|
|
 |
| (GMT+08:00)
2006-03-06 21:26:37
|
 |
|
ບົດບັນທຶກປະຈຳວັນກ່ຽວກັບກອງປະຊຸມສອງສະພາໃນວັນທີ 6 ມີນາ
cri
Author: da
ກອງປະຊຸມສະພາປະຊາຊົນແຫ່ງຊາດຈີນຄັ້ງທີ 4 ສະໄໝທີ 10 ທີ່ໄຂຂຶ້ນໃນວັນທີ 5 ມີນາ,ໄດ້ດູດດຶງສາຍຕາຂອງປະຊາຊົນບັນດາຊົນເຜົ່າຢູ່ເຂດໃນຈີນ ຮົງກົງ ມາກາວແລະໄຕ້ຫວັນ,ພ້ອມທັງໄດ້ຮັບຄວາມສົນໃຈຈາກທົ່ວໂລກ.ສະພາປະຊາຊົນແຫ່ງຊາດຈີນໄຂປະຊຸມປີລະເທື່ອ ເວົ້າສຳລັບປະຊາຊົນຈີນແລ້ວແມ່ນວັນເຂົ້າຮ່ວມແລະເປິກສາຫາລືວຽກບ້ານການເມືອງ,ສ່ວນເວົ້າສຳລັບຫາງສຽງຂອງໂລກແລ້ວ,ພັດແມ່ນໂອກາດທີ່ເອົາໃຈໃສ່ປັກກິ່ງແລະວິຈານຈີນ.ໂດຍສະເພາະແມ່ນບັນດາປະເທດອາຊີອາຄະເນຢູ່ອ້ອມຂ້າງປະເທດຈີນ,ຍິ່ງໄດ້ເອົາໃຈໃສ່ນຳກອງປະຊຸມສະພາປະຊາຊົນແຫ່ງຊາດຈີນຄັ້ງນີ້.
ເວັບໄຊ manager on line ທີ່ມີຊື່ສຽງຂອງໄທໄດ້ແຈ້ງຂ່າວແລະວິຈານບົດລາຍງານວຽກງານລັດຖະບານຂອງທ່ານນາຍົກລັດຖະມົນຕີເວີນເຈຍປາວກ່ຽວກັບການສ້າງສາຊົນນະບົດແບບໃໝ່ຂອງຈີນ ການສຶກສາພາກບັງຄັບ ແລະເນື້ອໃນໃຈຄວາມແຜນພັດທະນາ 5 ປີຄັ້ງທີ 11 ຂອງຈີນເປັນຕົ້ນດ້ວຍຫົວເລື່ອງ"ຈີນເພີ່ມເບີກເງິນ 42 ຕື້ໂດລາສະຫະລັດອອກແຮງຊຸກຍູ້ການສ້າງສາຊົນນະບົດແບບໃໝ່ ເພື່ອລົບລ້າງຄວາມທຸກຍາກຈາກກົກຮາກ",ສຸດທ້າຍ,ບົດຄວາມຊີ້ອອກວ່າ,ຈີນຍັງຈະເພີ່ມຄ່າໃຊ້ຈ່າຍດ້ານການທະຫານ 35 ຕື້ໂດລາສະຫະລັດໃຊ້ເຂົ້າໃນການເຝິກແອບກອງທັບແລະຍົກສູງຄວາມສາມາດ,ແລະຖືເລື່ອງນີ້ກ່າວເຕືອນພວກຕັດແຍກໄຕ້ຫວັນອອກເປັນເອກະລາດວ່າ:"ຈີນເດັດຂາດບໍ່ຫ່ອນປະນີປະນອມຕໍ່ການກະທຳໃດໆທີ່ເຈດຕະນາຕັດແຍກປະເທດຊາດ."
ເວັບໄຊຂອງວິທະຍຸແຫ່ງຊາດຫວຽດນາມຄື ວິທະຍຸສຽງຂອງຫວຽດນາມໄດ້ພິມບົດຄວາມໂຮມສູນແຈ້ງຂ່າວກ່ຽວກັບບັນຫາສ້າງສາຊົນນະບົດແບບໃໝ່ໃນບົດລາຍງານຂອງທ່ານເວີນເຈຍປາວ,ບົດຄວາມຊີ້ອອກວ່າ:"ການສ້າງສາຊົນນະບົດສັງຄົມນິຍົມແບບໃໝ່ແມ່ນໜ້າທີ່ປະຫວັດການຕົ້ນຕໍລາຍໜຶ່ງຂອງຈີນ."
ໜັງສືພິມນານຢາງຊ່າງປ້າວຂອງມາເລເຊຍໄດ້ແຈ້ງຂ່າວກອງປະຊຸມສະພາປະຊາຊົນແຫ່ງຊາດຈີນຄັ້ງນີ້ດ້ວຍຫົວຂໍ້ສະເພາະຢ່າງລະອຽດ.ບົດຄວາມຂຽນວ່າ:"ບົດລາຍງານຂອງທ່ານເວີນເຈຍປາວ ສ່ວນຫຼາຍແມ່ນກ່ຽວພັນກັບບັນຫາສ້າງເຂດຊົນນະບົດສັງຄົມນິຍົມແບບໃໝ່.ໃນປະຊາກອນຂອງຈີນ 1 ຕື້ 300 ລ້ານຄົນ,ມີຊາວກະສິກອນ 750 ລ້ານຄົນຢູ່ທີ່ຊົນນະບົດ,ສະນັ້ນ,ລັດຖະບານວາງແຜນເບີກເງິນ 339 ຕື້ 700 ລ້ານຢວນເຂົ້າໃນການຍົກສູງການຜະລິດກະສິກຳ,ແລະເບີກເງິນອີກຫຼາຍຕື້ຢວນເຂົ້າໃນການຍົກສູງລະດັບບໍລິການສັງຄົມໃນເຂດຊົນນະບົດ."
ໜັງສືພິມລຽນເຫີຈາວປ້າວຂອງສິງກະໂປຊີ້ອອກວ່າ:"ໃນ 5 ປີທີ່ຜ່ານມາ,ໃຕ້ການປັບປຸງຄວບຄຸມມະຫາພາກ,ເສດຖະກິດຈີນຍັງໄດ້ເຕີບໂຕຂຶ້ນ 9,5% ຕໍ່ປີ,ລັດຖະບານກາງໄດ້ຕົກລົງເພີ່ມຄວາມແຮງໃນການພັດທະນາແບບຍືນຍົງ,ໄດ້ວາງເປົ້າໝາຍ GDP ເພີ່ມຂຶ້ນ 7,5% ຕໍ່ປີໃນ 5 ປີຂ້າງໜ້າ,ເປົ້າໝາຍນີ້ແມ່ນວາງອອກຕາມຄວາມຕ້ອງການແລະຄວາມອາດເປັນໄປໄດ້,ຍິ່ງແມ່ນຢູ່ບົນພື້ນຖານເຮັດໃຫ້ອົງປະກອບດີຂຶ້ນ ຍົກປະສິດທິພາບໃຫ້ສູງຂຶ້ນແລະຫຼຸດການສິ້ນເບື້ອງໜ້ອຍລົງ."
ຈາກນີ້ເຫັນໄດ້ວ່າ,ເນື້ອໃນທີ່ບັນດາປະເທດອາຊີອາຄະເນເອົາໃຈໃສ່ທີ່ສຸດນຳກອງປະຊຸມສະພາປະຊາຊົນແຫ່ງຊາດຈີນແລະບົດລາຍງານວຽກງານລັດຖະບານຂອງທ່ານນາຍົກລັດຖະມົນຕີນັ້ນ ແມ່ນໂຮມສູນຢູ່ໃນບັນຫາກະສິກຳ ຊົນນະບົດແລະຊາວກະສິກອນ,ນີ້ໄດ້ສ່ອງແສງໃຫ້ເຫັນບັນດາປະເທດອາຊີອາຄະເນມີສະພາບແຫ່ງຊາດຄ້າຍຄືກັນກັບປະເທດຈີນ ທັງປະເຊີນບັນຫາຊີວິດການເປັນຢູ່ທີ່ຄືກັນ,ເຊື່ອວ່າໃນວາລະປະຊຸມໃນບໍ່ເທົ່າໃດມື້ຂ້າງໜ້າ,ຈະສະໜອງຂ່າວຄາວຫຼາຍກວ່າເກົ່າໃຫ້ບັນດາປະເທດອ້ອມຂ້າງຊອກຮູ້ຈີນແລະການພັດທະນາຂອງຈີນໃນອະນາຄົດ,ພ້ອມທັງຈະນຳເອົາຄວາມຫວັງແລະຜົນປະໂຫຍດຫຼາຍກວ່າເກົ່າໃຫ້ແກ່ຊີວິດການເປັນຢູ່ຂອງສາມັນຊົນຂອງຈີນ.
|
|
|
