ຕາມ​ຂ່າວ​CRI: ວັນ​ທີ 22 ກຸມພາ, ທ່ານ​ບານ​ກີ​ມຸນ ລັດຖະມົນຕີ​ກະຊວງ​ການ​ຕ່າງປະ​ເທດ​ແລະ​ການ​ຄ້າ​ສ.​ເກົາຫຼີກ່າວ​ວ່າ, ​ເພື່ອ​ຈັດການ​ເຈລະຈາ 6 ຝ່າຍ​ຮອບ​ໃໝ່ກ່ຽວ​ກັບ​ບັນຫາ​ນິວ​ເຄຼຍ​ແຫຼມ​ເກົາ​ຫຼີຄືນ​ໃໝ່​ໂດຍ​ໄວ, ສ.​ເກົາຫຼີຈະ​ເພີ່ມ​ທະວີ​ການ​ພົວພັນ​ແລະ​ແລກປ່ຽນ​ກັບປະ​ເທດ​ທີ່​ກ່ຽວ​ຂ້ອງ.

​ໃນ​ງານ​ຊຸມນຸມ​ນັກ​ຂ່າວ​ທີ່​ຈັດ​ຂຶ້ນ​ໃນ​ມື້​ດຽວ​ກັນ, ທ່ານ​ບານ​ກີ​ມຸນ​ກ່າວ​ວ່າ, ທ່ານ​ຊົງ​ມິນ​ຊຸນ ຫົວໜ້າ​ຫ້ອງການ​ນະ​ໂຍບາຍ​ເອກະ​ພາບ​ການ​ຕ່າງປະ​ເທດ​ແລະ​ປ້ອງ​ກັນ​ຄວາມ​ໝັ້ນ​ຄົງ​ຂອງ​ທຳນຽບປະທາ ນາທິບໍດີ ສ.​ເກົາຫຼີຈະ​ໄປ​ຢ້ຽມຢາມ​ອາ​ເມ​ລິ​ກາ​ໃນ​ວັນ​ທີ 23 ກຸມ​ພາ, ຈະແລ​ກປ່ຽນ​ກັບ​ຝ່າຍ​ອາ​ເມ​ລິ​ກາ​ກ່ຽວ​ກັບ​ບັນຫາ​ທີ່​ສົນ​ໃຈ​ນຳ​ກັນ​ຄື ບັນຫາ​ນິວ​ເຄຼຍ​ແຫຼມ​ເກົາ​ຫຼີ​ເປັນຕົ້ນ. ທ່ານ​ຊຸນ​ຢືງວູ ຫົວໜ້າ​ຜູ່​ແທນ​ຝ່າຍ​ສ.​ເກົາຫຼີທີ່​ເຂົ້າຮ່ວມ​ການ​ເຈລະຈາ 6 ຝ່າຍ​ກໍ່​ຈະ​​ໄປ​ຢ້ຽມ​ຢາມ​ປະ​ເທດ​ທີ່​ກ່ຽວຂ້ອງ​ໃນຕົ້ນ​ເດືອນ​ມີນາ, ​ແລກປ່ຽນ​ຄວາມ​ເຫັນ​ກັບ​ປະ​ເທດ​ທີ່​ກ່ຽວ​ຂ້ອງ​ກ່ຽວ​ກັບ​ບັນຫາ​ນິວ​ເຄຼຍ​ແຫຼມ​ເກົາຫຼີ​ແລະ​ການ​ເຈລະຈາ 6 ຝ່າຍ​ເປັນ​ຕົ້ນ.