|
ກຳປັ່ນຫລູຫລາຊື່ເຈົ້າຍິງມະຫາສະຫມຸດທີ່ຜະລິດຢູ່ເອີລົບລຳຫນຶ່ງໄດ້ກາຍເປັນສິ່ງທີ່ເຮັດໃຫ້ເມືອງໄປຫາຍເຂດກວາງຊີເອກອ້າງທະນົງຕົວ, ເວລາ 7 ໂມງຄ່ຳຂອງວັນທີ 6 ມີນາ,ກຳປັ່ນທີ່ບັນທຸກຜູ່ທ່ອງທ່ຽວ 500 ກວ່າຄົນໄດ້ຈາກເມືອງໄປຫາຍເດີນໄປສູ່ຫວຽດນາມເປັນຄັ້ງທຳອິດ,ອັນໄດ້ທັບມ້າງສະພາບການມິດງຽບຂອງການທ່ອງ ທ່ຽວເທິງທະເລຈີນຫວຽດນາມສອງປີມານີ້.
ກຳປັ່ນເຈົ້າຍິງມະຫາສະຫມຸດແມ່ນຜະລິດຢູ່ແອສປາຍ,ຂະຫນາດຂັບນ້ຳ 11,5 ພັນໂຕນ,ສູງ 8 ຊັ້ນ, ຍາວ 140 ແມັດ,ກວ້າງ 21 ແມັດ,ຄວາມໄວສູງສຸດແມ່ນ 3,4 ກິໂລແມັດຕໍ່ຊົ່ວໂມງ.ຢູ່ໃນກຳປັ່ນລຳນີ້ມີສິ່ງກໍ່ສ້າງຄົບຊຸດ,ລາຍການບໍລິການກໍ່ອຸດົມສົມບູນຫລາຍ, ຕົ້ນຕໍມີບາເຫລົ້າ,ອ່າງລອຍນ້ຳ,ໄນຄຼັບ,ຊາລົງຢ່ອນອາລົມ,ຫ້ອງອາຫານຈີນ,ຫ້ອງອາຫານຝຼັ່ງ,ສູນຊາວນ້າ,ຫ້ອງສາຍຮູບເງົາ, ຫ້ອງຫລິ້ນໄພ້ແລະຫມາກລຸກ ຫ້ອງຫລິ້ນສະນຸເກີເປັນຕົ້ນ.ນອກນີ້ ມີຫ້ອງນອນ 152 ຫ້ອງ,ໃນນັ້ນ ມີຫ້ອງຊຸດ, ຫ້ອງດ່ຽວ,ຫ້ອງສອງຄົນແລະຫ້ອງສີ່ຄົນ, ເຊິ່ງສາມາດບັນຈຸ 500 ກວ່າຄົນ.
ທ່ານຕ້ວນເວີນຕ້າວ ຮອງເລຂາຄະນະພັກເມືອງໄປຫາຍເວົ້າວ່າ, ກຳປັ່ນທີ່ແລ່ນຢູ່ອ່າວພາກເຫນືອ ເຊິ່ງເປັນທາງນ້ຳທອງທຳທີ່ຕິດຕໍ່ຈີນກັບຫວຽດ ນາມລຳນີ້ແມ່ນປ່ອງຢ້ຽມສຳຄັນແຫ່ງຫນຶ່ງທີ່ໄປຫາຍໄປຫາອາຊຽນ,ແລະກໍ່ແມ່ນຂົວແລະສາຍພານທີ່ເພີ່ມທະວີການແລກປ່ຽນລະຫວ່າງໄປຫາຍກັບບັນດາປະເທດອາຊຽນ.ການຟື້ນຟູໃຊ້ທາງເດີນເຮືອສາຍນີ້ຈະມີບົດບາດຊຸກຍູ້ຫລາຍດ້ານຄື:ການເພີ່ມທະວີການຮ່ວມມືດ້ານການທ່ອງທ່ຽວຢູ່ເຂດອ່າວພາກເຫນືອ, ເພີ່ມທະວີການແລກປ່ຽນເສດຖະກິດ ວັດທະນະທຳແລະການທ່ອງທ່ຽວລະຫວ່າງອາຊຽນກັບຈີນກໍ່ຄືຫວຽດນາມກັບຈີນ, ດຶງດູດຄົນຍິ່ງຫລາຍໄປທ່ຽວເມືອງໄປຫາຍ, ເພີ່ມກຳລັງຊີວິດທາງດ້ານການທ່ອງທ່ຽວຂອງເມືອງໄປຫາຍໃຫ້ຫລາຍຂຶ້ນ, ເສີມຂະຫຍາຍສັບພະຄຸນຕ່າງໆຂອງເມືອງໄປຫາຍໃນຖານເປັນຕົວເມືອງທ່ອງທ່ຽວທີ່ມີຊື່ສຽງຢູ່ພາຍໃນປະເທດແລະຕ່າງປະເທດເປັນຕົ້ນ.
ການທ່ອງທ່ຽວແມ່ນອຸດສາຫະກຳເສົາຄ້ຳຂອງເມືອງໄປຫາຍໂດຍຕະຫລອດ, ພາບວິວທິວທັດອັນສວຍງາມແລະຮີດຄອງປະເພນີຫລາຍສີຫລາຍສັນຂອງບັນດາປະເທດອາຊຽນກໍ່ດຶງດູດຄົນນັບເປັນລ້ານໄປທ່ຽວ.
ປີ 1997,ເຂດກວາງຊີໄດ້ເປີດທາງເດີນເຮືອທ່ອງທ່ຽວຈາກເມືອງໄປຫາຍຮອດອ່າວຮ່າລອງຂອງຫວຽດນາມ,ປັດຈຸບັນ, ທາງເດີນເຮືອເສັ້ນນີ້ໄດ້ກາຍເປັນເສັ້ນທາງທ່ອງທ່ຽວທອງຄຳທີ່ໄດ້ຮັບຄວາມນິຍົມຊົມຊອບຈາກແຂກທ່ອງທ່ຽວ,ໄດ້ຮັບຄວາມຮັກແພງຈາກວິສາຫະກິດທ່ອງທ່ຽວແລະໄດ້ຮັບຄວາມສົນໃຈຈາກວົງການຕ່າງໆຂອງສັງຄົມ,ໄດ້ເສີມຂະຫຍາຍບົດບາດຊຸກຍູ້ກວາງຊີພັດທະນາການທ່ອງທ່ຽວ,ຊຸກຍູ້ການຮ່ວມມືດ້ານເສດຖະກິດການຄ້າແລະການທ່ອງທ່ຽວລະຫວ່າງຈີນກັບຫວຽດນາມ.ທາງເດີນເຮືອເສັ້ນນີ້ທຳອິດແມ່ນອາທິດລະຖ້ຽວແລ້ວຄ່ອຍໆຂະຫຍາຍເປັນອາທິດລະສອງຖ້ຽວ,ສາມມື້ສອງຖ້ຽວ,ຈົນຮອດບາມື້ຖ້ຽວຫນຶ່ງ, ແຂກທ່ອງທ່ຽວກໍ່ຈາກຄົນຢູ່ເຂດອ້ອມແອ້ມເມືອງໄປຮາຍຂະຫຍາຍເປັນຄົນຢູ່ເຂດແຂວງອ້ອມແອ້ມກວາງຊີຈົນຮອດທົ່ວປະເທດຈີນ.
ທ່ານໂຈ່ວນິງ ຜູ່ອຳນວຍການໃຫຍ່ບໍລິສັດກຳປັ່ນຫລູຫລາຮົງກົງຈຳກັດທີ່ຮັບຜິດຊອບຫນ້າທີ່ເດີນເຮືອລຳນີ້ບອກນັກຂ່າວວ່າ,ມູນເຫດທີ່ພວກເຂົາເຈົ້າໃຊ້ເງິນກ້ອນໃຫຍ່ນຳເຂົ້າກຳປັ່ນຫລູຫລາຈາກແອສປາຍລຳນີ້,ກໍ່ແມ່ນຍ້ອນໄດ້ເຫັນໄປໃນແງ່ດີຕໍ່ການພົວພັນທີ່ນັບມື້ນັບແຫນ້ນແຟ້ນຂຶ້ນລະຫວ່າງຈີນກັບບັນດາປະເທດອາຊຽນ,ຊັບພະຍາກອນທ່ອງທ່ຽວທີ່ອຸດົມສົມບູນຈະເຮັດໃຫ້ການບຸກເບີກທາງເດີນເຮືອມີອະນາຄົດອັນກວ້າງຂວາງ.
|
