|
|
 |
| (GMT+08:00)
2006-03-12 19:04:01
|
 |
|
ຈີນຕັ້ງໜ້າຮັບມືກັບສະຖານະການອັນຂ້ຽວຂາດຂອງການຜະລິດຢ່າງປອດໄພ(ສຽງ)
cri
|
ປີກາຍນີ້ ອັດຕາເຕີບໂຕຂອງເສດຖະກິດຂອງຈີນໄດ້ບັນລຸ 9,9%,ແຕ່ພັດມີ 1 ແສນ 2 ໝື່ນ 7 ພັນຄົນເສຍຊີວິດຍ້ອນອຸບັດຕິເຫດໃນການຜະລິດ,ໝາຍຄວາມວ່າ,ໃນຂະນະທີ່ຈີນໄດ້ສ້າງຊັບສິນອັນມະຫາສານນັ້ນ,ກໍ່ໄດ້ເສຍຄ່າຕອບແທນດ້ານຊີວິດອັນໜັກໜາ.ໃນຖານເປັນກຳມະກອນບໍ່ແຮ່ຜູ້ໜຶ່ງຂອງແຂວງຈຽງຊູ່ ພາກຕາເວັນອອກຂອງຈີນ,ທ່ານຕ້າຍຊິງວ້າງໄດ້ສະແດງຄວາມເປັນຫ່ວງນຳຜູ້ຮ່ວມງານເພາະເກີດອຸບັດຕິເຫດໃນບໍ່ແຮ່ເລື້ອຍໆ.
"ບໍ່ຖ່ານຫີນນ້ອຍຈຳນວນໜຶ່ງຂອງຈີນເກີດອຸບັດຕິເຫດອ່າວຫລາຍ,ຂ້ອຍກໍ່ເປັນຫ່ວງວ່າ, ມື້ນີ້ລົງບໍ່ໄປແລ້ວຈະໄດ້ຂຶ້ນມາອີກບໍ່."
ກ່ຽວກັບມູນເຫດທີ່ພາໃຫ້ບໍ່ຖ່ານຫີນແລະຄົມມະນາຄົມເປັນຕົ້ນເກີດອຸບັດຕິເຫດຮ້າຍແຮງເລື້ອຍໆໃນຫລາຍປີມານີ້,ໃນເວລາທ່ານເວີ່ນເຈຍປາວ ອ່ານບົດລາຍງານວຽກງານລັດຖະບານເມື່ອອາທິດກ່ອນ, ທ່ານໄດ້ຊີ້ໃຫ້ເຫັນບັນຫາສຳຄັນໃນດ້ານຄວາມປອດໄພຂອງການຜະລິດ.
"ມາດຕະການຄວາມປອດໄພບໍ່ໄດ້ຮັບການປະຕິບັດຢ່າງແທ້ຈິງ,ໜ້າທີ່ຮັບຜິດຊອບຕົ້ນຕໍດ້ານຄວາມປອດໄພຂອງວິສາຫະກິດບໍ່ໄດ້ກຳນົດຢ່າງຈະແຈ້ງ,ອຸປະກອນຮັກສາຄວາມປອດໄພໃນການຜະລິດຫລ້າຫລັງ;ຄວາມຕ້ອງການຖ່ານຫີນຫລາຍເກີນໄປ,ພາໃຫ້ການຜະລິດແລະການຂົນສົ່ງເຄັ່ງຕຶງເກີນໄປ;ວຽກງານພື້ນຖານຂອງວິສາຫະກິດອ່ອນບາງ,ການຄຸ້ມຄອງໂຍະຍານ,ບາງວິສາຫະກິດດຳເນີນການຜະລິດລະເມີດກົດໝາຍແລະກົດລະບຽບຢ່າງໜັກໜ່ວງ. ນອກນີ້,ຜູ້ນຳແລະພະນັກງານຂອງບາງທ້ອງຖິ່ນມີລະເຫີຼງຫຼືປະລະໜ້າທີ່ຢ່າງໜັກໜ່ວງ,ຈົນກະທັ້ງກິນສິນຈ້າງສໍ້ໂກງເພື່ອຜົນປະໂຫຍດສ່ວນຕົວ."
ຕໍ່ເລື່ອງນີ້,ທ່ານເວີ່ນເຈຍປາວໄດ້ສະເໜີວິທີແກ້ໄຂ 7 ຂໍ້,ຮຽກຮ້ອງໃຫ້ອົງການປົກຄອງທ້ອງຖິ່ນທຸກຂັ້ນແລະວິສາຫະກິດຈັດຕັ້ງປະຕິບັດລະບອບໜ້າທີ່ຮັບຜິດຊອບດ້ານການຜະລິດຢ່າງປອດໄພ,ທ່ານສົ່ງເສີມໃຫ້ກຸ່ມວິສາຫະກິດຖ່ານຫີນຂະໜາດໃຫຍ່ລວມຕົວແລະດັດສ້າງບໍ່ຖ່ານຫີນຂະໜາດກາງແລະຂະໜາດນ້ອຍ.ປີນີ້,ລັດຈະເບີກເງິນ 3 ຕື້ຢວນສະໜັບສະໜູນໂຄງການທົດລອງແກ້ຂອດຍາກດ້ານວິທະຍາສາດເຕັກນິກເພື່ອປົວແປງແລະນຳໃຊ້ແກັສໂດຍສັງລວມ,ແລະຈະກວດກາຊຳລະບັນຫາປະລະໜ້າທີ່ ລະເຫີຼງໜ້າທີ່ແລະເສຍທາດຂາດຄຸນໃນຂົງເຂດການຜະລິດດ້ວຍຄວາມປອດໄພຢ່າງເຂັ້ມງວດ.
ທ່ານຫລີອີ້ຈົ່ງ ຫົວໜ້າກົມໃຫຍ່ຕິດຕາມກວດກາຄຸ້ມຄອງການຜະລິດຢ່າງປອດໄພແຫ່ງລັດຈີນກ່າວວ່າ,ຕໍ່ບັນຫາລະບອບໜ້າທີ່ຮັບຜິດຊອບຂອງອົງການປົກຄອງທຸກຂັ້ນໄດ້ມີແຜນແລະຄວາມຄິດເບື້ອງຕົ້ນແລ້ວ.
"ຂໍ້ສຳຄັນໜຶ່ງກໍແມ່ນສ້າງແລະບູລະນະລະບົບກວດສອບຕົວເລກດັດຊະນີຄວບຄຸມການຜະລິດດ້ວຍຄວາມປອດໄພ, ປະຕິບັດທັດສະນະຜົນງານການເມືອງແລະຜົນງານການຜະລິດອັນຖືກຕ້ອງໃນການຜະລິດດ້ວຍຄວາມປອດໄພ. ອັດຕາຕາຍຍ້ອນອຸບັດຕິເຫດໃນແຕ່ລະຫົວໜ່ວຍGDPຕ້ອງຫຼຸດລົງ 35% ພາຍໃນ 5 ປີ, ໃນຜູ້ດຳເນີນງານອຸດສາຫະກຳການຄ້າແລະບໍ່ແຮ່ 1 ແສນຄົນໃດ, ໃນ 5 ປີຕ້ອງຫຼຸດລົງ 25%. ສອງຕົວເລກດັ່ງກ່າວນີ້ໄດ້ຈັດເຂົ້າໃນລະບົບຕົວເລກດັດຊະນີຂອງເສດຖະກິດແຫ່ງຊາດແລະການພັດທະນາສັງຄົມ.
ກຸ່ມບໍ່ຖ່ານກົກຊ່ານຊີແມ່ນບໍ່ຖ່ານຫິນສຳຄັນຂອງລັດທີ່ມີຂະໜາດຂ້ອງຂ້າງໃຫຍ່, ແຕ່ລະປີໄດ້ຜະລິດຖ່ານຫິນ 60 ລ້ານໂຕນຂຶ້ນໄປ. ທ່ານຕູ້ຟູຊີນ ຜູ້ອຳນວຍການໃຫຍ່ບອກນັກຂ່າວວ່າ, ໃນເວລາວາງແຜນການຜະລິດທຸກປີ, ພວກເຂົາເຈົ້າລ້ວນແຕ່ໄດ້ເອົາການຈັດວາງມາດຕະການຮັກສາຄວາມປອດໄພໃນການຜະລິດວາງໄວ້ຢູ່ໃນຖານະອັນດັບໜຶ່ງ.
"ປີນີ້ໄດ້ຈັດວາງງົບປະມານ 1 ຕື້ 200 ລ້ານຢວນເພື່ອໃຊ້ເຂົ້າໃນການຜະລິດດ້ວຍຄວາມປອດໄພໂດຍກົງ, ເຊິ່ງລວມທັງການບູລະນະລະບົບຄວາມປອດໄພ, ການຈັດຊື້ ປ່ຽນໃໝ່ແລະສ້ອມແປງເຄື່ອງຕິດຕາມຄວບຄຸມຄວາມປອດໄພ, ແລະຍັງມີມາດຕະການຮັບປະກັນຄວາມປອດໄພອື່ນໆ. ນອກນີ້, ການລົງທຶນຫຼາຍກວ່າໝູ່ກໍແມ່ນກົນຈັກແລະເຄື່ອງປະກອບ, ດ້ານໜຶ່ງແມ່ນເພື່ອຍົກປະສິດທິພາບໃຫ້ສູງຂຶ້ນ, ແຕ່ສຳຄັນກວ່ານັ້ນແມ່ນເພື່ອຮັບປະກັນຄວາມປອດໄພ."
ຍ້ອນວ່າອຸບັດຕິເຫດຖ່ານຫີນສ່ວນຫຼາຍເກີດຂຶ້ນໃນບໍ່ຖ່ານຫີນນ້ອຍທີ່ບໍ່ມີຄວາມສາມາດຜະລິດດ້ວຍຄວາມປອດໄພ. ທ່ານຕູ້ຟູຊີນເວົ້າວ່າ, ບົດລາຍງານວຽກງານຂອງລັດຖະບານໃນປີນີ້ໄດ້ກ່າວເຖິງເລື່ອງໃຫ້ກຸ່ມວິສາຫະກີດຖ່ານຫິນຂະໜາດໃຫຍ່ໂຮມເອົາແລະດັດສ້າງບໍ່ຖ່ານຫີນຂະໜາດກາງແລະຂະໜາດນ້ອຍ, ນີ້ແມ່ນນະໂຍບາຍກົກຮາກໃນການປົວແປງແກ້ໄຂບັນຫາດັ່ງກ່າວນີ້. ໃນນາມເປັນຜູ້ແທນສະພາປະຊາຊົນຜູ້ໜຶ່ງ, ທ່ານຫວັງໃຫ້ຂະແໜງການທີ່ກ່ຽວຂ້ອງວາງຂໍ້ກຳນົດລະອຽດທີ່ກ່ຽວຂ້ອງໂດຍໄວ, ເພື່ອໃຫ້ວິສາຫະກິດໃນແຫ່ງຕ່າງໆນຳໄປປະຕິບັດ.
ທ່ານຢາງກັ່ງອີ ຜູ້ແທນສະພາປະຊາຊົນອີກຜູ້ໜຶ່ງໄດ້ສະເໜີໃຫ້ເພີ່ມທະວີການອົບຮົມຜູ້ມີຄວາມຮູ້ຄວາມສາມາດໃນຂະແໜງການທີ່ມີຄວາມອັນຕະລາຍຫຼາຍ, ຍົກຄຸນທາດຂອງພວກເຂົາເຈົ້າໃນການຮັກສາຄວາມປອດໄພໃຫ້ສູງຂຶ້ນຈາກດ້ານກົກຮາກ, ເພື່ອຫຼຸດອຸບັດເຫດໃຫ້ໜ້ອຍລົງ.
(ຈົບ)
|
|
|
