|
ຕາມຂ່າວCRI: ວັນທີ 4 ມີນາຢູ່ທີ່ປັກກິ່ງ, ຜູ່ນຳຈີນຄື ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນແລະຜູ່ນຳທ່ານອື່ນໆຕ່າງໄດ້ພົບປະກຳມະການທີ່ເຂົ້າຮ່ວມກອງປະຊຸມສະໄໝສາມັນຂອງສະພາປຶກສາການເລືອງປະຊາຊົນແຫ່ງຊາດຈີນ ແລະເຂົ້າຮ່ວມການອະພິປາຍ.
ໃນກອງປະຊຸມປະສົມຂອງກຳມະການອົງການສຳພັນປະຊາທິປະໄຕຈີນແລະສະ ມາຄົມສົ່ງເສີມປະຊາທິປະໄຕຈີນ, ທ່ານຫູຈິນທາວໄດ້ຮັບຟັງການປະກອບຄຳຄິດຄຳເຫັນຂອງກຳມະການຫຼາຍທ່ານ ແລ້ວຊີ້ອອກວ່າ, ການບັນລຸຈຸດໝາຍພັດທະນາເສດຖະກິດແລະສັງຄົມໃນ 5 ປີຕໍ່ໜ້າ, ຕ້ອງລົງເລິກລະດົມມວນຊົນຢ່າງກວ້າງຂວາງ, ອາໄສມວນຊົນຢ່າງເດັດດ່ຽວໜຽວແໜ້ນ, ສ້າງຄວາມສຸກໃຫ້ແກ່ມວນຊົນຢ່າງຈິງອົກຈິງໃຈ, ໃຫ້ທົ່ວປວງຊົນເສີມຂະຫຍາຍນ້ຳໃຈເປັນເຈົ້າການທາງປະຫວັດສາດຢ່າງເຕັມສ່ວນ.
ທ່ານອູປາງໂກ ປະທານຄະນະປະຈຳສະພາປະຊາຊົນແຫ່ງຊາດຈີນໄດ້ເຂົ້າຮ່ວມກອງປະຊຸມປະສົມຂອງກຳມະການພັກປະຊາທິປະໄຕຊາວນາກຳມະກອນຈີນແລະສະມາຄົມວິຊາການຈິວຊານຈີນ, ທ່ານອູປາງໂກຊີ້ອອກວ່າ, ລະບອບການຮ່ວມມືແລະການປຶກສາຫາລືການເມືອງລະຫວ່າງຫຼາຍພັກທີ່ນຳພາໂດຍພັກກອມມູນິດຈີນແມ່ນລະບອບພື້ນຖານການເມືອງທີ່ສອດຄ່ອງກັບສະພາບແຫ່ງຊາດຈີນ, ສູນກາງພັກກອມມູນິດຈີນຈະເຮັດຄືແຕ່ເກົ່າເມືອຫຼັງ ເພີ່ມທະວີຄວາມສາມັກຄີແລະການຮ່ວມມືກັບບັນດາພັກຝ່າຍປະຊາທິປະໄຕແລະບຸກຄົນບໍ່ສັງກັດພັກຝ່າຍໃດ. ທ່ານຫວັງໃຫ້ບັນດາພັກຝ່າຍປະຊາທິປະໄຕຈົ່ງຕັ້ງໜ້າປະກອບຄວາມເຫັນແລະວາງຂໍ້ສະເໜີ, ປະກອບສ່ວນເຂົ້າໃນການຊຸກຍູ້ສັງຄົມໃຫ້ພັດທະນາ.
ໃນເວລາເຂົ້າຮ່ວມການອະພິປາຍຂອງກຳມະການໃນວົງການເສດຖະກິດ, ທ່ານເວິນເຈ່ຍປາວ ນາຍົກລັດຖະມົນຕີຈີນກ່າວວ່າ, ສູນກາງພັກກອມມູນິດຈີນເອົາໃຈໃສ່ໃນລະດັບສູງນຳການຕົກລົງນະໂຍບາຍຕາມຫຼັກວິທະຍາສາດແລະມີປະຊາທິປະໄຕ. ເວົ້າສຳລັບລັດຖະບານແລ້ວ, ຕ້ອງແຈ້ງສະພາບການພັດທະນາເສດຖະກິດແລະສັງຄົມໃຫ້ສະພາປຶກສາການເມືອງຊາບຢ່າງທັນການ, ຕັ້ງໜ້າຄົ້ນຄວ້າແລະຮັບເອົາຂໍ້ສະເໜີແລະຍັດຕິຂອງສະພາປຶກສາການເມືອງແລະກຳມະການ, ຮັບເອົາການຕິດຕາມກວດກາວຽກງານລັດຖະບານຂອງສະພາປຶກສາການເມືອງຢ່າງເປັນເຈົ້າການ.
|
