|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ໃນລາຍການແຂ່ງຂັນໄຕ່ສະເກັດຄູ່ລວດລາຍງານກິລາໂອລິມປິກທີ່ຕູຣິນໃນວັນທີ 13 ກຸມພາ, ນາງເຊິນເສກັບທ້າວຈ້າວຫົງປໍ ແຊມປຽນໂລກຄູ່ທຳອິດຂອງຈີນໃນລາຍການດັ່ງກ່າວຊິງໄດ້ຫຼຽນທອງ. ຢູ່ເບື້ອງຫຼັງຫຼຽນທອງຫຼຽນນີ້ມີເລື່ອງເຮັດໃຫ້ຄົນຕື້ນຕັນໃຈ, ໃນລາຍການພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ແຊມປຽນໂລກລາຍການໄຕ່ສະເກັດຄູ່ຂອງຈີນອຳລາຈາກສຳໜາມກິລານ້ຳກ້າມທີ່ຕູຣິນຢ່າງໄດ້ຜົນເຕັມເມັດເຕັມໜ່ວຍ.
ໃນງານແຂ່ງຂັນໄຕ່ສະເກັດລວດລາຍຊີງຊະນະເລີດລະດັບໂລກທີ່ຈັດຂຶ້ນໃນເດືອນມີນາປີ 2002, ນາງເຊິນເສກັບທ້າວຈ້າວຫົງປໍ ນັກກິລາຈີນໄດ້ເອົາຊະນະຄູ່ແຂ່ງ, ແລະເປັນແຊມປຽນໂລກຄູ່ທຳອິດຂອງຈີນໃນລາຍການໄຕ່ສະເກັດຄູ່; ໃນງານແຂ່ງຂັນຊິງຊະນະເລີດລະດັບໂລກທີ່ຈັດຂຶ້ນໃນປີ 2003, ນັກກິລາຈີນຄູ່ນີ້ຊິງໄດ້ແຊມປຽນອີກ, ແລ້ວໄດ້ສ້າງຖານະນຳໜ້າໂລກຂອງຈີນໃນລາຍການໄຕ່ສະເກັດຄູ່ດັ່ງກ່າວ. ແຕ່ວ່າ, ໃນງານກິລາໂອລິມປິກລະດູໜາວທີ່ຈັດຂຶ້ນຢູ່ເມືອງຊອນເລກອາເມລິກາໃນເດືອນກຸມພາປີ 2002, ນາງເຊິນເສກັບທ້າວຈ້າວຫົງປໍຊີງໄດ້ພຽງແຕ່ຫຼຽນທອງ, ສະນັ້ນ, ກ່ອນງານກິລາໂອລິມປິກລະດູໜາວຕູຣິນ, ເຂົາເຈົ້າລ້ວນແຕ່ມີຄວາມຄອງຄອຍຕໍ່ງານກິລາໂອລິມປິກລະດູໜາວຄັ້ງນີ້. ເວົ້າສຳລັບທ້າວຈ້າວປົງປໍທີ່ອາຍຸ 33 ປີແລະນາງເຊິນເສທີ່ອາຍຸ 28 ປີແລ້ວ, ງານກິລາໂອລິມປິກລະດູໜາວຕູຣິນເປັນໂອກາດເຂົ້າຮ່ວມງານກິລາໂອລິມປິກລະດູໜາວເທື່ອສຸດທ້າຍແລ້ວ.
ແຕ່ບໍ່ເປັນຈັ່ງບຸນ, ໃນວັນທີ 5 ສິງຫາປີ 2005 ເຊິ່ງຫ່າງຈາກມື້ໄຂງານກິລາໂອລິມປິກລະດູໜາວຄັ້ງທີ 20 ຍັງເຫຼືອພຽງແຕ່ 6 ເດືອນກວ່ານັ້ນ, ທ້າວຈ້າວປົງປໍພັດໄດ້ບາດເຈັບຄື ເສັ້ນເອັນສົ້ນຂາຊ້າຍແຕກໃນການຝຶກແອບ. ພາຍຫຼັງບົ່ງມະຕິແລ້ວ ນາຍໝໍກ່າວວ່າ, ເມື່ອສັງເກດເບິ່ງອາການເຈັບຂອງທ້າວຈ້າວຫົງປໍ, ເວົ້າສຳລັບຄົນທຳມະດາແລ້ວ, ເຖິງວ່າຈະພັກ 6 ເດືອນ, ກໍ່ບໍ່ສາມາດຟື້ນຟູການແລ່ນໄດ້, ຍິ່ງບໍ່ຕ້ອງເວົ້າວ່າເຮັດອິລິຍະບົດຄວາມຍາກສູງເທິງນ້ຳກ້າມ. ການໂຈມຕີຢ່າງກະທັນຫັນດັ່ງກ່າວ, ເກືອບໄດ້ທັບມ້າງຄວາມປາຖະໜາຂອງທ້າວຈ້າວຫົງປໍທີ່ຫວັງຢາກເຂົ້າຮ່ວມງານກິລາໂອລິມປິກລະດູໜາວທີ່ຕູຣິນ.
ເມື່ອຫວນຄືນປະສົບການດັ່ງກ່າວ, ທ້າວຈ້າວຫົງປໍມີຄວາມຮູ້ສຶກຢ່າງເລິກເຊິ່ງ, ເພິ່ນເວົ້າວ່າ: ຂ້າພະເຈົ້າຮູ້ສຶກວ່າ, ໃນຊີວິດກິລາຂອງຂ້າພະເຈົ້າ ປີນີ້ແມ່ນປີໜຶ່ງທີ່ປະສົບຄວາມຫຍຸ້ງຍາກຫຼາຍກວ່າຍາມໃດໝົດ, ເປັນປີໜຶ່ງທີ່ປະສົບຄວາມລຳບາກກາກກຳຫຼາຍກວ່າຍາມໃດໝົດ.
ແມ່ນແທ້! ເມື່ອທ້າວຈ້າວຫົງປໍຖືກບາດເຈັບ, ລາຍການໃໝ່ "ມາດາມແມງກະເບື້ອງ" ເຊິ່ງແມ່ນລາຍການທີ່ທ້າວຈ້າວຫົງປໍກັບນາງເຊິນເສກຽມແຂ່ງຂັນໃນງານກິລາໂອລິມປິກລະດູໜາວຕູຣິນຍັງແມ່ນລາຍການ "ເຄິ່ງສຳເລັດຮູບ" ທໍ່ນັ້ນ, ເຖິງວ່າຈ້າວຫົງປໍໄດ້ຮັບການບົວລະບັດທາງການແພດດີກວ່າໝູ່ ແລະສາມາດຟື້ນຟູການຝຶກແອບກ່ອນໄຂງານກິລາໂອລິມປິກລະດູໜາວກໍ່ຕາມ, ແຕ່ໃນເວລາແຂ່ງຂັນ ເສັ້ນເອັນສົ້ນຂາຂອງຕົນທີ່ຍັງອ່ອນແອທົນໄດ້ຫຼືບໍ່ໃນເວລາທ້າວຈ້າວຫົງປໍເຮັດອະລິຍະບົດຄວາມຍາກສູງ?
ຫຼັງຈາກນັ້ນ, ທ້າວຈ້າວຫົງປໍກໍ່ໄດ້ທົນຕໍ່ຄວາມເຈັບປ່ວຍສາຫັດທີ່ຄົນທຳມະດາບໍ່ອາດທົນໄດ້, ເພິ່ນໄດ້ຟື້ນຟູການຝຶກແອບເສັ້ນເອັນສົ້ນຂາຂອງຕົນກ່ອນເວລາກຳນົດ. ວັນທີ 24 ພະຈິກປີ 2005, ເພິ່ນໄດ້ຟື້ນຟູການຝຶກແອບຢູ່ເທິງນ້ຳກ້າມຢ່າງເປັນທາງການຄັ້ງທຳອິດຫຼັງຈາກບາດເຈັບ, ເວລານີ້ຫ່າງຈາກເວລາບາດເຈັບຂອງເພິ່ນພຽງແຕ່ 3 ເດືອນເຄິ່ງທໍ່ນັ້ນ. ວັນທີ 4 ມັງກອນປີ 2006, ເພິ່ນເລີ່ມຟື້ນຟູການຝຶກແອບການເຕັ້ນຢູ່ເທິງນ້ຳກ້າມ, ວັນທີ 7 ກຸມພາ, ກ່ອນອອກຈາກປັກກິ່ງໄປຕູຣິນມື້ໜຶ່ງ, ເພິ່ນໄດ້ສຳເລັດອິລິຍະບົດຄວາມຍາກສູງໃນລາຍການຄື ເຕັ້ນຫັນກາຍສາມຮອບແລ້ວເຕັ້ນຫັນກາຍຕໍ່ອີກສອງຮອບຄັ້ງທຳອິດ.
ແຕ່ໃນການແຂ່ງຂັນໄຕ່ສະເກັດຄູ່ລວດລາຍງານກິລາໂອລິມປິກລະດູໜາວທີ່ຈັດຂຶ້ນໃນວັນທີ 13 ກຸມພາ, ແຊມປຽນເກົ່າລະດັບໂລກຄູ່ນີ້ໄດ້ສະແດງລາຍການ "ມາດາມແມງກະເບື້ອງ" ທີ່ພວກເຂົາເຈົ້າຝຶກແອບນຳກັນຍັງບໍ່ຮອດ 2 ເດືອນ ເຖິງວ່າບໍ່ທັນຈົບງາມສົມບູນແຕ່ພັດໝັ້ນໜຽວທົນທານທີ່ສຸດ, ແລະໄດ້ສະເທືອນທົ່ວໂລກ. ໃນທີ່ສຸດ ພວກເຂົາເຈົ້າຊິງໄດ້ຫຼຽນທອງ. ນາງເຊິນເສເວົ້າວ່າ: ຮູ້ສຶກພໍໃຈຢູ່, ເພາະວ່ານີ້ກໍ່ແມ່ນລະດັບຝຶກແອບຂອງພວກຂ້າພະເຈົ້າແລ້ວ. ນັກກິລາຄູ່ອື່ນໄດ້ຝຶກແອບໜຶ່ງປີແລ້ວ, ແຕ່ພວກຂ້າພະເຈົ້າຝຶກແອບພຽງແຕ່ 2 ເດືອນທໍ່ນັ້ນ, ມີການປະພຶດຄືແນວນີ້, ພວກຂ້າພະເຈົ້າກໍ່ດີໃຈແລ້ວ.
ໃນນາມເປັນນັກກິລາໄຕ່ສະເກັດຄູ່ທີ່ດີເດັ່ນກວ່າໝູ່ຂອງຈີນກໍ່ຄືຂອງໂລກ, ພັດບໍ່ສາມາດຊິງໄດ້ແຊມປຽນງານກິລາໂອລິມປິກລະດູໜາວ ຈັ່ງແມ່ນເສຍໃຈແທ້ໆ; ແຕ່ກໍ່ຄືດັ່ງຄຳເວົ້າຂອງທ່ານຢາວປິ່ນ ຄູຝຶກໃຫຍ່ກອງໄຕ່ສະເກັດລວດລາຍຈີນທີ່ວ່າ, ນາງເຊິນເສກັບທ້າວຈ້າວຫົງປໍສາມາດລົງສະໜາມແຂ່ງຂັນທີ່ຕູຣິນ, ນີ້ແມ່ນເລື່ອງອັດສະຈັນແລ້ວ. ຫຼຽນຄຳຈະກວມຄວາມໝາຍທັງໝົດຂອງກິລາບໍ່ໄດ້, ໃນຂະບວນການກະກຽມເພື່ອງານກິລາໂອລິມປິກຕູຣິນ ນາງເຊິນເສກັບທ້າວຈ້າວຫົງປໍໄດ້ສະແດງຄວາມໝາຍຂອງນ້ຳໃຈກິລາເປັນຢ່າງດີ, ການອຳລາຈາກສະໜາມກິລານ້ຳກ້າມຢູ່ຕູຣິນຂອງພວກເຂົາເຈົ້າແມ່ນຈົບງາມ.
|
