|
|
 |
| (GMT+08:00)
2006-03-20 11:08:36
|
 |
|
ປັດຊະຍາເຄື່ອງອິ້ວອ້ອຍ
cri
Author: min
|
ຈີນມີຄວາມເວົ້າບູຮານຄວາມໜຶ່ງວ່າ, ໂຊກກັບເຄາະຕ່າງເອື່ອຍອີງກັນ, ແລະມັກແຝງຊ້ອນຢູ່ນຳກັນ. ໃນປື້ມໜັງສືບູຮານເລື່ອງ 《ຮວຍນານຈື》 ຂອງຈີນໄດ້ບັນທຶກນິທານເລື່ອງໜຶ່ງ, ວ່າສະໄໝແຕ່ກີ້ແຕ່ກ່ອນ, ມີພໍ່ເຖົ້າຜູ້ໜຶ່ງອາໄສຢູ່ເຂດຊາຍແດນຂອງຈີນ. ມີມື້ໜຶ່ງ, ມ້າຂອງເພິ່ນຫາຍຕົວໄປ, ພວກຊາວບ້ານພາກັນເສຍດາຍນຳເພິ່ນ, ແຕ່ພໍ່ເຖົ້າພັດເວົ້າວ່າ: ຕໍ່ໄປ, ຍັງບໍ່ຮູ້ວ່າມັນຈະແມ່ນໂຊກຫຼືແມ່ນເຄາະເທື່ອ. ຫຼັງຈາກນັ້ນບໍ່ເທົ່າໃດມື້, ມ້າໂຕນັ້ນບໍ່ພຽງໄດ້ກັບຄືນມາ, ຍັງພາມ້າມານຳໂຕໜຶ່ງ. ຊາວບ້ານພາກັນດີໃຈນຳ, ເລີຍສະແດງຄວາມຊົມເຊີຍນຳເພິ່ນ. ແຕ່ພໍ່ເຖົ້າພັດເວົ້າແບບຈືດໆຈາງໆວ່າ: ໃຜຊິຮູ້ວ່າມັນແມ່ນໂຊກຫຼືແມ່ນເຄາະ! ພາຍຫຼັງມາ, ມີເທື່ອໜຶ່ງ, ລູກຊາຍຂອງເພິ່ນຂີ່ມ້າໂຕທີ່ໄດ້ມາໃໝ່, ແລ້ວຕົກຈາກຫຼັງມ້າ, ຈົນຂາຫັກ. ຄົນທັງຫຼາຍພາກັນມາຢາມລູກເພິ່ນ, ແລະປອບໃຈເພິ່ນ. ແຕ່ວ່າພໍ່ເຖົ້າກໍເວົ້າຄວາມເກົ່າອີກ. ຕໍ່ມາ, ບ້ານເມືອງເກີດເສິກສົງຄາມ, ຊາວໜຸ່ມໃນບ້ານຈຶ່ງພາກັນຕອບສະໜອງຄຳຮຽກຮ້ອງເຂົ້າເປັນທະຫານ, ບໍ່ດົນກໍ່ສະລະຊີຍໄປໃນສະໜາມຣົບທັງໝົດ, ລູກຊາຍຂອງພໍ່ເຖົ້າບໍ່ໄດ້ໄປແນວໜ້າຍ້ອນຂາຫັກ, ຈຶ່ງປອດໄພ.
ນິທານເລື່ອງນີ້ຊີ້ບອກໃຫ້ພວກເຮົາຮູ້ວ່າ, ບໍ່ວ່າເລື່ອງໃດກໍ່ມີສອງດ້ານກົງກັນຂ້າມ. ຖ້າເຫັນແຕ່ດ້ານບໍ່ດີ, ຊີວິດກໍ່ຈະບໍ່ມີຄວາມມ່ວນຊື່ນຈັກເມັດ, ກົງກັນຂ້າມຖ້າເບິ່ງດ້ານດີໃຫ້ຫຼາຍແດ່, ຊີວິດກໍ່ຈະເຕັມໄປດ້ວຍຄວາມຫວັງ.
ທ່ານຜູ້ຟັງທີ່ຮັກແພງ, ມີຄົນເວົ້າວ່າ, ຄວາມຮູ້ບຸນຄຸນແລະຄວາມເຊື່ອໝັ້ນກໍ່ຄືກັບກ້າມເນື້ອ, ເຈົ້າໃຊ້ມັນຫຼາຍເທົ່າໃດ, ມັນກໍ່ແຮ່ງແຂງແຮງມີກຳລັງ, ແລະເຈົ້າກໍແຮ່ງມີຄວາມສາມາດສ້າງຄວາມສຸກໃຫ້ແກ່ຕົນເອງ, ຍ້ອນມີຄວາມຮູ້ບຸນຄຸນຈຶ່ງເຫັນປັດໄຈທີ່ດີຂອງສິ່ງຂອງແລະເລື່ອງລາວທຸກຢ່າງ, ນີ້ແມ່ນທ່າທີສະຫຼາດທີ່ສຸດ, ເພາະບໍ່ວ່າເລື່ອງໃດກໍ່ມີດ້ານດີຂອງມັນ. ທຸກໆຄົນແລະທຸກໆເຫດການກໍ່ຄືກັບແກ້ວມະນີ, ມີຫຼາຍດ້ານຫຼາຍຫຼ່ຽມ, ມັນເປັນແນວໃດ, ແມ່ນສຸດແລ້ວແຕ່ທ່ານຈະເບິ່ງມັນຈາມມຸມໃດ. ຖ້າຢາກມີຄວາມສຸກ, ດີທີ່ສຸດແມ່ນພະຍາຍາມໃຫ້ຄຶດເຫັນດ້ານດີຂອງທຸກສິ່ງທຸກຢ່າງ. ໂລກໜ່ວຍດຽວກັນ, ແຕ່ໃນສາຍຕາຂອງຄົນຕ່າງກັນພັດເປັນຮູບຕ່າງກັນ, ນີ້ກໍ່ແມ່ນຍ້ອນວ່າແຕ່ລະຄົນສັງເກດເບິ່ງໂລກຈາກມຸມທີ່ບໍ່ຄືກັນ, ດັ່ງນັ້ນ, ຈຶ່ງມີຄົນເວົ້າວ່າ: ເລື່ອງໃດເລື່ອງໜຶ່ງແມ່ນຫຍັງມັນບໍ່ສຳຄັນ, ສຳຄັນຢູ່ບ່ອນວ່າ, ເຈົ້າຄຶດວ່າມັນແມ່ນຫຍັງ. ສະນັ້ນ, ເມື່ອມີເລື່ອງທີ່ບໍ່ດີເກີດຂຶ້ນ, ດີທີ່ສຸດແມ່ນຊອກຫາວິທີໃດໜຶ່ງ, ມາພິນິດພິຈາລະນາມັນຄືນໃໝ່, ຈົນກວ່າເຈົ້າສາມາດເບິ່ງເຫັນດ້ານດີຂອງມັນ. ພະຍາຍາມໃຊ້ຄວາມສະຫຼາດຂອງເຈົ້າ, ຖອດຖອນເອົາສິ່ງທີ່ດີໃນເລື່ອງລາວອັນສັບສົນ.
ທ່ານອາດຈະເຄີຍເຫັນຫຼືເຄີຍໃຊ້ເຄື່ອງອິ້ວອ້ອຍ, ເມື່ອທ່ານເອົາລຳອ້ອຍປ່ອນເຂົ້າເຄື່ອງຈັກ, ເຄື່ອງຈັກກໍຈະໜີບລຳອ້ອຍຈົນແປ, ນ້ຳອ້ອຍຫວານໆທີ່ມີທາດບຳລຸງກໍຈະໄຫຼອອກມາລິດໆ, ສ່ວນກາກອ້ອຍກໍ່ຈະຖືກອິ້ວອອກທາງຂ້າງ. ພວກເຮົາຄວນຄືຕົນເອງເປັນຄືຈັກອິ້ວ. ເອົາປະສົບການຂອງຕົນເອງປ້ອງເຂົ້າໃນຈັກອິ້ວແຫ່ງຈິດສຳນຶກຂອງພວກເຮົາ, ສັງເກດເບິ່ງຂະບວນການທັງໝົດດ້ວຍທ່າທີທີ່ຫວັງດີຕໍ່ທຸກຢ່າງ, ແລ້ວເປີດສະວິກຈັກອິ້ວແຫ່ງດວງໃຈ, ລະບາຍຄວາມຂົມຂື່ນ, ຄວາມໂສກເສົ້າແລະຄວາມລຳຄານໃຈອອກຖິ້ມ. ແລ້ວພະຍາຍາມໄປຊອກຫາຄວາມເປັນໂຊກທີ່ໂຕເອງເບິ່ງເຫັນໃນເວລາຕົກຢູ່ໃນອາລົມໂສກເສົ້າເຂັນໃຈ. ທະແນມແຕ່ເຮົາເອງຍິນດີ, ເຮົາກໍ່ຍ່ອມຈະເບິ່ງເຫັນດ້ານດີຂອງທຸກສິ່ງທຸກຢ່າງ.
ຕາບໃດເຮົາໄດ້ຮູ້ສຶກເຖິງສິ່ງທີ່ດີໃນປະສົບການທີ່ຜ່ານມາ, ສະພາບທັງໝົດກໍ່ຈະຕ່າງເກົ່າ, ເຮົາຈະບໍ່ເບື່ອໜ່າຍອະດີດຕະການຂອງຕົນອີກ, ແລະຈະໃຊ້ບາດກ້າວຕໍ່ໄປເພື່ອສະແຫວງຫາຄວາມສຸກຂອງຕົນ. ເຮັດໃຫ້ເສດກາກອ້ອຍກາຍເປັນທາດບຳລຸງຂອງຊີວິດ, ຊີມລົດຊາດອັນຫອມຫວານຂອງນ້ຳອ້ອຍ, ຫຼືເວົ້າອີກແບບໜຶ່ງກໍແມ່ນ, ຂໍແຕ່ໄດ້ສິ່ງທີ່ດີ, ສິ່ງທີ່ບໍ່ດີເຫຼົ່ານັ້ນກໍບໍ່ເອົາຫົວຊາມັນອີກ.
ທ່ານຜູ້ຟັງທີ່ຮັກແພງ, ເມື່ອທ່ານໄດ້ພົບເລື່ອງໃດໜຶ່ງທີ່ບໍ່ດີ, ຂໍໃຫ້ທ່ານຈົ່ງພະຍາຍາມຄຶດໄປທາງທີ່ດີ, ຊອກຫາດ້ານທີ່ມີຜົນດີຕໍ່ທ່ານເຮັດ, ແນວນີ້, ໃນຊີວິດຂອງທ່ານກໍຈະມີເລື່ອງບໍ່ມ່ວນໃຈ, ໜ້ອຍລົງຫຼາຍ, ແລະມີຄວາມຫວັງຫຼາຍຂຶ້ນ!
|
|
|
