|
|
 |
| (GMT+08:00)
2006-03-05 21:17:36
|
 |
|
ບົດບັນທຶກປະຈຳວັນກ່ຽວກັບກອງປະຊຸມສອງສະພາໃນວັນທີ 5 ມີນາ
cri
Author: da
ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນແລະສະພາປຶກສາການເມືອງຈີນໄດ້ໄຂຂຶ້ນຢູ່ປັກກິ່ງເປັນລຳດັບ,ໃນເວລາໄປເອົາຂ່າວ ຂ້າພະເຈົ້າໄດ້ຮູ້ວ່າ,ລະດັບເປີດເຜີຍຂອງກອງປະຊຸມສອງສະພາໃນປີນີ້ແມ່ນບໍ່ເຄີຍມີມາກ່ອນ.ເມື່ອທຽບກັບປີກາຍແລ້ວ,ກອງປະຊຸມສອງສະພາໃນປີນີ້ຈະເຮັດໃຫ້ວິທະຍຸ ໂທລະພາບແລະຖ່າຍທອດສົດກອງປະຊຸມຫຼາຍກວ່າເກົ່າແລະໃຫ້ນັກຂ່າວຕ່າງປະເທດເຂົ້າທີ່ປະຊຸມຫຼາຍກວ່າເກົ່າ.ນອກນີ້,ກອງປະຊຸມສອງສະພາຍັງໄດ້ຕັ້ງແວບຂອງສູນຖະແຫຼງຂ່າວກອງປະຊຸມສອງສະພາ,ປະກາດແຈ້ງການແລະຂ່າວຫຼ້າສຸດຂອງກອງປະຊຸມສອງສະພາຢ່າງທັນການ.ກອງປະຊຸມສອງສະພາກໍຈະໃຊ້ມາດຕະການລະອຽດ,ສົ່ງເສີມຜູ້ແທນສະພາປະຊາຊົນແຫ່ງຊາດແລະກຳມະການສະພາປຶກສາການເມືອງຕ້ອນຮັບການເຂົ້າສຳພາດຂອງນັກຂ່າວຈີນແລະຕ່າງປະເທດຫຼາຍກວ່າເກົ່າ.
ກອງປະຊຸມສອງສະພາແມ່ນເຫດການໃຫຍ່ໃນຊີວິດການເມືອງຂອງຈີນ,ຫົວຂໍ້ທີ່ຜູ້ແທນສະພາປະຊາຊົນແຫ່ງຊາດແລະກຳມະການສະພາປຶກສາການເມືອງສົນໃຈນັ້ນກໍແມ່ນຫົວຂໍ້ທີ່ມວນຊົນຈີນສົນໃຈ,ກອງປະຊຸມສອງສະພາເຂົ້າສູ່ສາຍຕາປວງຊົນດ້ວຍທ່າທີໄຂປະຕູແລະໃກ້ຊິດກັບປວງຊົນ,ແມ່ນຄວາມຮູ້ສຶກອັນເລິກເຊິ່ງທີ່ສຸດຂອງຂ້າພະເຈົ້າໃນຖານເປັນນັກຂ່າວໃນເວລາເອົາຂ່າວກອງປະຊຸມສອງສະພາ.
ຂ້າພະເຈົ້າເຄີຍຖາມເພື່ອນຮ່ວມງານທີ່ເອົາຂ່າວກອງປະຊຸມສອງສະພາ,ພວກເຂົາເຈົ້າລ້ວນແຕ່ເວົ້າວ່າ,ຜູ້ແທນສະພາປະຊາຊົນແຫ່ງຊາດແລະກຳມະການສະພາປຶກສາການເມືອງທີ່ເຂົ້າຮ່ວມກອງປະຊຸມໃນປີນີ້ມີທ່າທີເປີດກວ້າງກວ່າເກົ່າ,ພວກທ່ານໄດ້ຍິນດີຕ້ອນຮັບການເຂົ້າສຳພາດຂອງສື່ມວນຊົນຫຼາຍ.ໃນໄລຍະກອງປະຊຸມ ທ່ານເສີງອີຈູ ຜູ້ແທນສະພາປະຊາຊົນແຫ່ງຊາດຈີນ ຮອງປະທານຄະນະປະຈຳສະພາປະຊາຊົນນະຄອນຈຸງກິງໄດ້ຕັ້ງເປີດຄໍລຳບັນທຶກຂອງຕົນຢູ່ເທິງແວບ,ຂ້າພະເຈົ້າທີ່ເປັນນັກຂ່າວໄດ້ເຫັນເພິ່ນໄດ້ຂຽນໃນບົດໜຶ່ງວ່າ:"ນີ້ແມ່ນຂ້າພະເຈົ້າຂຽນບົດຢູ່ເທິງແວບເປັນເທື່ອທຳອິດ.ຢູ່ທີ່ນີ້,ຖານະຂ້າພະເຈົ້າແມ່ນຜູ້ແທນສະພາປະຊາຊົນແຫ່ງຊາດ.ໃນກອງປະຊຸມສອງສະພາຄັ້ງນີ້,ຄວາມຄຶດແລະຄຳເວົ້າຂອງຂ້າພະເຈົ້າ,ລ້ວນແຕ່ຈະແຈ້ງໃຫ້ຄົນທັງຫຼາຍຊາບໂດຍຜ່ານບົດຢູ່ເທິງແວບ.ຄວາມເຫັນແລະຂໍ້ສະເໜີຂອງຄົນທັງຫຼາຍ,ກໍສາມາດບອກຂ້າພະເຈົ້າຮູ້ໂດຍຜ່ານບົດເທິງແວບເຊັ່ນດຽວກັນ."ກ່ອນນີ້ສອງມື້,ຂ້າພະເຈົ້າໄດ້ພົບທ່ານນາງຫູຕ້າປາຍ ຜູ້ແທນສະພາປະຊາຊົນແຫ່ງຊາດທີ່ມາຈາກແຂວງເຫີນານ,ເພິ່ນໄດ້ນຳເອົາຂໍ້ສະເໜີ 4 ຂໍ້ແລະຍັດຕິ 10 ສະບັບມາເຂົ້າຮ່ວມກອງປະຊຸມ,ທ່ານນາງບອກນັກຂ່າວວ່າ,ໃນບໍ່ເທົ່າໃດມື້ທີ່ຮ່ວມປະຊຸມຢູ່ທີ່ປັກກິ່ງ,ທ່ານໄດ້ສຳຜັດກັບບັນດາໝູ່ເພື່ອນ,ໃນນັ້ນສ່ວນຫຼາຍແມ່ນນັກຂ່າວຂອງບັນດາສື່ມວນຊົນ.ທ່ານນາງເວົ້າວ່າ,ກໍຄືກັນກັບຜູ້ແທນສະພາ,ພວກຂ້າພະເຈົ້ານັກຂ່າວກໍມີໜ້າທີ່ຮັບຜິດຊອບ ມີຄວາມເອົາໃຈໃສ່ ແລະຫົວຂໍ້ສົນທະນາເຊັ່ນດຽວກັນ,ນີ້ກໍແມ່ນການພັດທະນາແຫ່ງຊາດແລະຊີວິດການເປັນຢູ່ຂອງປະຊາຊົນ.
ເລື່ອງທີ່ໜ້າມ່ວນຊື່ນນັ້ນແມ່ນ,ໃນເວລາເພື່ອນຮ່ວມວຽກຜູ້ໜຶ່ງໄປສຳພາດຜູ້ແທນສະພາປະຊາຊົນທີ່ມາແຕ່ມາກາວ,ເລີຍບໍ່ນຶກບໍ່ຝັນ,ເພິ່ນພັດກາຍເປັນຜູ້ຖືກຜູ້ແທນສະພາສຳພາດ.ຜູ້ແທນສະພາຖາມເພິ່ນວ່າ:"ຄຽງຄູ່ກັບຂະບວນປະຊາທິປະໄຕຂອງຈີນມີຄວາມກ້າວໜ້າ,ທ່ານມີຄວາມເຫັນຫຍັງຕໍ່ຄວາມເສລີພາບດ້ານຄຳເວົ້າວາຈາ."ນັກຂ່າວທີ່ເປັນເພື່ອນຮ່ວມງານເວົ້າວ່າ,ສະຕິຕໍ່ປະຊາທິປະໄຕຂອງປວງຊົນຈີນເພີ່ມທະວີຫຼາຍຂຶ້ນ,ພວກເຂົາເຈົ້າບໍ່ຢາກຮູ້ຂ່າວທີ່ແຈ້ງແຕ່ຝ່າຍດຽວ.ໃນຖານເປັນນັກຂ່າວ,ໜ້າທີ່ຂອງພວກຂ້າພະເຈົ້າກໍແມ່ນເອົາຂ່າວຈາກກຸ່ມຄົນຕ່າງກັນທີ່ມີທັດສະນະຄະຕິແລະສຽງຕ່າງກັນ,ເຮັດໃຫ້ຜູ້ຟັງຂອງພວກຂ້າພະເຈົ້າຮູ້ຈັກຈີນທີ່ແທ້ຈິງ.
|
|
|
