ຕາມຂ່າວCRI: ວັນທີ 28 ມີນາ ການເລືອກຕັ້ງລັດຖະສະພາຂອງອິສຣາແອນໄດ້ເລີ່ມຈັດຂຶ້ນຢ່າງເປັນທາງການ, ຜູ່ມີສິດເລືອກຕັ້ງຂອງອິສຣາແອນຈະປ່ອນບັດເລືອກຕັ້ງລັດຖະສະພາຊຸດໃໝ່, ນາຍົກລັດຖະມົນຕີຜູ່ໃໝ່ແລະຄະນະລັດຖະບານຊຸດໃໝ່ຂອງອິສຣາແອນກໍ່ກຳເນີດເກີດຂຶ້ນຕາມຜົນການເລືອກຕັ້ງທົ່ວໄປ.
31 ພັກຝ່າຍເຊິ່ງລວມທັງສາມພັກການເມືອງໃຫຍ່ ຄື ພັກຄາດີມາ ພັກກຳມະກອນແລະກຸ່ມລີຄຸດໄດ້ເຂົ້າຮ່ວມການເລືອກຕັ້ງທົ່ວໄປເທື່ອນີ້, ພວກກເຂົາເຈົ້າຈະແຂ່ງຂັນຍາດເອົາທີ່ນັ່ງລັດຖະສະພາ 120 ທີ່ນັ່ງ. ອີງຕາມກົດໝາຍອິສຣາແອນ, ພັກການເມືອງທີ່ໄດ້ຮັບທີ່ນັ່ງຫຼາຍກວ່າໝູ່ໃນການເລືອກຕັ້ງລັດຖະສະພາຈະຮັບຜິດຊອບປະກອບລັດຖະບານ, ຜູ່ນຳຂອງພັກດັ່ງກ່າວຈະດຳລົງຕຳແໜ່ງນາຍົກລັດຖະມົນຕີຂອງລັດຖະບານ.
ການປ່ອນບັດໄດ້ເລີ່ມດຳເນີນແຕ່ 7 ໂມງເຊົ້າວັນທີ 28 ມີນາ, ແລະຈະສິ້ນສຸດລົງໃນເວລາ 22 ໂມງມື້ດຽວກັນ. ເພື່ອຮັບປະກັນໃຫ້ການເລືອກຕັ້ງທົ່ວໄປດຳເນີນໄປຢ່າງສະດວກ, ພາກສ່ວນຮັກສາຄວາມປອດໄພຂອງອິສຣາແອນໄດ້ເພີ່ມທະວີການປ້ອງກັນຄວາມປອດໄພ.
|