|
|
 |
| (GMT+08:00)
2006-03-23 16:37:27
|
 |
|
ເອົາໃຈໃສ່ນຳຜູ້ຈະສິ້ນຊີວິດ(ສຽງ)
cri
|
ສັບທີ່ວ່າ ເອົາໃຈໃສ່ນຳຊີວິດທ່ານອາດຈະຮູ້ສຶກບໍ່ລື້ງຫູປານໃດ,ແລະອາດຈະຮູ້ສຶກເລິກລັບຕໍ່ໂຮງໝໍເອົາໃຈໃສ່ນຳຜູ້ສິ້ນຊີວິດ,ໃນບົດນີ້,ຂ້າພະເຈົ້າຈະພາທ່ານໄປຢາມໂຮງໝໍຊົ່ງທັງປັກກິ່ງ ເຊິ່ງເປັນໂຮງໝໍທີ່ໃຫ້ຄວາມເອົາໃຈໃສ່ນຳຜູ້ຈະສິ້ນຊີວິດ.
ຢູ່ແຫ່ງນີ້,ການເອົາໃຈໃສ່ນຳຊີວິດໝາຍເຖິງການໃຫ້ຄວາມເອົາໃຈໃສ່ນຳຄົນເຈັບຜູ້ເປັນພະ ຍາດທີ່ປົວບໍ່ຫາຍແລະຈະສິ້ນລົມຫາຍໃຈ.ຊ່ອຍໃຫ້ພວກເຂົາເຈົ້າລືມຄວາມເຈັບປວດແລະຄວາມຢ້ານກົວຕໍ່ການຕາຍໃນບັ້ນທ້າຍຂອງຊີວິດ,ໃຫ້ພວກເຂົາເຈົ້າຍ່າງສຸດໄລຍະທາງຂອງຊີວິດດ້ວຍຄວາມມ່ວນໃຈໂດຍທຽບຖານແລະມີສັກສີ.ສ່ວນອົງການທີ່ຮັບປິ່ນປົວຄົນປ່ວຍປະເພດນີ້,ແລະໃຫ້ການບໍລິການທີ່ສະໜອງກັນນັ້ນກໍເອີ້ນກັນວ່າໂຮງໝໍໃຫ້ຄວາມເອົາໃຈໃສ່ນຳຊີວິດ.
ເມື່ອຍ່າງເຂົ້າປະຕູໂຮງໝໍຊົ່ງທັງ,ທ່ານຈະໄດ້ເຫັນສາລາ ນ້ຳພຸ ນ້ຳອອກບໍ່ແລະພູທຽມ, ທ່ານອາດຈະເຂົ້າໃຈຜິດວ່າໂຕໄດ້ຍ່າງເຂົ້າສວນອຸທິຍານແຫ່ງໃດແຫ່ງໜຶ່ງ.ຢູ່ໃນເດີ່ນໂຮງ ໝໍມີຜູ້ເຖົ້າຫຼາຍສິບຄົນນັ່ງຕີເປັນວົງ,ບາງຄົ້ນຮ້ອງງິ້ວ,ບາງຄົນຫັດກາຍ,ແຕ່ທ່ານຢ່າເຂົ້າໃຈຜິດວ່າ ພວກເພິ່ນແມ່ນຜູ້ເຖົ້າທຳມະດາ,ພວກເພິ່ນແມ່ນຄົນເຈັບທີ່ມໍ່ຈະສິ້ນຊີວິດແລ້ວ.
ໂຮງໝໍຊົ່ງທັງປັກກິ່ງແມ່ນອົງການທີ່ເປັນທາງໂຮງໝໍ ໂຮງສະຫວັດດີການແລະໂຮງລ້ຽງຜູ້ເຖົ້າຢູ່ບ່ອນດຽວກັນ,ໄດ້ມີປະຫວັດເກືອບ20ປີແລ້ວ,ໂຮງໝໍນີ້ຮັບເອົາແຕ່ຄົນເຈັບທີ່ໂຮງໝໍໃຫຍ່ຕ່າງໆບົ່ງມະຕິວ່າປົວບໍ່ໄດ້ແລ້ວນັ້ນໂດຍຈຳເພາະ,ບໍລິການປິ່ນປົວພະຍາດຢ່າງຮອບດ້ານ,ລວມທັງການປິ່ນປົວດ້ວຍການຜ່ອນຄາຍທາງຈິດໃຈແລະເບິ່ງແຍງຊີວິດການເປັນຢູ່.ຢູ່ໂຮງໝໍຊົ່ງທັງມີຫ້ອງນອນສຳລັບຄົນເຈັບເກືອບຮ້ອຍຫ້ອງ ມີນາຍໝໍແລະນາງພະຍາບານຮ້ອຍກວ່າຄົນ.ປະຈຸບັນນີ້ມີຄົນເຈັບ230ກວ່າຄົນນອນໂຮງໝໍ,ໃນນັ້ນສ່ວນຫຼາຍແມ່ນຜູ້ເຖົ້າ.
ທ່ານຫຼີເຫວີຍ ຫົວໜ້າໂຮງໝໍຊົ່ງທາງເຫັນວ່າ,ເຖິງວ່າຊາວຈີນມີມູນເຊື້ອທີ່ກະຕັນຍູຕໍ່ຜູ້ເຖົ້າກໍຕາມ,ແຕ່ສິ່ງທີ່ຄົນເຈັບຜູ້ມໍ່ຈະສິ້ນຊີວິດຕ້ອງການນັ້ນບໍ່ພຽງແຕ່ແມ່ນການເບິ່ງແຍງດ້ານຊີວິດການເປັນຢູ່ທໍ່ນັ້ນ.ທ່ານເວົ້າວ່າ:"ສິ່ງທີ່ຜູ້ເປັນລູກຫຼານເຮັດໄດ້ນັ້ນ,ກໍແມ່ນໃຫ້ຄວາມອົບອຸ່ນແກ່ຜູ້ເຖົ້າທີ່ເຈັບປ່ວຍ,ແຕ່ຜູ້ເຖົ້າທີ່ມໍ່ຈະສິ້ນຊີວິດຍັງມີຄວາມຮຽກຮ້ອງຕ້ອງການອື່ນໆຫຼາຍຢ່າງ.ແຕ່ຄອບຄົວຂອງຄົນເຈັບ,ສ່ວນຫຼາຍບໍ່ແມ່ນນາຍໝໍ,ບໍ່ຊ່າງວາງແຜນການພະຍາບານແບບວິທະຍາສາດແລະກໍບໍ່ມີຄຸນທາດຂອງນາຍໝໍຈິດຕະສາດ,ສະນັ້ນ,ຄວາມຕ້ອງການຫຼາຍຢ່າງຂອງຄົນເຈັບຈຶ່ງບໍ່ສາມາດຕອບສະໜອງໄດ້."
ໂຮງໝໍຊົ່ງທັງມີຕົວເລກຕ່າງໆທີ່ໄດ້ບັນທຶກແຕ່ລະບາດກ້າວຂອງຕົນ,ແລະຍັງເປັນສັກຂີພິຍານໃຫ້ແກ່ການຂະຫຍາຍຕົວຂອງພາລະກິດເອົາໃຈໃສ່ນຳຜູ້ຈະສິ້ນຊີວິດຂອງຈີນ:ມີຄົນເຈັບ1ໝື່ນ7ພັນກວ່າຄົນໄດ້ຜ່ານຊີວິດບັ້ນທ້າຍຢູ່ທີ່ນີ້;ຄົນເຈັບທີ່ປິ່ນປົວຢູ່ນີ້ມີອາຍຸສະເລ່ຍ82ປີ,ຜູ້ອາຍຸສູງສຸດ109ປີ,ຜູ້ນ້ອຍສຸດພຽງແຕ່4ມື້;ບໍ່ວ່າວົງຈອນຊີວິດຍາວຫຼືສັ້ນປານໃດ,ໂຮງໝໍຊົ່ງທັງກໍລ້ວນແຕ່ພະຍາຍາມແຕ້ມວົງຈອນຂອງພວກເຂົາເຈົ້າໃຫ້ຄົບຖ້ວນ.
ຍ້ອນວ່າຜູ້ມາປົວຢູ່ທີ່ນີ້ລ້ວນແຕ່ແມ່ນຝູງຄົນພິເສດ,ນັບແຕ່ເວລາສ້າງຕັ້ງຂຶ້ນ,ໂຮງໝໍຊົ່ງທັງກໍໄດ້ວາງລະບອບພະຍາບານທີ່ປິ່ນປົວແລະເບິ່ງແຍງຮອບດ້ານຕະຫຼອດ24ຊົ່ວໂມງ.ນາງຫຼີ ຫົວໜ້ານາງພະຍາບານເວົ້າວ່າ:"ຜູ້ພະຍາບານພວກເຮົາຕ້ອງລຸກແຕ່5-6ໂມງເຊົ້າຊູ່ມື້,ລ້າງສ່ວຍໃຫ້ຜູ້ເຖົ້າຜູ້ແກ່ແລະປ້ອນເຂົ້າປ້ອນນ້ຳພວກເພິ່ນ.ຫຼັງຈາກນັ້ນ,ພວກເຂົາເຈົ້າກໍ ຊ່ອຍຜູ້ເຖົ້າທີ່ລຸກຍ່າງໄດ້ນັ້ນໄປຫັດກາຍຢູ່ຊັ້ນລຸ່ມ,ສຳລັບຜູ້ທີ່ລຸກບໍ່ໄດ້ກໍຊ່ອຍພວກເພິ່ນພິກຄີງແລະຕົບຫຼັງລູບຫຼັງໃຫ້ພວກເພິ່ນຊົ່ວໂມງລະເທື່ອ."
ໂຮງໝໍຊົ່ງທັງຍັງມີຈຸດພິເສດອີກ ຄື:ຈົນຮອດປະຈຸບັນ,ໄດ້ມີ200ກວ່າໂຮງຮຽນຊັ້ນສູງແລະອົງການຈັດຕັ້ງສັງຄົມສ້າງການພົວພັນຍາວນານກັບໂຮງໝໍຊົ່ງທັງ,ໃນເວລາຫວ່າງ,ຜູ້ອາສາສະໝັກຂອງໂຮງຮຽນຊັ້ນສູງແລະອົງການຈັດຕັ້ງສັງຄົມດັ່ງກ່າວກໍມາໂຮງໝໍສະແດງລາຍການໃຫ້ຄົນເຈັບເບິ່ງ,ລົມກັບພວກເຂົາເຈົ້າ,ແລະເບິ່ງແຍງພວກເຂົາເຈົ້າ.ຜູ້ອາສາສະໝັກຮູ້ສຶກວ່າການຊ່ອຍຄົນເຈັບທີ່ມໍ່ຈະສິ້ນຊີວິດບັນເທົາຄວາມທຸກທໍລະມານດ້ານຈິດໃຈນັ້ນແມ່ນເລື່ອງທີ່ມີຄວາມສຸກຫຼາຍ.
ຢູ່ຫ້ອງຜູ້ເຖົ້າຜູ້ໜຶ່ງ,ນັກຂ່າວໄດ້ພົບຜູ້ອາສາສະໝັກຫຼາຍຄົນຂອງມະຫາວິທະຍາໄລສື່ສານຈີນ.
"ຂ້ອຍມານີ້ເລື່ອຍໆ,ປະມານເກືອບທຸກອາທິດ.ຂ້ອຍມັກມາລົມກັບແມ່ເຖົ້າຜູ້ໜຶ່ງ.ດ້ານໜຶ່ງພາໃຫ້ເພິ່ນມ່ວນໃຈ,ອີກດ້ານໜຶ່ງ,ຂ້ອຍກໍ່ໄດ້ຮຽນຮູ້ບາງສິ່ງບາງຢ່າງນຳເພິ່ນ."
ຢູ່ໃນຫ້ອງນີ້ຫ້ອຍເຕັມໄປດ້ວຍນົກຍາງແລະດາວນ້ອຍໆທີ່ພັບດ້ວຍເຈ້ຍ,ນັກຂ່າວໄດ້ເຫັນແມ່ເຖົ້າຫຼີທີ່ນັກຮຽນໄດ້ເວົ້າເຖິງ,ເພິ່ນອາຍຸ91ປີ,ເປັນມະເຮັງມາຫຼາຍປີແລ້ວ.
"ແມ່ເຖົ້າມາຢູ່ນີ້ດົນແລ້ວ,ຄືກັບບ້ານຂອງແມ່ເຖົ້າເອງ,ດຽວນີ້,ແມ່ເຖົ້າແມ່ນສະມາຊິກຜູ້ໜຶ່ງຂອງຄອບຄົວໃຫຍ່ຊົ່ງທັງ,ຢູ່ນີ້,ໃຜກໍຮັກແພງແມ່ເຖົ້າ,ແມ່ເຖົ້າກໍຮູ້ສຶກມ່ວນຫຼາຍ."
ແມ່ເຖົ້າທັງຍິ້ມທັງເວົ້າຕໍ່ນັກຂ່າວ,ບໍ່ມີຄວາມໂສກເສົ້າຫຍັງຈັກເມັດ,ບໍ່ຄືຄົນເຈັບທີ່ມໍ່ຈະສິ້ນ ຊີວິດຄືນັກຂ່າວຄິດເອົາໄວ້.ໃນໂຮງໝໍຫຼັງນີ້,ຕາມໃບໜ້າຂອງທຸກໆຄົນ,ທ່ານກໍຈະເຫັນຮອຍຍີ້ມເລື່ອຍໆຄືກັນ.
ປະຈຸບັນນີ້,ຢູ່ຈີນໄດ້ມີຜູ້ເຖົ້າ130ກວ່າລ້ານຄົນ,ກວມ10%ຂອງຍອດຈຳນວນປະຊາກອນ.ຈະປະຕິບັດຕໍ່ຜູ້ເຖົ້າແນວໃດ,ໂດຍສະເພາະແມ່ນຜູ້ເຖົ້າທີ່ເປັນພະຍາດທີ່ປົວບໍ່ຫາຍ,ໄດ້ກາຍເປັນບັນຫາທີ່ວົງການຕ່າງໆໃນສັງຄົມຈີນເອົາໃຈໃສ່ນຳ.
ປະຈຸບັນນີ້,ຈີນມີອົງການເອົາໃຈໃສ່ນຳຜູ້ຈະສິ້ນຊີວິດ100ກວ່າອົງການ,ມີຜູ້ປະຕິບັດວຽກງານດ້ານນີ້ຫຼາຍພັນຄົນ,ໃນໂຮງຮຽນຊັ້ນສູງວິຊາແພດສາດຈຳນວນໜຶ່ງຍັງໄດ້ຕັ້ງຫຼັກສູດເອົາໃຈໃສ່ນຳຜູ້ຈະສິ້ນຊີວິດ;ນອກນີ້,ຈີນຍັງພວມຕັ້ງໜ້າກະກຽມຈະສ້າງຕັ້ງສະມາຄົມເອົາໃຈໃສ່ນຳຜູ້ຈະສິ້ນຊີວິດ,ເພື່ອທ້ອນໂຮມເອົາຊັບພະຍາກອນແລະກຳລັງຕ່າງໆໃນສັງຄົມໃຫ້ປະກອບສ່ວນເຂົ້າໃນພາລະກິດເອົາໃຈໃສ່ນຳຄົນເຈັບຜູ້ຈະສິ້ນຊີວິດໃຫ້ຫຼາຍກວ່າເກົ່າ.
|
|
|
