|
|
 |
| (GMT+08:00)
2006-02-27 18:12:07
|
 |
|
ເພງພື້ນເມືອງເຜົ່າມົງໂກນທີ່ຂັບຮ້ອງໂດຍນາງເດີເດີມາ(ສຽງ)
cri
Author: shuo
|
ຍິນດີຕ້ອນຮັບທ່ານເຂົ້າສູ່ລາຍການນັດພົບໃນວັນອາທິດ.ຂ້າພະເຈົ້າແມ່ນດາລາວັນ.ໃນລາຍການພາກນີ້,ຂ້າພະເຈົ້າຈະຈັດເພງພື້ນເມືອງເຜົ່າມົງໂກນທີ່ຂັບຮ້ອງໂດຍນາງເດີເດີມາ ນັກຮ້ອງຊື່ດັງຂອງຈີນສູ່ທ່ານຟັງ.
ທີ່ທ່ານພວມຟັງຢູ່ນີ້ແມ່ນເພງtian shang de feng "ລົມຢູ່ເທິງທ້ອງຟ້າ".ເພງນີ້ມີທຳນອງທີ່ທຸ້ມເລິກແລະເນື້ອຮ້ອງມີຄວາມໝາຍເລິກເຊິ່ງ.ເພງນີ້ບອກຄົນເຮົາວ່າຕ້ອງຖະໜອມຫວງແຫນກາລະເວລາ,ສະແຫວງຫາອຸດົມການຂອງຕົນ.
ເນື້ອເພງຮ້ອງວ່າ: "ເມກເຝື້ອຢູ່ເທິງທ້ອງຟ້າຕ້ອງສະຫຼາຍຫາຍສູນ,ຢູ່ເທິງໜ້າດິນ,ອາຍຸຄົນເຮົາຈົ່ງອະມະຕະ,ພວກເຮົາຕ້ອງຖະໜອມຫວງແຫນກາລະເວລາທີ່ດີງາມ,ໃຫ້ຄວາມປາຖະໜາຂອງພວກເຮົາຈົ່ງບັນລຸຜົນເປັນຈິງ."
ນາງເດີເດີມາແມ່ນນັກຮ້ອງເຜົ່າມົງໂກນທີ່ຮັບຄວາມນິຍົມຊົມຊອບຜູ້ຟັງອັນກວ້າງໃຫຍ່ໄພ ສານ.ນາງເດີເດີມາຊ່າງຮ້ອງເພງຮູບແບບຕ່າງໆ,ທັງຊ່າງຮ້ອງເພງເຜົ່າມົງໂກນ,ທັງຊ່າງຮ້ອງເພງລະຄອນຝ່າຍຕາເວັນຕົກ.ຜ່ານການຄົ້ນຄວ້າເປັນເວລາດົນນານ,ນາງໄດ້ເອົາວິທີຂັບຮ້ອງຝ່າຍຕາເວັນຕົກປະສົມປະສານກັບວິທີຂັບຮ້ອງເພງສຽງຍາວເຜົ່າມົງໂກນ,ໄດ້ດັດແປງແລະພັດທະນາວິທີຂັບຮ້ອງແລະຂົງເຂດການສະແດງໃຫ້ສົມບູນຢ່າງບໍ່ຢຸດຢັ້ງບົນພື້ນຖານທີ່ຮັກສາຈຸດພິເສດຂອງຊົນເຜົ່າ,ຈູງໃຈຜູ້ຟັງດ້ວຍລົດຊາດພິເສດແລະກິ່ນອາຍຊີວິດອັນເຂັ້ມຂຸ້ນຂອງເຜົ່າມົງໂກນ,ຄ່ອຍໆຈໍ່ຕົວຂຶ້ນເປັນລັກສະນະສິລະປະອັນພິເສດຂອງຕົນ,ຄົນທັງຫຼາຍເອີ້ນນາງເປັນ "ນົກເຂົ້າໝີ້ນໃນທົ່ງຫຍ້າ".
ແຕ່ຊຸມປີ70ສະຕະວັດແລ້ວນີ້ຈົນຮອດປະຈຸບັນ,ນາງເດີເດີມາໄດ້ເຄື່ອນໄຫວຢູ່ບົນເວທີສະແດງດົນຕີຊົນເຜົ່າຂອງຈີນຢ່າງຂະຫຍັນຫ້າວຫັນ.ນາງຂັບຮ້ອງດ້ວຍສຽງທີ່ມີສະເໜພິເສດຂອງຕົນ,ວາດພາບທົ່ງຫຍ້າອັນກວ້າງຂວາງແລະຮາບພຽງ,ສັນລະເສີນໂສມໜ້າເຜົ່າມົງໂກນທີ່ຊື່ກົງແລະມີຄວາມກະຕືລືລົ້ນ,ສະແດງຄວາມຮັກແພງຕໍ່ທຳມະຊາດແລະຊີວິດ. ຕໍ່ໄປເຊີນຟັງເພງhe ying hua "ດອກເຮີອີ່ງ"ເພງເຜົ່າມົງໂກນທີ່ນາງຂັບຮ້ອງ.
ເນື້ອເພງຮ້ອງວ່າ:"ຖ້າເຈົ້າຖາມຂ້ອຍ,ບ້ານຂ້ອຍຢູ່ໃສ,ຕູບຜ້າທີ່ຢູ່ລະຫວ່າງກາງຕູບຜ້າສາມໜ່ວຍນັ້ນກໍແມ່ນແລ້ວ.ຖ້າວ່າເຈົ້າຖາມຂ້ອຍ,ຈັງຫວະກ້າວຂອງມ້າຂ້ອຍເປັນແນວໃດ,ມ້າ ໂຕນັ້ນທີ່ແລ່ນປານນ້ຳໄຫຼກໍແມ່ນມ້າລາຍນ້ອຍຂອງຂ້ອຍ."
ທີ່ທ່ານພວມຟັງຢູ່ນີ້ແມ່ນເພງ"ຕາກູລ່າ" ເພງເຜົ່າມົງໂກນທີ່ຂັບຮ້ອງໂດຍນາງເດີເດີມາ.ຕາກູລ່າແມ່ນຊື່ຂອງນາງສາວຜູ້ໜຶ່ງ,ເພງນີ້ໄດ້ສະແດງມິດຕະພາບອັນເລິກເຊິ່ງລະຫວ່າງຜູ້ຮ້ອງເພງກັບນາງຕາກູລ່າ.ເນື້ອເພງຮ້ອງວ່າ: "ເມກດຳເລື່ອນລອຍຢູ່ເທິງທ້ອງຟ້າ,ຈະມີຝົນຕົກ.ຂ້ອຍເປັນຫ່ວງວ່າອາດພັດພາກຈາກນາງຕາກູລ່າບໍ່?ເຖິງວ່າຕົ້ນໄມ້ກິນໝາກເຕັມພູ,ແຕ່ໂຕທີ່ມີໝາກໄມ້ບໍ່ມີຈັກຕົ້ນ,ເຖິງວ່າເອື້ອຍນ້ອງທີ່ຮູ້ຈັກກັນມີຫຼາຍ,ແຕ່ຜູ້ຮູ້ໃຈນັ້ນມີແຕ່ນາງຕາກູລ່າເທົ່ານັ້ນ."
ໃນ30ປີມານີ້,ນາງເດີເດີມາໄດ້ຮ້ອງເພງເຜົ່າມົງໂກນຈຳນວນຫຼວງຫຼາຍ,ໃນສຽງຮ້ອງຂອງນາງ,ທ່ານສາມາດຮູ້ສຶກຄວາມສວຍງາມຂອງທົ່ງຫຍ້າແລະກິ່ນຫອມຂອງຊານົມ.ທ້າຍນີ້,ເຊີນທ່ານຟັງເພງliao kuo de cao yuan "ທົ່ງຫຍ້າທີ່ກວ້າງສຸດສາຍຕາ"ທີ່ນາງຂັບຮ້ອງ.ນີ້ແມ່ນເພງພື້ນເມືອງສຽງຍາວເຜົ່າມົງໂກນທີ່ຊື່ດັງເພງໜຶ່ງ,ເພງນີ້ມີທຳນອງທີ່ສະຫງ່າອົງອາດ,ຈັງຫວະເສລີ,ໄດ້ບັນລະຍາຍຜູ້ບ່າວລ້ຽງສັດຄິດຮອດຄິດເຖິງແລະຮັກແພງຄູ່ຮັກຂອງຕົນ.
ເນື້ອເພງຮ້ອງວ່າ:"ເຖິງວ່າມີທົ່ງຫຍ້າທີ່ກວ້າງສຸດສາຍຕາ,ແຕ່ບໍ່ຮູ້ຢູ່ໃສມີບວກຕົມ.ເຖິງວ່າມີ ນາງສາວທີ່ສວຍງາມ,ແຕ່ບໍ່ຮູ້ຄວາມມຸ່ງຫວັງຂອງນາງ."
|
|
|
