|
ທ່ານເຫີຈູງ ເປັນອາຈານສອນຢູ່ມະຫາວິທະຍາໄລພາສາຕ່າງປະເທດປັກກິ່ງ, ພ້ອມກັນນັ້ນຍັງເປັນພິທີກອນຂອງວິທະຍຸແລະໂທລະພາບຫຼາຍຊ່ອງ.ເອກະລັກອັນເບີກບານ ຂອງທ່ານໃນເວລາຈັດລາຍການ,ໄດ້ຮັບຄວາມຊົມເຊີຍຈາກຊາວໜຸ່ມທັງຫຼາຍ. ທ່ານເຫີຈູງຍັງເປັນນັກປະພັນ ເຄີຍແຕ່ງໜັງສື ພິມຈຳໜ່າຍ, ເຄີຍສະແດງຮູບເງົາ ສະແດງເປັນພະເອກໃນລະຄອນເວົ້າ, ຜູ້ຊົມທັງຫຼາຍຈຶ່ງຖືທ່ານເຫີຈູງເປັນສິລະປິນຜູ້ເກັ່ງຮອບດ້ານ.
ປີ 2004,ທ່ານໄດ້ອັດຈຳໜ່າຍ CDແຜ່ນທຳອິດ ທີ່ໃຫ້ຊື່ວ່າ ke yi ai "ຮັກກັນໄດ້" ແລ້ວໄດ້ເຂົ້າສູ່ເວທີເພງຢ່າງເປັນທາງການ, ໃຊ້ເວລາບໍ່ດົນ, CD ແຜ່ນນີ້ກໍໄດ້ຂາຍຮອດ 4 ແສນ 2 ໝື່ນກວ່າແຜ່ນ, ເພງ zhi zi hua kai "ດອກຈື່ຈຶບານ" ຄືເພງເອກໃນ CD ທີ່ມີເອກະລັກປະເພດເພງເດີ່ນໂຮງຮຽນ ໄດ້ນິຍົມກັນຫຼາຍໃນທົ່ວປະເທດຈີນ,ອັນໄດ້ເບີກ ທາງໃຫ້ທ່ານເຫີຈູງວິວັດພັດທະນາເທິງເວທີເພງ, ກາຍເປັນນັກຮ້ອງໃໝ່ຜູ້ດີເດັ່ນຂອງເວທີເພງຈີນ.ໃນCDແຜ່ນໃໝ່ນີ້,ທ່ານເຫີຈູງໄດ້ລອງໃຊ້ດົນຕີຫຼາຍປະເພດທີ່ທັນສະໄໝກວ່າເກົ່າ .
(ປ່ອຍເພງ yi lu zou guo "ຕະຫຼອດທາງທີ່ເດີນຜ່ານມາ")
"ບໍ່ວ່າເຈົ້າປາຖະໜາສິ່ງໃດ, ຈົ່ງໄປສະແຫວງຢ່າງສົມໃຈ, ຕະຫຼອດທາງທີ່
ເດີນຜ່ານມາ,ເລື່ອງຫຍັງກໍເຄີຍປະສົບແລ້ວ, ຄວາມຮັກແຕ່ລະໄລຍະ ລ້ວນແຕ່ມີຈຸດຄືກັນ,ຢາກຮັກກໍຮັກໂລດ,ຢ່າສູ່ເວົ້າຫຍັງຫຼາຍ.ເຈົ້າກຽມພ້ອມແລ້ວບໍ່?"
ທີ່ຟັງມານັ້ນແມ່ນເພງ yi lu zou guo "ຕະຫຼອດທາງທີ່ເດີນຜ່ານມາ" ເພງທຳອິດໃນ CD ແຜ່ນໃໝ່ຂອງທ່ານເຫີຈູງ,ເພງນີ້ແຕ່ງໂດຍທ່ານລິນອີ່ເຟີ່ງ ສິລະປິນດົນຕີຜູ້ໜຸ່ມນ້ອຍທີ່ມີຄວາມສາມາດຂອງຮົງກົງ,ເນື້ອເພງໄດ້ສ່ອງແສງໃຫ້ເຫັນຈິດໃຈກວ້າງຂວາງ ແລະທ່າທີສຸຂະທັດຂອງຊາວໜຸ່ມ.
(ປ່ອຍເພງzao chen "ຍາມເຊົ້າ")
ເພງzao chen "ຍາມເຊົ້າ" ທີ່ມີທຳນອງເພງບຼຸສຢ່າງເຂັ້ມຂຸ້ນ,ໄດ້ບັນລະຍາຍຄວາມສຸກຂອງຄູ່ຮັກຄູ່ໜຶ່ງທີ່ເຟືອກັນໃນບ່ອນຫວ່າງທີ່ບໍ່ກວ້າງປານໃດ.ເພງນີ້ມີເນື້ອຮ້ອງວ່າ:"ຮູ້ສຶກວ່າແສງຕາເວັນອັນອົບອຸ່ນສາດສ່ອງໃສ່ຂາ,ໃນຫ້ອງເຈືອຈານໄປດ້ວຍບັນຍາກາດ ກຽດຄ້ານ, ບຶດໜຶ່ງພວກເຮົາກໍຈະໄປຊົງກາເຟກິນ, ຫຼືດື່ມນ້ຳຊາ ຈາງໆກໍ່ໄດ້.ໃນຫ້ອງນ້ອຍມີແຕ່ເຈົ້າກັບຂ້ອຍ,ເຮົາມາສະແດງເປັນທ້າວໂລມີໂອກັບນາງຈູລີເອ, ເທື່ອນີ້ຕ່າງແຕ່ວ່າ,ພວກເຮົາບໍ່ຕ້ອງພັດພາກຈາກກັນ, ຕໍ່ໄປພາຍໜ້າ,ແຕ່ລະເຊົ້າຄ່ຳ ເຈົ້າກັບຂ້ອຍກໍຈະໄດ້ຢູ່ນຳກັນ.
ທີ່ຈິງແລ້ວ,ໃນCD ແຜ່ນທຳອິດ,ທ່ານເຫີຈູງກໍເຄີຍຮ້ອງເພງບຼຸສ ທີ່ຊື່ວ່າ ping fan xin "ຈິດໃຈທຳມະດາ"ໄດ້ຢ່າງດີ. ເທື່ອນີ້,ທ່ານຮ້ອງເພງ"ຍາມເຊົ້າ"ກໍແຮ່ງມ່ວນ. ເບິ່ງຊົງ, ດົນຕີສີເມື່ອຍໆຄ້ານໆແບບນີ້,ອາດຈະເໝາະກັບລັກສະນະຂອງທ່ານເຫີຈູງ.
(ປ່ອຍເພງ man you "ທ່ຽວຫຼິ້ນ")
"ບິນໄປສູ່ທະເລ, ຕໍ່ໜ້າແມ່ນໂລກສີຄາມ, ໃນໃຈພວມມີຄວາມຝັນເກີດຂຶ້ນ, ວາແຂນອອກ ກອດເອົາທຸກຢ່າງໃຕ້ແສງຕາເວັນ, ຟ້າແຈ້ງຫຼາຍ ຮີບມືນຕາຂຶ້ນ,ຟຶດຄວາມອິດເມື່ອຍມື້ວານນີ້ຖິ້ມ, ຍາມໃດກໍມີເລື່ອງໃໝ່ອ່ຽມທີ່ເປັນໜ້າດີໃຈເກີດຂຶ້ນ. ປ່ຽນເຄື່ອງນຸ່ງໂຕຫຼົມໆ, ເພາະຍາມນີ້ແມ່ນລະດູຢ່ອນອາລົມ. ບໍ່ເມືອບ້ານ, ກໍບໍ່ມີສິ່ງເປັນຫ່ວງ."
ທີ່ທ່ານພວມຟັງຢູ່ນີ້ແມ່ນເພງ man you "ທ່ຽວຫຼິ້ນ"ເພງເອກໃນ CD ແຜ່ນໃໝ່ຂອງທ່ານເຫີຈູງ,ເອກະລັກ"ລັອກແອນໂລນ"ແບບອັງກິດແລະທຳນອງເຕັ້ນດີດເບົາໆ ເຕັມໄປດ້ວຍບັນຍາກາດໄວຄະນອງແລະເສລີ . ເພງ"ທ່ຽວຫຼິ້ນ"ກໍແມ່ນຂອງຂວັນອັນຈິງໃຈທີ່ທ່ານເຫີຈູງມອບໃຫ້ຊາວໜຸ່ມໝົດທຸກຄົນ,ທ່ານຫວັງໃຫ້ເພງນີ້ເປັນ ເພື່ອນຊາວໜຸ່ມທັງຫຼາຍ, ຢ່ວງບາດກ້າວອັນເສລີ,ມຸ່ງໄປສູ່ໂລກທີ່ກວ້າງຂວາງກວ່າເກົ່າ.
CDແຜ່ນໃໝ່ຂອງທ່ານເຫີຈູງ ມີນັກດົນຕີຜູ້ດີເລີດຫຼາຍຄົນເປັນກຳລັງສະໜັບ ສະໜູນ ເຊັ່ນ:ທ່ານລິນອີ່ເຟີ່ງ ທ່ານຫູຢຽນປິ່ນແລະທ່ານອູເຄິ້ຊຸນເປັນຕົ້ນ,ນັກດົນຕີຮຸ້ນໃໝ່ທີ່ມາຈາກເຂດໃນຈີນຮົງກົງແລະໄຕ້ຫວັນເຫຼົ່ານີ້ໄດ້ເປັນອົງປະກອບສຳຄັນໃນການແຕ່ງ CD ແຜ່ນໃໝ່ນີ້,ພູມປັນຍາການປະດິດຄິດແຕ່ງອັນພິເສດຂອງພວກເຂົາເຈົ້າ,ເຮັດໃຫ້ CD ແຜ່ນນີ້ມີບັນຍາກາດໂຣມັງຕິກທີ່ຕ່າງໝູ່ແລະມີຄວາມຫ້າວຫັນຟົດຟື້ນຂອງຊາວໜູ່ມ.
(ປ່ອຍເພງ"ຄຶດ")
"ຢາກໃຊ້ຫາງຕາແຕ້ມຮູບເຈົ້າ,ຢາກໃຫ້ເຈົ້າຟັງນິທານຫຼາຍໆເລື່ອງ,ຢາກຢູ່ໃນສະຫວັນນ້ອຍທີ່ກວ້າງພຽງ 10 ຕາແມັດ,ລໍຖ້າໃຫ້ຟ້າແຈ້ງ,ພຽງແຕ່ຢາກໃຫ້ເຈົ້າຢູ່ຄຽງຂ້າງຂ້ອຍ." ນີ້ແມ່ນເພງທີ່ໃຫ້ຊື່ວ່າ xiang ແປວ່າ "ຄຶດ" ຊຶ່ງເປັນເພງລູກທຸ້ງຂອງໄທເມືອງທີ່ທ່ານອູເຄິ້ຊຸນ ນັກຮ້ອງໄຕ້ຫວັນແຕ່ງສຳລັບທ່ານເຫີຈູງໂດຍສະເພາະ.
ມ້ວນທ້າຍລາຍການມື້ນີ້,ເຊີນຟັງເພງ li zhan "ອອກຈາກສະຖານີ" ເພງຮັກທີ່ໂສກເສົ້າເພງໜຶ່ງໃນ CD ແຜ່ນໃໝ່ຂອງທ່ານເຫີຈູງ.ເພງນີ້ມີເນື້ອຮ້ອງວ່າ:"ເຈົ້າສັ່ງຄວາມໄວ້ວ່າ,ໃຫ້ຂ້ອຍຄອຍຖ້າຕະຫຼອດຊີວິດ, ຂ້ອຍກໍມີແຕ່ຄຶດຮອດເຈົ້າທຸກເຊົ້າຄ່ຳ, ຢ່າສູ່ເວົ້າຄຳສັ່ງລາ, ຢ່າສູ່ວ່າຂໍໂທດ,ເຈົ້າວ່າຈະຢູ່ຄຽງຂ້າງຂ້ອຍຊົ່ວກາລະນານ,ແຕ່ພັດໄປໄກໂດຍບໍ່ກັບຄືນ,ແຮ່ງຮັກເຈົ້າຫຼາຍ,ກໍແຮ່ງເຫງົາໃຈ,ຂ້ອຍມີແຕ່ໃຊ້ນ້ຳຕາຫຼໍ່ລ້ຽງຄວາມຝັນທີ່ຫ່ຽວແຫ້ງ."
|
