|
ສະບາຍດີທ່ານຜູ່ຟັງທີ່ໂຄລົບ, ເພື່ອຈັດງານກິລາໂອລິມປິກລະດູຮ້ອນປີ 2008 ແລະງານກິລາໂອລິມປິກຄົນພິການຕາມຫຼັງຢູ່ທີ່ປັກກິ່ງນັ້ນຢ່າງສຳເລັດຜົນ, ປັກກິ່ງພວມເຮັດວຽກກະກຽມໃນທຸກໆດ້ານ, ຜູ່ຈັດຕັ້ງພິຈາລະນາຢ່າງລະອຽດຮອບຄອບຫຼາຍ, ຈົນກະທັ້ງໄດ້ຄຳນຶງເຖິງການສະໜອງໝາພາທາງບໍລິການນັກກິລາຕາບອດຂອງບັນດາປະເທດທີ່ຈະເຂົ້າຮ່ວມງານກິລາໂອລິມປິກຄົນພິການປັກກິ່ງ. ປັດຈຸບັນ ໝາພາທາງບໍລິການນັກກິລາຕາບອດໃຊ້ສະເພາະໃນງານກິລາໂອລິມປິກຄົນພິການປັກກິ່ງງວດທຳອິດ ພວມຮັບການຝຶກແອບຢູ່ທີ່ໝັ້ນຝຶກໝາພາທາງແຫ່ງໜຶ່ງທີ່ເມືອງຕ້າຫຼຽນ ທາງພາກເໜືອຂອງຈີນ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ປັກກິ່ງຝຶກໝາພາທາງເພື່ອບໍລິການນັກກິລາຕາບອດທີ່ຈະເຂົ້າຮ່ວມງານກິລາໂອລິມປິກຄົນພິການປັກກິ່ງປີ 2008.
ທີ່ໝັ້ນຝຶກໝາພາທາງແຫ່ງນີ້ຕັ້ງຢູ່ຊານເມືອງພາກໃຕ້ຂອງເມືອງຕ້າຫຼຽນ, ສັງກັດສູນທົດລອງສັດມະຫາວິທະຍາໄລແພດສາດຕ້າຫຼຽນ, ຫວ່າງມໍ່ໆນີ້, ນັກຂ່າວໄດ້ໄປເອົາຂ່າວຢູ່ທີ່ໝັ້ນຝຶກໝາພາທາງດັ່ງກ່າວດ້ວຍຄວາມປະຫຼາດໃຈ.
ໃນຫ້ອງການ, ນາງຊົ້ງຢາໜານ ພະນັງງານຄົ້ນຄວ້າບອກນັກຂ່າວວ່າ, ໂດຍໄດ້ຮັບຄວາມມອບໝາຍຈາກອົງການປົກຄອງນະຄອນປັກກິ່ງ, ແຕ່ປີ 2005 ເປັນຕົ້ນມາ, ສູນທົດລອງສັດມະຫາວິທະຍາໄລແພດສາດຕ້າຫຼຽນໄດ້ເລີ່ມຝຶກໝາພາທາງຄົນຕາບອດ, ເມື່ອໄດ້ພະຍາຍາມມາ 1 ປີແລ້ວ, ປັດຈຸບັນ ການຝຶກໝານ້ອຍງວດທຳອິດໄດ້ເຂົ້າສູ່ໄລຍະກາງແລ້ວ, ກະວ່າໃນປີນີ້ຫຼືປີໜ້າ, ພວກມັນມີຫວັງຈະບໍລິການຄົນພິການໄດ້. ໃນງານກິລາໂອລິມປິກຄົນພິການປັກກິ່ງ, ໝາພາທາງເຫຼົ່ານີ້ຈະພານັກກິລາຕາບອດລົງສະໜາມແຂ່ງຂັນ ແລະພາທາງພວກເຂົາເຈົ້າໃນເວລາອອກນອກ. ນາງຊົ້ງຢາໜານ ພະນັກງານຄົ້ນຄວ້າຂອງທີ່ໝັ້ນຝຶກໝາພາທາງເວົ້າວ່າ: ດຽວນີ້ ພວກຂ້າພະເຈົ້າໄດ້ວາງແຜນການໄວ້ແລ້ວ, ຫວັງວ່າຈະສາມາດບໍລິການຄົນຕາບອດ, ອຸທິດກຳລັງເພື່ອຄົນຕາບອດ.
ຢູ່ສູນຝຶກໝາ, ນັກຂ່າວໄດ້ເຫັນໝາ 3 ໂຕພວມຮັບການຝຶກ, ໝາສາມໂຕນີ້ຕ່າງມີຊື່ວ່າ "ໝາວໝາວ" "ສືໂຖວ" ແລະ "ລູ້ລູ້", ໄດ້ເຕີບໃຫຍ່ເປັນໝາໃຫຍ່ແລ້ວ, ຖ້າຢືນສອງຂາຫຼັງຍັງສູງກວ່າຄົນເຮົາ. ນາງຊົ້ງຢາໜານບອກນັກຂ່າວວ່າ, ໝາພາທາງຄົນຕາບອດຕ້ອງມີຮູບຮ່າງໃຫຍ່, ເພາະວ່າ ມີແຕ່ຮູບຮ່າງໃຫຍ່ສົມຄວນແລ້ວ ຈຶ່ງສາມາດໃຊ້ຮ່າງກາຍຂອງມັນບັງຄົນຕາບອດໄວ້ໄດ້, ເພື່ອໃຫ້ຄົນຕາບອດໄກຈາກເຂດອັນຕະລາຍ. ຄຸນທາດສຳຄັນກວ່າໝູ່ຂອງໝາພາທາງແມ່ນຕ້ອງມີນິໄສທຸ່ນທ່ຽງບໍ່ຮ້ອນບໍ່ຮົນ. ນາງຊົ້ງຢາໜານເວົ້າວ່າ: ໝາພາທາງຕ້ອງທຸ່ນທ່ຽງ, ຟັງຄວາມແລະຍອມຖ້າເຈົ້າຂອງ, ຂີ້ດື້ເກີນໄປບໍ່ໄດ້.
ຍ້ອນວ່າ ໃນຊີວິດປະຈຳວັນ, ໝາພາທາງຕ້ອງຖືເຈົ້າຂອງເປັນແກນກາງຢ່າງສະເໝີຕົ້ນສະເໝີປາຍ. ເຈົ້າຂອງບໍ່ໄປໃສ, ມັນກໍ່ຕ້ອງນັ່ງຄອຍຢູ່ຂ້າງ, ເວລາເຈົ້າຂອງອອກເດີນທາງ ມັນກໍ່ຕ້ອງພາທາງໃຫ້ເຈົ້າຂອງ. ມີແຕ່ເປັນໝາທີ່ພາທາງຢ່າງໃຈຈົດໃຈຈໍ່ ບໍ່ສົນໃຈນຳເລື່ອງແປກຢູ່ອ້ອມຂ້າງແລ້ວ, ຈຶ່ງເລືອກໃຊ້ໄດ້. ຖ້າໝາພາທາງສົນໃຈນຳເລື່ອງອ້ອມຂ້າງຫຼາຍເກີນໄປ, ຕົວຢ່າງຄື ເມື່ອໄດ້ເຫັນອາຫານ ເຄື່ອງຫຼິ້ນ ຫຼືຕ່າງເພດຢູ່ກາງທາງເລີຍປະເຈົ້າຂອງ, ກໍ່ເປັນໝາພາທາງທີ່ບໍ່ເໝາະສົມກັບໜ້າທີ່ວຽກງານຂອງມັນ.
ຢູ່ທີ່ໝັ້ນຝຶກໝາພາທາງ, ນັກຂ່າວໄດ້ເຫັນພະນັກງານພວມຝຶກໝາ "ໝາວໝາວ". ກ່ອນອື່ນ, ນາງຊົ້ງຢາໜານເອີ້ນ "ໝາວໝາວ" ດ້ວຍພາສາອັງກິດຢ່າງສະໜິດສະໜົມວ່າ "ຮັນໂລ", ນາງຊົ້ງຢາໜານເວົ້າ "ສະບາຍດີ" ດ້ວຍພາສາອັງກິດເທື່ອໃດ, ໝາ "ໝາວໝາວ" ກໍ່ຈະເດ່ຂາໜ້າຈັບມືກັບນາງຊົ້ງຢາໜານ. ປັດຈຸບັນ "ໝາວໝາວ" ໄດ້ເຂົ້າໃຈຄຳສັ່ງທີ່ເປັນພາສາອັງກິດ ເຊັ່ນ ລຸກຂຶ້ນ(up) ໄປ(go) ຢຸດ(stop) ນັ່ງລົງ(sit) ໄປທາງຂວາ(right) ໄປທາງຊ້າຍ(left) ເປັນຕົ້ນແລ້ວ. ນາງຊົ້ງຢາໜານເວົ້າວ່າ: ຄຳສັບອັງກິດເຫຼົ່ານີ້ ມັນລ້ວນແຕ່ເຂົ້າໃຈໄດ້, ເພາະພວກຂ້າພະເຈົ້າໃຊ້ພາສາອັງກິດມາຝຶກມັນ.
ເນື່ອງຈາກໄດ້ພິຈະລານາວ່າ ໝາພາທາງຈະບໍລິການນັກກິລາບັນດາປະເທດໃນງານກິລາໂອລິມປິກຄົນພິການປັກກິ່ງ, ສະນັ້ນ ປັດຈຸບັນ ທີ່ໝັ້ນຝຶກໝາໄດ້ໃຊ້ພາສາອັງກິດຝຶກໝາໂດຍຕະຫຼອດ. ນອກຈາກຝຶກພາສາແລ້ວ, ຫຼັກສູດຂອງ "ໝາວໝາວ" ຍັງມີຫຼາຍຢ່າງ. ໃນມື້ທີ່ນັກຂ່າວໄປເອົາຂ່າວນັ້ນ, ກ່ອນອື່ນແມ່ນຝຶກຫຼີກສິ່ງກີດຂວາງ, ບົນທາງຫຼວງຈຳລອງເສັ້ນໜຶ່ງ, ນາງຊົ້ງຕັ້ງແກ້ງຈູງ "ໝາວໝາວ" ເດີນໄປສູ່ຝາອັດຄອງນ້ຳໃຕ້ດິນທີ່ສູງກວ່າໜ້າດິນ, ເມື່ອເຫັນເຈົ້າຂອງອາດຈະຕຳສະດຸດລົ້ມ, "ໝາວໝາວ" ກໍ່ຟ້າວຂວາງຮ່າງກາຍຂອງຕົນ ກັ້ນກາງນາງຊົ້ງຢາໜານໄວ້. ເປັນອັນຈະແຈ້ງແລ້ວວ່າ, ໃນການຝຶກຫຼີກສິ່ງກີດຂວາງນັ້ນ, ຜົນງານຂອງ "ໝາວໝາວ" ແມ່ນດີເລີດທີ່ສຸດ. ຕໍ່ມາຝຶກການຂຶ້ນລົງຂັ້ນໃດ, ຖ້າເປັນໝາພາທາງທີ່ໄດ້ມາດຖານ, ເມື່ອຍ່າງໄປຮອດຕີນຂັ້ນໃດຫຼືຫົວຂັ້ນໃດ, ມັນກໍ່ຈະຢຸດໂລດ, ແລະໃຊ້ຮ່າງກາຍຂອງຕົນຂວາງຢູ່ຂ້າງໜ້າຂອງເຈົ້າຂອງ, ເພື່ອໃຫ້ເຈົ້າຂອງຮູ້ວ່າຢູ່ຕໍ່ໜ້າແມ່ນຂັ້ນໃດ, ຕ້ອງລະວັງ.
ຕາມໄດ້ຊາບ, ປັດຈຸບັນ ໝາພາທາງນັກກິລາຕາບອດໃຊ້ສະເພາະໃນງານກິລາໂອລິມປິກຄົນພິການປັກກິ່ງງວດທຳອິດທີ່ຝຶກຢູ່ທີ່ໝັ້ນຝຶກໝາດັ່ງກ່າວ, ລ້ວນແຕ່ຮູ້ພາທາງຂຶ້ນລົງຂັ້ນໃດແລະຫຼີກສິ່ງກີດຂວາງ, ປັດຈຸບັນ, ພວກເຂົາເຈົ້າໄດ້ເລີ່ມຝຶກໝາຮູ້ປ້າຍສັນຍານຈະລາຈອນຕ່າງໆແລ້ວ. ທາງມ້າລາຍ ທາງສຳລັບຄົນຕາບອດ ການສັງເກດຈຳນວນລົດສັນຈອນເປັນຕົ້ນ, ລ້ວນແຕ່ແມ່ນຕ້ອງຝຶກໃຫ້ໝາຮູ້ໝົດ. ຍ້ອນໝາຕາບອດສີແດງແລະສີຂຽວມາແຕ່ເກີດ,ຈະພາຄົນຕາບອດເດີນຜ່ານຖະໜົນທີ່ອາໃສລະບົບໄຟອຳນາດບໍ່ໄດ້. ສະນັ້ນ ການຊອກຫາທາງມ້າລາຍແລະສັງເກດເບິ່ງກະແສຄົນແລະລົດສັນຈອນນັ້ນ ຈຶ່ງກາຍເປັນຫຼັກອ້າງອີງຂອງມັນທີ່ຈະພາເຈົ້າຂອງເດີນຜ່ານຖະໜົນໄດ້ຫຼືບໍ່. ພາຍຫຼັງການຝຶກໝາພາທາງງວດນີ້ສຳເລັດຜົນແລ້ວ, ທີ່ໝັ້ນຝຶກໝາຈະໃຫ້ນັກກິລາບັນດາປະເທດທີ່ຈະເຂົ້າຮ່ວມງານກິລາໂອລິມປິກຄົນພິການມາຮັບລ້ຽງໝາພາທາງກ່ອນເວລາໄຂງານກິລາໂອລິມປິກເພື່ອລື້ງແກວ່ນກັບເຈົ້າຂອງ.
|
