|
ໃນໂລກປະຈຸບັນ,ບໍ່ມີປະເທດໃດຄືກັບຈີນ,ປີໃດກໍ່ມີໂຄງການຂຸດຄົ້ນວັດຖຸບູຮານປະມານ 500 ລາຍ,ພາລະກິດອະນຸລັກວັດຖຸບູຮານຂອງຈີນແມ່ນພາລະກິດອະນຸລັກວັດຖຸບູຮານທີ່ມີຂະໜາດໃຫຍ່ກວ່າໝູ່ຂອງໂລກ.
ຫວ່າງກ່ອນນີ້ບໍ່ດົນ,ລັດຖະບານຈີນປະກາດວ່າ,ແຕ່ປີນີ້ເປັນຕົ້ນໄປ,ວັນເສົາອາທິດທີສອງຂອງເດືອນມິຖຸນາທຸກປີແມ່ນ"ວັນມໍລະດົກວັດທະນະທຳ".ຕໍ່ເລື່ອງນີ້,ທ່ານຈ່າງປາຍ ຮອງຫົວໜ້າກົມວັດຖຸບູຮານແຫ່ງຊາດຈີນເຫັນວ່າ,ພາລະກິດອະນຸລັກວັດຖຸບູຮານຂອງຈີນແມ່ນພາລະກິດຂອງທົ່ວປວງຊົນຕະຫຼອດມາ,ໃນຫຼາຍປີມານີ້,ເສດຖະກິດຈີນເຕີບໂຕຢ່າງສືບເນື່ອງແລະວ່ອງໄວ,ການຂຸດຄົ້ນວັດຖຸບູຮານທີ່ປະສານສົມທົບກັບການກໍ່ສ້າງພື້ນຖານພາຍໃນຂອບເຂດທົ່ວປະເທດກໍ່ຫຼາຍສົມຄວນ.ລັດຖະບານຈີນນັບມື້ນັບເອົາໃຈໃສ່ນຳວຽກງານອະນຸລັກວັດຖຸບູຮານ,ເຮັດໃຫ້ພາລະກິດອະນຸລັກວັດຖຸບູຮານຂອງທົ່ວປະເທດໄດ້ມີສະຖານະການທີ່ດີແຫ່ງການພັດທະນາຢ່າງຂະໜາດໃຫຍ່.ທ່ານເວົ້າວ່າ:
"ວຽກງານອະນຸລັກວັດຖຸບູຮານໄດ້ມີຄວາມຄືບໜ້າຢ່າງວ່ອງໄວ,ໂດຍສະເພາະແມ່ນໂຄງການໃຫຍ່ຈຳນວນໜຶ່ງ,ຕົວຢ່າງຄືການອະນຸລັກວັດຖຸບູຮານໃນໂຄງການເຂື່ອນໄຟຟ້າຊ່ານເຊຍແລະໂຄງການເປັ່ງນ້ຳພາກໃຕ້ໄປສູ່ພາກເໜືອ,ກຳລັງບູຮານຄະດີຂອງທົ່ວປະເທດລ້ວນແຕ່ມາຊ່ອຍເຫຼືອ,ມີຄວາມຄືບໜ້າຢ່າງສະດວກຫຼາຍ.ນອກນີ້,ໂຄງການອະນຸລັກຢ່າງເປັນເຈົ້າການຈຳນວນໜຶ່ງກໍ່ໄດ້ມີຄວາມຄືບໜ້າດີຫຼາຍ,ຕົວຢ່າງຄືການອະນຸລັກເສັ້ນທາງຜ້າໄໝຕອນຢູ່ເຂດຊີ່ນຈ່ຽງຂອງຈີນໄດ້ເລີ່ມຕົ້ນແລ້ວ.ການພັດທະນາເສດຖະກິດສັງຄົມໄດ້ຊຸກຍູ້ໃຫ້ພາລະກິດວັດຖຸບູຮານມີການພັດທະນາ."
"ການເປັ່ງນ້ຳພາກໃຕ້ໄປສູ່ພາກເໜືອ"ທີ່ທ່ານຈ່າງປາຍກ່າວເຖິງນັ້ນ,ແມ່ນໂຄງການກໍ່ສ້າງທີ່ມີຂະໜາດໃຫຍ່ກວ່າໝູ່ຂອງຈີນໃນປະຈຸບັນ,ຈຸດປະສົງແມ່ນຜ່ານຄອງເໝືອງສົ່ງນ້ຳຈືດຂອງພາກໃຕ້ທີ່ອຸດົມສົມບູນໄປສູ່ເຂດພາກເໜືອທີ່ໄກແສນໄກ.ຍ້ອນເຂດພາກກາງທີ່ຄອງສົ່ງຜ່ານນັ້ນແມ່ນແຫຼ່ງກຳເນີດຂອງອາລະຍະທຳຈີນ,ຮ່ອງຮອຍວັດທະນະທຳໃຕ້ດິນອຸດົມສົມບູນທີ່ສຸດ,ລັດຖະບານຈີນໄດ້ເບີກເງິນຈຳເພາະເພື່ອຂຸດຄົ້ນແລະອະນຸລັກວັດຖຸບູຮານ.
ຂໍ້ມູນຂອງກົມວັດຖຸບູຮານແຫ່ງຊາດຈີນສະແດງໃຫ້ເຫັນວ່າ,ໃນ 10 ກວ່າປີມານີ້,ແຕ່ລະປີ,ຈີນກໍ່ມີໂຄງການຂຸດຄົ້ນວັດຖຸບູຮານໃຕ້ດິນປະມານ 500 ລາຍ,ການຂຸດຄົ້ນໃຕ້ດິນທີ່ມີຂະໜາດໃຫຍ່ສ່ຳນີ້,ໄດ້ອຳນວຍຂໍ້ມູນທີ່ຫາຍາກໃຫ້ແກ່ການຄົ້ນຄວ້າປະຫວັດສາດແລະການຄົ້ນຄວ້າແຫຼ່ງກຳເນີດຂອງອາລະຍະທຳຈີນ,ໄດ້ຊຸກຍູ້ການພັດທະນາຂອງຫໍພິພິທະພັນ,ພ້ອມກັນນັ້ນ,ກໍ່ໄດ້ເຮັດໃຫ້ບຸກຄົນວົງການວັດຖຸບູຮານສາກົນເອົາໃຈໃສ່ນຳ.ໃນເດືອນຕຸລາປີ 2005,ກອງປະຊຸມສະພາມົນຕີຮ່ອງຮອຍບູຮານນະສະຖານສາກົນ(ຄືອົງການ ICOMOS)ຄັ້ງທີ 15 ໄດ້ໄຂຂຶ້ນຢູ່ເມືອງຊີ່ອ່ານ ນະຄອນຫຼວງເກົ່າແກ່ຂອງຈີນ,ກອງປະຊຸມຖື"ຮ່ອງຮອຍບູຮານນະສະຖານໃນສິ່ງແວດລ້ອມເບື້ອງຫຼັງ--ການອະນຸລັກມໍລະດົກວັດທະນະທຳໃນທິວທັດຕົວເມືອງທີ່ປ່ຽນແປງຢ່າງບໍ່ຢຸດຢັ້ງ"ເປັນຫົວຂໍ້ຫຼັກ,ໄດ້ຫາລືຊ່ອງທາງໃໝ່ໃນການອະນຸລັກມໍລະດົກວັດທະນະທຳໃນສັດຕະວັດທີ 21,ແລະໄດ້ປະກາດ"ຖະແຫຼງການຊີ່ອ່ານ"ກ່ຽວກັບການອະນຸລັກມໍລະດົກວັດທະນະທຳແລະສິ່ງແວດລ້ອມ.ທ່ານຈ່າງປາຍ ຮອງຫົວໜ້າກົມວັດຖຸບູຮານແຫ່ງຊາດຈີນເຫັນວ່າ,ກອງປະຊຸມເທື່ອນີ້ໄດ້ຊຸກຍູ້ພາລະກິດວັດຖຸບູຮານຂອງທົ່ວໂລກ.ທ່ານເວົ້າວ່າ:
"ກອງປະຊຸມຄັ້ງນີ້ມີ 100 ກວ່າປະເທດແລະເຂດແຄວ້ນເຂົ້າຮ່ວມ,ມີອິດທິພົນຫຼາຍ,ໄດ້ຮັບໝາກຜົນອັນພົ້ນເດັ່ນ,ແລະໄດ້ປະກາດ'ຖະແຫຼງການຊີ່ອ່ານ'.ທັງນີ້ແມ່ນມີຈຸດພິເສດ,ຕົ້ນຕໍແມ່ນກ່ຽວກັບສິ່ງແວດລ້ອມວັດຖຸບູຮານແມ່ນຫຍັງ ການພົວພັນລະຫວ່າງສິ່ງແວດລ້ອມວັດຖຸບູຮານກັບວັດຖຸບູຮານ,ພ້ອມທັງຄວາມໝາຍສຳຄັນແລະຄວາມເຄັ່ງຮ້ອນຂອງການອະນຸລັກສິ່ງແວດລ້ອມວັດຖຸບູຮານໃນສະເພາະໜ້ານີ້,ນີ້ແມ່ນການປະກອບສ່ວນເຂົ້າໃນພາລະກິດອະນຸລັກວັດຖຸບູຮານຂອງໂລກ."
ການເພີ່ມທະວີຖານະຂອງວິທະຍາສາດເຕັກໂນໂລຊີໃນວຽກງານອະນຸລັກວັດຖຸບູຮານ,ແມ່ນຈຸດພິເສດຂໍ້ໜຶ່ງໃນການອະນຸລັກວັດຖຸບູຮານຂອງຈີນໃນຫຼາຍປີມານີ້.ຍົກເອົາການອະນຸລັກຮູບປັ້ນທະຫານມ້າຂອງເຈົ້າຊີວິດຊີນສີຮ້ອງເຕ້ ມໍລະດົກຂອງໂລກເປັນຕົວຢ່າງ,ຍ້ອນບົດບາດຂອງອາກາດ,ຮູບປັ້ນດິນເຜົາເຄືອບສີຢູ່ແຫ່ງນີ້ເມື່ອໄດ້ຖືກຂຸດຄົ້ນອອກມາແລ້ວກໍ່ຈະປ່ຽນສີ.ຜູ້ຊ່ຽວຊານດ້ານການອະນຸລັກວັດຖຸບູຮານຂອງຈີນແລະເຢຍລະມັນໄດ້ຮ່ວມມືກັນ,ປະຈຸບັນ,ໄດ້ແກ້ໄຂບັນຫາຍາກຂໍ້ນີ້ເປັນຢ່າງດີ.ທ່ານຈ່າງປາຍເວົ້າວ່າ:
"ວິທະຍາສາດເຕັກໂນໂລຊີອະນຸລັກວັດຖຸບູຮານແມ່ນການຂະຫຍາຍຕົວທີ່ບໍ່ເຄີຍມີມາກ່ອນ,ປະຈຸບັນ,ໃນທົ່ວປະເທດຈີນໄດ້ສ້າງສູນອະນຸລັກວັດຖຸບູຮານດ້ວຍວິທະຍາສາດເຕັກໂນໂລຊີ 6 ແຫ່ງແລ້ວ,ໄດ້ເພີ່ມອຸປະກອນແລະການລົງທຶນ.ຕົວຢ່າງຄືແຫຼ່ງຄົ້ນຄວ້າວິທະຍາສາດຮູບແຕ້ມຝາຜະໜັງຂອງຕຸ່ນຮວງ,ໄດ້ຄົ້ນຄວ້າການຮັກສາຮູບແຕ້ມຝາຜະໜັງເປັນຈຸດໜັກ.ທັງໝົດເຫຼົ່ານີ້ມີບົດບາດຮັບປະກັນອັນໃຫຍ່ຫຼວງຕໍ່ໜ້າທີ່ໃໝ່ຈຳນວນໜຶ່ງໃນການອະນຸລັກວັດຖຸບູຮານດ້ວຍວິທະຍາສາດເຕັກໂນໂລຊີ."
ຍ້ອນຈີນມີຜືນແຜ່ນດິນອັນກວ້າງຂວາງ,ການແຈກຢາຍຂອງວັດຖຸບູຮານຢູ່ແຫ່ງຕ່າງໆຂອງຈີນກໍ່ມີເອກະລັກພິເສດ.ຢູ່ແຂວງເຮີນານແລະແຂວງສ້ານຊີ່ຂອງເຂດພາກກາງ,ມີຊື່ສຽງຍ້ອນມີວັດຖຸບູຮານໃຕ້ດິນຢ່າງອຸດົມສົມບູນ,ເຂດດັ່ງກ່າວມີຮ່ອງຮອຍສຸສານແລະພະລາຊະວັງບູຮານທີ່ກ່ຽວພັນເຖິງການກຳເນີດຂອງອາລະຍະທຳຈີນຫຼາຍບ່ອນ;ຢູ່ແຂວງຊ່ານຊີ່ຂອງເຂດພາກກາງ,ສິ່ງກໍ່ສ້າງຢູ່ໜ້າດິນທີ່ມີປະຫວັດເກີນພັນປີກວມຍອດຈຳນວນສິ່ງກໍ່ສ້າງແບບນີ້ຂອງທົ່ວປະເທດ 70% ຂຶ້ນໄປ,ສິ່ງກໍ່ສ້າງເຫຼົ່ານີ້ມີໂຄງສ້າງເປັນດິນຈີ່ແລະໄມ້ແບບດັ້ງເດີມ,ຕ້ອງຮັກສາຢ່າງພຽນໃຈ;ຢູ່ນະຄອນຫຼວງປັກກິ່ງ,ມີມໍລະດົກໂລກກວມທົ່ວປະເທດ 1 ສ່ວນ 5.ຍ້ອນມີສະພາບການຕ່າງກັນ,ແຂວງແລະນະຄອນຕ່າງໆໄດ້ອອກກົດບັນຍັດທ້ອງຖິ່ນທີ່ສົມຄູ່ກັນ,ນີ້ກໍ່ແມ່ນຈຸດພິເສດຂໍ້ໜຶ່ງຂອງພາລະກິດອະນຸລັກວັດຖຸບູຮານຂອງຈີນໃນຫຼາຍປີມານີ້.ຍົກເອົາປັກກິ່ງເປັນຕົວຢ່າງ,ໂດຍແນໃສ່ການດັດສ້າງເມືອງເກົ່າທີ່ທົ່ວໂລກພາກັນເອົາໃຈໃສ່,ອົງການປົກຄອງນະຄອນປັກກິ່ງໄດ້ວາງຂໍ້ມາດຕາຈຳເພາະ.ທ່ານເມນີງຮວາ ຫົວໜ້າກົມວັດຖຸບູຮານປັກກິ່ງເວົ້າວ່າ:
"ໃນການນິຕິບັນຍັດ,ພວກຂ້າພະເຈົ້າໄດ້ຮັບໝາກຜົນອັນສຳຄັນ,ຄືສະພາຜູ້ແທນປະຊາຊົນນະຄອນປັກກິ່ງໄດ້ຜ່ານ'ກົດຂໍ້ກຳນົດກ່ຽວກັບການອະນຸລັກເມືອງເກົ່າຂອງນະຄອນປັກກິ່ງ',ມີຄວາມໝາຍອັນສຳຄັນທີ່ສຸດແລະມີລັກສະນະກົກຮາກຕໍ່ການຮັກສາເມືອງເກົ່າແລະໂສມໜ້າປະຫວັດສາດຂອງນະຄອນປັກກິ່ງ,ເປັນຂີດໝາຍສະແດງໃຫ້ເຫັນວ່າ,ແຕ່ນີ້ເປັນຕົ້ນໄປ,ການຮັກສາເມືອງເກົ່າຂອງປັກກິ່ງໄດ້ເຂົ້າສູ່ໂຄຈອນລະບອບກົດໝາຍ.ນອກນີ້,ກ່ຽວກັບກຳແພງຍັກ,ພວກຂ້າພະເຈົ້າໄດ້ມີວິທີຮັກສາສະບັບທຳອິດຂອງທົ່ວປະເທດ,ກ່ຽວກັບຫໍພິພິທະພັນ,ພວກຂ້າພະເຈົ້າກໍ່ໄດ້ວາງຂໍ້ກຳນົດສະບັບໜຶ່ງ.ພວກຂ້າພະເຈົ້າພວມດຳເນີນການສຳຫຼວດຄົ້ນຄວ້າ,ກຽມວາງກົດໝາຍຈຳເພາະກ່ຽວກັບການຮັກສາພະລາຊະວັງບູຮານກູ້ກົ່ງ."
ມີບາງຄົນເວົ້າວ່າ,ຖ້າບໍ່ມີການພັດທະນາຢ່າງວ່ອງໄວຂອງເສດຖະກິດຈີນ,ການຂຸດຄົ້ນແລະອະນຸລັກວັດຖຸບູຮານຂອງຈີນກໍ່ບໍ່ຫ່ອນມີຂະໜາດໃຫຍ່ປານນີ້.ແມ່ນແທ້,ຍ້ອນຄວາມຕ້ອງການຂອງການສ້າງສາໃຫ້ທັນສະໄໝ,ການຂຸດຄົ້ນວັດຖຸບູຮານຢູ່ຫຼາຍແຫ່ງແມ່ນຢູ່ໃນທ່າຮັບ,ແຕ່ກໍ່ມີຄວາມຈິງອັນໜຶ່ງແມ່ນ,ຍ້ອນເສດຖະກິດຈີນໄດ້ພັດທະນາ,ໄດ້ໃຫ້ການຮັບປະກັນດ້ານເງິນທຶນແກ່ການອະນຸລັກວັດຖຸບູຮານແລະການຄົ້ນຄວ້າວັດຖຸບູຮານຂອງຈີນ,ເຮັດໃຫ້ຮ່ອງຮອຍອາລະຍະທຳທີ່ເກົ່າແກ່ຖືກທຳລາຍໜ້ອຍລົງເທົ່າທີ່ຈະໜ້ອຍໄດ້ໃນທ່າມກາງການປ່ຽນແປງຂອງຍຸກສະໄໝ.
|
