|
ທ່ານເຈິນດຶກເລື່ອງ(ຊ້າຍ)ພົບປະທ່ານເຈຍຊິງລິນ
ຕາມຂ່າວCRI,ວັນທີ21ມີນາ,ຢູ່ທີ່ຮາໂນຍ,ທ່ານເຈິນດຶກເລື່ອງ ປະທານປະເທດຫວຽດນາມໄດ້ພົບປະທ່ານເຈຍຊິງລິນ ປະທານສະພາປຶກສາການເມືອງປະຊາຊົນແຫ່ງຊາດຈີນທີ່ໄປຢ້ຽມຢາມ.ສອງຝ່າຍເປັນເອກະສັນກັນກ່າວວ່າ,ຍິນດີຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍໄປໜ້າຕື່ມອີກ.
ໃນການພົບປະ,ທ່ານເຈິນດຶກເລື່ອງກ່າວວ່າ,ຈີນແມ່ນປະເທດໃກ້ຄຽງແລະເປັນຕະຫຼາດໃຫຍ່ກວ່າໝູ່ຂອງຫວຽດນາມ,ບົດຮຽນຂອງຈີນກ່ຽວກັບການຊຳລະບັນຫາທີ່ກ່ຽວຂ້ອງໃນການປະຕິຮູບແລະໄຂປະຕູສູ່ພາຍນອກຢ່າງເໝາະສົມແມ່ນເປັນໜ້າຮ່ຳ ຮຽນແລະຖອດຖອນເອົາສຳລັບຝ່າຍຫວຽດນາມ. ພັກແລະລັດຖະບານຫວຽດນາມຈະສືບທອດແລະສົ່ງເສີມມິດຕະພາບອັນເປັນມູນເຊື້ອລະຫວ່າງສອງປະເທດ,ຊຸກຍູ້ການພົວພັນສອງພັກສອງລັດໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ.ທ່ານເຈິນດຶກເລື່ອງຍັງກ່າວວ່າ,ຫຼັກໝັ້ນຂອງພັກແລະລັດຖະບານຫວຽດນາມທີ່ຍຶດໝັ້ນຫຼັກການປະເທດຈີນດຽວ,ຄັດຄ້ານທຸກການເຄື່ອນໄຫວທີ່ແຍກໄຕ້ຫວັນໃຫ້ເປັນເອກະລາດນັ້ນບໍ່ໄດ້ມີການປ່ຽນແປງ.
ທ່ານເຈຍຊິງລິນສະແດງຄວາມຊົມເຊີຍຕໍ່ຫວຽດນາມທີ່ຍຶດໝັ້ນນະໂຍບາຍຈີນດຽວ.ທ່ານຍັງໄດ້ວາງຂໍ້ສະເໜີ4ຂໍ້ກ່ຽວກັບການຊຸກຍູ້ການພົວພັນຈີນຫວຽດນາມຂະຫຍາຍໄປສູ່ລະດັບສູງກວ່າເກົ່າ,ຄື,ຮັກສາທ່ວງທ່າທີ່ຊັ້ນສູງຢ້ຽມຢາມກັນ,ຊຸກຍູ້ການຮ່ວມມືດ້ານເສດຖະກິດການຄ້າຕື່ມອີກ,ເພີ່ມທະວີກົນໄກຮ່ວມມືລະຫວ່າງພາກສ່ວນການຕ່າງປະເທດ,ການປ້ອງກັນຄວາມປອດໄພເປັນຕົ້ນ,ເປີດກວ້າງການໄປມາຫາສູ່ກັນຢ່າງມີໄມຕີຈິດລະຫວ່າງຊາວໜຸ່ມເຍົາວະຊົນ,ຊຸກຍູ້ການສຳຫຼວດເສັ້ນຊາຍແດນເທິງບົກ,ການຮ່ວມມືດ້ານສຳຫຼວດຂຸດຄົ້ນນ້ຳມັນເຊື້ອໄຟແລະອາຍແກັສແລະດ້ານການປະມົງຢູ່ອ່າວພາກເໜືອ,ການຮ່ວມກັນພັດທະນາທະເລໃຕ້ໃຫ້ໄດ້ຮັບຄວາມຄືບໜ້າຢ່າງຕັ້ງໜ້າ.
|
