|
|
 |
| (GMT+08:00)
2006-03-01 20:38:26
|
 |
|
ທ່ານລີຊັ່ນກັບເພງຂອງທ່ານ(ສຽງ)
cri
Author: mo
|
ທ່ານລີຊັນແມ່ນນັກຮ້ອງພິເສດເທິງເວທີເພງຈີນ, ວ່າທ່ານເປັນນັກຮ້ອງພິເສດ, ບໍ່ພຽງແຕ່ທ່ານເປັນຄົນພິການມາແຕ່ນ້ອຍ, ເວລາຮ້ອງເພງຕ້ອງສັກໄມ້ຄ້ອນເທົ້າທັງສອງເບື້ອງທໍ່ນັ້ນ, ວິທີຮ້ອງເພງຂອງທ່ານກໍພິເສດຄືກັນ, ໄດ້ຮັບຄວາມນິຍົມຊົມຊອບຈາກຜູ້ຟັງທັງຫລາຍ. ຕົ້ນປີ2005, ທ່ານລີຊັ່ນໄດ້ອັດCDແຜ່ນທີສາມທີ່ໃຫ້ຊື່ວ່າ"Gu du de xiao chuan"ແປວ່າ"ເຮືອນ້ອຍທີ່ປ່ຽວພອຍ". ໃນລາຍການມື້ນີ້, ແສງແກ້ວຂໍແນະນຳເພງມ່ວນໆໃນCDແຜ່ນນີ້ສູ່ທ່ານຟັງ.
ທີ່ທ່ານພວມຟັງຢູ່ນີ້ແມ່ນເພງ"Qiu si" ຄວາມຄິດຮອດໃນລະດູໃບໄມ້ຫຼົ່ນ, ຂັບຮ້ອງໂດຍທ່ານລີຊັ່ນ. ເພງນີ້ມີເນື້ອຮ້ອງວ່າ: ເດິກແລ້ວ, ລົມພັດ, ໝອກນ້ຳກ້ກຸ້ມກົ້ວ, ຈຶ່ງຮູ້ວ່າ ປີໜຶ່ງໄດ້ຜ່ານໄປອີກແລ້ວ. ຫວນຄຶດປະສົບການຜ່ານມາ, ຄວາມຄິດຮອດຄິດເຖິງຫາຍສາບສູນ. ຄວາມຝັນພາເຈົ້າມາຫາຂ້ອຍ, ຝັນເຫັນສອງຄົນເຮົາຮັກກັນຄືແຕ່ກ່ອນ. ເມື່ອຕື່ນແລ້ວຈຶ່ງຮູ້ວ່າທຸກຢ່າງຍັງຄືເກົ່າ, ມີແຕ່ລົມພັດມາ, ເຮັດໃຫ້ຄິດຮອດເຫຼືອພັນລະນາ"
ທີ່ຟັງມານັ້ນແມ່ນເພງ"Qiu si" ຄວາມຄິດໃນລະດູໃບໄມ້ຫຼົ່ນ ໃນCDແຜ່ນໃໝ່ຂອງທ່ານລີຊັ່ນ.
ຂ້ອຍແມ່ນເຮືອນ້ອຍທີ່ປ່ຽວພອຍ, ຝັກໃຝ່ຢາກມີທ່າເຮືອທີ່ອົບອຸ່ນ. ບໍ່ວ່າຈະກວງໄກຢູ່ຂອບຟ້າ, ຂ້ອຍກໍຈະພາຍຄືນມາທຽບທ່າ, ເລົ່າຄວາມຄິດຮອດໃນທ່າມກາງລົມຟອງ, ແລ້ວຈຶ່ງຊັກໃບເຮືອໄປພະເນຈອນເທື່ອໃຫມ່" ທີ່ທ່ານພວມຟັງຢູ່ນີ້ແມ່ນເພງ"wo shi yi zhi gu du de xiao chuan" ຂ້ອຍແມ່ນເຮືອນ້ອຍທີ່ປ່ຽວພອຍ"ເພງເອກໃນCDແຜ່ນໃຫມ່ຂອງທ່ານລີຊັ່ນ. ໃນMTVຂອງເພງນີ້, ທ່ານລີຊັ່ນຫັນຫນ້າສູ່ທະເລທີ່ກ້ວາງໃຫຍ່, ຮ້ອງເພງສະແດງຄວາມຮູ້ສຶກໃນສ່ວນເລິກຂອງຫົວໃຈ. ໄມ້ຄ້ຳບ່າກໍກາຍເປັນໄມ້ພາຍ, ພາຍເຮືອນ້ອຍຜ່າລົມຟອງລ່ອງລອຍເທິງທະເລ, ນຳເອົາຄວາມຝັນແລະຄວາມຫວັງມຸ່ງໄປສູ່ທ່າເຮືອແຫ່ງຄວາມສຸກ.
ທີ່ຟັງມານັ້ນແມ່ນເພງ"wo shi yi zhi gu du de xiao chuan" ຂ້ອຍແມ່ນເຮືອນ້ອຍທີ່ປ່ຽວພອຍ" ຂັບຮ້ອງໂດຍທ່ານລີຊັ່ນ. ທ່ານລີຊັ່ນເກີດຢູ່ນະຄອນຊີອ່ານແຂວງສ້ານຊີ ພາກຕາເວັນຕົກຂອງຈີນ. ທ່ານພິການແຕ່ນ້ອຍຍ້ອນເປັນພະຍາດໂປລີໂອ , ຈຳເປັນຕ້ອງໃຊ້ໄມ້ຄ້ຳບ່າຈິ່ງຍ່າງໄດ້. ໃນປີ1992 ທ່ານລີຊັ່ນໄດ້ເຂົ້າຮ່ວມງານປະກວດເພງຂອງຄົນພິການຈີນທົ່ວປະເທດ, ແລ້ວໄດ້ຮັບລາງວັນທີໜຶ່ງ. ຕໍ່ມາທ່ານໄປຊອກຫາຄວາມຝັນດົນຕີຂອງຕົນຢູ່ປັກກິ່ງ. ໃນປີ1999, ທ່ານໄດ້ຂຶ້ນຊື່ລືນາມຍ້ອນຮ້ອງເພງທີ່ຊື່ວ່າ"chuang wai" ນອກປ່ອງຢ້ຽມ, ກາຍເປັນນັກຮ້ອງຄົນພິການທີ່ໄດ້ຮັບຄວາມຊົມເຊີຍຈາກຜູ້ຟັງທັງຫລາຍ.
ຕໍ່ໄປເຊີນຟັງເພງ"you shui neng gou ai ni chao guo wo" ມີໃຜຮັກເຈົ້າຫຼາຍກວ່າຂ້ອຍ. ທ່ານລີຊັ່ນເວົ້າວ່າ, ເພງນີ້ແມ່ນເພງທີ່ທ່ານມັກກ່ວາຫມູ່ໃນCDແຜ່ນໃຫມ່ຂອງທ່ານ. ເປັນເພງລະບາຍອາລົມທີ່ມ່ວນອອນຊອນ, ສະແດງໃຫ້ເຫັນຄວາມສາມາດຂອງທ່ານລີຊັນໃນການຂັບຮ້ອງ.
ທີ່ຟັງມານັ້ນແມ່ນເພງ"ມີໃຜຮັກເຈົ້າຫຼາຍກວ່າຂ້ອຍ"
CDແຜ່ນໃຫມ່ຂອງທ່ານລີຊັ່ນໄດ້ຮັບການສະຫນັບສະຫນູນຈາກນັກດົນຕີທີ່ດີເດັ່ນພາຍໃນປະເທດຈີນເຊັ່ນ: ທ່ານສານປາວ, ທ່ານຈ່າງຫົງກ່ວາງເປັນຕົ້ນ, ນອກນີ້ຍັງໄດ້ເລືອກເອົາບົດເພງທີ່ນັກດົນຕີໃຫມ່ຈຳນວນໜຶ່ງເປັນຜູ້ແຕ່ງ, ເຮັດໃຫ້CDແຜ່ນນີ້ໄດ້ມີກຳລັງແຮງແລະຄວາມກະຕືລືລົ້ນເພີ່ມຂຶ້ນ. ຕໍ່ໄປເຊີນຟັງເພງ"da cheng shi" ຕົວເມື່ອງໃຫຍ່. ເພງນີ້ແມ່ນນັກດົນຕີໃຫມ່ທີ່ຊື່ວ່າຫວາງຊີນຢູແຕ່ງໃຫ້ທ່ານລີຊັ່ນໂດຍຈຳເພາະ. ເພງນີ້ມີທຳນອງມ່ວນພິເສດ, ສະແດງໃຫ້ເຫັນ ປະສົບການໃນຊີວິດຕົວເມືອງຂອງຄົນທັງຫລາຍ.
ເນື້ອເພງມີຢູ່ວ່າ:"ຍາມຫນາວປີນັ້ນ, ເຈົ້າຈາກບ້ານໄປຖິ່ນອື່ນ, ເຈົ້າວ່າເຈົ້າຈະໄປສ້າງພາລະກິດຢູ່ເມື່ອງໃຫຍ່. ບໍ່ໄດ້ຄິດເລີຍວ່າ, ຕົວເມືອງຍັງແອອັດກວ່າທີ່ຂ້ອນຄິດໄວ້, ທີ່ຈິງ, ໃນຕົວເມືອງ, ຄົນສ່ວນຫຼາຍກໍຄືກັບເຈົ້າແລະຂ້ອຍ, ໃນຕົວເມືອງໃຫຍ່ກໍມີຮ່ອງຮອຍຂອງເຮົາ.
ທ່ານລີຊັ່ນເອົາໃຈໃສ່ທີ່ສຸດນຳພາລະກິດສາທາລະນະປະໂຫຍດຂອງສັງຄົມ.ພາຍຫລັງຂຶ້ນຊື່ລືນາມແລ້ວ, ທ່ານໄດ້ວິ້ງເຕັ້ນນຳພາລະກິດສາທາລະນະປະໂຫຍດເກືອບທຸກປີ, ເອົາລາຍໄດ້ຈາກການສະແດງຂອງຕົນທີ່ບໍ່ຫລາຍປານໃດໄປຊ່ອຍເຫຼືອຄົນອື່ນ. ປີ2004, ທ່ານລີຊັ່ນໄດ້ເປັນ"ຜູ້ໂຄສະນາຄວາມຮັກ"ໃຫ້ແກ່ງານກິລາໂອລິມປິກຄົນພິການຈີນ. ເພງ"ai bu hui zou yuan" ຮັກຍັງຢູ່ຄຽງຂ້າງ ເພງທີ່ທ່ານລີຊັ່ນແຕ່ງເພື່ອງານກິລາໂອລິມປິກຄົນພິການ2008 ໄດ້ຈັດເຂົ້າໃນCDແຜ່ນໃຫມ່ຂອງທ່ານ. ທ່ານເວົ້າວ່າ CDແຜ່ນໃຫມ່ຂອງທ່ານໄດ້ຂາຍແຜ່ນຫນຶ່ງ, ທ່ານກໍບໍລິຈາກເງິນ 0.1 ຢວນຈີນໃຫ້ຄະນະຜູ້ແທນງານກິລາໂອລິມປິກຄົນພິການ2008ຂອງຈີນ. ທ່ານເວົ້າວ່າ, ໃນຖານເປັນຜູ້ໂຄສະນາຄວາມຮັກ, ທ່ານຢາກໃຊ້ການກະທຳຂອງຕົນມາຮຽກຮ້ອງໃຫ້ຄົນຍິ່ງຫລາຍກ່ວາເກົ່າມາອຸດທິດຄວາມຮັກໃຫ້ຄົນພິການ. ມ້ວນທ້າຍລາຍການມື້ນີ້, ເຊີນຟັງເພງ"ai bu hui zou yuan" ຮັກຍັງຢູ່ຄຽງຂ້າງ.
ທ່ານຜູ້ຟັງທີ່ເຄົາລົບ, ລາຍການຢ່ອນອາລົມໃນວັນເສົາພາກນີ້ຂໍຈົບລົງທໍ່ນີ້, ສະບາຍດີ.
|
|
|
