|
|
 |
| (GMT+08:00)
2006-03-09 18:44:17
|
 |
|
ຊີມອາຫານແຊບຂອງຣັດເຊຍຢູ່ຮາບິນເມືອງນ້ຳແຂງ(ສຽງ)
cri
Author: da
|
ເມືອງຮາບິນ
ເມື່ອ 100 ກວ່າປີກ່ອນ,ເນື່ອງຈາກສະຖານະການພາຍໃນປະເທດແລະໃນໂລກ,ຄົນຣັດເຊຍນັບເປັນໝື່ນຄົນໄດ້ຜ່ານແຜ່ນດິນໃຫຍ່ເອີລົບອາຊີ,ຈາກແຄມແມ່ນ້ຳໂວນກາມາຮອດແຄມແມ່ນ້ຳຊົ່ງຮ່ວາ,ຍົກຍ້າຍມາຢູ່ຮາບິນ ເມືອງພາກເໜືອຂອງຈີນ.ໃນຊູ່ມື້ນີ້,ຢູ່ໃນເມືອງທີ່ມີຊື່ລືນາມຍ້ອນຫິມມະຕົກເລື້ອຍໆດັ່ງກ່າວ,ນອກຈາກມີສິ່ງກໍ່ສ້າງແບບຣັດເຊຍແລ້ວ,ຍັງມີຮ້ານອາຫານຣັດເຊຍຫຼາກຫຼາຍໆໄດ້ບອກໃຫ້ຜູ້ທ່ຽວຮູ້ວ່າ,ເມືອງນີ້ເປັນເມືອງທີ່ມີເອກະລັກພິເສດແນວໃດ.
ຖະໜົນຈົ່ງຢ່າງ
ຖະໜົນຈົ່ງຢ່າງ ທີ່ຢູ່ເຂດກາງເມືອງຮາບິນ,ແມ່ນຖະໜົນການຄ້າໃຫຍ່ກວ່າເພິ່ນແບບໃຫ້ຄົນຍ່າງເລາະຢູ່ກາງເມືອງຮາບິນ,ແມ່ນຄົນຣັດເຊຍສ້າງຂຶ້ນເມື່ອຊຸມປີທີ 20 ສະຕະວັດທີ່ແລ້ວ.ໃນນັ້ນ,ຮ້ານອາຫານຮວາເມີຍແມ່ນຮ້ານອາຫານຣັດເຊຍທີ່ເກົ່າແກ່ກວ່າໝູ່ໃນເມືອງຮາບິນ,ໄທເມືອງຮາບິນເກືອບທຸກຄົນມັກມາກິນເຂົ້າຢູ່ຮ້ານນີ້.
ເມື່ອຍ່າງເຂົ້າຮ້ານອາຫານຮວາເມີຍ,ຈະມີຜູ້ເຖົ້າຜົມຫງອກຜູ້ໜຶ່ງທີ່ໃສ່ເນີສີດຳພາບໍລິກອນຕ້ອນຮັບແຂກ.ລຸງຊື່ວ່າ"ວັງເວີນຫຼີ",ອາຍຸ 75 ປີ,ເພິ່ນໄດ້ເຮັດວຽກຢູ່ຮ້ານນີ້ 40 ກວ່າປີແລ້ວ.ຟັງລຸງເລົ່າເລື່ອງເກົ່າກ່ຽວກັບຮ້ານນີ້ໃຫ້ແຂກຝັງເປັນເລື່ອງທີ່ໜ້າຟັງທີ່ສຸດ:
"ຮ້ານອາຫານຮວາເມີຍແມ່ນຮ້ານອາຫານຣັດເຊຍຮ້ານທຳອິດທີ່ມາຕັ້ງຢູ່ຈີນ,ຕັ້ງຂຶ້ນເມື່ອປີ 1925 ,ເຈົ້າຂອງຮ້ານໃນຄາວນັ້ນແມ່ນຊາວຢິວຣັດເຊຍ."
ລຸງວັງເວົ້າວ່າ,ຕໍ່ມາ ໄດ້ປ່ຽນເຈົ້າຂອງຮ້ານຫຼາຍເທື່ອ,ເຄີຍມີໄທຣັດເຊຍ ໄທເຢຍລະມັນ ໄທໂປໂລຍ ໄທເຊັກແລະໄທຈີນ.ໃນຖານເປັນຮ້ານອາຫານຣັດເຊຍແບບເກົ່າແກ່,ຈົນຮອດປະຈຸບັນ ຮ້ານຮວາເມີຍກໍຍັງຮັກສາຮີດຄອງດັ້ງເດີມຫຼາຍຢ່າງໄວ້ຜູ່.ລຸງວັງເວີນຫຼີເວົ້າວ່າ:
"ຮ້ານຄ້າໃຫຍ່ ຮ້ານອາຫານໃຫຍ່ຂອງຣັດເຊຍ,ຮ້ານໃດກໍມີຜູ້ເຖົ້າຮັບຕ້ອນແຂກຢູ່ບ່ອນເຂົ້າປະຕູຮ້ານ,ເຮັດໃຫ້ຄົນຮູ້ສຶກສະໜິດສະໜົມ.ມີແຂກຫຼາຍຄົນເວົ້າວ່າ,ເມື່ອເຫັນຜູ້ເຖົ້າຕ້ອນຮັບແຂກຢູ່ນີ້,ກໍຮູ້ສຶກຄືວ່າຢູ່ເຮືອນໝູ່,ລົມກັນໄດ້ຕາມສະບາຍ."
ກໍເໝືອນກັບຮ້ານອາຫານຣັດເຊຍອື່ນໆ,ຢູ່ໃນຮ້ານຮວາເມີຍກໍມີໂຄມໄຟແຂວນເທິງເພດານແບບບູຮານ ພ້ອມກັບເຄື່ອງເອ້ຝາເຮືອນສົມທົບກັນຢ່າງສວຍງາມ.ໜ້າໂຕະປູຜ້າສີຂາວ,ແຂກຜູ້ນັ່ງກິນອາຫານກໍລົມກັນອຸ່ມໆ.ຖ້າໃນຂະນະນີ້,ຢູ່ນອກປ່ອງຢ້ຽມມີຫິມມະຕົກຍ່າວໆ,ກໍຈະງາມປານຮູບແຕ້ມສີນ້ຳມັນແບບຣັດເຊຍເອົາໂລດ.
 ອາຫານຂອງຮ້ານຮວາເມີຍກໍບໍ່ແມ່ນແຕ່ງແບບລົດຊາດດັ້ງເດີມອ້ອຍຕ້ອຍຂອງຣັດເຊຍດອກ,ຫາກແມ່ນໄດ້ດັດແປງຕາມລົດຊາດທີ່ຄົນຈີນມັກ ຄືຈາງແດ່ຈັກໜ່ອຍ.ຍັງມີອາຫານຣັດເຊຍບາງຢ່າງແມ່ນເຮັດແບບຈີນອ້ອຍຕ້ອຍ,ຄື"ປິ້ງປີງທະເລໃສ່ນົມຂຸ້ນ",ຢູ່ໃນອາຫານຣັດເຊຍແມ່ນບໍ່ມີ.ແຕ່ພໍ່ຄົວໄດ້ໃຊ້ນົມຂຸ້ນແບບດັ້ງເດີມຂອງຣັດເຊຍມາປິ້ງໃສ່ປີງທະເລຂອງຈີນ,ມີລົດຊາດແຊບພິເສດ,ໄດ້ຮັບຄວາມນິຍົມຈາກແຂກຜູ້ມາກິນອາຫານມັກຫຼາຍ.ນອກນີ້,ຖ້າໄປຮ້ານອາຫານຮວາເມີຍຕ້ອງຊີມອາຫານທີ່ມີຊື່ສຽງປະຈຳຮ້ານສອງເຍື່ອງ,ຄື"ແກງຜັກແດງແລະກຸ້ງອົບໝໍ້ດິນ".ແຂກຍີ່ປຸ່ນຜູ້ໜຶ່ງທີ່ມາກິນຢູ່ຮ້ານຮວາເມີຍເທື່ອທຳອິດເວົ້າວ່າ:
"ອາຫານຣັດເຊຍຂອງຮ້ານນີ້ແຊບຫຼາຍ,ຂ້າພະເຈົ້າມັກແກງແລະຍຳສະຫຼັດຂອງຮ້ານນີ້,ກຸ້ງອົບກໍແຊບຫຼາຍ.ຮ້ານກໍງາມ,ສະບາຍຫຼາຍ,ມີລັກສະນະແບບຕົ້ນສະຕະວັດທີ 20.ຂ້າພະເຈົ້າເຫັນວ່າ,ມີເອກະລັກຂອງຣັດເຊຍທີ່ສຸດ."
ຍ່າງອອກຈາກຮ້ານຮວາເມີຍ,ເດີນຕາມຖະໜົນຈົ່ງຢ່າງໄປທາງທິດເໜືອ,ທ່ານກໍຈະເຫັນຕຶກສອງຊັ້ນສີເຫຼືອງຫຼັງໜຶ່ງຢູ່ແຈທິດຕາເວັນອອກຂອງຫົນທາງ.ຊັ້ນທີສອງຂອງຕຶກນີ້ແມ່ນຫ້ອງສະໝຸດ,ຊັ້ນລຸ່ມແມ່ນຮ້ານອາຫານຣັດເຊຍທີ່ມີເຄືອຕົ້ນໝາກອະງຸ່ນກ້ຽວວຽນ,ຊື່ວ່າ"ຣູເຊຍ1914".
ເມື່ອທຽບກັບຮ້ານຮວາເມີຍທີ່ຫຼູຫຼາແລ້ວ,ຮ້ານຣູເຊຍຄືຈັ່ງວ່າເປັນຫ້ອງຮັບແຂກຂອງຄອບຄົວຄົນຣັດເຊຍທຳມະດາ.ໃນຮ້ານມີພຽງແຕ່ 7-8 ໂຕະ,ຢູ່ເທິງຝາມີຮູບແຕ້ມນ້ຳມັນສີຜູ້ຍິງຣັດເຊຍ.ຢູ່ສອງເບື້ອງຂອງຮູບແຕ້ມແຜ່ນນີ້ໄດ້ແຂວນຮູບຄອບຄົວຂອງຊາວຣັດເຊຍຫຼາຍແຜ່ນ.ເຈົ້າຂອງຮ້ານແມ່ນຜູ້ຊາຍຊື່ວ່າ ຫູຫົງ,ແມ່ນຊ່າງກໍ່ສ້າງທີ່ອາໄສຢູ່ຍີ່ປຸ່ນ,ອາຍຸ 50 ປີກວ່າແລ້ວ,ແມ່ນລູກຊອດຈີນຣັດເຊຍ.ທ່ານແນະນຳວ່າ,ຜູ້ຍິງຣັດເຊຍໃນຮູບແຕ້ມເທິງຝາເຮືອນແມ່ນຍ່າຂອງແມ່ເພິ່ນ,ສ່ວນຮູບຖ່າຍແລະເຄື່ອງເອ້ໃນຮ້ານ,ສ່ວນຫຼາຍແມ່ນມູນມັງຂອງຜູ້ຍິງຣັດເຊຍຜູ້ໜຶ່ງທີ່ໄດ້ດຳລົງຊີວິດຢູ່ເມືອງຮາບິນ 90 ກວ່າປີແລ້ວ.
ທ່ານຫູຫົງເວົ້າວ່າ,ທ່ານຕັ້ງຮ້ານອາຫານຮ້ານນີ້,ແມ່ນຢາກເຮັດເປັນຫໍລະລຶກຂອງຄອບຄົວ,ເພື່ອລະລຶກຊາວຣັດເຊຍ 2 ແສນກວ່າຄົນທີ່ເຄີຍຕັ້ງພູມລຳເນົາແລະດຳລົງຊີວິດຢູ່ເມືອງຮາບິນ.ທ່ານເວົ້າວ່າ:
"ຂ້າພະເຈົ້າມັກສິ່ງກໍ່ສ້າງເກົ່າໆເຫຼົ່ານີ້,ດັ່ງນັ້ນ,ຂ້າພະເຈົ້າຈຶ່ງສ້ອມແປງຕົບແຕ່ງເປັນຮ້ານອາຫານ.ເພື່ອໃຫ້ຄົນທັງຫຼາຍທີ່ມາກິນເຂົ້າຢູ່ຮ້ານນີ້ຮູ້ວ່າ,ໄທຣັດເຊຍໃນເມື່ອກ່ອນແມ່ນດຳລົງຊີວິດຢູ່ຈີນແນວໃດ."
ເມື່ອທຽບກັບຮ້ານອາຫານຮວາເມີຍແລ້ວ,ອາຫານຂອງຮ້ານຣູເຊຍຄືອາຫານຣັດເຊຍຫຼາຍກວ່າ.ຕາມເວົ້າກັນວ່າ,ອາຫານຂອງຮ້ານນີ້,ແມ່ນສີມືຂອງຄົນໃຊ້ທີ່ເປັນຄົນຣັດເຊຍຂອງຄອບຄົວຫູ,ມີລົດຊາດແບບຄອບຄົວຊາວດເຊຍແທ້ໆ.ມີໝົກຊະນິດໜຶ່ງແຊບຫຼາຍ,ມີໄສ້ເຮັດດ້ວຍຊີ້ນງົວແລະຊີ້ນໝູ,ຟັກໃສ່ຜັກບົ່ວໃຫຍ່ ກາຫຼົດແລະເຂົ້າຈ້າວ,ເອົາໃບຜັກຫໍ່ແລ້ວຕົ້ມໃນນ້ຳກະດູກງົວໃຫ້ສຸກ,ໃນເວລາກິນຍັງຕ້ອງໃສ່ເຄື່ອງປຸງຫຼາຍຢ່າງ.ແຂກທີ່ເຄີຍກິນໃຜກໍຍ້ອງວ່າ ຫອມຫຼາຍແຊບຫຼາຍ.
ທີ່ຈິງແລ້ວ,ພຽງແຕ່ຈັ່ງກິນກາເຟ ຕາກແດດຢູ່ຮ້ານອາຫານຣູເຊຍ,ເປີດອ່ານປຶ້ມບັນທຶກທີ່ເຈົ້າຂອງຮ້ານຂຽນໄວ້,ກໍ່ສາມາດຂ້າເວລາຢ່າງສະບາຍສະບາຍໝົດຕອນສວຍ.ໃນປຶ້ມບັນທຶກໜັງສືນ້ອຍຂອງຮ້ານຣູເຊຍ,ມີແຂກຂຽນໄວ້ວ່າ:"ໃນເຮືອນປີ 1914,ເທິງປະຕູຫ້ອຍໝາກກະດິ່ງໃສ່,ຫຼັງຄາສູງໆ,ປ່ອງຢ້ຽມໃຫຍ່ໆ,ນາງສາວຮັບແຂກໃສ່ຜ້າກັນເປື້ອນ,ຄືກັບໄດ້ໄປຫຼິ້ນເຮືອນໝູ່,ແລະຄືກັບນິທານເດັກ."
|
|
|
