|
ໃນຊີວິດວັດທະນະທຳສິລະປະຂອງປັກກິ່ງທີ່ມີການປ່ຽນແປງຄູ່ມື້ແລະມີເນື້ອໃນຫຼາຍຮູບຫຼາຍສີ,ຫໍພິພິດທະພັນວິຈິດຕະກຳຈີນໃນຖານເປັນຫໍພິພິດທະພັນວິຈິດຕະກຳລະດັບຊາດພຽງແຫ່ງດຽວຂອງຈີນໄດ້ເສີມຂະຫຍາຍບົດບາດທີ່ສຳຄັນທີ່ສຸດ,ການເຄື່ອນໄຫວສິລະປະຈຳນວນຫຼວງຫຼາຍທີ່ສ່ອງແສງໃຫ້ເຫັນທ່ວງທ່າສິລະປະຂອງຈີນແລະຂອງໂລກໄດ້ຈັດຂຶ້ນຢູ່ຫໍພິພິດທະພັນດັ່ງກ່າວ.
ປີນີ້,ຫໍພິພິດທະພັນວິຈິດຕະກຳຈີນໄດ້ຈັດລາຍການວາງສະແດງສິ່ງຍອດຢ້ຽມຈີນແລະຕ່າງປະເທດ115ລາຍ.ປັດຈຸບັນ,ພວມຈັດງານວາງສະແດງຫຼາຍລາຍເຊັ່ນວິຈິດຕະກຳພື້ນເມືອງ,ຮູບແຕ້ມສີນ້ຳມັນ,ຮູບຖ່າຍຂອງຈີນເປັນຕົ້ນ.ເລີ່ມແຕ່ເດືອນມີນາເປັນຕົ້ນໄປ,ຫໍພິພິດທະພັນວິຈິດຕະກຳຈີນຈະຈັດງານວາງສະແດງສິ່ງຍອດຢ້ຽມຕ່າງປະເທດຢ່າງເປັນລະບົບເຊັ່ນງານວາງສະແດງສິລະປະກຳຍອດຢ້ຽມຣັດເຊຍ,ງານວາງສະແດງແກ້ວຜະລຶກຝະຣັ່ງ,ງານວາງສະແດງສິລະປະກຳຍຸກປັດຈຸບັນຂອງແມັກຊິກ,ງານວາງສະແດງສິນລະປະສະຖາປັດຕະຍະກຳຍຸກປັດຈຸບັນຂອງໂອຕຼິສເປັນຕົ້ນ,ງານວາງສະແດງເຫຼົ່ານີ້ຈະຈັດຂຶ້ນຢູ່ຫໍວິຈິດຕະກຳຈີນຢ່າງເປັນລຳດັບ,ຜູ້ຊົມຈີນຈະໄດ້ຊົມເບິ່ງອາຫານຕາເຫຼົ່ານີ້ຢ່າງອີ່ມຫູອີ່ມຕາ.
ຫິພິພິດທະພັນວິຈິດຕະກຳຈີນຕັ້ງຢູ່ໃຈກາງເມືອງປັກກິ່ງ,ແປະກັບພະລາດຊະວັງກູ້ກົງທີ່ມີຊື່ສຽງດົ່ງດັງໃນໂລກ.ຍ່າງຕາມກຳແພງຫຼັງພະລາຊະວັງກູ້ກົງໄປທາງທິດຕາເວັນອອກ,ກໍຈະໄດ້ເຫັນຕຶກໃຫຍ່ທີ່ປະຈັກຕາຂອງຫໍພິພິດທະພັນວິຈິດຕະກຳຈີນ,ຊາຍຄາເຮືອນທີ່ງໍຂຶ້ນແບບບູຮານ,ຫຼັງຄາເຮືອນທີ່ມຸງດ້ວຍດິນຂໍສີເຫຼືອງ,ຢູ່ອ້ອມແອ້ມຕຶກໃຫຍ່ຍັງມີລະບຽງແລະສາລາ,ມີຕົ້ນໄມ້ອ້ອມຮອບ,ໝົດອາຄານມີເອກະລັກພິເສດຂອງສິ່ງກໍ່ສ້າງດັ້ງເດີມຂອງຈີນຢ່າງເດັ່ນຊັດ,ຄືສະຫງ່າງາມ,ເຄັ່ງຂຶມ,ລຽບງ່າຍແບບບູຮານແລະມີກິ່ນອາຍຍຸກປັດຈຸບັນ.ເຊິ່ງເປັນສິ່ງກໍ່ສ້າງສັນຍະລັກຫຼັງໜຶ່ງທີ່ມີຊື່ສຽງໃນນະຄອນປັກກິ່ງ.
ຢູ່ຈີນໃນຊູ່ມື້ນີ້,ຫໍພິພິດທະພັນແລະຫໍວາງສະແດງທຸກປະເພດທີ່ທັນສະໄໝແລະມີຫຼາຍຮູບຫຼາຍແບບໄດ້ປະກົດຕົວອອກຢ່າງບໍ່ຢຸດຢັ້ງ,ແຕ່ວ່າ,ຫໍພິພິດທະພັນວິຈິດຕະກຳຈີນພັດໄດ້ເປັນສູນວາງສະແດງທ່ວງທ່າຂະຫຍາຍຕົວຂອງສິລະປະຈີນຕະຫຼອດມາ,ແລະເປັນປ່ອງຢ້ຽມສຳຄັນແຫ່ງໜຶ່ງທີ່ຈີນດຳເນີນການແລກປ່ຽນດ້ານວັດທະນະທຳກັບໂລກ.
ທີ່ຈິງແລ້ວ,ຫໍພິພິດທະພັນວິຈິດຕະກຳຈີນໃນຖານເປັນຫໍພິພິດທະພັນວິຈິດຕະກຳລະດັບຊາດພຽງແຫ່ງດຽວຂອງຈີນ,ກໍມີຄວາມໝາຍສັນຍະລັກໃນໃຈຂອງວິຈິດຕະກອນແລະຜູ່ນິຍົມຈິດຕະກຳຂອງຈີນ.ຈິດຕະກອນຫຼາຍໆຄົນໄດ້ຖືການຈັດງານວາງສະແດງຂອງຕົນຢູ່ຫໍພິພິດທະພັນວິຈິດຕະກຳຈີນເປັນກຽດສັກສີພິເສດໃນຊີວິດຂອງຕົນ.ທ່ານຟ້ານຕີອານ ຫົວໜ້າຫໍພິພິດທະພັນວິຈິດຕະກຳຈີນກ່າວວ່າ: "ຂ້າພະເຈົ້າເຫັນວ່ານີ້ແມ່ນຍ້ອນບົດບາດຂອງມູນເຊື້ອທີ່ວົງການວິຈິດຕະກຳເອົາໃຈໃສ່ນຳວັດທະນະທຳ,ແລະແບບແຜນຂອງສັງຄົມ,ແມ່ແທ້,ເມື່ອປະເຊີນກັບປະກົດການວິຈິດຕະກຳທີ່ຄຶກຄັກໃນຊູ່ມື້ນີ້,ຜ່ານຈາກການຄັດເລືອກດ້ານວິຊາການແລະວັດທະນະທຳຂອງຫໍພິພິດທະພັນພວກເຮົາແລະຜູ່ຊ່ຽວຊານດ້ານຕ່າງໆ,ເຮັດໃຫ້ງານວາງສະແດງສາມາດກາຍເປັນທ່ວງທ່າດ້ານວິຊາການແຫ່ງການຂະຫຍາຍຕົວຂອງວິຈິດຕະກຳໃນຊູ່ມື້ນີ້."
ແຕ່ຊຸມປີ80ສະຕະວັດແລ້ວນີ້ຮອດປັດຈຸບັນ,ຫໍພິພິດທະພັນວິຈິດຕະກຳຈີນໄດ້ຈັດງານວາງສະແດງວິຈິດຕະກຳທຸກປະເພດແລະງານວາງສະແດງສິລະປະກຳຂອງຈິດຕະກອນທີ່ມີຊື່ສຽງຂອງຈີນແລະຕ່າງປະເທດຕັ້ງ3000ກວ່າເທື່ອ,ງານວາງສະແດງລັກສະນະທົ່ວປະເທດທີ່ມີອິດທິພົນເກືອບໄດ້ຈັດຂຶ້ນຢູ່ຫໍດັ່ງກ່າວທັງໝົດ,ງານວາງສະແດງສິ່ງຍອດຢ້ຽມຕ່າງປະເທດທີ່ມີລະດັບສູງກໍໄດ້ຈັດຂຶ້ນຢູ່ແຫ່ງນີ້ຄືກັນ.
ກຳລັງດຶງດູດແລະອິດທິພົນຂອງຫໍພິພິດທະພັນວິຈິດຕະກຳຈີນໃນວົງການວິຈິດຕະກຳແມ່ນແຍກອອກຈາກເຄື່ອງສິລະປະກຳອຸດົມສົມບູນທີ່ເຂົາສະສົມໄວ້ນັ້ນບໍ່ໄດ້.ຈຳນວນປະເພດແລະຄຸນນະພາບຂອງສິລະປະກຳໃນຫໍພິພິດທະພັນວິຈິດຕະກຳຈີນສະສົມນັ້ນໄດ້ມີທ່າແຮງທີ່ບໍ່ມີໃຜປຽບທຽບໄດ້ໃນປະເທດຈີນ.ປັດຈຸບັນ,ຫໍດັ່ງກ່າວໄດ້ສະສົມເຄື່ອງສິລະປະກຳທຸກປະເພດ7ໝື່ນກວ່າເຄື່ອງ,ຕົ້ນຕໍແມ່ນເຄື່ອງສິລະປະກຳຍອດຢ້ຽມໃນສະໄໝມໍ່ແລະປັດຈຸບັນ,ໃນນັ້ນ,ສ່ວນຫຼາຍແມ່ນເຄື່ອງວິຈິດຕະກຳຂອງຈິດຕະກອນທີ່ສ້າງຜົນສະທ້ອນສຳຄັນຕໍ່ຮູບແຕ້ມດັ້ງເດີມຂອງຈີນໃນສະຕະວັດທີ20.
ໃນເຄື່ອງສິລະປະກຳຕ່າງໆຂອງຫໍພິພິດທະພັນວິຈິດຕະກຳ,ທ່ານລູເຕີວິກພ້ອມດ້ວຍພັນລະຍາ ນັກສະສົມເຢຍລະມັນໄດ້ມອບເຄື່ອງສິລະປະກຳເອີລົບອາເມລິກາ117ເຄື່ອງໃຫ້ຫໍດັ່ງກ່າວ,ໃນນັ້ນ,ມີຮູບແຕ້ມຂອງທ່ານປີກັສໂຊ4ແຜ່ນ.ນີ້ແມ່ນຈີນສະສົມເຄື່ອງສິລະປະຝ່າຍຕາເວັນຕົກຈຳນວນຫຼວງຫຼາຍເປັນຄັ້ງທຳອິດ.ຈິດຕະກອນຂອງຫຼາຍປະເທດ ເຊັ່ນສ.ເກົາຫຼີ ຍີ່ປຸ່ນ ອິສຣາແອນ ອາກຊັງຕີນ ຝະຣັ່ງແລະອາເມລິກາເປັນຕົ້ນກໍໄດ້ບໍລິຈາກຜົນງານໃຫ້ຫໍພິພິດທະພັນວິຈິດຕະກຳຈີນ.ອາຈານໃຫຍ່ດ້ານສິລະປະແລະຈິດຕະກອນຊື່ດັງອັນໄພສານຂອງຈີນກໍພາກັນບໍລິຈາກໃຫ້ຫໍພິພິດທະພັນວິຈິດຕະກຳຈີນ.ປີ2005,ຫໍພິພິດທະພັນວິຈິດຕະກຳຈີນລວມໄດ້ຮັບຜົນງານບໍລິຈາກ6400ກວ່າເຄື່ອງ.
ທ່ານຟ້ານຕີອ່ານ ຫົວໜ້າຫໍພິພິດທະພັນວິຈິດຕະກຳຈີນເວົ້າວ່າ:"ພວກຂ້າພະເຈົ້າຄິດວ່າ,ເລີ່ມແຕ່ປີ2006,ຈຸດປະສົງຂອງຫໍພິພິດທະພັນວິຈິດຕະກຳຈີນແມ່ນຈຳນວນການວາງສະແດງຈະຫຼຸດໜ້ອຍລົງ,ແລະຍົກຄຸນນະພາບການວາງສະແດງໃຫ້ສູງຂຶ້ນ,ຍາດແຍ່ງໃຫ້ນັບມື້ນັບສູງຂຶ້ນ,ນີ້ບໍ່ພຽງແຕ່ແມ່ນເປົ້າໝາຍຂອງຫໍພິພິດທະພັນວິຈິດຕະກຳເອງເທົ່ານັ້ນ,ຫາກຍັງແມ່ນຄວາມປາຖະໜາຂອງວົງການວິຈິດຕະກຳອີກດ້ວຍ.ສະນັ້ນ,ຕ້ອງຍາດແຍ່ງໃຫ້ມີຄຸນນະພາບຍິ່ງດີກວ່າເກົ່າ,ປະຖົມປັດໄຈແມ່ນຫຼຸດຈຳນວນການວາງສະແດງໃຫ້ໜ້ອຍລົງ,ແຕ່ໃຫ້ດີຂຶ້ນກວ່າເກົ່າ."
ປະຈຸບັນ,ຫໍພິພິດທະພັນວິຈິດຕະກຳຈີນໄດ້ຕິດຕໍ່ພົວພັນຢ່າງກວ້າງຂວາງກັບຫໍພິພິດທະພັນວິຈິດຕະກຳວິດນີຂອງອາເມລິກາ ຫໍພິພິດທະພັນວັນກໍຂອງໂຮນລັງ ຫໍລູເວຼີ ຫໍແວກຊາຍແລະສູນສິລະປະຊອກສ໌ປອມປີດູຂອງຝະຣັ່ງ ຫໍພິພິດທະພັນລອນດອນຂອງອັງກິດແລະສ.ເກົາຫຼີ ສະໂລວາກີແລະແຟງລັງເປັນຕົ້ນ,ໄດ້ບັນລຸຄວາມຈຳນົງຂອງການຮ່ວມມືໃນຂັ້ນພື້ນຖານກ່ຽວກັບການເຄື່ອນໄຫວແລກປ່ຽນວັດທະ ນະທຳໃນປີນີ້ແລະປີໜ້າ.ຕາມແນະນຳວ່າ,ໂຄງການສ້າງຂະຫຍາຍຫໍພິພິດທະພັນວິຈິດຕະກຳຈີນຈະລົງມືກໍ່ສ້າງໃນໄວໆນີ້,ຈະສ້າງຂະຫຍາຍຫໍໃໝ່ປະມານ4ໝື່ນຕາລາງແມັດ,ເນື້ອທີ່ເທົ່າກັບ1,5ເທົ່າຂອງຫໍເກົ່າ.ຮອດເວລານັ້ນ,ຫໍພິພິດທະພັນວິຈິດຕະກຳຈີນຈະກາຍເປັນຫໍພິພິດທະພັນວິຈິດຕະກຳລະດັບສາກົນທີ່ສາມາດຈັດການເຄື່ອນໄຫວແລກປ່ຽນດ້ານວິຈິດຕະກຳສາກົນຂະໜາດໃຫຍ່,ແລະຈະກາຍເປັນສູນຊົມເບິ່ງເຄື່ອງສິລະປະແລະລື້ນເລີງທີ່ເປີດປະຕູ ງາມລຽບແລະມີຄວາມສະໜິດສະໜົມ,ເພື່ອຕ້ອນຮັບ ງານກິລາໂອລິມປິກປັກກິ່ງປີ2008.
|
