|
ສະບາຍດີທ່ານຜູ່ຟັງທີ່ໂຄລົບ, ງານກິລາໂອລິມປິກລະດູໜາວຄັ້ງທີ 20 ທີ່ຈັດຂຶ້ນຢູ່ຕູຣິນອີຕາລີໄດ້ສິ້ນສຸດລົງໃນວັນທີ 26 ກຸມພາ, ຫຼັງຈາກນັ້ນ, ງານກິລາໂອລິມປິກລະດູຮ້ອນຄັ້ງທີ 29 ທີ່ຈະຈັດຂຶ້ນຢູ່ທີ່ປັກກິ່ງໃນປີ 2008 ນັ້ນ ກໍ່ກາຍເປັນຈຸດສຸມທີ່ຊາວໂລກຊັກສາຍຕາໃສ່. ໃນໂອກາດງານກິລາໂອລິມປິກລະດູໜາວຕູຣິນປິດລົງນັ້ນ, ນັກຂ່າວ CRI ໄດ້ສຳພາດທ່ານໂຣເກ ປະທານຄະນະກຳມະການໂອລິມປິກສາກົນ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ທ່ານໂຣເກຝາກຄວາມຫວັງຫຼາຍຕໍ່ງານກິລາໂອລິມປິກປັກກິ່ງ.
ບໍ່ວ່າຈະເວົ້າໃນດ້ານໃດ, ງານກິລາໂອລິມປິກລະດູໜາວຕູຣິນທີ່ຫາກໍ່ສິ້ນສຸດລົງນັ້ນ ລ້ວນແຕ່ໄດ້ຮັບຜົນສຳເລັດຫຼາຍສົມຄວນ, ສະນັ້ນ ຄະນະກຳມະການໂອລິມປິກສາກົນແລະທ່ານໂຣເກລ້ວນແຕ່ເພິ່ງພໍໃຈຫຼາຍ. ການຈັດງານກິລາໂອລິມປິກລະດູໜາວຕູຣິນຢ່າງສຳເລັດຜົນ, ກໍ່ເຮັດໃຫ້ທ່ານໂຣເກແລະຄະນະກຳມະການໂອລິມປິກສາກົນມີຄວາມຫວັງຢ່າງເຕັມສ່ວນຕໍ່ງານກິລາໂອລິມປິກປັກກິ່ງປີ 2008. ທ່ານໂຣເກເຫັນວ່າ, ຄະນະກຳມະການຈັດງານກິລາໂອລິມປິກປັກກິ່ງຈະຖອດຖອນບົດຮຽນໄດ້ຫຼາຍຢ່າງຈາກການຈັດງານກິລາໂອລິມປິກລະດູໜາວຕູຣິນຢ່າງສຳເລັດຜົນ, ແລະກໍ່ຕ້ອງພະຍາຍາມຮ່ຳຮຽນເອົາ, ເພາະວ່າ ເຖິງວ່າວຽກງານກະກຽມງານກິລາໂອລິມປິກປັກກິ່ງໃນສະເພາະໜ້າມີຄວາມຄືບໜ້າຢ່າງສະດວກກໍ່ຕາມ, ແຕ່ປັກກິ່ງກໍ່ປະເຊີນກັບການທ້າທາຍອັນມະຫາສານຢູ່ຄືເກົ່າ. ທ່ານເວົ້າວ່າ: ຈະເປັນການທ້າທາຍອັນມະຫາສານຢ່າງແນ່ນອນ, ເພາະວ່າພວກທ່ານຕ້ອງກຽມໃຫ້ດີໃນຫຼາຍດ້ານ, ເຊັ່ນ ການຮັບປະກັນຄວາມປອດໄພ ຄົມມະນາຄົມໃນໄລຍະຈັດງານກິລາໂອລິມປິກ ລວມທັງການຖ່າຍທອດທາງໂທລະພາບ ການຢາຍຜູ່ຊົມໃຫ້ອອກຈາກສະໜາມແລະການບໍລິການດ້ານການປິ່ນປົວເປັນຕົ້ນ. ນີ້ແມ່ນວຽກງານ ທີ່ສັບສົນທີ່ສຸດ, ພວກທ່ານຕ້ອງເຮັດໄດ້ດີສົມຄວນໃນທຸກດ້ານ, ຂ້າພະເຈົ້າຮູ້ວ່າມີຄວາມຫຍຸ້ງຍາກຫຼາຍ.
ທ່ານໂຣເກກ່າວວ່າ, ທ່ານຝາກຄວາມຫວັງຫຼາຍທີ່ສຸດຕໍ່ງານກິລາໂອລິມປິກປັກກິ່ງ, ແລະຮັບປາກວ່າ ຄະນະກຳມະການໂອລິມປິກສາກົນຈະໃຫ້ການຊ່ອຍເຫຼືອແກ່ປັກກິ່ງໃນດ້ານຕ່າງໆ.
ທີ່ຈິງແລ້ວ, ໃນເວລາງານກິລາໂອລິມປິກລະດູໜາວຕູຣິນສິ້ນສຸດລົງ, ທ່ານໂຣເກກໍໄດ້ອວຍໄຊໃຫ້ພອນແກ່ງານກິລາໂອລິມປິກ 3 ຄັ້ງຂ້າງໜ້າ ຄື ງານກິລາໂອລິມປິກປັກກິ່ງ ງານກິລາໂອລິມປິກລະດູໜາວແວນຄູເວີແລະງານກິລາໂອລິມປິກລອນດອນ, ແລະກ່າວວ່າ ຄະນະກຳມະການໂອລິມປິກສາກົນຈະສຸມກຳລັງ ສະໜັບສະໜູນວຽກງານຈັດຕັ້ງງານກິລາໂອລິມປິກສາມຄັ້ງດັ່ງກ່າວ, ຍ້ອນວ່າ ຈຸດປະສົງຂອງການຈັດງານກິລາໂອລິມປິກກໍ່ແມ່ນເຜີຍແຜ່ທັດສະນະຄະຕິໂອລິມປິກ ຄື "ສັນຕິພາບກັບຊາວໜຸ່ມ" ໃຫ້ເຖິງທົ່ວໂລກ, ໃຫ້ຄົນທັງຫຼາຍຢູ່ແຫ່ງຕ່າງໆໃນໂລກເຂົ້າຮ່ວມການກິລາ.
ໃນຊົ່ວໄລຍະ 4 ປີທີ່ທ່ານໂຣເກຂຶ້ນດຳລົງຕຳແໜ່ງປະທານຄະນະກຳມະການໂອລິມປິກສາກົນ, ຄະນະກຳມະການໂອລິມປິກສາກົນແລະກິລາໂອລິມປິກໄດ້ພັດທະນາຕໍ່ມາ, ແຕ່ກໍ່ປະເຊີນກັບການທ້າທາຍບາງຢ່າງ, ຕົວຢ່າງຄື ບັນຫາຢາກະຕຸ້ນປະສາດແບບໃໝ່ທີ່ຖືກຫ້າມໃຊ້ເປັນຕົ້ນ. ຕໍ່ວຽກງານຂອງຕົນໃນ 4 ປີມານີ້, ທ່ານໂຣເກໄດ້ຕີລາຄາວ່າ: ນີ້ບໍ່ແມ່ນບັນຫາທີ່ໃຫ້ຂ້າພະເຈົ້າຕີລາຄາຕົນເອງ, ຫາກແມ່ນໃຫ້ຜູ່ອື່ນມາຕີລາຄາ. ຂ້າພະເຈົ້າຮູ້ວ່າຕົນເອງໄດ້ເຮັດວຽກຫຍັງແດ່, ສ່ວນເຮັດໄດ້ດີຫຼືບໍ່ດີ, ຜູ່ຄົນຕ່າງກັນກໍ່ໄດ້ຕີລາຄາຈາກມຸມຕ່າງກັນ. ແຕ່ຂ້າພະເຈົ້າເຫັນວ່າ, ຄະນະກຳມະການໂອລິມປິກສາກົນຄວນຮູ້ສຶກດີໃຈຕໍ່ໝາກຜົນທີ່ຍາດມາໄດ້ໃນ 4 ປີຜ່ານມາ.
ທ່ານໂລເກເຄີຍເປັນນັກກິລາຊ່ວງເຮືອແບນຊິກທີ່ເຂົ້າຮ່ວມງານກິລາໂອລິມປິກໃນເມື່ອກ່ອນ ດຽວນີ້ເປັນປະທານຄະນະກຳມະການໂອລິມປິກສາກົນ, ທ່ານໂຣເກມີສ່ວນກ່ຽວຂ້ອງກັບງານກິລາໂອລິມປິກໃນເວລາກວ່າເຄິ່ງຊີວິດມານີ້, ຕໍ່ການເຄື່ອນໄຫວໃດໆທີ່ຊຸກຍູ້ອຸດົມການໂອລິມປິກ, ທ່ານລ້ວນແຕ່ອອກແຮງສະໜັບສະໜູນ. ຕໍ່ວິທະຍຸ CRI ພວກເຮົາໄດ້ເຮັດລາຍການງານກິລາໂອລິມປິກປັກກິ່ງຢ່າງເປັນລະບົບໃນຫຼາຍປີມໍ່ໆມານີ້, ທ່ານໂຣເກສະແດງຄວາມຊົມເຊີຍ, ແລະຮັບເອົາກາລະລຶກຂອງ CRI ຢ່າງປິຕິຊົມຊື່ນ. ໃນເວລາໃຫ້ສຳພາດ, ທ່ານໂຣເກເວົ້າວ່າ: ຂ້າພະເຈົ້າຢາກເວົ້າວ່າ, ຂ້າພະເຈົ້າຂໍຂອບອົກຂອບໃຈນຳເພື່ອນມິດຈີນທີ່ໄດ້ທຳຄວາມພະຍາຍາມໃນການພັດທະນາການກິລາ, ໂດຍສະເພາະແມ່ນວຽກງານຈັດຕັ້ງງານກິລາໂອລິມປິກປັກກິ່ງ. ດຽວນີ້ຫ່າງຈາກມື້ໄຂງານກິລາໂອລິມປິກປັກກິ່ງບໍ່ຮອດ 1000 ມື້ແລ້ວ, ເພື່ອຜົນສຳເລັດຂອງງານກິລາໂອລິມປິກ, ຂ້າພະເຈົ້າຫວັງວ່າ ຜູ່ຈັດຕັ້ງຕ້ອງດຸໝັ່ນຂະຫຍັນພຽນພະຍາຍາມຕໍ່ໄປ, ເມື່ອເປັນແນວນັ້ນ, ງານກິລາໂອລິມປິກປັກກິ່ງຈະເປັນງານກິລາໂອລິມ ປິກຄັ້ງໜຶ່ງທີ່ໄດ້ຮັບຜົນສຳເລັດຫຼາຍທີ່ສຸດ. ຂໍອວຍພອນປັກກິ່ງຈົ່ງໂຊກດີ! ຂໍຂອບໃຈນຳປັກກິ່ງ.
|
