|
|
 |
| (GMT+08:00)
2006-03-06 10:48:33
|
 |
|
ຊີວີຂອງຄົນເຮົາ
cri
Author: limin
ຊີວິດແມ່ນຫົວຂໍ້ອະມະຕະທີ່ຄົນເຮົາມັກເວົ້າກັນເລື້ອຍໆ. ເມື່ອເວົ້າເຖິງຊີວິດ, ເຄີຍມີຄົນບັນລະຍາຍວ່າ, ຊີວິດຂອງແຕ່ລະຄົນເໝືອນດັ່ງນ້ຳສາຍໜຶ່ງ, ເລີ່ມຕົ້ນຈະເປັນຫ້ວຍນ້ອຍໆຖືກສອງຝັ່ງຈຳກັດ, ແລ້ວຄ່ອຍໆໄຫຼແຮງຂຶ້ນ, ຊຸທັ່ງຫິນແກ້ງ, ໄຫຼຕົກຕາດ, ຄອນນ້ຳກໍຄ່ອຍໆກວ້າງອອກ, ນ້ຳກໍໄຫຼສະໝ່ຳສະເໝີກວ່າເກົ່າ, ໃນທີ່ສຸດໄຫຼສູ່ປ່ອງລົງທະເລ, ບໍ່ມີການຢຸດສະງັກອີກ, ຫຼັງຈາກນັ້ນກໍຫຼຸດພົ້ນຈາກຄວາມຊົງຕົວຢູ່ຂອງຮ່າງຄີງແລະບໍ່ມີຄວາມເຈັບປວດທໍລະມານ, ເດີນໄປສູ່ຈຸດຈົບແນວດຽວກັນຂອງຊີວິດທັງມວນ. ນີ້ກໍແມ່ນການບັນລະຍາຍເສັ້ນທາງແຫ່ງຊີວິດຂອງຄົນເຮົາ. ຊີວິດເໝືອນດັ່ງສາຍນ້ຳທາລາ.
ຊີວິດຄືກັບລະຄອນ, ໃນເວລາຫາກໍເກີດມາສູ່ໂລກນີ້, ເຈົ້າຮ້ອງໄຫ້, ແຕ່ຄົນທີ່ຮັກເຈົ້າພັດຫົວ, ໃນເວລາຊີວິດຈົບລົງລາໂລກໄປ, ເຈົ້າຫົວ, ແຕ່ຄົນທີ່ຮັກເຈົ້າພັດໄຫ້, ແຕ່ມາສູ່ໂລກນີ້ຮອດລາໂລກໄປ, ແຕ່ການໄຫ້ຮອດການຫົວ, ເສັ້ນທາງແຫ່ງຊີວິດກໍເດີນຜ່ານມາແນວນີ້ແຫຼະ, ບົນເສັ້ນທາງທີ່ພວກເຮົາຍ່າງຜ່ານມານັ້ນ, ເຕັມໄປດ້ວຍດອກໄມ້ແລະສ້ຽນໜາມ, ມີແສງຕາເວັນອັນຮຸ່ງເຮືອງ, ແຕ່ກໍ່ມີຟ້າລົມຝົນຕົກ. ມີຄວາມຂົມຂື່ນ, ແຕ່ກໍມີຄວາມຫວານຊື່ນ, ນີ້ແຫຼະກໍແມ່ນຊີວິດ. ທ່ານຊຸ່ຍຢົງຢວນ ພິທີກອນທີ່ມີຊື່ສຽງຂອງຈີນເຄີຍເວົ້າວ່າ: ຊີວິດກໍຄືກັບເຂົ້າໜົມກ້ຽວຂອງຈີນ, ກາລະເວລາແມ່ນເປືອກ, ປະສົບການແມ່ນໄສ້, ລົດຂົມຫວານຄວາມທຸກສຸກມີຢູ່ໃນໄສ້ຂອງເຂົ້າໜົມກ້ຽວທັງໝົດ.
ແຕ່ວ່າ, ຊີວິດຂອງແຕ່ລະຄົນພັດແຕກຕ່າງກັນ, ທ່ານຫຼິວຢິ່ງຢູ ນັກປະພັນທີ່ມີຊື່ສຽງຂອງຈີນເຄີຍເວົ້າວ່າ: ຊີວິດຂອງແຕ່ລະຄົນກໍຄືກັບປື້ມຫົວໜຶ່ງ, ຈະຂຽນໄດ້ດີຫຼືບໍ່ດີ, ໜາຫຼືບາງ, ອັດສະຈັນຫຼືທຳມະດາ ກໍ່ແລ້ວແຕ່ເຈົ້າເອງທັງນັ້ນ, ຜູ້ອື່ນແທນບໍ່ໄດ້, ສະນັ້ນ, ໃນເວລາຈະຂຽນ, ຕ້ອງລະມັດລະວັງທີ່ສຸດ.
ຊີວິດແມ່ນເວທີ, ເວລາອອກໄປສະແດງ, ພວກເຮົາຕ້ອງຕັ້ງອົກຕັ້ງໃຈ. ຊີວິດແມ່ນຂະບວນລົດໄຟໄປຮອດສະຖານີໃດກໍຕ້ອງຕື່ມນ້ຳຕື່ມຖ່ານຫີນ, ເພື່ອໃຫ້ຕົນເອງແລ່ນໄດ້ໄວແລະໄກກວ່າເກົ່າ.
ທ່ານຜູ້ຟັງທີ່ໂຄລົບ, ບົນເສັ້ນທາງແຫ່ງຊີວິດ, ໃນເວລາມີຄວາມສຸກ, ຂໍໃຫ້ທຸກຄົນຈົ່ງມ່ວນຊື່ນຢ່າງສົມໃຈ, ເວລາພົບຄວາມທຸກ, ຂໍໃຫ້ທຸກຄົນຈົ່ງເຂັ້ມແຂງ!
|
|
|
