|
 ທ່ານຜູ້ຟັງ,ຫວ່າງມໍ່ໆນີ້,ພວກເຮົາໄດ້ຮັບແຟກສ໌ຂອງທ່ານຈຳປາ.ທຸມມະລາສີທີ່ຝາກມາຈາກແຂວງຜົ້ງສາລີ,ໃນແຟັກທ່ານບອກພວກເຮົາຮູ້ວ່າ,ທ່ານໄດ້ຟັງລາຍການ"ອາລະຍະທຳພັນປີ"ຂອງວິທະຍຸcriພວກເຮົາເລື້ອຍໆ,ເມື່ອໄດ້ຟັງລາຍການນີ້ດັ່ງກ່າວ,ທ່ານໄດ້ຮັບຄວາມຮູ້ຫຼາຍກ່ຽວກັບວັດທະນະທຳຈີນ,ແລະຫວັງໃຫ້ພວກເຮົາແນະນຳແນວຄິດສາສະໜາເຕົ໋າຂອງຈີນຢ່າງຈະແຈ້ງກວ່າເກົ່າ,ສະນັ້ນ,ໃນລາຍການມື້ນີ້,ພວກເຮົາຂໍແນະນຳປັດຊະຍາແລະສາດສະໜາເຕົ໋າຂອງຈີນຢ່າງລະອຽດສູ່ທ່ານຟັງ,ນອກນີ້,ພວກເຮົາຍັງຕ້ອງເຕືອນໃຫ້ທ່ານຮູ້ວ່າ,ຫວ່າງກ່ອນນີ້ບໍ່ດົນ,ພວກເຮົາໄດ້ປັບປຸງລາຍການພາສາລາວຂອງວິທະຍຸcriພວກເຮົາ,ລາຍການອາລະຍະທຳພັນປີແລະນິທານສຸພາສິດຈີນທີ່ແຕ່ກ່ອນອອກອາກາດໃນທຸກວັນອັງຄານນັ້ນ,ປັດຈຸບັນໄດ້ປັບປຸງມາອອກອາກາດໃນລາຍການອາລະຍະທຳຈີນໃນແຕ່ລະວັນອາທິດ,ຫວັງໃຫ້ທ່ານຈົ່ງຕິດຕາມຮັບຟັງ.ຕໍ່ໄປ,ພວກເຮົາກໍຂໍແນະນຳແນວຄິດປັດຊະຍາເຕົ໋າແລະວັດທະນະທຳສາດສະໜາເຕົ໋າສູ່ທ່ານຟັງ.
ຈີນແມ່ນປະເທດທີ່ມີຫຼາຍຊົນເຜົ່າ,ບັນດາຊົນເຜົ່າລ້ວນແຕ່ໄດ້ປະກອບສ່ວນຂອງຕົນເຂົ້າໃນການພັດທະນາວັດທະນະທຳອັນເປັນມູນເຊື້ອຂອງຈີນ.ດັ່ງນັ້ນ,ນັກປາດຫຼາຍຄົນເຫັນວ່າວັດທະນະທຳອັນເປັນມູນເຊື້ອຂອງຈີນມີຫຼາຍເຄົ້າທີ່ຕາບຈູນເຊິ່ງກັນແລະກັນແລະປະສົມກັນ,ບໍ່ແມ່ນອັນດຽວກັນ.ໃນອົງກອນປະສົມທີ່ມີຫຼາຍເຄົ້າຕາບຈູນກັນດັ່ງກ່າວ,ປັດຊະຍາສຳນັກຂົງຈື,ພຸດທະສາດສະໜາແລະປັດຊະຍາເຕົ໋າແມ່ນ3ເສົາຄ້ຳໃຫຍ່.ອັນທີ່ວ່າ"ເຕົ໋າ",ໝາຍເຖິງປັດຊະຍາເຕົ໋າແລະສາດສະໜາເຕົ໋າ.
ສາດສະໜາເຕົ໋າຂອງຈີນແມ່ນປະກົດການສັງຄົມທີ່ມີປະຫວັດສາດອັນຍາວນານຂອງຈີນ,ແມ່ນພາກສ່ວນໜຶ່ງ ທີ່ຂາດບໍ່ໄດ້ ຂອງວັດທະນະທຳຈີນ.ສາດສະໜາເຕົ໋າມີຜົນສະທ້ອນອັນເລິກເຊິ່ງຍາວໄກຕໍ່ຊີວິດການເປັນຢູ່ຂອງປະຊາຊົນຈີນ.
ສາດສະໜາເຕົ໋າແມ່ນກຳເນີດແລະຂະຫຍາຍຕົວຢູ່ຈີນ.ສ້າງຕັ້ງຂຶ້ນໃນໄລຍະເຈົ້າຊີວິດຊຸ້ນເຕ້ລາຊະວົງຮັ້ນຕາເວັນອອກ(ແຕ່ຄ.ສ.ປີ125—144).ໃນດ້ານມູນເຊື້ອວັດທະນະທຳ,ສາດສະໜາເຕົ໋າໄດ້ສືບທອດອາລະຍະທຳພິທີແລະດົນຕີອັນເປັນມູນເຊື້ອໃນສະໄໝບູຮານຂອງຈີນ,ບົນພື້ນຖານທິດສະດີດັ່ງກ່າວ,ສາດສະໜາເຕົ໋າໄດ້ດຶງດູດໂດຍກົງແລະຂະຫຍາຍແນວຄິດປັດຊະຍາເຕົ໋າຂອງເຫຼົ່າຈືແລະຈ່ວງຈືໃນສະໄໝຊຸນຊິວແລະຍຸດທະຈັກ,ໃນດ້ານພຶດຕິກຳ,ສາດສະໜາເຕົ໋າໄດ້ສືບທອດບົດຮຽນແລະຜົນການຝຶກຝົນໃນສະໄໝກ່ອນລາຊະວົງຊີນ.ວັດທະນະທຳຂອງສາດສະໜາເຕົ໋າມີປະຫວັດມາແຕ່ບູຮານນະການແລະຫືກຫຶມຍືມເລິກ.ສະຫຼຸບແລ້ວ ມີດັ່ງລຸ່ມນີ້,ຄື:ທັດສະນະຈັກກະພົບຂອງສາດສະໜາເຕົ໋າ,ຊີວະທັດຂອງສາດສະໜາເຕົ໋າ,ປັດຊະຍາສາດສະໜາເຕົ໋າ,ເທວະວິທະຍາສາດສະໜາເຕົ໋າ,ວິທີເຝິກແອບ,ພິທີສາສະໜາເຕົ໋າ,ແພດສາດແລະການບຳລຸງຮ່າງກາຍ,ວິທີດູ"ຮວງຈຸ້ຍ",ວິທີດູມໍ,ທຳມະການສາດສະໜາເຕົ໋າ,ກົງຟູສາດສະໜາເຕົ໋າ,ດົນຕີສາດສະໜາເຕົ໋າແລະອື່ນໆ.
ແນ່ນອນແລ້ວ,ສິ່ງທີ່ເຄີຍມີຜົນສະທ້ອນອັນສຳຄັນຕໍ່ວັດທະນະທຳຈີນແລະແຍກອອກຈາກສາດສະໜາເຕົ໋າບໍ່ໄດ້ນັ້ນ,ຍັງມີແນວຄິດເຕົ໋າໃນປະຫວັດປັດຊະຍາ.ປັດຊະຍາເຕົ໋າກັບສາດສະໜາເຕົ໋າ,ໃນພາສາຝ່າຍຕາເວັນຕົກແປເປັນຄຳດຽວກັນຄື,ພາສາອັງກິດແປວ່າTaoism.ແຕ່ວ່າ,ປະຈຸບັນ,ຢູ່ຈີນ,ພວກເຮົາພັດຖືເປັນສ່ອງຢ່າງ,ຄື:ປັດຊະຍາເຕົ໋າແມ່ນປັດຊະຍາຝ່າຍໜຶ່ງ,ແມ່ນແນວຄິດຊະນິດໜຶ່ງ,ສ່ວນສາດສະໜາເຕົ໋າພັດແມ່ນສາດສະໜາຊະນິດໜຶ່ງ,ເຊິ່ງມີອົງການຈັດຕັ້ງ ສາດສະນິກະຊົນ,ວັດວາອາຮາມ,ພິທີຂາບໄຫວ້ ຕະຫຼອດຮອດກຳລັງເສດຖະກິດໃນລະດັບໃດໜຶ່ງ.ໃນຫຼັກທຳສາດສະໜາເຕົ໋າໄດ້ຢືມໃຊ້ມະໂນພາບແລະແນວຄິດຂອງປັດຊະຍາເຕົ໋າຢ່າງຫຼວງຫຼາຍ,ປັດຊະຍາເຕົ໋າກໍ່ໄດ້ເປີດຂ້ວາງຜົນສະທ້ອນຍ້ອນສາສະໜາເຕົ໋າ.ຖ້າເວົ້າວ່າ,ແຕ່ເດີມອິດທິພົນຂອງປັດຊະຍາເຕົ໋າ ພຽງແຕ່ມີຢູ່ໃນຊັ້ນຄົນເຈົ້າໜ້າທີ່ເທົ່ານັ້ນ,ແຕ່ອິດທິພົນຂອງສາດສະໜາເຕົ໋າພັດກວ້າງກວ່ານັ້ນຫຼາຍ,ມັນເຄີຍຂະຫຍາຍລົງສູ່ປະຊາຊົນຂັ້ນລຸ່ມ.ກໍ່ແມ່ນໃນຄວາມໝາຍນີ້ເອງ,ປັດຊະຍາເຕົ໋າແລະສາດສະໜາເຕົ໋າຈິ່ງໄດ້ກາຍເປັນໜຶ່ງໃນສາມເສົາຄ້ຳອັນສຳຄັນຂອງວັດທະນະທຳຈີນ.
ເຫຼົາຈື ນັກປັດຊະຍາເຫຼົ່າຈືໃນສະໄໝກ່ອນລາຊະວົງຊີນແມ່ນຜູ້ລິເລີ່ມສ້າງແນວຄິດປັດຊະຍາເຕົ໋າ,ມີຖານະອັນສຳຄັນໃນວັດທະນະທຳດັ້ງເດີມຂອງຈີນ.ແນວຄິດປັດຊະຍາເຕົ໋າມີຜົນສະທ້ອນອັນສຳຄັນຕໍ່ການຈໍ່ຕົວຂອງຈະລິຍະທຳອັນດີງາມທີ່ເປັນມູນເຊື້ອຂອງປະຊາຊາດຈີນ,ເຊັ່ນ,ແນວຄິດຕ່າງໆຂອງເຫຼົ່າຈືຄື,ຖະໜອມຖ່ອມຕົວ,ອະໂຫສີ,ບໍ່ສະແຫວງຫາຊື່ສຽງແລະຜົນປະໂຫຍດ,ຖືການຊ່ອຍຜູ້ອື່ນເປັນເລື່ອງເບີກບານມ່ວນຊື່ນ,ເອົາຊະນະກຳລັງແຂງແຮງດ້ວຍກຳລັງອ່ອນແລະອື່ນໆ.ກໍ່ແມ່ນຍ້ອນການເສີມຂະຫຍາຍວັດທະນະທຳສາດສະໜາເຕົ໋າ,ຈິ່ງໄດ້ຈໍ່ຕົວເປັນນ້ຳໃຈວັດທະນະທຳທີ່ປຸ້ມລຸມຕຸ້ມຕ່ອມຂອງປະຊາຊາດຈີນ,ເຮັດໃຫ້ວັດທະນະທຳເກົ່າແກ່ຂອງປະຊາຊາດຈີນສາມາດສືບທອດກັນມາເປັນເວລາຍາວນານກໍ່ບໍ່ຊຸດໂຊມ ແລະນັບມື້ນັບກ້ານກຸ່ງຮຸ່ງເຮືອງ.
ການເຄົາລົບທຳມະຊາດແລະສົ່ງເສີມການບໍ່ຕ້ອງສ້າງຜົນງານຫຍັງ,ແມ່ນແນວຄິດສຳຄັນກວ່າໝູ່ຂອງປັດຊະຍາເຕົ໋າຂອງຈີນ.
ໃນໜັງສືບູຮານຂອງຈີນໄດ້ຂຽນວ່າ,ແນວຄິດເຄົາລົບທຳມະຊາດແລະບໍ່ຕ້ອງສ້າງຜົນງານຫຍັງ,ແມ່ນມີມາແຕ່ສະໄໝດຶກດຳບັນ,ຕາມເລົ່າລືກັນວ່າ,ເຈົ້າຮວງຕີ້ເຊິ່ງເປັນບັນພະບຸລຸດຂອງປະຊາຊາດຈີນເປັນຜູ້ລິເລີ່ມແລະປະຕິບັດຕາມທິດສະດີດັ່ງກ່າວ.ສະນັ້ນ,ນັກປາດສາດສະໜາເຕົ໋າພາຍຫຼັງມາກໍມັກເຄົາລົບເຈົ້າຮວງຕີ້ເປັນຜູ້ລິເລີ່ມສ້າງປັດຊະຍາເຕົ໋າແລະສາດສະໜາເຕົ໋າ.ແຕ່ວ່າ,ເມື່ອເບິ່ງຈາກຂໍ້ມູນປະຫວັດສາດແລະປື້ມບູຮານທີໄດ້ຮັກສາໄວ້ໃນປັດຈຸບັນແລ້ວເຫັນວ່າ,ແນວຄິດປັດຊະຍາເຕົ໋າມີພື້ນຖານໃນປື້ມ"ສິມທຳປີດົກ".ຕາມເລົ່າລືກັນວ່າ,ຜູ້ແຕ່ງປື້ມ"ສິນທຳປີດົກ"ແມ່ນເຫຼົາຈື,ສະນັ້ນ,ປື້ນ"ສິນທຳປີດົກ"ກໍ່ເອິ້ນວ່າ"ເຫຼົ່າຈື".ຫຼັງຈາກເຫຼົ່າຈືແລ້ວ,ມີນັກປາດຫຼາຍຄົນໄດ້ໂຄສະນາແນວຄິດປັດຊະຍາເຕົ໋າ,ໃນນັ້ນຜູ້ມີຊື່ສຽງກວ່າໝູ່ແລະມີອິດທິພົນກວ່າໝູ່ກໍ່ແມ່ນຈ່ວງໂຈ່ວໃນໄລຍະສະໄໝຍຸດທະຈັກ.ໃນປື້ມ"ຈ່ວງຈື"ທີ່ຮັກສາໄວ້ໃນປະຈຸບັນກໍ່ໄດ້ບັນທຶກແນວຄິດຂອງຈ່ວງໂຈ່ວ.
ແນວຄິດເຄົາລົບທຳມະຊາດແລະ ບໍ່ຕ້ອງສ້າງຜົນງານຫຍັງ ຂອງປັດຊະຍາເຕົ໋າມີຄວາມໝາຍສອງດ້ານ,ຄື,ໜຶ່ງແມ່ນ,ເຄົາລົບກົດເກນທຳມະຊາດທີ່ບໍ່ສ້າງຜົນງານຫຍັງ,ສອງແມ່ນສົ່ງເສີມແບບສະບັບຂອງມວນມະນຸດ,ໝາຍຄວາມວ່າມະນຸດຄວນຮຽນນຳກົດເກນທຳມະຊາດແລະບໍ່ຕ້ອງສ້າງຜົນງານຫຍັງ,ໃນເຈດຈຳນົງສົ່ງເສີມແບບສະບັບຂອງມວນມະນຸດ,ມີຄວາມໝາຍສອງດ້ານ,ຄື:ໜຶ່ງ,ໃນດ້ານການພົວພັນລະຫວ່າງມະນຸດກັບທຳມະຊາດ,ປັດຊະຍາເຕົ໋າເນັ້ນໜັກເຖິງການພົວພັນທີ່ກົມກຽວກັນແລະເປັນອັນໜຶ່ງອັນດຽວກັນລະຫວ່າງມະນຸດກັບສັບພະສິ່ງທັງປວງເຫັນວ່າມະນຸດຄວນໄປຕາມກົດເກນຂອງສັບພະສິ່ງທັງປວງແລະເຮັດຕາມຫຼັກມູນທຳມະຊາດ,ຢ່າເຮັດໂລເລຕາມຄວາມປາຖະໜາໃນຕົວຂອງມະນຸດ,ແລ້ວທຳລາຍຄວາມກົມກຽວກັນແລະຄວາມດຸນດຽງກັນຂອງທຳມະຊາດ,ສອງ,ໃນດ້ານປະຊາສຳພັນທາງສັງຄົມ,ໂດຍສະເພາະແມ່ນຜູ້ກຳອຳນາດທີ່ມີຖານະນຳພາໃນສັງຄົມ,ຕ້ອງຮຽນນຳຈິດໃຈທຳມະຊາດທີ່ບໍ່ຕ້ອງສ້າງຜົນງານຫຍັງ,ເຮັດໃຫ້ລະບອບ,ແລະແບບສະບັບຕ່າງໆກະທັດຮັດເທົ່າທີ່ຄວນ,ເຮັດໃຫ້ປະຊາຊົນຮັກສາຄວາມຊື່ສັດສຸດຈະລິດ.
ບໍ່ຕ້ອງສົງໄສເລີຍວ່າ,ແນວຄິດເຄົາລົບທຳມະຊາດແລະບໍ່ຕ້ອງສ້າງຜົນງານຫຍັງ ຂອງປັດຊະຍາເຕົ໋າ,ເປັນການສ່ອງແສງໃຫ້ເຫັນໄລຍະທີ່ມະນຸດມີກຳລັງອ່ອນແອໃນການຕໍ່ສູ້ກັບທຳມະຊາດ.ແຕ່ມາຮອດຊຸ່ມື້ນີ້, ສາມາດເວົ້າໄດ້ວ່າ,ກຳລັງດັດສ້າງແລະຄວບຄຸ້ມທຳມະຊາດຂອງມະນຸດ, ໄດ້ແຂງແຮງຂຶ້ນຈົນຮອດລະດັບທີ່ສາມາດ"ເຮັດຕາມຈິດໃຈຂອງຄົນ"ໃນລະດັບໃດໜຶ່ງແລ້ວ.ແຕ່ວ່າ,ບຸກຄົນຜູ້ມີຄວາມຮູ້ຈຳນວນຫຼວງຫຼາຍໄດ້ສັງເກດເຫັນແລ້ວວ່າ,ການດັດສ້າງທຳມະຊາດຕາມຈິດໃຈຂອງມະນຸດແບບນີ້,ບໍ່ພຽງແຕ່ໄດ້ຖືກທຳມະຊາດຕໍ່ຕ້ານແລະແກ້ແຄ້ນນັບມຶ້ນັບຮ້າຍແຮງ,ພາໃຫ້ສິ່ງແວດລ້ອມທີ່ມະນຸດດຳລົງຊີວິດຢູ່ນັ້ນຊຸດຮ້າຍລົງຢ່າງວ່ອງໄວ,ບໍ່ໜຳຄົນເຮົາກໍ່ນັບມື້ນັບຖືກ"ສິ່ງແວດລ້ອມທຳມະຊາດທຽມ"ທີ່ສ້າງເອົາເອງນັ້ນຜູກມັດ,ກາຍເປັນຂ້າທາດຂອງມັນ.ດັ່ງນັ້ນ,ຈິດໃຈເສລີຂອງມະນຸດທີ່ມີຕໍ່ທຳມະຊາດແຂງແຮງສຳໃດແທ້,ແມ່ນບັນຫາທີ່ຕ້ອງຄົ້ນຄວ້າ.ໃນຊຸ່ມື້ນີ້,ຄົນເຮົາຄືມີຄວາມຈຳເປັນທີ່ຮຽນການເຄົາລົບທຳມະຊາດໃຫ້ດີກວ່າເກົ່າຄືນໃໝ່.ໃນດ້ານນີ້,ເນື້ອໃນສົມເຫດສົມຜົນໃນແນວຄິດເຄົາລົບທຳມະຊາດແລະ ບໍ່ຕ້ອງສ້າງຜົນງານຫຍັງ ຂອງປັດຊະຍາເຕົ໋າສາມາດໄຂຊ່ອງທາງຄວາມຄຶດຂອງພວກເຮົາໄດ້ຫຼາຍ.
|
