|
|
 |
| (GMT+08:00)
2006-03-04 21:04:50
|
 |
|
ລະບອບສະພາປະຊາຊົນຈີນ(ສຽງ)
cri
Author: da
|
ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນ ຊຶ່ງເປັນອົງການອຳນາດສູງສຸດຂອງຈີນຈະເລີ່ມຈັດຂຶ້ນແຕ່ວັນທີ 5 ມີນາ,ນີ້ແມ່ນເລື່ອງໃຫຍ່ໃນຊີວິດການເມືອງຂອງປະຊາຊົນຈີນ.ລະບອບສະພາປະຊາຊົນຈີນແມ່ນລະບອບການເມືອງກົກຮາກຂອງຈີນ,ທັງແມ່ນຮູບການການຈັດຕັ້ງຂອງອົງການອຳນາດຂອງຈີນ.
ຢູ່ຈີນ,ສິດອຳນາດທັງໝົດຂອງລັດແມ່ນເປັນຂອງປະຊາຊົນ,ອົງການທີ່ປະຊາຊົນໃຊ້ສິດອຳນາດຂອງລັດແມ່ນສະພາປະຊາຊົນແຫ່ງຊາດແລະສະພາປະຊາຊົນທ້ອງຖິ່ນທຸກຂັ້ນ.ບໍ່ວ່າຈະແມ່ນສະພາປະຊາຊົນແຫ່ງຊາດຫຼືຂອງທ້ອງຖິ່ນທຸກຂັ້ນ,ລ້ວນແຕ່ເລືອກຕັ້ງກຳເນີດຂຶ້ນຢ່າງປະຊາທິປະໄຕ.ສະພາປະຊາຊົນຈີນແບ່ງເປັນຂັ້ນລະດັບຊາດ ຂັ້ນແຂວງ ຂັ້ນເມືອງແລະຂັ້ນຕາແສງ,ອົງການບໍລິຫານ ອົງການຕັດສິນ ອົງການໄອຍະການທຸກຂັ້ນຂອງຈີນແມ່ນກຳເນີດຈາກສະພາປະຊາຊົນທຸກຂັ້ນ,ຮັບຜິດຊອບຕໍ່ສະພາປະຊາຊົນ,ແລະຮັບການຕິດຕາມກວດກາຈາກສະພາປະຊາຊົນ.ວຽກງານນິຕິບັນຍັດ ຕົກລົງນະໂຍບາຍ ປະຕິບັດແລະກວດກາຂອງລັດຕ້ອງສ່ອງແສງເຈດຕະນາລົມຂອງປະຊາຊົນແລະປົກປັກຮັກສາຜົນປະໂຫຍດຂອງປະຊາຊົນ.
ຢູ່ຈີນ,ສະພາປະຊາຊົນແຫ່ງຊາດແມ່ນອົງການອຳນາດສູງສຸດຂອງຈີນ,ສະພາປະຊາຊົນທ້ອງຖິ່ນທຸກຂັ້ນແມ່ນອົງການອຳນາດແຫ່ງລັດໃນທ້ອງຖິ່ນ.ປະຈຸບັນ ຜູ້ແທນສະພາປະຊາຊົນທຸກຂັ້ນມີເກືອບ 2 ລ້ານ 9 ແສນຄົນ.ຜູ້ແທນສະພາປະຊາຊົນແຫ່ງຊາດແຕ່ລະຊຸດມີອາຍຸຕຳແໜ່ງ 5 ປີ.
ຈີນມີແຜ່ນດິນອັນກວ້າງໃຫຍ່ໄພສານ,ມີ 56 ຊົນເຜົ່າ.ຜູ້ແທນສະພາປະຊາຊົນແຫ່ງຊາດຈີນກວມບຸກຄົນໃນເຂດຕ່າງໆ ຊົນເຜົ່າຕ່າງໆແລະວົງການຕ່າງໆ.ວຽກງານຂອງຜູ້ແທນສະພາປະຊາຊົນຈີນສ່ວນຫຼາຍແມ່ນນອກອາຊີບ,ໃນຍາມທຳມະດາ ພວກເຂົາເຈົ້າມີອາຊີບຕ່າງກັນຢູ່ແຫ່ງຕ່າງໆ,ສະນັ້ນມີລັກສະນະຕົວແທນອັນກວ້າງຂວາງ.ສາມາດເວົ້າໄດ້ວ່າ,ລະບອບສະພາປະຊາຊົນໄດ້ລະດົມປະຊາຊົນຈີນທົ່ວປະເທດເຂົ້າຮ່ວມການສ້າງສາປະເທດຊາດໃນນາມເປັນເຈົ້າຂອງບ້ານເມືອງ.
ສິດຕຳແໜ່ງຂອງສະພາປະຊາຊົນແຫ່ງຊາດຕົ້ນຕໍມີດັ່ງນີ້:ປັບປຸງລັດຖະທຳມະນູນແລະຕິດຕາມກວດກາການປະຕິບັດລັດຖະທຳມະນູນ;ສ້າງແລະປັບປຸງກົດໝາຍສຳຄັນ;ຕິດຕາມກວດກາວຽກງານຂອງລັດຖະບານ ສານປະຊາຊົນສູງສຸດແລະອົງການໄອຍະການປະຊາຊົນສູງສຸດ,ຕົກລົງບັນຫາສຳຄັນທີ່ກ່ຽວຂ້ອງກັບທົ່ວພາກສ່ວນຂອງຊາດ,ເລືອກຕັ້ງແລະຕົກລົງຜູ້ນຳລັດເປັນຕົ້ນ.ສະນັ້ນ,ໃນກອງປະຊຸມປະຈຳປີ,ຜູ້ແທນທັງຫຼາຍຕ້ອງຮັບຟັງແລະສຳຫຼວດພິຈາລະນາບົດລາຍງານຫຼາຍສະບັບຊຶ່ງລວມທັງບົດລາຍງານວຽກງານຂອງລັດຖະບານ,ແລະລົງມະຕິທີ່ສົມຄູ່ກັນ.ພວກເຂົາເຈົ້າໃຊ້ສິດສຳຫຼວດພິຈາລະນາ ສິດສະເໜີຍັດຕິ ສິດເລືອກຕັ້ງ ສິດລົງມະຕິ ສິດຊັກຖາມແລະສິດຖອນແລະປົດຕຳແໜ່ງເປັນຕົ້ນ,ເຂົ້າຮ່ວມການນຳໃຊ້ສິດອຳນາດແຫ່ງລັດ.ໃນໄລຍະປິດກອງປະຊຸມ,ຄະນະປະຈຳສະພາປະຊາຊົນແຫ່ງຊາດ ຊຶ່ງເປັນອົງການປະຈຳຂອງສະພາປະຊາຊົນແຫ່ງຊາດຈະໃຊ້ອຳນາດສູງສຸດແຫ່ງລັດ.
ແຕ່ກອງປະຊຸມສະພາປະຊາຊົນແຫ່ງຊາດຈີນຄັ້ງປະຖົມມະເລີກຈັດຂຶ້ນເມື່ອປີ 1954 ເປັນຕົ້ນມາ,ສະພາປະຊາຊົນແຫ່ງຊາດແລະຄະນະປະຈຳສະພາໄດ້ພິຈາລະນາຮັບຮອງເອົາກົດໝາຍ 400 ກວ່າສະບັບ.ປະຈຸບັນ,ລະບົບກົດໝາຍທີ່ມີເອກະລັກພິເສດຂອງຈີນໄດ້ຈໍ່ຕົວຂຶ້ນໃນຂັ້ນເບື້ອງຕົ້ນແລ້ວ.
ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນທີ່ຈະຈັດຂຶ້ນແຕ່ວັນທີ 5 ຮອດວັນທີ 14 ມີນາແມ່ນກອງປະຊຸມສະພາປະຊາຊົນແຫ່ງຊາດຄັ້ງທີ 4 ສະໄໝທີ 10 .ໃນກອງປະຊຸມ,ຜູ້ແທນຈະຮັບຟັງແລະສຳຫຼວດພິຈາລະນາບົດລາຍງານວຽກງານຂອງລັດຖະບານທີ່ທ່ານເວີ່ນເຈ່ຍປາວ ນາຍົກລັດຖະມົນຕີຈີນກ່າວຕໍ່ກອງປະຊຸມ,ຍັງຈະພິຈາລະນາ"ແຜນກຳນົດ 5 ປີຄັ້ງທີ 11 ແຫ່ງການພັດທະນາເສດຖະກິດແຫ່ງຊາດແລະສັງຄົມ",ກຳນົດເສັ້ນທາງພັດທະນາເສດຖະກິດແລະສັງຄົມຂອງຈີນໃນ 5 ປີຂ້າງໜ້າ.ນອກນີ້,ຜູ້ແທນຍັງຈະສະເໜີຍັດຕິແລະຂໍ້ສະເໜີກ່ຽວກັບບັນຫາຈຸດຮ້ອນແລະບັນຫາທີ່ກ່ຽວຂ້ອງກັບຊີວິດການເປັນຢູ່ຂອງປະຊາຊົນຢ່າງແໜ້ນແຟ້ນ,ເຊັ່ນ:ນະໂຍບາຍກະສິກຳ ຊົນນະບົດແລະຊາວກຳມະກອນ,ການປະຕິຮູບໂຄງປະກອບປີ່ນປົວ,ການອະນຸລັກສິ່ງແວດລ້ອມແລະການສ້າງສາຊີວະພາບ,ການຕ້ານການສໍ້ລາດບັງຫຼວງແລະການສ້າງສາອົງການປົກຄອງໃຫ້ປອດໄສໄຮ້ມົນທິນ ແລະບັນຫາອື່ນໆ.
|
|
|
