|
ແພດສາດຈີນເຫັນວ່າ ນ້ຳນົມເປັນອາຫານທາດເຢັນ ມີສັບພະຄຸນບຳລຸງຕ່ອມນ້ຳລາຍ ແກ້ຫິວນ້ຳ ຊຸ່ມລຳໄສ້ ແກ້ຮ້ອນໃນ ພາໃຫ້ຖ່າຍສະດວກແລະບຳລຸງປ້າງເປັນຕົ້ນ.ເອົານ້ຳນົມປະສົມກັບອາຫານແນວອື່ນ; ຈະກາຍເປັນອາຫານຊະນິດທີ່ປົວພະຍາດຕ່າງໆໄດ້
ກ່ອນອື່ນ ພວກເຮົາຈະແນະນຳວິທີຕົ້ມປຽກນ້ຳນົມ,ກຽມນົມສົດໄວ້2ຂີດເຄິ່ງ ເຂົ້າສານຈ້າວ 60 ກຼາມ ນ້ຳຕານຫນ້ອຍຫຼາຍຕາມມັກ ຕົ້ມເຂົ້າປຽກໃຫ້ສຸກ ຖ້ານ້ຳເຂົ້າຫຼາຍ ໃຫ້ຖອກອອກສ່ວນຫນຶ່ງ ແລ້ວໃສ່ນ້ຳນົມ, ໃຊ້ໄຟອ່ອນ ຕົ້ມໃຫ້ເຂົ້າປຽກເປື່ອຍ ແລ້ວໃສ່ນ້ຳຕານໃຫ້ພໍດີຕາມມັກ ແບ່ງອອກກິນຄາບເຊົ້າແລະຄາບຄ່ຳ,ໃນເວລາເຂົ້າປຽກອຸ່ນໆຫຼືຮ້ອນຫນ້ອຍຫນຶ່ງ. ເຂົ້າປຽກນ້ຳນົມ ສາມາດບຳລຸງຮ່າງກາຍ ບຳລຸງປ້າງແລະກະເພາະ ເຮັດໃຫ້ອະໄວຍະວະທັງ 5 ແຂງແຮງ ເຫມາະສຳລັບຜູ່ທີ່ຮ່າງກາຍອ່ອນໂຊ ຄົນເຈັບຫຼັງຈາກຫາຍປ່ວຍ ຜູ່ເຖົ້າທີ່ບໍ່ແຂງແຮງແລະຜູ່ຂາດທາດບຳລຸງເປັນຕົ້ນ
ນ້ຳນົມຕົ້ມໃສ່ຫມາກທັນຈີນກໍມີທາດບຳລຸງຫຼາຍຄືກັນ ກ່ອນອື່ນ ເອົາເຂົ້າສານຈ້າວ 100ກຼາມຕົ້ມໃສ່ຫມາກທັນຈີນ 25 ກຼາມໃຫ້ເປັນເຂົ້າປຽກ, ເມື່ອເຂົ້າເປື່ອຍແລ້ວ,ກໍຖອກນ້ຳນົມໃສ່ເຄິ່ງລິດ ຕົ້ມໃຫ້ຟົດ ກໍໄດ້ໂລດ ເຂົ້າປຽກນ້ຳນົມໃສ່ຫມາກທັນຈີນສາມາດບຳລຸງເລືອດລົມ ບຳລຸງປ້າງແລະກະເພາະ ເຫມາະສຳລັບຜູ່ຮ່າງກາຍອ່ອນໂຊຍ້ອນເຮັດວຽກເມື່ອຍໂພດແລະເລືອດລົມບໍ່ດີເປັນຕົ້ນ
ວິທີຕົ້ມເຂົ້າປຽກນ້ຳນົມອີກວິທີຫນຶ່ງ ອາດຈະເຮັດຍາກແດ່ ຄືໃຫ້ເອົ່ເຂົ້າຈ້າວ 60 ກຼາມ ຫມາກມັນຫໍ້ຈືນ 80 ກຼາມ ຫມາກມັນຫໍ້ດິບ 45 ກຼາມ ນ້ຳຕານ 12 ກຼາມ; ນ້ຳນົມ 2 ຂີດ ລ້າງເຂົ້າແລ້ວຫມ່າໄວ້ຊົ່ວໂມງຫນຶ່ງ ທາວຂຶ້ນສະເດັດນ້ຳ ແລ້ວຖອກໃສ່ຈັກບົດ,ເອົາຫມາກມັນຫໍ້ໃສ່ ຖອກນ້ຳນົມໃສ່ແລະຕື່ມນ້ຳໃສ່ຫນ້ອຍຫນຶ່ງ ບົດໃຫ້ແຫຼກຈົນລະອຽດ ແລ້ວໃຊ້ເຄື່ອງຕອງ ຕອງເອົາແຕ່ນ້ຳ ແລ້ວຖອກໃສ່ຫມໍ້ ຕົ້ມໃຫ້ຟົດ ປົງຫມໍ້ແລ້ວໃສ່ນ້ຳຕານ ຄົນໃຫ້ນ້ຳຕານລະລາຍ ແລ້ວຕອງອີກເທື່ອຫນຶ່ງ ເອົາແຕ່ນ້ຳ ຖອກໃສ່ຫມໍ້ ເອົາຕັ້ງເຕົາ ເມື່ອຕົ້ມຟົດ ກໍມອດໄຟ ກໍແປວ່າເຮັດສຳເລັດ ຕົ້ມກິນແບບນີ້ ສາມາດບຳລຸງປ້າງແລະຫມາກໄຂ່ຫຼັງ ຊຸ່ມປອດ ກິນແກ້ໄອ ແກ້ເປັນຫືດ,ແກ້ເຈັບແອວແລະແກ້ຮ້ອນໃນໃຫ້ຖ່າຍສະດວກເປັນຕົ້ນ ທັງເປັນອາຫານບຳລຸງສຳລັບຜູ່ທີ່ອ່ອນໂຊຫຼັງເຊົາເຈັບປ່ວຍ ຜູ່ເປັນໂຣກປະສາດອ່ອນ ຫຼອດລົມອັກເສບ ແລະທັງເປັນອາຫານສຳລັບຜູ່ເຖົ້າທີ່ມັກທ້ອງຜູກ ກິນໃນເວລາທ້ອງເປົ່າຫຼືກິນຕາງອາຫານເຊົ້າອາຫານຄ່ຳກໍໄດ້
ວິທີປຸ່ງແຕ່ງອາຫານນ້ຳນົມເພື່ອປົວພະຍາດຍັງມີຫຼາຍຢ່າງດັ່ງລຸ່ມນີ້:
ວິທີງ່າຍທີ່ສຸດຢ່າງຫນຶ່ງກໍແມ່ນໃນເວລາຕົ້ມນ້ຳນົມ ໃສ່ແປ້ງສິງກະໂປຫຼືແປ້ງຮາກບົວຈັກບ່ວງສອງບ່ວງ ເຮັດໃຫ້ນ້ຳນົມຂຸ້ນ ນ້ຳນົມນີ້ເຫມາະສຳລັບຜູ່ທີ່ຮາກເລື້ອຍໆ ປຸ້ນທ້ອງແລະຕ້ອງການເພີ່ມພະລັງງານ.
ອີກວິທີຫນຶ່ງແມ່ນໃຫ້ຕົ້ມໄຂ່ໄກ່ຈົນສຸກຄັກໆ ປອກເປືອກແກະໄຂ່ຂາວອອກ ໃຊ້ບ່ວງເຕັກໄຂ່ເຫຼືອງໃຫ້ມຸ່ນ ແລ້ວໃສ່ນ້ຳນົມຄົນໃຫ້ເຂົ້າກິນດີໆ ນ້ຳນົມໄຂ່ເຫຼືອງເຫມາະສຳລັບຜູ່ເລືອດຈາງປະເພດຂາດທາດເຫຼັກແລະເດັກອ່ອນ 4 ຫາ 5 ເດືອນທີ່ຕ້ອງການບຳລຸງທາດການຊີອົມ
ການເຮັດນ້ຳນົມທີ່ແຍກໄຂມັນອອກກໍງ່າຍທີ່ສຸດ ຄືໃຫ້ຕົ້ມນ້ຳນົມຈົນຟົດແລ້ວປິດໄຟປະໄວ້ຫຼາຍຊົ່ວໂມງ ບັດນັ້ນໃຫ້ຕັກເອົາຫນ້ານ້ຳນົມທີ່ແຂ້ນເປັນຊັ້ນນັ້ນອອກ ເຮັດແບບນີ້ສາມາດແຍກໄຂມັນອອກໄດ້ 80% ເຫມາະສຳລັບເດັກແດງແລະເດັກອ່ອນທີ່ເປັນພະຍາດລຳໄສ້ເຊັ່ນ:ລົງທ້ອງ ທ້ອງບິດແລະລຳໄສ້ອັກເສບເປັນຕົ້ນ
ນອກນີ້ ຊານົມກໍ່ແມ່ນອາຫານປົວພະຍາດທີ່ດີສົມຄວນ ກິ່ນຫອມຂອງຊາແລະກິ່ນນ້ຳນົມປົນໃສ່ກັນ ທາດບຳລຸງຕ່າງຕາບຈູນກັນ ແກ້ກິ່ນຄາວຂອງນ້ຳນົມແລະລົດຂົມຂອງຊາ ກິນແລ້ວຮູ້ສຶກແຊບ,ລົດຫອມ,ຕິດສົບຕິດປາກດົນນານ. ຊານົມແກ້ເມືອກມັນ ຊ່ອຍຍ່ອຍອາຫານ ເຮັດໃຫ້ຊື່ນໃຈ ຖ່າຍສະດວກ ແກ້ພິດ ຫາຍເມື່ອຍ ຍັງເຫມາະສຳລັບຄົນເຈັບກະເພາະລຳໄສ້ອັກເສບກະທັນຫັນຫຼືຊຳເຮື້ອ ຫົວລຳໄສ້ອ່ອນເປັນແຜເປັນຕົ້ນ ສຳລັບຜູ່ທີ່ເບື່ອອັນໂກນແລະຢາມືນ ຍັງມີບົດບາດແກ້ພິດນຳອີກ
|
