|
ທ່ານຜູ້ຟັງທີ່ໂຄລົບ,ແມ່ຕູ້ປ່າວຊ້ຽນທີ່ອາໄສຢູ່ເມືອງຮາງໂຈ່ວແຂວງເຈີຈຽງພາກຕາເວັນອອກຂອງຈີນ,ແມ່ນແມ່ຕູ້ຜູ້ທັນສະໄໝ,ຄົນນິຍົມອັນໃດເພິ່ນກໍຮຽນອັນນັ້ນ.ເພິ່ນມີອາຍຸ73ປີແລ້ວ,ແຕ່ໃຊ້ຄອມພິວເຕີກໍເປັນ,ເວົ້າອັງກິດກໍເປັນ,ທັງຍັງຊ່າງຂັບລົດອີກ,ຄວາມສາມາດເຫຼົ່ານີ້ແມ່ນແມ່ຕູ້ຮຽນເປັນ,ຫຼັງຈາກເພິ່ນອາຍຸ60ປີ.ສະນັ້ນ,ຊີວິດການເປັນຢູ່ຂອງເພິ່ນຈຶ່ງມີຫຼາຍສີຫຼາຍສັນ,ໃນບັ້ນປາຍຂອງຊີວິດເພິ່ນກໍ່ຍັງມ່ວນນຳຫຼາຍສິ່ງຫຼາຍຢ່າງຢູ່.ໃນລາຍການຈີນປະຈຸບັນພາກນີ້,ເຊີນທ່ານພ້ອມກັນກັບພວກເຮົາໄປເບິ່ງຊີວິດອັນທັນສະໄໝຂອງແມ່ຕູ້ຮາງໂຈ່ວຜູ້ນີ້.
ຫ່າງຈາກໜອງຊີຫູທີ່ມີຊື່ສຽງຂອງເມືອງຮາງໂຈ່ວບໍ່ໄກປານໃດມີເຂດຄຸ້ມສັງຄົມແຫ່ງໜຶ່ງທີ່ມີຊື່ວ່າເຕິ່ງຊິ່ນຊ້ຽງ,ເຮືອນຂອງແມ່ຕູ້ປ່າວຊ້ຽນກໍ່ຕັ້ງຢູ່ທີ່ນີ້.ການເວົ້າຈາປາໄສຂອງແມ່ຕູ້ປະກົດວ່າຍັງຈະແຈ້ງດີ,ເປັນເລື່ອງເປັນລາວ,ເປັນຖ້ອຍເປັນຄວາມ,ຄວາມຮູ້ສຶກກໍໄວ,ເວົ້າສຳນຽງໄທຮາງໂຈ່ວອ້ອຍຕ້ອຍ.ຖ້າບໍ່ແມ່ນຮອຍຫຍູ່ຕາມໃບໜ້າຂອງເພິ່ນ,ນັກຂ່າວອາດຈະບໍ່ເຊື່ອວ່າເພິ່ນ70ກວ່າປີແລ້ວ.
ເມືອງຮາງໂຈ່ວທີ່ແມ່ຕູ້ປ່າວຊ້ຽນອາໄສຢູ່ນັ້ນແມ່ນເມືອງທ່ອງທ່ຽວທີ່ມີຊື່ສຽງໃນໂລກ,ໄດ້ຊື່ເປັນສະຫວັນເມືອງຄົນຍ້ອນມີຊັບໃນດິນສິນໃນນ້ຳອັນອຸດົມສົມບູນແລະມີທຳມະຊາດອັນສວຍງາມ.ແມ່ຕູ້ປ່າວຊ້ຽນຮູ້ສຶກຕົນເອງໂຊກດີຫຼາຍທີ່ໄດ້ເກີດເປັນໄທເມືອງຮາງໂຈ່ວ.
"ພວກເຮົາໃຜກໍໄດ້ຊົມຄວາມສວຍງາມຂອງເມືອງຮາງໂຈ່ວ,ພ້ອມກັນນັ້ນຂ້າພະເຈົ້າດີໃຈຫຼາຍທີ່ເມືອງຮາງໂຈວໄດ້ຮັບຄວາມຍ້ອງຍໍສໍລະເສີນ,ຊາວຕ່າງປະເທດແລະຄົນຕ່າງຖິ່ນເວົ້າວ່າ,ຄົນຢູ່ຮາງໂຈ່ວມີຄວາມສຸກແທ້ໆ.ຂ້າພະເຈົ້າມັກຖາມຕົນເອງຢູ່ໃນໃຈ:ເລື້ອຍໆວ່າ,ເຈົ້າຮັກເມືອງຮາງໂຈ່ວບໍ່?ແທ້.ແຕ່ນີ້ຍັງບໍ່ພໍ,ໃນຖານເປັນໄທເມືອງຜູ້ໜຶ່ງ,ຂ້າພະເຈົ້າຍັງຄວນພະຍາຍາມປະກອບສ່ວນຂອງຕົນ."
ກ່ອນບຳນານ,ແມ່ຕູ້ປ່າວຊ້ຽນໄດ້ປະກອບອາຊີບແຕ່ງບົດວັນນະຄະດີຢູ່ຫໍສິລະປະມວນຊົນເມືອງຮາງໂຈ່ວຕະຫຼອດມາ,ແມ່ຕູ້ຄິດວ່າ,ນອກຈາກໜອງຊີ່ຮູ,ຜ້າໄໝແລະຊາລົງຈີງທີ່ມີຊື່ສສຽງນັ້ນແລ້ວ,ທີ່ຈິງ,ຮາງໂຈ່ວຍັງມີຫຼາຍບ່ອນທີ່ງາມໜ້າຊົມ.ສະນັ້ນເມື່ອ5ປີກ່ອນ,ແມ່ຕູ້ປ່າວຊ້ຽນໄດ້ວາງແຜນເອົາເອງ,ຕັດສິນໃຈໃຊ້ເວລາໜຶ່ງປີ,ອອກໄປທ່ຽວບ່ອນທີ່ມີທິວທັດສວຍງາມມື້ລະບ່ອນ,ຫຼໄປຢາມືຄອບຄົວໜຶ່ງໃນແຫ່ງຕ່າງໆ,ແລ້ວກັບຄືນມາຂຽນບົດບັນທຶກບົດໜຶ່ງຍາວປະມານ1000ຄຳ,ບົດບັນທຶກເຫຼົ່ານີ້,ຈະບອກໃຫ້ຄົນທັງຫຼາຍຮູ້ຈັກເມືອງຮາງໂຈ່ວຢ່າງຮອບດ້ານກວ່າເກົ່າ.
ແມ່ຕູ້ໃສ່ຊື່ໃຫ້ບົດບັນທຶກນີ້ວ່າ"ທ່ອງທ່ຽວຊົມຮາງໂຈ່ວ365ມື້".ປະຈຸບັນ,ບົດປະພັນທີ່ຍາວ3ແສນກວ່າຄຳຕົວໜັງສືຈີນສະບັບນີ້ໄດ້ປະກາດໃນເວບໃຊ້ແລ້ວ,ແລະມີຜູ້ເປີດອ່ານຫຼາຍສົມຄວນ.
ຍ້ອນວ່າແມ່ຕູ້ມັກແຕ່ງເລື້ອງ,ເມື່ອ13ປີກ່ອນ,ໃນເວລາແມ່ຕູ້ອາຍຸ60ປີ,ເພິ່ນໄດ້ເລີ່ມຮຽນໃຊ້ຄອມພິວເຕີ.ໃນເວລານັ້ນ,ຄອມພິວເຕີໄດ້ຄ່ອຍໆກ້າວເຂົ້າສູ່ຊີວິດຂອງຊາວຈີນ,ແຕ່ຕູ້ກໍ່ຢາກໃຊ້ພາຫະນະທັນສະໄໝຊະນິດນີ້ໃນຊີວິດຂອງຕົນ.ເມື່ອເພິ່ນຮຽນເປັນແລ້ວ,ໃນເລລາເພິ່ນແຕ່ງເລື້ອງກໍແຮ່ງສະດວກໄດ້ໃຈ.ບໍ່ພຽງແຕ່ແນວນີ້,ພາຍຫຼັງມາເພິ່ນຍັງໄດ້ຈັດຊຸດອົບຮົມສອນຄອມພິວເຕີໃຫ້ລ້າໃນເຂດຄຸ້ມທີ່ເພິ່ນຢູ່.
"ເມື່ອມີວິຊາຄວາມຮູ້ແລ້ວ,ຂ້າພະເຈົ້າຍັງຕ້ອງເອົາມາໃຊ້ໃຫ້ເປັນປະໂຫຍດ.ຂ້າພະເຈົ້າຮູ້ສຶກວ່າເຂດຄຸ້ມສັງຄົມແມ່ນບ່ອນທີ່ດີຫຼາຍ,ຂ້າພະເຈົ້າເລີຍເປັນເຈົ້າການຮ້ອງຂໍຈັດຊຸດອົບຮົມສອນຄອມພິວເຕີ.ພາຍໃນເວລາ3ປີ,ນັບຮອດປະຈຸບັນໄດ້ຈັດໄປ5ຊຸດແລ້ວ,ໃນຜູ້ທີ່ມາຮຽນ,ອາຍຸສູງກວ່າໝູ່78ປີ,ນ້ອຍກວ່າໝູ່20ກວ່າປີ."
ໃນປີທີ່ອາຍຸ65ປີ,ແມ່ຕູ້ປ່າວຊ້ຽນໄດ້ໄປລອນດອນເທື່ອໜຶ່ງຕາມຄຳເຊີນຂອງຫຼານສາວທີ່ເຮັດວຽກຢູ່ອັງກິດ.ຍ້ອນວ່າເວົ້າພາສາອັງກິດບໍ່ເປັນ,ເພິ່ນຮູ້ສຶກວ່າຕົນເອງຄືກັບຄົນຫູໜວກປາກກືກ,ທຳຄວາມເຂົ້າໃຈກັບຄົນທ້ອງຖິ່ນຍາກຫຼາຍ.ພາຍຫຼັງກັບມາຈາກອັງກິດແລ້ວ,ແມ່ຕູ້ໄດ້ເລີ່ມຮຽນພາສາອັງກິດ.ດຽວນີ້,ເພິ່ນໄດ້ຊ່າງເວົ້າຄວາມເວົ້າທີ່ໃຊ້ປະຈຳວັນໄດ້ຢ່າງຊຳນານແລ້ວ.ຢູ່ຮາງໂຈ່ວ,ໜ້ອຍທີ່ສຸດທີ່ຈະມີຜູ້ເຖົ້າອາຍຸ60ກວ່າປີແລ້ວຍັງຂັບລົດໄດ້,ໃນປີແມ່ຕູ້ອາຍຸ69ປີ,ແມ່ຕູ້ສິນໃຈຮຽນຂັບລົດຢ່າງກ້າຫານ.ໃນເວລາມໍ່ຈະຮອດວັນເກີດ70ປີ,ແມ່ຕູ້ໄດ້ຮັບໃບຂັບຂີ່ຈາກໂຮງຮຽນສອນຂັບລົດຢ່າງເປັນທາງການແລ້ວ,ໄດ້ເປັນຜູ້ຂັດລົດທີ່ອາຍຸ70ກວ່າປີຍັງຂັບລົດໄດ້ພຽງຜູ້ດຽວໃນເມືອງນີ້.ຈາກນັ້ນມາ,ເພິ່ນມ່ວນນຳການຂັບລົດຫຼາຍບໍຢອກ.ໃນເວລາທີ່ຕ້ອງອອກເດີນທາງ,ແມ່ຕູ້ປ່າວຊ້ຽນກໍ່ໂທລະສັບເຊົ່າລົດຄັນໜຶ່ງນຳບໍລິສັດຕັກຊີ,ໃນລົດຍັງມີໂຊເຟີຜູ້ໜຶ່ງຕິດຕາມໄປນຳ,ຊ່ອຍເພິ່ນແກ້ໄຂບັນຫາໃນເວລາຄັບຂັນ.ແມ່ຕູ້ໄດ້ບັນທຶກປະສົບການແລະຄວາມຮູ້ສຶກຂອງຕົນໃນເວລາຂັບລົດທຸກເທື່ອ,ຂຽນເປັນບົດສັ້ນໆ,ລົງພິມໃນໜັງສືພິມຕອນແລງຂອງເມືອງ,ແບ່ງປັນຄວາມມ່ວນຊື່ນນຳກັນກັບຄົນທັງຫຼາຍ.
ແມ່ຕູ້ປ່າວຊ້ຽນແມ່ນຜູ້ເຖົ້າທັນສະໄໝ,ຍຸກສະໄໝນິຍົມອັນໃດເພິ່ນກໍ່ຮຽນອັນນັ້ນ,ອັນໃດພາໃຫ້ສະດວກສະບາຍເພິ່ນກໍ່ໃຊ້ອັນນັ້ນ.ເພິ່ນມັກໃຊ້ມືຖືໂທລະສັບຫຼືສົ່ງຂໍ້ຄວາມສັ້ນລູກໃພ້ເລື້ອຍໆ,ແລະຍັງລົມກັນກັບຫຼານສາວດ້ວຍQQໃນເວບໃຊ,ຕາມຄວາມເວົ້າຂອງເພິ່ນເອງກໍ່ແມ່ນຄວນໄປໃຫ້ທັນກະແສຂອງຍຸກສະໄໝ.
"ຂ້າພະເຈົ້າເຫັນວ່າ,ພວກເຮົາດຳລົງຊີວິດຢູ່ໃນຍຸກສະໄໝປະຈຸບັນໂດຍສະເພາະແມ່ນຜູ້ເຖົ້າ,ຖ້າບໍ່ມີວິຊາຄວາມຮູ້ສະໄໝປະຈຸບັນ,ກໍ່ຈະຕົກຢູ່ຫຼັງຍຸກສະໄໝ."ແມ່ຕູ້ປ່າວຊ້ຽນຍັງໃຊ້ເວລາຫຼາຍສົມຄວນໄປເຮັດວຽກສາທາລະນະປະໂຫຍດ.ເພິ່ນແມ່ນຜູ້ອາສາສະໝັກທີ່ອາຍຸສູງກວ່າໝູ່ໃນເຂດຄຸ້ມນີ້,ນອກຈາກຊ່ອຍສອນຄວາມຮູ້ຄອມພິວເຕີຟີໃຫ້ໄທເມືອງໃນເຂດຄຸ້ມແລະຄົນຕ່າງຖິ່ນທີ່ມາເຮັດວຽກໃນເມືອງແລ້ວ,ຍັງຕັ້ງໂທລະສັບ"ສາຍດ່ວນຂອງແມ່ຕູ້ປ່າວ"ຢູ່ໃນເຂດຄຸ້ມສັງຄົມ.ໃນວັນຮັບໂທລະສັບສາຍດ່ວນແຕ່ລະວັນອັງຄານ,"ສາຍດ່ວນຂອງແມ່ຕູ້ປ່າວ"ແມ່ນດັງຢູ່ບໍ່ຂາດ.ໄທເມືອງໃນຄຸ້ມມີເລື່ອງອຸກໃຈຂ້ອງໃຈ,ຫຼືມີຄວາມຂັດແຍ່ງກັນ,ແມ່ນມັກໂທມາຂໍຄວາມຊ່ອຍເຫຼືອຈາກ"ສາຍດ່ວນຂອງແມ່ຕູ້ປ່າວ".ເພື່ອຍ້ອງຍໍເພິ່ນທີ່ເອົາໃຈໃສ່ນຳສາທາລະນະປະໂຫຍດ,ຫວ່າງກ່ອນນີ້ບໍ່ດົນ,ນະຄອນຮາງໂຈ່ວໄດ້ມອບນາມມະຍົດຜູ້ອາສາສະໝັກດີ່ເດັ່ນໃນການເຜີຍແຜ່ຄວາມຮູ້ວິທະຍາສາດໃຫ້ເພິ່ນ,ຄຸ້ມເຕິ່ງຊິ່ນຊ້ຽງຍັງເລືອກແມ່ຕູ້ເປັນຜູ້ຫ້າວຫັນໃນການກໍ່ສ້າງເຂດຄຸ້ມສັງຄົມ.
ແມ່ຕູ້ປ່າວຊ້ຽນມີລູກຊາຍ3ຄົນ,ພວກລູກຮູ້ສຶກວ່າ,ຊີວິດຂອງແມ່ມີເນື້ອໃນອຸດົມສົມບູນແລະມ່ວນຊື່ນ,ນີ້ແມ່ນສິ່ງທີ່ປະໂລມໃຈພວກລູກທີ່ສຸດ.ທ່ານເມິ້ງຢາງ ລູກຊາຍຜູ້ຖ້ວນສອງຂອງແມ່ຕູ້ເວົ້າຕໍ່ນັກຂ່າວວ່າ:
"ແມ່ເປັນຄົນທັນສະໄໝ,ເອົາໃຈໃສ່ນຳຄຸນນະພາບຊີວິດການເປັນຢູ່,ເພິ່ນຖືຄຸນນະພາບຂອງຊີວິດເປັນສິ່ງສຳຄັນຍິ່ງກວ່າອາຍຸ.ອາຍຸສູງຄືເພິ່ນຍັງບຸກບືນຫ້າວຫັນປານນີ້,ໄດ້ຮັບຜົນງານດີປານນີ້,ພວກເຮົາຮູ້ສຶກປະເອີບໃຈຫຼາຍ.
|
