|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ຫວ່າງກ່ອນນີ້ບໍດົນ, ກອງປະຊຸມສະໄໝສາມັນຂອງສະພາປຶກສາການເມືອງປະຊາຊົນແຫ່ງຊາດແລະສະພາປະຊາຊົນແຫ່ງຊາດຈີນໄດ້ອັດລົງຢູ່ທີ່ປັກກິ່ງຜົນສຳເລັດເຕັມເມັດເຕັມໜ່ວຍ. ໃນກອງປະຊຸມສະໄໝສາມັນຂອງສະພາປຶກສາການເມືອງປະຊາຊົນແຫ່ງຊາດຈີນປີນີ້, ກຳມະການຫຼາຍທ່ານໄດ້ສະເໜີວ່າ, ເນື້ອໃນສຳຄັນອັນໜຶ່ງໃນການເພີ່ມທະວີການສ້າງສາພາລະກິດສາທາລະນະໃນຊົນນະບົດ ແມ່ນຕ້ອງເພີ່ມທະວີການສ້າງສາກິລາໃນຊົນນະບົດ.
ຢູ່ຈີນ ຄວາມຜິດໂຕນກັນລະຫວ່າງຕົວເມືອງກັບຊົນນະບົດໄດ້ຄົງຕົວຢູ່ໃນບັນດາຂົງເຂດຊີວິດສັງຄົມ, ໃນນັ້ນ ກິລາກໍ່ບໍ່ນອກເໜືອ. ເຖິງວ່ານັກກິລາລະດັບຍອດຢ້ຽມຂອງຈີນຈຳນວນຫຼວງຫຼາຍແມ່ນມາຈາກຊົນນະບົດກໍ່ຕາມ, ແຕ່ການກິລາໃນຊົນນະບົດຈີນພັດບໍ່ຟົດຟື້ນປານໃດ.
ເມື່ອທຽບກັບຕົວເມືອງແລ້ວ ກິລາໃນຊົນນະບົດຫຼ້າຫຼັງຢູ່, ນີ້ແມ່ນຍ້ອນປັດໄຈຕ່າງໆນານາ, ເຊິ່ງລວມທັງສິ່ງກໍ່ສ້າງກິລາໃນຊົນນະບົດແລະທຶນທີ່ໃຊ້ທາງກິລາໃນຊົນນະບົດບໍ່ພໍ, ຊາວກະສິກອນມີເວລາຫວ່າງບໍ່ຫຼາຍ, ລະດັບການຈັດຕັ້ງບໍ່ສູງທໍ່ຕົວເມືອງ.
ທີ່ທ່ານພວມຟັງຢູ່ນີ້ແມ່ນຄວາມເຫັນຂອງທ່ານເສິນຢ້າວປ່າງ ອະດີດລັດຖະມົນຕີກະຊວງກະສິກຳຈີນ ກຳມະການສະພາປຶກສາການເມືອງປະຊາຊົນແຫ່ງຊາດຈີນ, ປັດຈຸບັນ ທ່ານຍັງເປັນປະທານສະມາຄົມກິລາຊາວກະສິກອນຈີນອີກດ້ວຍ. ຕາມສະມາຄົມກິລາຊາວກະສິກອນຈີນຄາດຄະເນວ່າ, ບ້ານບໍລິຫານທີ່ມີສະໜາມກິລາແລະສິ່ງກໍ່ສ້າງກິລາທີ່ໄດ້ຕາມມາດຖານແຫ່ງໜຶ່ງຂຶ້ນໄປນັ້ນ ມີພຽງບໍ່ຮອດ 1/5 ໃນທົ່ວປະເທດ, ແລະບ້ານບໍລິຫານເຫຼົ່ານີ້ສ່ວນຫຼາຍຢູ່ເຂດພາກຕາເວັນອອກທີ່ຮັ່ງມີຂອງຈີນ.
ໃນສາຍຕາຂອງທ່ານເສິນຢ້າວປ່າງ, ບໍ່ວ່າເງື່ອນໄຂສະໜາມກິລາແລະສິ່ງກໍ່ສ້າງກິລາເປັນແນວໃດ, ເວົ້າລວມແລ້ວ ສະພາບການກິລາໃນຊົນນະບົດຈີນໃນບໍ່ເທົ່າໃດປີມານີ້ແມ່ນຍັງພໍໄດ້ຢູ່. ດ້ານໜຶ່ງ ກິລາສາມາດເຮັດໃຫ້ສຸຂະພາບຂອງຊາວກະສິກອນເຂັ້ມແຂງຂຶ້ນ, ອີກດ້ານໜຶ່ງ ກໍ່ມີຜົນປະໂຫຍດ ຫຼາຍຕໍ່ການເຮັດໃຫ້ຊີວິດດ້ານຈິດໃຈຂອງຊາວກະສິກອນສົມບູນຂຶ້ນ. ທ່ານເສິນຢ້າວປ່າງເວົ້າວ່າ:
ດຽວນີ້ ຢູ່ຊົນນະບົດມີຄວາມຮັບຮູ້ຄືກັນອັນໜຶ່ງ, ນັ້ນກໍ່ຄື ການຫຼິ້ນກິລາເຮັດໃຫ້ສຸຂະພາບຂອງຊາວກະສິກອນເຂັ້ມແຂງແມ່ນສຳຄັນຫຼາຍ. ຢູ່ຫຼາຍບ່ອນໄດ້ຈັດໃຫ້ມີການແຂ່ງຂັນກິລາທີ່ມີສີສັນພິເສດ ຕົວຢ່າງຄື ຟ້ອນມັງກອນ ເຊີດສິງໂຕ ຊ່ວງເຮືອແລະການແຂ່ງຂັນດຶງເຊືອກເປັນຕົ້ນ, ແລະກໍ່ມີກິລາທັນສະໄໝ ເຊັ່ນ ບານບ້ວງ ແລະປິ່ງປ່ອງເປັນຕົ້ນ, ກິລາເຫຼົ່ານີ້ແມ່ນໜ່ຽງປັ້ນກຳລັງຈິດໃຈຫຼາຍ. ໃນການແຂ່ງຂັນ, ຊາວບ້ານມັກຈະເຂົ້າຂ້າງນັກກິລາຂອງບ້ານຕົນ, ອັນໄດ້ລະດົມຄວາມຫ້າວຫັນຂອງຄົນທັງຫຼາຍເພື່ອຍາດເອົາກຽດມາໃຫ້ທົ່ວບ້ານຂອງຕົນ. ສະຕິຕໍ່ກຽດສ່ວນລວມແນວນີ້ ມີບົດບາດທີ່ສຸດຕໍ່ການກະຕຸກໃຫ້ມວນຊົນຮັກບ້ານຕົນ ຮັກໝູ່ຄະນະ.
ທ່ານເສິນຢ້າວປ່າງເຫັນວ່າ, ນອກຈາກສາມາດໜ່ຽງປັ້ນຈິດໃຈຂອງມວນຊົນແລ້ວ, ກິລາຍັງສາມາດຊ່ອຍເຮັດໃຫ້ຮີດສັງຄົມສະອາດບໍລິສຸດອີກດ້ວຍ. ທ່ານເວົ້າວ່າ:
ເມື່ອຊາວກະສິກອນເຂົ້າຮ່ວມການກິລາຫຼາຍແລ້ວ, ບໍ່ວ່າຈະຫຼິ້ນກິລາຫຼືວ່າແມ່ນເບິ່ງເຊຍຢູ່ຂ້າງ, ເຂົາເຈົ້າກໍ່ຈະບໍ່ໄປກໍ່ເລື່ອງກໍ່ລາວອີກແລ້ວ. ຕາມພວກຂ້າພະເຈົ້າໄດ້ຮູ້ວ່າ, ໃນຕາແສງໃດທີ່ດຳເນີນການກິລາໄດ້ດີນັ້ນ, ທຳມະດາແລ້ວ ຢູ່ຕາແສງນັ້ນການຫຼິ້ນພະນັນກໍ່ໜ້ອຍ. ຄົນທັງຫຼາຍບໍ່ໃສ່ໃຈນຳການຫຼິ້ນພະນັນອີກແລ້ວ, ເພາະກິລາໄດ້ດຶງດູດເຂົາເຈົ້າ, ທຳມະດາແລ້ວ ເຂົາເຈົ້າກໍ່ຈະມັກເຂົ້າຮ່ວມການກິລາ, ຄວາມນິຍົມກໍ່ຍ້າຍໄປນຳກິລາແລ້ວ.
ຢາກເຮັດໃຫ້ການກິລາດຳເນີນໂດຍທົ່ວໄປຢູ່ຊົນນະບົດຈີນ, ການລົງທຶນແລະການສະໜັບສະໜູນຂອງຊາດແມ່ນຂາດເຂີນບໍ່ໄດ້. ສະນັ້ນ, ທ່ານຈ່າງຟ່າສຽງ ກຳມະການສະພາປຶກສາການເມືອງປະຊາຊົນແຫ່ງຊາດຈີນສະເໜີວ່າ, ບົນພື້ນຖານການເງິນສູນກາງອ່າວຫຼາຍໃນປັດຈຸບັນ, ຄວນເພີ່ມການລົງທຶນສ້າງສາສິ່ງກໍ່ສ້າງກິລາຊົນນະບົດ. ທ່ານໄດ້ຮູ້ວ່າ, ປີນີ້ ຄະນະກຳມະການປະຕິຮູບແລະພັດທະນາແຫ່ງລັດຈີນຈະເບີກເງິນ 30 ລ້ານຢວນໃຊ້ເຂົ້າໃນການກໍ່ສ້າງສິ່ງກໍ່ສ້າງກິລາຊົນນະບົດ, ທ່ານສະເໜີໃຫ້ກົມໃຫຍ່ກິລາແຫ່ງຊາດຈີນເບີກເງິນຈຳນວນໜຶ່ງຈາກມູນນິທິຫວຍກິລາ ໃຊ້ເຂົ້າໃນພາລະກິດກິລາຊົນນະບົດ.
ເງິນທຶນສຳຄັນຫຼາຍ, ແຕ່ນະໂຍບາຍຍິ່ງສຳຄັນກວ່າ. ໃນຂະນະທີ່ລັດຖະບານຈີນວາງແຜນວຽກງານສຳລັບ 5 ປີຂ້າງໜ້າ, ກໍ່ເຈາະຈົງຊີ້ອອກວ່າ ຕ້ອງເພີ່ມທະວີການກໍ່ສ້າງພື້ນຖານໂຄງລ່າງຊົນນະບົດ, ເພີ່ມທະວີການສ້າງສາພາລະກິດສາທາລະນະຊົນນະບົດ ເຊັ່ນ ການສຶກສາ ສາທາລະນະສຸກແລະວັດທະນະທຳເປັນຕົ້ນ. ທ່ານຈ່າງຟ່າສຽງແລະກຳມະການສະພາປຶກສາການເມືອງປະຊາຊົນແຫ່ງຊາດຈີນຜູ່ອື່ນໆອີກ 10 ກວ່າທ່ານໄດ້ຮ່ວມກັນສະເໜີໃຫ້ເພີ່ມຕື່ມເນື້ອໃນກ່ຽວກັບການກິລາເຂົ້າໃນພາລະກິດສ້າງສາສາທາລະນະຊົນນະບົດ. ທ່ານຈ່າງຟ່າສຽງເວົ້າວ່າ: ຖ້າລັດຖະບານຮັບເອົາຂໍ້ສະເໜີດັ່ງກ່າວ, ການສ້າງສາຊົນນະບົດແບບໃໝ່ນັ້ນ ກໍ່ຈະເລີ່ມຕົ້ນງ່າຍ ຈະມີຜົນໄວທີ່ມວນຊົນໄດ້ເຫັນ. ຖ້າພວກເຮົາເລີ່ມລົງມືຈາກດ້ານນີ້, ກໍ່ຈະໄດ້ຮັບຜົນອ່າວໄວ.
|
