|
ຕາມຂ່າວCRI,ວັນທີ20ມີນາ,ຢູ່ທີ່ຮ່າໂນ້ຍ,ທ່ານເຈຍຊິ້ງລິນ ກຳມະການປະຈຳກົມການເມືອງສູນກາງພັກກອມມູນິດຈີນ ປະທານສະພາປຶກສາການເມືອງປະຊາຊົນແຫ່ງຊາດຈີນໄດ້ເຈລະຈາກັບທ່ານຟານຢຽນ ກຳມະການກົມການເມືອງສູນກາງເລຂາປະຈຳການກອງເລຂາສູນກາງພັກກອມມູນິດຫວຽດນາມ.ສອງຝ່າຍໄດ້ລົງເລິກແລກປ່ຽນຄວາມເຫັນກ່ຽວກັບສາຍພົວພັນລະຫວ່າງສອງພັກສອງລັດຈີນຫວຽດນາມແລະບັນຫາທີ່ສົນໃຈນຳກັນ.
ທ່ານເຈຍຊິ້ງລິນໄດ້ຕັ້ງໜ້າຕີລາຄາການພົວພັນລະຫວ່າງສອງພັກສອງລັດຈີນຫວຽດນາມ.ທ່ານກ່າວວ່າ,ໃຕ້ການຊີ້ນຳຂອງທິດທາງທີ່"ໝັ້ນຄົງຍາວນານ,ອວ່າຍໜ້າໄປສູ່ອະນາຄົດ,ມີໄມຕີຈິດຖານບ້ານໃກ້ເຮືອນຄຽງ,ຮ່ວມມືຮອບດ້ານ",ສາຍພົວພັນລະຫວ່າງສອງພັກສອງລັດຈີນຫວຽດນາມໄດ້ມີການພັດທະນາຢ່າງໃຫຍ່ຫຼວງ.ປັດຈຸບັນ,ການຮ່ວມມືດ້ານເສດຖະກິດການຄ້າລະຫວ່າງສອງປະເທດໄດ້ຮັບໝາກຜົນອັນເດັ່ນຊັດ,ບັນຫາເສັ້ນຊາຍແດນທີ່ຕົກຄ້າງມາແຕ່ປະຫວັດສາດໄດ້ຮັບການແກ້ໄຂເປັນກ້າວໆ,ການຮ່ວມມືແລະການແລກປ່ຽນກັນໃນຂົງເຂດອື່ນໆລະຫວ່າງສອງຝ່າຍກໍໄດ້ລົງສູ່ລວງເລິກຢ່າງບໍ່ຢຸດຢັ້ງ.
ທ່ານຟານຢຽນກ່າວວ່າ, ຫຼາຍປີມານີ້,ສາຍພົວພັນຫວຽດນາມຈີນແລະການຮ່ວມມືໃນຂົງເຂດຕ່າງໆໄດ້ພັດທະນາເປັນຢ່າງດີ.ຝ່າຍຫວຽດນາມຮູ້ສຶກເພິ່ງພໍໃຈຕໍ່ທ່ວງທ່າຂະຫຍາຍຕົວອັນດີງາມຂອງສາຍພົວພັນລະຫວ່າງສອງພັກສອງລັດ.
ທ່ານເຈຍຊິ້ງລິນກ່າວວ່າ,ພັກກອມມູນິດຈີນແລະລັດຖະບານຈີນຖືການຂະຫຍາຍສາຍພົວພັນຈີນຫວຽດນາມໄວ້ຢູ່ໃນຖານະພົ້ນເດັ່ນໃນວຽກງານການຕ່າງປະເທດກັບປະເທດອ້ອມຂ້າງຢ່າງສະເໝີຕົ້ນສະເໝີປາຍ.ທ່ານສະເໜີໃຫ້ສອງຝ່າຍສືບຕໍ່ປັບປຸງແລະເພີ່ມທະວີການແລກປ່ຽນແລະການຮ່ວມມືກັນໃນຂົງເຂດຕ່າງໆເຊັ່ນການເມືອງ,ເສດຖະກິດການຄ້າ,ການສຳຫຼວດຢັ່ງແທກຂຸດຄົ້ນນ້ຳມັນເຊື້ອໄຟແລະອາຍແກັສ,ການປະມົງເປັນຕົ້ນ,ຊຸກຍູ້ໃຫ້ສາຍພົວພັນລະຫວ່າງສອງພັກສອງລັດສືບຕໍ່ຂະຫຍາຍລົງສູ່ລວງເລິກ.ທ່ານຟານຢຽນກ່າວວ່າທ່ານເຫັນດີເຫັນພ້ອມນຳຂໍ້ສະເໜີຂອງທ່ານເຈຍຊິ້ງລິນ.
ເມື່ອກ່າວເຖິງບັນຫາໄຕ້ຫວັນ,ທ່ານຟານຢຽນກ່າວລື້ມວ່າ,ພັກແລະລັດຖະບານຫວຽດນາມຈະສືບຕໍ່ຍຶດໝັ້ນຫຼັກການຈີນດຽວ,ເດັດດ່ຽວຄັດຄ້ານການເຄື່ອນໄຫວແຍກໄຕ້ຫວັນໃຫ້ເປັນເອກະລາດ,ຫວັງໃຫ້ພາລະກິດອັນຍິ່ງໃຫຍ່ໂຮມເຂົ້າເປັນເອກະພາບກັນຂອງຈີນບັນລຸຜົນເປັນຈິງໂດຍໄວ.
|
