|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ງານກິລາໂອລິມປິກລະດູໜາວຄັ້ງທີ 20 ທີ່ຈັດຂຶ້ນຢູ່ທີ່ຕູຣິນແຫ່ງອີຕາລີເປັນເວລາ 17 ມື້ນັ້ນ ໄດ້ສິ້ນສຸດລົງໃນວັນທີ 26 ກຸມພາເວລາທ້ອງຖິ່ນ. ໃນງານກິລາໂອລິມປິກລະດູໜາວຄັ້ງນີ້, ລາຍການກິລາລະດູໜາວຂອງຈີນໄດ້ຮັບຄວາມຄືບໜ້າຢ່າງປະຈັກຕາຊາວໂລກອັນໃດແດ່? ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: "ລາຍການກິລາງານກິລາໂອລິມປິກລະດູໜາວຂອງຈີນໄດ້ຮັບຄວາມຄືບໜ້າຫຼາຍ".
ແນ່ນອນແລ້ວ ການຊັ່ງຊາໝາກຜົນແລະລະດັບຂອງນັກກິລາຫຼືທີມກິລາໃດໜຶ່ງແມ່ນຢູ່ນຳວ່າຫຼຽນຄຳທີ່ໄດ້ນັ້ນຫຼາຍຫຼືໜ້ອຍ, ໂດຍສະເພາະແມ່ນຫຼຽນຄຳງານກິລາໂອລິມປິກ. ແຕ່ວ່າ ໃນຫຼາຍກໍລະນີ, ຫຼຽນຄຳກໍ່ບໍ່ສາມາດກວມເອົາຄວາມໝາຍໄດ້ໃນດ້ານຕ່າງໆ. ໃນງານກິລາໂອລິມປິກລະດູໜາວຕູຣິນຄັ້ງທີ 20, ເຖິງວ່າຄະນະນັກກິລາຈີນຊີງໄດ້ຫຼຽນຄຳບໍ່ຫຼາຍໃນຫຼາຍລາຍການກິລາກໍ່ຕາມ, ແຕ່ໝາກຜົນທີ່ພວກເຂົາເຈົ້າຍາດມາໄດ້ນັ້ນ ກໍ່ສ່ອງແສງເຖິງຄວາມຄືບໜ້າອັນໃຫຍ່ຫຼວງທີ່ຈີນຍາດມາໄດ້ໃນລາຍການກິລາລະດູໜາວ.
ເວົ້າສຳລັບຈີນແລ້ວ, ໃນລາຍການກິລາລະດູໜາວ, ການແຂ່ງຂັນກິລາຫິມະມີຄວາມກ້າວໜ້າຢ່າງວ່ອງໄວ. ລາຍການໄຕ່ສະກີລວດລາຍກາງອາກາດຖືກຈັດເຂົ້າ ງານກິລາໂອລິມປິກລະດູໜາວປີ 1994, ແຕ່ໃນງານກິລາໂອລິມປິກລະດູໜາວນາກາໂນທີ່ຈັດຂຶ້ນເມື່ອປີ 1998, ນາງສີນານນານ ນັກກິລາຈີນກໍຊີງໄດ້ຫຼຽນເງິນແລ້ວ, ໃນງານກິລາໂອລິມປິກລະດູໜາວຕູຣິນປີນີ້, ນາງລີນີນາ ນັກກິລາຈີນຊີງໄດ້ຫຼຽນເງິນລາຍການແຂ່ງຂັນດັ່ງກ່າວອີກ, ສ່ວນທ້າວຫານສຽວເຜິງຍິ່ງຊີງໄດ້ຫຼຽນຄຳ ເຊິ່ງແມ່ນຫຼຽນຄຳຫຼຽນທຳອິດຂອງຈີນໃນລາຍການແຂ່ງຂັນຢູ່ເທິງຫິມະແລະລາຍການແຂ່ງຂັນເພດຊາຍໃນງານກິລາໂອລິມປິກລະດູໜາວ.
ໃນບາງລາຍການກິລາລະດູໜາວ, ຈີນແມ່ນເຂົ້າຮ່ວມການແຂ່ງຂັນເປັນຄັ້ງທຳອິດໃນງານກິລາໂອລິມປິກລະດູໜາວ, ໃນຂະບວນການພັດທະນາຂອງລາຍການກິລາເຫຼົ່ານີ້, ກໍ່ມີສິ່ງທີ່ເຮັດໃຫ້ຄົນຕື່ນເຕັ້ນ. ໃນງານກິລາໂອລິມປິກລະດູໜາວຄັ້ງນີ້, ທີມໄຕ່ສະກີລາຍການແປ້ນຫິມະຂອງຈີນທີ່ເຂົ້າຮ່ວມການແຂ່ງຂັນເທື່ອທຳອິດໄດ້ເຂົ້າຮ່ວມການແຂ່ງຂັນພຽງແຕ່ລາຍການແປ້ນຫິມະແລ່ນຕາມຮອງຮູບໂຕຢູູ້(U)ເພດຍິງທໍ່ນັ້ນ, ເຖິງວ່າໃນທີ່ສຸດນັກກິລາສອງຄົນທີ່ເຂົ້າຮ່ວມການແຂ່ງຂັນບໍ່ໄດ້ເຂົ້າຮອບຊີງຊະນະເລີດກໍ່ຕາມ, ແຕ່ວ່າ ຈີນພັດທະນາລາຍການກິລາດັ່ງກ່າວມາພຽງແຕ່ 2 ປີກວ່າເທົ່ານັ້ນ, ກໍຍາດໄດ້ຜົນງານຄືແນວນີ້ກໍ່ດີສົມຄວນແລ້ວ. ທ່ານຖຽນໂຢວໜຽນ ຫົວໜ້າທີມໄຕ່ສະກີລາຍການແປ້ນຫິມະຂອງຈີນເວົ້າວ່າ: ພວກຂ້າພະເຈົ້າໃຊ້ເວລາພຽງແຕ່ 2 ປີກວ່າ ກໍ່ຍາດໄດ້ຜົນງານເຖິງລະດັບນີ້, ໄດ້ເຮັດໃຫ້ທົ່ວວົງການໄຕ່ສະກີໂລກໃສ່ໃຈນຳດ້ວຍສາຍຕາໃໝ່ແລ້ວ. ເດືອນມິຖຸນາປີກາຍນີ້, ພວກຂ້າພະເຈົ້າໄປຝຶກແອບຢູ່ຕ່າງປະເທດ, ຄູຝຶກການາດາຜູ່ໜຶ່ງໄດ້ໃຫ້ກຳລັງໃຈພວກຂ້າພະເຈົ້າ ໂດຍກ່າວວ່າ, ທ່ານເອງເຄີຍເຫັນນັກກິລາດີເດັ່ນຫຼາຍຄົນ, ແຕ່ໃນທີມກິລາຂອງຈີນມີນັກກິລາດີເດັ່ນຫຼາຍໆຄົນ, ທ່ານເອງໄດ້ເຫັນໜ້ອຍແລະຮູ້ສຶກຕື່ນຕົກໃຈຫຼາຍ.
ທ່ານຖຽນໂຢວໜຽນແນະນຳວ່າ, ຄືທີມຈີນນີ້ ນັກກິລາໄດ້ຝຶກລາຍການແປ້ນຫິມະພຽງ 2 ປີກໍ່ໄດ້ຄຸນວຸດທິເຂົ້າຮ່ວມການແຂ່ງຂັນໃນງານກິລາໂອລິມປິກລະດູໜາວ ນີ້ແມ່ນເລື່ອງອັດສະຈັນ; ຄູຝຶກຕ່າງປະເທດຫຼາຍຄົນລ້ວນແຕ່ເຫັນວ່າ, ນັກກິລາຫຼິ້ນແປ້ນຫິມະຜູ່ໃດຖ້າບໍ່ມີປະສົບການຝຶກແອບ 5 ປີຂຶ້ນໄປ, ກໍ່ບໍ່ອາດມີຄຸນວຸດທິເຂົ້າຮ່ວມການແຂ່ງຂັນໃນງານກິລາໂອລິມປິກໄດ້, ແລະທີ່ຈິງແລ້ວ, ນັກກິລາທີ່ເຂົ້າຮ່ວມການແຂ່ງຂັນໃນງານກິລາໂອລິມປິກລະດູໜາວຕູຣິນເທື່ອນີ້ ສ່ວນຫຼາຍແມ່ນນັກກິລາອາວຸໂສທີ່ໄດ້ຝຶກແອບມາປະມານ 10 ປີແລ້ວ.
ໃນລາຍການໄຕ່ສະເກັດລວດລາຍ, ຈີນເຄີຍຊີງໄດ້ຫຼຽນທອງເພດຍິງໃນງານກິລາໂອລິມປິກລະດູໜາວທີ່ຈັດຂຶ້ນຢູ່ທີ່ນາກາໂນເມື່ອປີ 1998, ແລະຊີງໄດ້ຫຼຽນທອງໄຕ່ສະເກັດຄູ່ລວດລາຍໃນງານກິລາໂອລິມປິກລະດູໜາວທີ່ຈັດຂຶ້ນຢູ່ເມືອງຊອນເລກເມື່ອປີ 2002. ເທື່ອນີ້ຢູ່ຕູຣິນ, ເຖິງວ່ານັກກິລາຈີນຊີງແຊມປຽນບໍ່ສຳເລັດຜົນກໍ່ຕາມ, ແຕ່ນັກກິລາຈີນສາມຄູ່ຕ່າງເປັນທີ 2 ທີ 3 ແລະທີ 4, ທ່າແຮງຂອງທີມພົ້ນເດັ່ນທີ່ສຸດ. ຍິ່ງເຮັດໃຫ້ຄົນຕື້ນຕັນໃຈນັ້ນແມ່ນ ທ້າວຈ້າວຫົງປໍ ແຊມປຽນໄຕ່ສະເກັດຄູ່ລວດລາຍໄດ້ບາດເຈັບເອັນສົ້ນຂາແຕກກ່ອນຈັດງານກິລາໂອລິມປິກລະດູໜາວຕູຣິນຍັງເຫຼືອ 6 ເດືອນ, ແລະຟື້ນຟູການຝຶກແອບເປັນເວລາພຽງ 3 ເດືອນ ກໍ່ພ້ອມກັບນາງເຊິນເສ ຄູ່ຮ່ວມມືເຂົ້າຮ່ວມງານກິລາໂອລິມປິກລະດູໜາວ, ທັງຜ່ານຜ່າຄວາມຫຍຸ້ງຍາກຂອງຄວາມເຈັບປ່ວຍ ຊີງໄດ້ຫຼຽນທອງໃນທີ່ສຸດ; ນາງຈ່າງຕ່ານ ນັກກິລາໜຸ່ມຂອງຈີນກໍຍຶດໝັ້ນສຳເລັດການແຂ່ງຂັນໃຕ້ສະພາບລົ້ມເຈັບໃນການແຂ່ງຂັນຮອບຊີງຊະນະເລີດ, ແລະຊີງໄດ້ຫຼຽນເງິນໃນທີ່ສຸດ. ເມື່ອກ່າວເຖິງໝາກຜົນທີ່ຈີນຍາດມາໄດ້ໃນລາຍການໄຕ່ສະເກັດຄູ່ລວດລາຍ, ທ່ານລິວເຜິງ ປະທານຄະນະກຳມະການໂອລິມປິກຈີນເວົ້າຢ່າງຕື້ນຕັນໃຈວ່າ: ເລື່ອງສຳຄັນແມ່ນໄດ້ຕັ້ງຫຼຽນຄຳຫຼຽນໜຶ່ງໃນທົ່ວໂລກ, ນັ້ນກໍ່ຄືຫຼຽນຄຳແຫ່ງນ້ຳໃຈແລະຫຼຽນຄຳແຫ່ງມານະຈິດຂອງນັກກິລາຈີນ, ຫຼຽນຄຳແຫ່ງນ້ຳໃຈແລະຫຼຽນຄຳແຫ່ງມານະຈິດຂອງປະຊາຊົນຈີນ, ເຊື່ອວ່າຫຼຽນຄຳຫຼຽນນີ້ຍ່ອມຈະເຮັດໃຫ້ທົ່ວໂລກຕື້ນຕັນໃຈເປັນເວລາຍາວນານ.
|
