|
|
 |
| (GMT+08:00)
2006-03-11 19:52:01
|
 |
|
ສັງຄົມທີ່ກົມກຽວກັນບ້ານເມືອງຮ່ວມຂອງພວກເຮົາ-----ຜູ້ແທນສະພາປະຊາຊົນເຂດພາກຕາເວັນຕົກລົມເລື່ອງສ້າງສັງຄົມທີ່ກົມກຽວກັນ(ສຽງ)
cri
|
ເດືອນມີນາປີ 2006,ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນຈະຜ່ານແຜນກຳນົດ 5 ປີຄັ້ງທີ 11 ກ່ຽວກັບການພັດທະນາເສດຖະກິດແຫ່ງຊາດແລະສັງຄົມຈີນ.ການຊຸກຍູ້ການສ້າງສັງຄົມສັງຄົມນິຍົມທີ່ກົມກຽວກັນຈະກາຍເປັນຈຸດໜັກຈຸດໜຶ່ງແຫ່ງການພັດທະນາຂອງຈີນໃນ 5 ປີຂ້າງໜ້າ.ກ່ຽວກັບບັນຫາດັ່ງກ່າວ,ນັກຂ່າວວິທະຍຸcriພວກເຮົາໄດ້ສຳພາດຜູ້ແທນສະພາປະຊາຊົນຂອງ ແຂວງພາກຕາເວັນຕົກຂອງຈີນທີ່ເຂົ້າຮ່ວມກອງປະຊຸມຄັ້ງນີ້,ພວກເຂົາເຈົ້າກ່າວວ່າ,ການຊຸກຍູ້ການສ້າງສັງຄົມທີ່ກົມກຽວກັນບໍ່ພຽງແຕ່ແມ່ນເປົ້າໝາຍທີ່ປະຊາຊົນທົ່ວປະເທດລວມທັງພາກຕາເວັນຕົກຕ້ອງບາກບັ່ນສູ້ຊົນເທົ່ານັ້ນ,ແລະກໍ່ມີຄວາມໝາຍສຳຄັນທີ່ສຸດຕໍ່ການເລັ່ງລັດການພັດທະນາຂອງເຂດພາກຕາເວັນຕົກ.
ທ່ານຫວັງຊິນຫວາຍທີ່ມາຈາກກົມຄຸ້ມຄອງບໍລິຫານອຸດສາຫະກຳການຄ້າເຂດຊິນຈ່ຽງເວົ້າຕໍ່ນັກຂ່າວວ່າ:
"ການສ້າງສັງຄົມທີ່ກົມກຽວກັນ,ສຳຄັນທີ່ສຸດກໍ່ແມ່ນຕ້ອງສ້າງສັງຄົມທີ່ມີສັດທາ.ເມື່ອມະນຸດສຳພັນມີຄວາມເຊື່ອຖືກັນທີ່ສຸດແລະເບົາອົກເບົາໃຈແລ້ວ,ສັງຄົມຈິ່ງຈະກົມກຽວກັນໄດ້."
ທ່ານກ່າວວ່າ ໃນເຂດພາກຕາເວັນຕົກ, ຍ້ອນວ່າກົດໝາຍກົດບັນຍັດທຸກລາຍພວມຢູ່ໃນໄລຍະບູລະນະໃຫ້ສົມບູນຂຶ້ນ, ການຕິດຕາມກວດກາສັດທາຂອງວິສາຫະກິດຍັງຂ້ອນຂ້າງບອບບາງ, ສະນັ້ນ, ຈຶ່ງໄດ້ປະກົດມີບັນຫາຕ່າງໆເຊັ່ນ ວິສາຫະກິດບໍ່ຖືສັດທາ, ກູ້ເງິນຍາກ, ບໍ່ສາມາດຈ່າຍເງິນດ້ວຍພາຫະນະທັນສະໄໝເປັນຕົ້ນ, ນີ້ໄດ້ຂັດຂວາງການພັດທະນາເສດຖະກິດພາກຕາເວັນຕົກໃນລະດັບໃດໜຶ່ງ.
ທ່ານວາງຊິນຮວາຍກ່າວວ່າ, ບົດລາຍງານຂອງທ່ານເວີນເຈຍປາວ ນາຍົກລັດຖະມົນຕີຈີນໄດ້ບັນດານໃຫ້ທ່ານມີຄວາມຄິດຫຼາຍຢ່າງ, ໃນການຫາລືກັນໃນຫຼາຍມື້ມານີ້, ທ່ານສະເໜີວ່າ, ອົງການປົກຄອງທຸກຂັ້ນຄວນສ້າງແທ່ນທີ່ຮ່ວມກັນຊົມໃຊ້ຂໍ້ມູນຂ່າວສານສຳລັບອົງການຕ່າງໆເຊັ່ນ ການທະນາຄານ ອຸດສາຫະກຳການຄ້າ ການກວດກາຄຸນນະພາບ ແລະຄວາມປອດໄພດ້ານອາຫານເປັນຕົ້ນ, ຊຸກຍູ້ໃຫ້ສ້າງສັດທານຳກັນ. ທ່ານເວົ້າວ່າ:
"ໃນ 5 ປີຂ້າງໜ້າ, ສ້າງແທ່ນທີ່ຂະແໜງການຕ່າງໆຂອງອົງການປົກຄອງສາມາດເຂົ້າຮ່ວມແລະຊົມໃຊ້ຂໍ້ມູນຂ່າວສານນຳກັນໄດ້, ຊັກນຳແລະຊຸກຍູ້ອົງກອນເສດຖະກິດຕ່າງໆໃນສັງຄົມມີສັດທາຈະມີບົດບາດເປັນນ້ຳມັນລີນ ເຮັດໃຫ້ການພັດທະນາເສດຖະກິດແລະສ້າງສາສັງຄົມທີ່ກົມກຽວກັນເດີນແມ່ນແລ່ນສະດວກ."
ເນື້ອໃນສຳຄັນອີກລາຍໜຶ່ງໃນການສ້າງສາສັງຄົມທີ່ກົມກຽວກັນນັ້ນແມ່ນເອົາໃຈໃສ່ນຳສຸຂະພາບຂອງປະຊາຊົນ,ເລັ່ງລັດພັດທະນາພາລະກິດສາທາລະນະສຸກແລະການປີ່ນປົວ,ຕັ້ງໜ້າແກ້ໄຂບັນຫາຄວາມຫຍຸ້ງຍາກໃນການປົວພະຍາດແລະເສຍຄ່າປິ່ນປົວແພງ.ທ່ານວັງອິ່ງທີ່ມາຈາກໂຮງໝໍກິ່ງແຂວງຕ້າຫຼີແຂວງຢຸນນານຈີນເວົ້າວ່າ:
"ເພື່ອແກ້ໄຂບັນຫາຫຍຸ້ງຍາກຂອງຊາວກະສິກອນໃນການປົວພະຍາດແລະຄ່າຢາຄ່າປີ່ນປົວແພງ,ອົງການປົກຄອງໄດ້ທຳຄວາມພະຍາຍາມຫຼາຍຢ່າງ,ເຊັ່ນ:ຊຸກຍູ້ການສ້າງລະບອບຮ່ວມມືປີ່ນປົວໃນຊົນນະບົດເທື່ອລະກ້າວຢ່າງໜັກແໜ້ນ,ດັດສ້າງໂຮງໝໍຊົນນະບົດແລະສ້າງຕັ້ງລະບົບສາທາລະນະສຸກ 3 ຂັ້ນ."
ທ່ານວັງອິ່ງເຫັນວ່າ,ຈະເສີມສ້າງສາທາລະນະສຸກຊົນນະບົດຂັ້ນພື້ນຖານ ກໍ່ຕ້ອງສ້າງແລະບູລະນະລະບອບປະກັນສັງຄົມ ຫຼາຍລະດັບທີ່ຄົບຖ້ວນສົມບູນຢູ່ເຂດພາກຕາເວັນຕົກແລະເຂດຊາຍແດນ,ນອກນີ້ຍັງຕ້ອງສົ່ງເສີມໃຫ້ວິສາຫະກິດຢຸກຢາສ້າງຕາໜ່າງຈຳໜ່າຍອັນຄົບຖ້ວນຢູ່ຊົນນະບົດ.
ທ່ານນາງໂຈ່ວເວີ້ຍຈ້ຽນ ຜູ້ແທນສະພາປະຊາຊົນແຫ່ງຊາດທີ່ມາຈາກແຂວງສ້ານຊີ່ບອກນັກຂ່າວວ່າ,ສັງຄົມທີ່ກົມກຽວກັນໃນສາຍຕາຂອງນາງ,ແມ່ນໃຫ້ເດັກນ້ອຍໄດ້ເຕີບໃຫຍ່ຂຶ້ນໃນສະພາບແວດລ້ອມອັນປອດໃສແລະກົມກຽວກັນ.ນາງເວົ້າວ່າ,ອິນເຕີເນັດໃນປະຈຸບັນແມ່ນປ່ອງຢ້ຽມສຳຄັນສຳລັບໃຫ້ຊາວໜຸ່ມເຍົາວະຊົນຊອກຮຽນຄວາມຮູ້,ແຕ່ຍ້ອນພາຫະນະຕິດຕາມຄຸ້ມຄອງອິນເຕີເນັດຂອງຈີນຍັງບໍ່ກ້າວໜ້າປານໃດ,ເວັບໄຊແລະຮູບພາບທີ່ບໍ່ດີຈຳນວນໜຶ່ງພວມທຳຮ້າຍຈິດໃຈຂອງເດັກນ້ອຍ.
ຄວນຮັບຮູ້ພັດທະນາແລະຄຸ້ມຄອງອິນເຕີເນັດຈາກຄວາມສູງຂອງການສ້າງສາສັງຄົມທີ່ກົມກຽວກັນ,ການສ້າງສາສັງຄົມທີ່ກົມກຽວກັນຕ້ອງການໃຫ້ບັນດາຝ່າຍໃນສັງຄົມທຳຄວາມພະຍາຍາມນຳກັນ,ເວົ້າໃນດ້ານອິນເຕີເນັດກໍ່ເຊັ່ນດຽວກັນ.ໃນຖານເປັນພາຫະນະອັນສຳຄັນຂອງສັງຄົມໃນການເຜີຍແຜ່ຂໍ້ມູນຂ່າວສານ,ອິນເຕີເນັດບໍ່ພຽງແຕ່ແມ່ນຊ່ອງທາງໃໝ່ທີ່ເພີ່ມທະວີການແລກປ່ຽນລະຫວ່າງຝ່າຍຕ່າງໆຂອງສັງຄົມ,ຍິ່ງແມ່ນທີ່ໝັ້ນໃໝ່ຂອງຂົງເຂດວັດທະນະທຳພວກເຮົາ.
ທ່ານໂຈ່ວເວີ້ຍຈ້ຽນຍັງບອກນັກຂ່າວວ່າ,ໃນໄລຍະກອງປະຊຸມຄັ້ງນີ້,ຂໍ້ສະເໜີທີ່ຜູ້ແທນວົງການສຶກສາສະເໜີອອກມາກ່ຽວກັບການເພີ່ມທະວີການອົບຮົມຕຳຫຼວດອິນເຕີເນັດ,ໄດ້ຮັບຄວາມເອົາໃຈໃສ່ໃນລະດັບສູງຈາກຝ່າຍຕ່າງໆທີ່ກ່ຽວຂ້ອງ,ນາງຮຽກຮ້ອງໃຫ້ເພີ່ມທະວີການຄຸ້ມຄອງອິນເຕີເນັດແບບວິທະຍາສາດ,ຊຸກຍູ້ໃຫ້ອິນເຕີເນັດເສີມຂະຫຍາຍບົດບາດໃນການສ້າງສາສັງຄົມທີ່ກົມກຽວກັນ,ໃຫ້ເດັກນ້ອຍທັງຫຼາຍມີແດນອິນເຕີເນັດທີ່ປອດໃສ.
|
|
|
