວນພິເສດຂອງຈີນແລ້ວ, ວິສາຫະກິດໄປສະນີດ່ວນພິເສດພາຍໃນປະເທດຈຳເປັນຕ້ອງຍົກສູງຄຸນນະ ພາບບໍລິການຕື່ມອີກ, ຊອກຫາການຊົງຕົວແລະການພັດທະນາໃນການແຂ່ງຂັນແລະຮ່ວມມືກັບບໍລິສັດຕ່າງປະເທດ. ໃນລາຍການແຈ້ງຂ່າວເສດຖະກິດຈີນພາກນີ້, ເຊີນທ່ານຟັງບົດແຈ້ງຂ່າວທີ່ພາດຫົວເລື່ອງວ່າ "ໄປສະນີດ່ວນພິເສດຈີນໄດ້ພັດທະນາຢ່າງບໍ່ຢຸດຢັ້ງ".
ທ່ານຈິ່ນຊຸ່ນເປັນປະທານບໍລິສັດເມີຍຢ້າຊຽງໄຮ້ໄປສະນີດ່ວນພິເສດ ເຊິ່ງເປັນບໍລິສັດໄປສະນີດ່ວນພິເສດຂອງເອກະຊົນ. ຫຼາຍປີກ່ອນ, ຍ້ອນຄວາມພາດພັ້ງຂອງບໍລິສັດໄປສະນີດ່ວນພິເສດແຫ່ງໜຶ່ງໄດ້ເຮັດໃຫ້ບໍລິສັດອາພອນຂອງເພິ່ນ ເສຍຫາຍໜຶ່ງແສນໂດລາ, ນີ້ກະຕຸກຊຸກຍູ້ທ່ານຈິ່ນຊຸ່ນຕົກລົງເປີດບໍລິສັດໄປສະນີດ່ວນພິເສດແຫ່ງໜຶ່ງຂອງຕົນ. ໃນຖານເປັນວິສາຫະກິດໃໝ່, ແນ່ນອນແລ້ວ, ບໍລິສັດໄປສະນີດ່ວນພິເສດເມີຍຢ້າບໍ່ມີຄວາມສາມາດທ້າທາຍກັບບໍລິສັດໄປສະນີດ່ວນພິເສດໃຫຍ່ຕ່າງປະເທດ, ແຕ່ບໍລິສັດໄປສະນີດ່ວນພິເສດນ້ອຍໃຫຍ່ໄດ້ແຂ່ງຂັນກັນຢູ່ຕະຫຼາດພາຍໃນປະເທດມາຫຼາຍປີ, ຊ່ອງຫວ່າງກໍບໍ່ກວ້າງປານໃດ. ຫຼັງຈາກໄດ້ພິຈາລະນາຢ່າງຮອບຄອບແລ້ວ, ທ່ານຈິ່ນຊຸ່ນໄດ້ກຳນົດຂອບເຂດທຸລະການເປັນທາງດ່ວນພິເສດຢູ່ລະຫວ່າງອາເມລິກາກັບຈີນ.
ບໍ່ເທົ່າໃດປີມາ, ການຕົກລົງທີ່ມີຄວາມສ່ຽງຂອງທ່ານຈິ່ນຊຸ່ນໄດ້ຄ່ອຍໆເຮັດໃຫ້ບຸກຄົນໃນວົງການຖືເປັນການຕົກລົງທີ່ເຫັນກວ້າງມອງໄກ. ຍ້ອນໄດ້ພັດທະນາຢ່າງວ່ອງໄວ, ເສດຖະກິດຈີນແລະການຄ້າລະຫວ່າງຈີນກັບອາເມລິກາໄດ້ເພີ່ມທະວີຢ່າງບໍ່ຢຸດຢັ້ງ, ທາງບໍລິການໄປສະນີດ່ວນພິເສດລະຫວ່າງຈີນກັບອາເມລິກາໄດ້ຮັບຄວາມນິຍົມຈາກຕະຫຼາດຫຼາຍ. ທ່ານຈິ່ນຊຸ່ນເວົ້າວ່າ:
ສົມມຸດວ່າພວກລູກຄ້າຢູ່ອາເມລິກາ, ເຂົາເຈົ້າຝາກເຄື່ອງຈາກອາເມລິກາມາຈີນ, ດັ່ງນັ້ນ, ບໍລິສັດໄປສະນີດ່ວນພິເສດສາກົນອື່ນໆ, ຕ້ອງໂຮມເຄື່ອງຕ່າງໆ, ແລ້ວແບ່ງອອກອີກ, ແລ້ວຈຶ່ງສົ່ງມາຈີນ.ແຕ່ເວົ້າສຳລັບບໍລິສັດພວກຂ້າພະເຈົ້າເມື່ອເຄື່ອງຝາກມາຮອດໝົ້ງ 7, 8 ໂມງຄ່ຳ, ພວກຂ້າພະເຈົ້າຟ້າວສົ່ງໄປເດີ່ນຍົນໂດຍກົງ. ສະນັ້ນບໍລິສັດພວກຂ້າພະເຈົ້າສົ່ງເຄື່ອງຝາກຮອດປາຍທາງຈະໄວກວ່າບໍລິສັດອື່ນປະມານເຄິ່ງມື້ຫາມື້ໜຶ່ງ. ນີ້ກໍ່ແມ່ນຈຸດພິເສດຂອງເສັ້ນພິເສດ, ເມື່ອເຮັດເປັນຈັ່ງຊີ້ແລ້ວ, ພວກຂ້າພະເຈົ້າກໍ່ປະກົດເຫັນວ່າ, ໃນປີທຳອິດ, ລູກຄ້າໄດ້ເພີ່ມຂຶ້ນຫຼາຍ.
ໃນສິບກວ່າປີມານີ້, ເກືອບທຸກໆປີກໍ່ມີນັກທຸລະກິດຈີນເຂົ້າເຮັດທຸລະກິດໄປສະນີດ່ວນພິເສດເຊິ່ງເປັນຂະແໜງການຟົດຟື້ນຄືດັ່ງທ່ານຈິ່ນຊຸ່ນ. ຕາມສະຖິຕິ, ໃນປະຈຸບັນ, ນອກຈາກລັດວິສາຫະກິດໄປສະນີດ່ວນພິເສດແລ້ວ, ຈີນຍັງມີວິສາຫະກິດໄປສະນີດ່ວນພິເສດເອກະຊົນຫຼາຍແສນແຫ່ງ, ພະນັກງານໄປສະນີດ່ວນພິເສດມີຫຼາຍລ້ານຄົນ. ໃນອີກດ້ານໜຶ່ງ, 4 ບໍລິສັດໄປສະນີດ່ວນພິເສດໃຫຍ່ຕ່າງປະເທດ, ຄື: DHL, FEDEX, UPS, TNT ກໍ່ໄດ້ເຂົ້າຕະຫຼາດຈີນ, ພ້ອມທັງທ້ອນໂຮມກຳລັງຢ່າງວ່ອງໄວ, ພັດທະນາຕາໜ່າງໄປສະນີດ່ວນພິເສດຂອງຕົນ.
ທຶນຮອນເອກະຊົນຢູ່ພາຍໃນປະເທດຈີນແລະບໍລິສັດຈໍລະຈອນວັດຖຸບໍລິການໃຫຍ່ຕ່າງປະເທດນິຍົມຕະຫຼາດໄປສະນີດ່ວນພິເສດຂອງຈີນແນວນີ້, ກໍ່ຍ້ອນວ່າຕະຫຼາດຈີນມີໂອກາດການທຸລະກິດໃຫຍ່ແຝງຢູ່. ຕາມການຄາດຄະເນ, ປະຈຸບັນ, ຂະໜາດຕະຫຼາດໄປສະນີດ່ວນພິເສດຂອງຈີນມີປະມານ 20 ຕື້ຢວນ, ໃນບໍ່ເທົ່າໃດປີຂ້າງໜ້າ, ຕະຫຼາດໄປສະນີດ່ວນພິເສດຂອງຈີນຈະເຕີບໂຕຕາມຈັງຫວະ 25%.
ໃນຕົ້ນຊຸມປີ 80 ສະຕະວັດແລ້ວນີ້, ບໍລິສັດໄປສະນີດ່ວນພິເສດໃຫຍ່ຕ່າງປະເທດກໍ່ເຂົ້າມາຈີນຕາມໆກັນ. ໂດຍອີງຕາມກົດໝາຍວ່າດ້ວຍນັກທຸລະກິດຕ່າງປະເທດລົງທຶນຢູ່ຈີນໃນຄາວນັ້ນ, ວິສາຫະກິດຕ່າງປະເທດຈະລົງທຶນຢູ່ຈີນແຕ່ຝ່າຍດຽວບໍ່ໄດ້, ຝ່າຍຈີນຍັງຕ້ອງຖືຫຸ້ນສ່ວນຫຼາຍ, ແຕ່ຫຼັງຈາກເດືອນທັນວາປີ 2005 ແລ້ວ, ບໍ່ມີຄວາມຈຳກັດດັ່ງກ່າວນີ້ແລ້ວ, ວິສາຫະກິດໄປສະນີດ່ວນພິເສດຕ່າງປະເທດໃດໆກໍ່ສາມາດຕັ້ງບໍລິສັດທີ່ລົງທຶນຢູ່ຈີນຝ່າຍດຽວ, ທຸລະກິດແຕ່ຝ່າຍດຽວຕາມເບົ້າແບບຄຸ້ມຄອງຂອງຕ່າງປະເທດ. ນະໂຍບາຍປົກປ້ອງຖືກຍົກເລີກ, ວິສາຫະກິດໄປສະນີດ່ວນພິເສດຂອງຈີນກໍ່ໄດ້ປະສົບກຳລັງໜີບອັນໃຫຍ່ຫຼວງ.
ທ່ານຮູເຊິງເຊີ້ງ ຫົວໜ້າສຳນັກງານວາລະສານ "ການຈໍລະຈອນວັດສະດຸບໍລິການສາກົນຈີນ" ເຫັນວ່າ, ປະຈຸບັນ, ວິສາຫະກິດໄປສະນີດ່ວນພິເສດຈີນຢາກແຂ່ງຂັນກັບບໍລິສັດໄປສະນີດ່ວນພິເສດຕ່າງປະເທດ, ຍັງມີການຫຼຸດລື່ນກັນໃນສາມດ້ານ:
ໜຶ່ງ, ຂະແໜງການນີ້ຕ້ອງມີຄວາມສຸກງອມໃນລະດັບໃດໜຶ່ງ. ມັນຕ້ອງມີລະບົບຕາໜ່າງອັນໜຶ່ງ, ແນ່ນອນແລ້ວ, ຂະໜາດລະບົບຕາໜ່າງຂອງວິສາຫະກິດພາຍໃນປະເທດພວກເຮົານ້ອຍກວ່າວິສາຫະກິດຕ່າງປະເທດ. ສອງ ບົດຮຽນທຸລະກິດແລະການຄຸ້ມຄອງຂອງພວກເຮົາຍັງມີຈຸດອ່ອນ, ສາມ ໃນ ຂະແໜງການໄປສະນີດ່ວນພິເສດຂອງພວກເຮົາຫຼາຍວິສາຫະກິດເຮັດທຸລະກິດຍັງບໍ່ເປັນສະບັບ.
ແຕ່ປີກາຍນີ້ເປັນຕົ້ນມາ, FEDEX, DHL, UPS ເປັນຕົ້ນ, ກໍ່ພາກັນວາງແຜນການລົງທຶນແລະສ້າງຕາໜ່າງໃນເຂດຈີນ, ໄດ້ເພີ່ມການລົງທຶນແລະການສ້າງຕາໜ່າງຢູ່ເຂດຈີນ, ຫວັງຢາກຢູ່ໃນທ່າແຮງໃນການແຂ່ງຂັນຮອບນີ້. ບຸກຄົນໃນຂະແໜງການເຫັນວ່າ, ເບິ່ງຈາກໄລຍະສັ້ນ, ເປົ້າໝາຍບໍລິການຂອງວິສາຫະກິດໄປສະນີດ່ວນພິເສດຕ່າງປະເທດເຫຼົ່ານີ້ຕົ້ນຕໍຍັງແມ່ນວິສາຫະກິດຂ້າມຊາດຢູ່ຈີນ, ສະນັ້ນ, ວິສາຫະກິດໄປສະນີດ່ວນພິເສດຈີນທີ່ເອົາໃຈໃສ່ແຕ່ວຽກໄປສະນີດ່ວນພິເສດຢູ່ພາຍໃນປະເທດເປັນຕົ້ນຕໍນັ້ນຖືກກະທົບຍັງບໍ່ຮຸນແຮງປານໃດ. ແຕ່ເບິ່ງຈາກໄລຍະຍາວນານແລ້ວ, ຖ້າວິສາຫະກິດພາຍໃນປະເທດບໍ່ຍົກສູງລະດັບໃນດ້ານທັດສະນະຄະຕິບໍລິການ, ຮູບແບບບໍລິການ, ມາດຖານບໍລິການ, ແລະຂອບເຂດບໍລິການຢ່າງຮອບດ້ານແລ້ວ, ພວກເຂົາເຈົ້າຈະປະສົບກຳລັງໜີບແລະສິ່ງທ້າທາຍຂອງຕະຫຼາດຈະນັບມື້ນັບໃຫຍ່ຫຼວງ.
ແຕ່ວ່າ, ທ່ານລິວຈ້ຽນຊິ່ນ ເລຂາທິການໃຫຍ່ຄະນະກຳມະການໄປສະນີດ່ວນພິເສດຂອງສະມາຄົມຕົວແທນການຂົນສົ່ງສິນຄ້າສາກົນຈີນວ່າ, ຕໍ່ພາບອະນາ ຄົດຂອງວິສາຫະກິດໄປສະນີດ່ວນພິເສດຈີນບໍ່ຄວນຈະເຫັນໄປແຕ່ແງ່ຮ້າຍ, ເຂົາເຈົ້າຍັງມີທ່າແຮງໃນການແຂ່ງຂັນ:
ທ່າແຮງໃຫຍ່ກວ່າໝູ່ຂອງເຂົາເຈົ້າກໍ່ແມ່ນເຮັດທຸລະກິດຢູ່ໃນປະເທດຕົນ, ພວກເຂົາເຈົ້າຮູ້ຕະຫຼາດຈີນ, ຮູ້ຄວາມຊິນເຄີຍເຮັດວຽກຂອງຄົນຈີນ, ຮູ້ທັດສະນະຄະຕິຂອງຄົນຈີນແລະຮູ້ປະຊາສຳພັນຂອງຄົນຈີນ. ວັດທະນະທຳທີ່ສືບທອດມາແຕ່ບູຮານເຫຼົ່ານີ້, ເຂົາເຈົ້າຈະເຮັດໃຫ້ລູກຄ້າຈີນຮ່ວມມືກັບເຂົາເຈົ້າງ່າຍກວ່າ.
ບຸກຄົນໃນຂະແໜງການຊີ້ອອກວ່າ, ເພື່ອແຂ່ງຂັນກັບວິສາຫະກິດໄປສະນີດ່ວນພິເສດຕ່າງປະເທດ, ວິສາຫະກິດໄປສະນີດ່ວນພິເສດພາຍໃນປະເທດ ຍ້ອນມີຂະໜາດຂ້ອນຂ້າງນ້ອຍ, ກຳລັງຕົວຈິງຂ້ອນຂ້າງອ່ອນ, ສະນັ້ນຍັງຕ້ອງເພີ່ມທະວີການຮ່ວມມື, ສັບຊ້ອນຊັບພະຍາກອນ,
ສ້າງສະຫະພັນຍຸດທະສາດ, ເພື່ອເພີ່ມທະວີ ປະເພດບໍລິການ, ເປີດກວ້າງຂອບເຂດບໍລິການ, ເພີ່ມໂກຕາຕະຫຼາດແລະຄວາມສາມາດແຂ່ງຂັນ. ໃນການແຂ່ງຂັນ, ວິສາຫະກິດຕ່າງໆທີ່ບໍ່ມີທ່າແຮງໃນດ້ານຂະໜາດຕາໜ່າງ, ຕົ້ນທຶນໝູນເດີນສູງແລະບໍ່ມີໄຫວພິບຕໍ່ຕະຫຼາດຈະຖືກກວມເອົາ, ຈັດຕັ້ງຄືນໃໝ່ແລະຖືກໄລ່ອອກເປັນກ້າວໆ.
ທ່ານລິວຈ້ຽນຊິ່ນເຫັນວ່າ, ການແຂ່ງຂັນລະຫວ່າງວິສາຫະກິດໄປສະນີດ່ວນພິເສດຈີນກັບວິສາຫະກິດໄປສະນີດ່ວນພິເສດຕ່າງປະເທດ, ຈະມີຜົນດີຕໍ່ການຍົກສູງຄຸນນະພາບການບໍລິການໄປສະນີດ່ວນພິເສດຂອງຈີນ, ແລ້ວບັນລຸເປົ້າໝາຍຮັບໄຊຊະນະພ້ອນກັນ.
|
|
|
