|
ຕາມຂ່າວCRI,ວັນທີ7ມີນາ,ໃນງານຊຸມນຸມນັກຂ່າວທີ່ກອງປະຊຸມຄັ້ງທີ4ຂອງສະພາປະຊາຊົນແຫ່ງຊາດຈີນສະໄໝທີ10ຈັດຂຶ້ນ,ທ່ານຫຼີຈ້າວຊີ່ງ ລັດຖະມົນຕີການຕ່າງປະເທດຈີນໄດ້ບັນລະຍາຍຫຼັກໝັ້ນຂອງຈີນກ່ຽວກັບບັນຫາ ຈຸດຮ້ອນສາກົນຕ່າງໆເຊັ່ນບັນຫານິວເຄຼຍອີຣານແລະການປະທະກັນລະຫວ່າງປາເລັສຕີນກັບອິດສຣາແອນເປັນຕົ້ນ.
ທ່ານຫຼີຈ້າວຊີ່ງຕອບຄຳຖາມຂອງນັກຂ່າວCRI
ໃນເວລາຕອບຄຳຖາມຂອງນັກຂ່າວກ່ຽວກັບບັນຫານິວເຄຼຍອີຣານ, ທ່ານຫຼີຈ້າວຊີ່ງກ່າວວ່າ,ຍັງມີຊ່ອງຫວ່າງແກ້ໄຂບັນຫານິວເຄຼຍອີຣານໃນຂອບອົງການພະລັງງານປະລະມານູສາກົນຢູ່,ປະຊາຄົມໂລກບໍ່ຄວນປະລະຄວາມພະຍາຍາມ.ທ່ານເວົ້າວ່າ,ໃນຖານເປັນປະເທດເຊັນສົນທິສັນຍາບໍ່ແຜ່ຜາຍອາວຸດນິວເຄຼຍ,ອີຣານມີສິດທິນຳໃຊ້ພະລັງງານນິວເຄຼຍເຂົ້າໃນທາງສັນຕິພາບ,ແລະກໍ່ຄວນປະຕິບັດຕາມພັນທະທີ່ກ່ຽວຂ້ອງ.ຝ່າຍຈີນຫວັງໃຫ້ອີຣານຮ່ວມມືກັບອົງການປະລະມານູສາກົນຢ່າງເຕັມສ່ວນ,ສືບຕໍ່ໃຊ້ມາດຕະການທີ່ມີຜົນດີຕໍ່ການເພີ່ມທະວີຄວາມໄວ້ເນື້ອເຊື່ອໃຈກັນ.
ທ່ານຫຼີຈ້າວຊີ່ງຕອບຄຳຖາມຂອງນັກຂ່າວຍີ່ປຸ່ນ
ໃນເວລາຕອບຄຳຖາມກ່ຽວກັບການປະທະກັນລະຫວ່າງປາເລັສຕິນກັບອິດສຣາແອນ,ທ່ານຫຼີຈ້າວຊີ່ງເວົ້າວ່າ,ຝ່າຍຈີນມີເຈດຈຳນົງພັດທະນາການພົວພັນກັບປະເທດຕາເວັນອອກກາງບົນພື້ນຖານຕ່າງເຄົາລົບກັນ,ສະເໝີພາບແລະຕ່າງຝ່າຍຕ່າງມີຜົນປະໂຫຍດ,ຝ່າຍຈີນໄດ້ທຳຄວາມພະຍາຍາມຕະຫຼອດມາເພື່ອຊັກຊວນໃຫ້ຈັດການເຈລະຈາສັນຕິພາບ.
ທ່ານຫຼີຈ້າວຊີ່ງຕອບຄຳຖາມຂອງນັກຂ່າວໄຕ້ຫວັນ
ເມື່ອເວົ້າເຖິງບັນຫານິວເຄຼຍແຫຼມເກົາຫຼີ,ທ່ານຫຼີຈ້າວຊີ່ງເວົ້າວ່າ,ຝ່າຍຈີນຫວັງໃຫ້ບັນດາຝ່າຍທີ່ກ່ຽວຂ້ອງໃຊ້ທ່າທີສົນທະນາແລະປຶກສາຫາລືກັນເພື່ອແກ້ໄຂບັນຫາດັ່ງກ່າວ,ທັງນີ້ມີຄວາມໝາຍສຳຄັນຕໍ່ການຮັກສາສັນຕິພາບແລະສະຖຽນລະພາບຂອງແຫຼມເກົາຫຼີຈົນກະທັ້ງພາກພື້ນອາຊີຕາເວັນອອກສຽງເໜືອ,ແລະກໍ່ສອດຄ່ອງກັບຜົນປະໂຫຍດຮ່ວມຂອງບັນດາຝ່າຍ.
|
