|
|
 |
| (GMT+08:00)
2006-03-01 16:29:19
|
 |
|
ທ່ານປ້າວສີຊຸ້ນ ຊາວລ້ຽງສັດເຜົ່າມົງໂກນທີ່ເປັນຄົນສູງກວ່າໝູ່ໃນໂລກ
cri
|
ຢູ່ເຂດມົງໂກໃນປົກຄອງຕົນເອງ ພາກເໜືອຂອງຈີນ ມີຊາວລ້ຽງສັດເຜົ່າມົງໂກນຜູ່ໜຶ່ງຊື່ວ່າປ້າວສີຊຸ້ນ,ລາວສູງ2,361ແມັດ,ຍ້ອນສູງໂພດ,ບໍ່ໄດ້ຮັບຄວາມຮັກຂອງນາງສາວຈັກເທື່ອ,ຈົນຮອດປັດຈຸບັນ,ລາວອາຍຸ50ກວ່າປີແລ້ວຍັງເປັນໂສດຢູ່,ລາວເຄີຍໝົກຢູ່ໃນເຮືອນ30ກວ່າປີ,ບໍ່ຢາກພົບໜ້າກັບຄົນນອກ.ປີກາຍນີ້,ລວງສູງຂອງທ່ານປ້າວສີຊຸ້ນໄດ້ຮັບຄວາມຮັບຮອງຈາກສະຖິຕິໂລກກີເນັສ,ຄືໄດ້ຮັບນາມມະຍົດເປັນຜູ່ສູງສຸດທີ່ເຕີບໃຫຍ່ຕາມທຳມະຊາດໃນໂລກ.ຈາກນັ້ນມາ,ຊີວິດຂອງທ່ານປ້າວສີຊຸ້ນກໍໄດ້ເກີດມີການປ່ຽນແປງ.ໃນລາຍການຊົນເຜົ່າສ່ວນໜ້ອຍມື້ນີ້,ພວກເຮົາຈະແນະນຳຜູ່ສູງສຸດໃນໂລກຜູ່ນີ້ສູ່ທ່ານຟັງ.
ທ່ານປ້າວສີຊຸ້ນເກີດຢູ່ໃນຄອບຄົວຊາວລ້ຽງສັດຢູ່ທົ່ງຫຍ້າເຂດມົງໂກນໃນ ພາກເໜືອຂອງຈີນ.ໃນເວລາທ່ານມີອາຍຸ15ປີ,ຮ່າງກາຍຂອງທ່ານເລີ່ມເຕີບໃຫຍ່ໄວພະລັນຢ່າງກະທັນຫັນ,ເມື່ອຮອດອາຍຸ20ປີກໍສູງ2,1ແມັດແລ້ວ.ແຕ່ວ່າປ້າວສີຊຸ້ນທີ່ເປັນຊາວໜຸ່ມພັດບໍ່ຮູ້ສຶກດີໃຈຍ້ອນຮ່າງກາຍໃຫຍ່ສູງ,ກົງກັນຂ້າມພັດຮູ້ສຶກບໍ່ສະດວກທຸກຢ່າງ.ກິນເຂົ້າຫຼາຍ,ເຄື່ອງນຸ່ງກໍຕ້ອງການແຜ່ນແພຫຼາຍ,ໄປຮອດໃສກໍບໍ່ມີຕຽງທີ່ເໝາະກັບລາວ,ຢູ່ນອກເຮືອນກໍຖືກຝູງຄົນຫຸ້ມລ້ອມເບິ່ງ.ທ່ານເວົ້າວ່າ:
"ໃນຄາວນັ້ນ,ຂ້າພະເຈົ້າສູງກວ່າຜູ່ອື່ນ,ມື້ໃດກໍມີຄົນມາເບິ່ງຂ້າພະເຈົ້າ,ຂ້າພະເຈົ້າບໍ່ດີໃຈ,ພາຍຫຼັງອາຍຸ20ປີແລ້ວ,ຂ້າພະເຈົ້າຍິ່ງບໍ່ຢາກພົບກັບຄົນນອກ.ລວງສູງເຮັດໃຫ້ຂ້າພະເຈົ້າຮູ້ສຶກຖືກກຳລັງໜີບເປັນພິເສດ,ຜູ່ອື່ນບໍ່ໄດ້ໃຫຍ່ຄືຂ້າພະເຈົ້າ,ເປັນຫຍັງຂ້າພະເຈົ້າຈິ່ງໃຫຍ່ສູງແນວນັ້ນ,ມັນຕ້ອງແມ່ນຍ້ອນເປັນພະຍາດແລ້ວ."
ໃນເວລາອາຍຸ20ກວ່າປີ,ທ່ານປ້າວສີຊຸ້ນກໍເຄີຍໄປຫາທ່ານໝໍ.ແຕ່ຜົນການກວດແມ່ນ,ເພິ່ນພຽງແຕ່ເປັນພະຍາດປະດົງຄໍ່ເບົາຢູ່ຂາທໍ່ນັ້ນ,ແນວອື່ນເປັນປົກກະຕິໝົດ.
ຜູ່ບ່າວທີ່ອາຍຸ20ກວ່າປີໄດ້ຮອດເວລາຫາເມຍແລ້ວ,ຜ່ານຈາກຜູ່ອື່ນແນະນຳ,ທ່ານປ້າວສີຊຸ້ນໄດ້ພົບໜ້າກັບນາງສາວຫຼາຍຄົນທີ່ຢູ່ບ້ານໃກ້ແຕ່ເມື່ອໄດ້ເຫັນວ່າທ່ານປ້າວສີຊຸ້ນສູງ2ແມັດປາຍ,ຕ້ອງເງີຍໜ້າຈິ່ງເຫັນໜ້າຂອງທ່ານໄດ້,ພວກນາງສາວລ້ວນແຕ່ກ່າວວ່າບໍ່ຍອມເປັນແຟນຂອງທ່ານ.ທ່ານປ້າວສີຊຸ້ນມີນິໃສຂີ້ອາຍ,ບັດນີ້ຍິ່ງນ້ອຍໃຈກວ່າເກົ່າ.ທ່ານຢ້ານວ່າຜູ່ອື່ນເບິ່ງລາວຄືໂຕສັດ,ສະນັ້ນ,ຈິ່ງບໍ່ສູ້ອອກຈາກເຮືອນ.
ໃນຄອບຄົວມີ5ອ້າຍເອື້ອຍນ້ອງ,ທ່ານປ້າວສີຊຸ້ນເປັນລູກຫຼ້າ,ຄົນໃນຄອບຄົວແພງລາວທີ່ສຸດ.ທ່ານບໍ່ຍອມອອກໄປເຮັດວຽກ,ຄົນໃນຄອບຄົວຈິ່ງໃຫ້ລາວເຮັດວຽກຢ້າວການເຮືອນແຕ່ເມື່ອເປັນແນວນັ້ນ,ນິໄສຂອງທ່ານປ້າວສີຊຸ້ນກໍຍິ່ງດຶກໃນກວ່າເກົ່າ.ແຕ່ເດີມ,ທ່ານປ້າວສີຊຸ້ນຄຶດວ່າຕົນເອງຈະດຳລົງຊີວິດຢ່າງເປົ່າປ່ຽວຢູ່ທົ່ງຫຍ້າຕະຫຼອດຊີວິດ.ແຕ່ເດືອນກັນຍາປີ2004,ພໍ່ຄ້າຜູ່ໜຶ່ງໄດ້ຮູ້ວ່າທ່ານສູງພິລຶກ,ເລີຍໄປຢາມທ່ານປ້າວສີຊຸ້ນໃນເຮືອນຕັ້ງຫຼາຍເທື່ອ,ຈ້າງທ່ານເປັນຜູ່ໂຄສະນາຂອງຮ້ານອາຫານໝໍ້ສະກີຂອງເຂົາ.ຮ້ານນັ້ນແມ່ນຕັ້ງຢູ່ໃນເມືອງຊື້ເຟິງ ທາງພາກຕາເວັນອອກເຂດມົງໂກໃນປົກຄອງຕົນເອງ.ໃນຫົວທີ່,ໝົດຄອບຄົວບໍ່ເຫັນດີໃຫ້ທ່ານປ້າວສີຊຸ້ນອອກໄປ,ຢ້ານລາວບໍ່ລື້ງເຄີຍກັບຊີວິດການເປັນຢູ່ພາຍນອກ.ແຕ່ເມື່ອໄດ້ກຶກກອງຫຼາຍເທື່ອແລ້ວ,ທ່ານຕັດສິນໃຈໄປເບິ່ງໂລກພາຍນອກສາກ່ອນ.
ບໍ່ນຶກບໍ່ຝັນວ່າ,ເມື່ອທ່ານປ້າວສີຊຸ້ນເປັນຜູ່ໂຄສະນາແລ້ວ,ຮ້ານອາຫານໝໍ້ສະກີທີ່ແຕ່ເດີມບໍ່ມີລູກຄ້າຫຼາຍປານໃດມາອຸດໜູນນັ້ນພາຍໃນບໍ່ເທົ່າໃດມື້ຊ້ຳ ພັດໄດ້ແໜ້ນອັ່ງ.ການທີຄົນທັງຫຼາຍຍາດກັນໄປກິນຢູ່ຮ້ານນັ້ນ,ພຽງແຕ່ເພື່ອຢາກເບິ່ງໜ້າຂອງຄົນໃຫຍ່ສູງຜູ່ນີ້ເທົ່ານັ້ນ.
ແນວນີ້ແຫຼະ,ທ່ານປ້າວສີຊຸ້ນທີ່ແຕ່ເດີມງຽບໆຢູ່ບໍ່ມີໃຜຮູ້ນັ້ນໄດ້ກ້າວເຂົ້າສູ່ຕົວເມືອງທີ່ອຶກກະທຶກຄຶກຄື້ນ,ກາຍເປັນຄົນຜູ່ໜຶ່ງທີ່ມີຊື່ສຽງດົ່ງດັງ.ທ່ານໄດ້ໃສ່ເກີບໜັງໃໝ່ທີ່ສັ່ງເຮັດເປັນເທື່ອທຳອິດ,ທ່ານໄດ້ຢູ່ຫ້ອງເປັນຂອງຕົນທີ່ບໍ່ຕ້ອງກົ້ມຫົວກໍເຂົ້າອອກໄດ້ສະດວກເປັນເທື່ອທຳອິດ,ທ່ານຍັງໄດ້ຂີ່ຍົນໄປທ່ຽວນະຄອນຮອດຮອດ ເທດສະບານເຂດປົກຄອງຕົນເອງເປັນເທື່ອທຳອິດ.
ປັດຈຸບັນ,ນັກຂ່າວໄດ້ສັງເກດເຫັນວ່າ,ທ່ານປ້າວສີຊຸ້ນມີນິໄສເປີດອົກເປີດ ໃຈ,ເຖິງວ່າພາສາຮັ້ນເວົ້າບໍ່ແຈ້ງປານໃດ,ແຕ່ມັກປາກມັກເວົ້າທີ່ສຸດ.ທ່ານປ້າວສີຊຸ້ນທີ່ມີຮ່າງໃຫຍ່ສູງໄດ້ນັ່ງຂັດຕະໝາດຢູ່ເທິງຕຽງໃຫຍ່ພິລຶກ,ທັງສູບຢາທັງລົມກັບນັກຂ່າວ,ທັງມີໃບໜ້າຍິ້ມແຍ້ມອ່ອນໂຍນໂດຍຕະຫຼອດ.ທ່ານຊິ້ວເສິງ ພີ່ນ້ອງຂອງທ່ານປ້າວສີຊຸ້ນບອກນັກຂ່າວວ່າ,ປັດຈຸບັນ,ທ່ານປ້າວສີຊຸ້ນບໍ່ພຽງແຕ່ເປີດຫູເປີດຕາຫຼາຍກວ່າເກົ່າເທົ່ານັ້ນ,ນິໄສກໍປ່ຽນແລ້ວ.
"ແຕ່ກ່ອນ,ປ້າວສີຊຸ້ນດຶກໃນທີ່ສຸດ,ແຕ່ດຽວນີ້ບໍ່ຄືແຕ່ກ່ອນແລ້ວ,ລາວມັກຜູກມິດທີ່ສຸດ,ໃນຍາມບຸນກຸດຈີນທ່ານເມືອບ້ານຢູ່10ຫາ15ມື້,ກໍຢູ່ບໍ່ໄດ້ແລ້ວ,ຢູ່ບໍ່ຢູ່ກໍໄປທ່ຽວຢູ່ນອກເຮືອນ,ຢູ່ບໍ່ຢູ່ກໍໄປຫຼິ້ນໄພ້."
ໃນທ້າຍປີ2004,ໃຕ້ການຊ່ອຍເຫຼືອຂອງສື່ມວນຊົນ,ທ່ານປ້າວສີຊຸ້ນຕົກລົງຮ້ອງຂໍເປັນສະຖິຕິໂລກກີເນັສທີ່ເປັນຄົນສູງສຸດທີ່ເຕີບໃຫຍ່ຕາມທຳມະຊາດໃນໂລກ.ເດືອນກໍລະກົດປີ2005,ເມື່ອໄດ້ກວດກາຄວາມສູງແລະສຸຂະພາບຂອງທ່ານປ້າວສີຊຸ້ນຢ່າງເອົາຈິງເອົາຈັງແລ້ວ,ສຳນັກງານໃຫຍ່ສະຖິຕິໂລກກີເນັສເຫັນວ່າທ່ານປ້າວສີຊຸ້ນມີສຸຂະພາບເຂັ້ມແຂງ,ເລີຍມອບໃບຢັ້ງຢືນຄົນສູງສຸດທີ່ເຕີບໃຫຍ່ຕາມທຳມະຊາດໃນໂລກໃຫ້ທ່ານ.
ປັດຈຸບັນ,ທ່ານປ້າວສີຊຸ້ນໄດ້ນຸ່ງຊຸດເຜົ່າມົງໂກນສີຟ້າທີ່ໃຫຍ່ພິລຶກໄປເຂົ້າຮ່ວມການເຄື່ອນໄຫວໂຄສະນາສາທາລະນະປະໂຫຍດຢູ່ແຫ່ງຕ່າງໆ.ບໍ່ພຽງແຕ່ເທົ່ານັ້ນ,ທ່ານຍັງໄດ້ຮັບເຊີນໄປເຂົ້າຮ່ວມການເຄື່ອນໄຫວແລກປ່ຽນວັດທະນະທຳຢູ່ຕ່າງປະເທດ.ເມື່ອຢູ່ນອກດົນແລ້ວ,ທ່ານປ້າວສີຊຸ້ນກໍຄິດຮອດຄິດເຖິງຄົນໃນ ຄອບຄົວຫຼາຍ,ໂດຍສະເພາະແມ່ນພໍ່ທີ່ມີອາຍຸ93ປີ.ທ່ານເວົ້າວ່າ,ຫວ່າງມໍ່ໆນີ້,ທ່ານໄດ້ປຸກເຮືອນໃຫຍ່ພິລຶກໃນບ້ານເກີດ,ພໍ່ແລະອ້າຍຫຼາຍຄົນໄດ້ຍ້າຍໄປຢູ່ເຮືອນໃໝ່ແລ້ວ.ນອກນີ້,ທ່ານຍັງຢາກປະກອບສ່ວນເພື່ອບ້ານເກີດເມືອງນອນ.ທ່ານເວົ້າວ່າ:
"ຢູ່ບ້ານຂ້າພະເຈົ້າ,ທາງບໍ່ດີ,ເປັນທາງຫີນນ້ອຍ.ຂ້າພະເຈົ້າຢາກເຮັດເລື່ອງດີເພື່ອບ້ານເກີດ,ສ້າງທາງປູຢາງໃຫ້ຄົນລຸ້ນຫຼັງຈື່ໄວ້ວ່າ,ມີຄົນໃຫຍ່ສູງຜູ່ໜຶ່ງເຄີຍໄດ້ເຮັດເລື່ອງດີເພື່ອລຸ້ນຫຼັງ.ນອກນີ້,ບາງຄອບຄົວຍັງທຸກຍາກຢູ່,ແຕ່ລູກຫຼານເຂົາເຈົ້າຮໍ່າຮຽນໄດ້ດີ,ຂ້າພະເຈົ້າຢາກອຸປະຖຳພວກເຂົາເຈົ້າໃຫ້ໄດ້ຮຽນໜັງສືຫຼາຍກວ່າເກົ່າ."
|
|
|
