ຕາມ​ຂ່າວCRI: ວັນ​ທີ 9 ມີນາ, ຫ້ອງການ​ຖະ​ແຫຼງຂ່າວ​ລັດຖະບານ​ຈີນ​ໄດ້​ປະກາດ "ບົດ​ບັນ​ທຶກ​ສິດ​ທິ​ມະນຸດ​ຂອງ​ອາ​ເມ​ລິ​ກາປີ 2005", ​ເພື່ອ​ຕອບ "ບົດ​ລາຍ​ງານ​ສິດທິ​ມະນຸດ​ຕ່າງປະ​ເທດ​ປີ 2005" ທີ່​ກະຊວງ​ການ​ຕ່າງປະ​ເທດ​ອາ​ເມ​ລິ​ກາ​ປະກາດ​ໃນ​ວັນ​ທີ 8 ມີນາ, ​ໃນ​ບົດ​ລາຍ​ງານ​ຂອງ​ອາ​ເມ​ລິ​ກາ​ໄດ້​ບິດ​ເບືອນ​ແລະ​ຕິຕຽນ​ສະພາບ​ສິດທິ​ມະນຸດ​ຂອງ​ບັນດາ​ປະ​ເທດ​ເຊິ່ງ​ລວມ​ທັງ​ຈີນ.

ບົດ​ບັນທຶກ​ໄດ້​ຊີ້​ອອກ​ວ່າ, ບົດ​ລາຍ​ງານ​ສິດທິ​ມະນຸດ​ຂອງຕ່າງປະ​ເທດ​ປີ 2005 ທີ່​ກະ​ຊວງ​ການ​ຕ່າງປະ​ເທດ​ອາ​ເມ​ລິ​ກາ​ປະກາດ​ນັ້ນບໍ່​ເອົາ​ຫົວຊາ​ນຳ​ສະພາບ​ສິດທິ​ມະນຸດ​ອັນ​ຂີ້​ຮ້າຍ​ຂອງ​ຕົນ​ເອງ, ຖື​ຕົນ​ເອງເປັນ "ພິພາກສາ​ສິດທິ​ມະນຸດ​ຂອງ​ໂລກ" ອີກ​ເທື່ອ​ໜຶ່ງ, ​ເວົ້າຈັ່ງຊັ້ນ​ຈັ່ງ​ຊີ້​ຕໍ່​ສະພາບ​ສິດທິ​ມະນຸດ​ຂອງ 190 ກວ່າ​ປະ​ເທດ​ແລະ​ເຂດ​ແຄວ້ນ​ເຊິ່ງ​ລວມ​ທັງ​ຈີນ, ຫາກ​ບໍ່​ກ່າວ​ເຖິງ​ບັນ​ຫາ​ຂອງ​ຕົນ​ເອງ​​ທີ່​ເຄີຍ​ລ່ວງ​ລ້ຳ​ສິດທິ​ມະ​ນຸດ​ຢ່າງ​ໜັກ​ໜ່ວງ.

ບົດ​ຄວາມ​ໄດ້​ຍົກ​ເອົາ​ຕົວຢ່າງຈຳນວນຫຼວງຫຼາຍ​ເພື່ອ​ພິສູດ​ວ່າ ອາ​ເມ​ລິ​ກາ​ເອງ​ມີ​ບັນ​ຫາ​ລ່ວງ​ລ້ຳ​ສິດທິ​ມະນຸດ​ຢ່າງ​ໜັກໜ່ວງ, ບົດ​ຄວາມ​ໄດ້​ແບ່ງ​ອອກ​ເປັນ 7 ພາກສ່ວນ ຄື "ກ່ຽວ​ກັບ​ຄວາມ​ປອດ​ໄພ​ດ້ານຊີວິດ​ແລະ​ຮ່າງກາຍ" "ກ່ຽວ​ກັບ​ສິດ​ການ​ເມືອງ​ແລະ​ເສ​ລີ​ພາບ" "ກ່ຽວ​ກັບ​ການ​ຈຳ​ແນ​ກ​ເຊື້ອ​ຊາດ" ​ແລະ "ກ່ຽວກັບສິດ​ຂອງ​ແມ່​ແລະ​ເດັກ" ​ເປັນ​ຕົ້ນ.

ບົດ​ຄວາມ​ໄດ້​ເຕືອນ​ໃຫ້​ລັດຖະບານ​ອາ​ເມລິກາຈົ່ງ​ເອົາ​ໃຈ​ໃສ່​ນຳ​ບັນຫາ​ສິດທິ​ມະ​ນຸດ​ຂອງ​ປະ​ເທດ​ຕົນ, ສຳຫຼວດການ​ກະທຳ​ຂອງ​ຕົນ​ເອງ​ໃນ​ຂົງ​ເຂດ​ສິດທິ​ມະນຸດ, ​ໃຊ້​ມາດ​ຕະ​ການ​ຕິດ​ແທດ​ຕົວ​ຈິງ, ປົວ​ແປງ​ສະພາບ​ສິດທິ​ມະນຸດ​ຂອງ​ຕົນ​ເອງ​, ​ເຮັດ​ວຽກ​ຫຼາຍກວ່າ​ເກົ່າທີ່​ມີຜົນ​ດີ​ຕໍ່​ການ​ຮ່ວມ​ມື​ທາງ​ສິດທິ​ມະນຸດ​ສາກົນ​ແລະ​ການ​ພັດທະນາພາລະກິດ​ສິດທິ​ມະນຸດ​ສາກົນ​ຢ່າງ​ປອດ​​ໃສ​.