|
ກຳມະການຊົນເຜົ່າສ່ວນໜ້ອຍແຂວງຢຸນນານທີ່ນັກຂ່າວຮູ້ຈັກ--ບົດບັນທຶກປະຈຳວັນກ່ຽວກັບກອງປະຊຸມສອງສະພາໃນວັນທີ 7 ມີນາ
cri
Author: da
ອາດຈະແມ່ນຍ້ອນວ່າຮັກຫອມພູຜາແມ່ນ້ຳແລະຮີດຄອງປະເພນີຊົນເຜົ່າສ່ວນໜ້ອຍຂອງແຂວງຢຸນນານ,ອາດຈະແມ່ນຍ້ອນວ່າເຄີຍໄປສຳພາດຢູ່ແຂວງຢຸນນານຫຼາຍເທື່ອ,ເວົ້າສຳລັບນັກຂ່າວແລ້ວ,ແຂວງຢຸນນານແມ່ນຄວາມໄຝ່ຝັນທີ່ອັດສະຈັນ.ເມື່ອໄດ້ຍິນວ່າຈະໄປສຳພາດກຳມະການສະພາປຶກສາການເມືອງ,ນັກຂ່າວກໍມັກໄປໂຮງແຮມທີ່ກຳມະການຊົນເຜົ່າສ່ວນໜ້ອຍເຂົ້າພັກ,ປີກ່ອນ ປີກາຍແລະປີນີ້,ພາຍຫຼັງສຳພາດຫຼາຍເທື່ອແລ້ວ,ກຳມະການຈຳນວນໜຶ່ງທີ່ເຄີຍສຳພາດນັ້ນກໍຄຸ້ນເຄີຍກັນດີແລ້ວ.
ທ່ານນາງຢາງອີ່ເປິ່ນ ກຳມະການເຜົ່າສ່ວນໜ້ອຍທີ່ນັກຂ່າວຄຸ້ນເຄີຍທີ່ສຸດນັ້ນແມ່ນຄົນເຜົ່ານ້າຊີ່,ເປັນຮອງເຈົ້າຄອງເມືອງລີ້ຈ່ຽງແຂວງຢຸນນານ.ປີ 2004,ນັກຂ່າວຂໍໃຫ້ເພິ່ນລົມການອະນຸລັກດົນຕີບູຮານຂອງເຜົ່ານ້າຊີ່,ໄດ້ສ້າງພາບປະທັດໃຈອັນເລິກເຊິ່ງໄວ້ໃຫ້ແກ່ນັກຂ່າວ,ດຽວນີ້ຍັງຈື່ຄຳເວົ້າຂອງທ່ານນາງທີ່ວ່າ:"ການອະນຸລັກມໍລະດົກວັດທະນະທຳຊົນເຜົ່າແມ່ນຊ້າບໍ່ໄດ້,ດຽວນີ້ລົງທຶນໜຶ່ງເຟິ່ນ,ແຕ່ໃນອະນາຄົດອາດຈະກາຍເປັນຮ້ອຍຢວນ ພັນຢວນ ໝື່ນຢວນ,ຈົນກະທັ້ງມີຄຸນຄ່າທີ່ນັບບໍ່ຖ້ວນ".
ໃນໄລຍະກອງປະຊຸມສອງສະພາປີກາຍນີ້,ທ່ານນາງໄດ້ພົບກັບນັກຂ່າວຫຼາຍເທື່ອອີກ,ເຖິງວ່າສອງຄົນພວກເຮົາລ້ວນແຕ່ຄາວຽກຫຼາຍກໍຕາມ,ແຕ່ຍັງໄດ້ທັກທາຍກັນ.ໃນກອງປະຊຸມປີນີ້,ທ່ານນາງຢາງອີ່ເປິ່ນບອກນັກຂ່າວວ່າ,ເພິ່ນໄດ້ນຳເອົາຍັດຕິສອງສະບັບ,ແມ່ນກ່ຽວພັນກັບການສຶກສາຊົນເຜົ່າສ່ວນໜ້ອຍຂອງເຂດພາກຕາເວັນຕົກ.ນັກຂ່າວໄດ້ນັດກັບເພິ່ນວ່າ,ຈະໄປສຳພາດເພິ່ນໃນບໍ່ເທົ່າໃດມື້ຂ້າງໜ້າ.
ຜູ້ທີ່ຄຸ້ນເຄີຍຕໍ່ມາກໍແມ່ນທ່ານສາດສະດາຈານວັງຊື້ຕ້າຍ ກຳມະການສະພາປຶກສາການເມືອງ,ທ່ານເປັນອະທິການບໍດີສະຖາບັນສິລະປະມະຫາວິທະຍາໄລຢຸນນານ,ທັງເປັນຮອງປະທານສະມາຄົມສິລະປິນພື້ນເມືອງແຂວງຢຸນນານ.ທ່ານວັງແມ່ນຄົນເຜົ່າອີ,ມັກຄົ້ນຄວ້າວັດທະນະທຳຊົນເຜົ່າ,ຍັດຕິທີ່ທ່ານນຳເອົາມາແຕ່ລະປີລ້ວນແຕ່ກ່ຽວພັນກັບວັດທະນະທການສຶກສຶກ.ທ່ານວັງມີຄວາມຮູ້ຫຼາຍ,ນັກຂ່າວມັກຟັງເພິ່ນເລົ່າວັດທະນະທຳຊົນເຜົ່າສ່ວນໜ້ອຍ,ເຮັດໃຫ້ນັກຂ່າວລືມວ່າ,ຕົນເອງເປັນນັກຂ່າວໃນເວລາສຳພາດເພິ່ນ,ຮູ້ສຶກວ່າໄດ້ຄືນເມືອຫ້ອງຮຽນ,ຄືກັນກັບໄປທ່ຽວຫຼິ້ນໃນວັດທະນະທຳຊົນເຜົ່າແຂວງຢຸນນານທີ່ມີຫຼາຍສີຫຼາຍສັນນຳທ່ານວັງ.ລາງເທື່ອ ໃນເວລາໄປເອົາຂ່າວຢູ່ໂຮງແຮມທີ່ທ່ານວັງເຂົ້າພັກ,ນັກຂ່າວມັກລົມກັບເພິ່ນໃນເວລາຫວ່າງ.
ກຳມະການແຂວງຢຸນນານຜູ້ອື່ນທີ່ນັກຂ່າວຮູ້ຈັກຍັງມີທ່ານເຈີ່ງເພີງເຜົ່າໄທລື້ ທ່ານວັງຈ່າງພິງ ເຜົ່າປູ້ຫຼາງທີ່ອາຍຸພຽງ 35 ປີກໍ່ໄດ້ເປັນກຳມະການສະພາປຶກສາການເມືອງມາ 7 ປີແລ້ວແລະທ່ານອື່ນໆ.ຄວາມກະຕືລືລົ້ນ ຄວາມຊື່ສັດ ຄວາມຮັກແພງວັດທະນະທຳຊົນເຜົ່າ ຄວາມສົນໃຈຕໍ່ວຽກງານບ້ານເກີດເມືອງນອນຂອງພວກເພິ່ນ,ລ້ວນແຕ່ໄດ້ສ້າງພາບປະທັບໃຈອັນເລິກເຊິ່ງໃຫ້ແກ່ນັກຂ່າວ,ເໝືອນກັບພູຜາປ່າໄມ້ແມ່ນ້ຳລຳເຊ ມັກເຮັດໃຫ້ຄົນລືມຍາກ.
|
|
