|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ໃນລາຍການພາກນີ້, ພວກເຮົາຈະເລັງສາຍຕາໃສ່ກິລາຫັດກາຍຢູ່ເຂດຄຸ້ມເຮືອນຢູ່ໃນຕົວເມືອງ ເຊິ່ງແມ່ນດ້ານສຳຄັນຂອງການຫັດກາຍທົ່ວປວງຊົນຈີນ.
ຕອນເຊົ້າທຸກມື້, ໃນທ່າມກາງສຽງດົນຕີໄດ້ດັງຂຶ້ນ, ຢູ່ບ່ອນເປົ່າຫວ່າງບໍ່ກວ້າງປານໃດໃນເຂດຄຸ້ມໜົງກວ່າງຕົງລີປັກກິ່ງ, ກໍຈະມີຫຼາຍສິບຄົນມາຫັດກາຍນຳກັນຢູ່ບ່ອນນີ້, ບາງຄົນຫຼິ້ນດາບ, ບາງຄົນຫຼິ້ນດ້ວຍມືເປົ່າ--ພວກເຂົາເຈົ້າບໍ່ແມ່ນຝຶກກັ່ງຟູ່, ຫາກແມ່ນເພື່ອຫັດກາຍໃຫ້ແຂງແຮງ ຮັກສາສຸຂະພາບໃຫ້ຢູ່ໃນສະພາບດີງາມທໍ່ນັ້ນ. ການຫຼິ້ນກິລາເບົາໆທີ່ຄ້າຍຄືກັນກັບການຫັດກາຍບໍລິຫານຕາມວິທະຍຸປະເພດນີ້ ຖືກພວກເຂົາເຈົ້າເອີ້ນເປັນກິລາ "ດາບໄທເກັກ".
ນາງລິວຊິ້ວມິງ ຄູບຳນານແມ່ນຜູ່ລິເລີ່ມຫັດກາຍບໍລິຫານດ້ວຍ "ດາບໄທເກັກ" ຢູ່ເຂດຄຸ້ມໜົງກວ່າງຕົງລີ, ເຮືອນຂອງນາງລິວຊິ້ງມິງກໍ່ຢູ່ເຂດຄຸ້ມນີ້, ນາງເປັນເຈົ້າການສອນວິຊາຫຼິ້ນດາບໄທເກັກໃຫ້ແກ່ເພື່ອນບ້ານໂດຍບໍ່ເກັບຄ່າ. ເມື່ອໄດ້ສິດສອນມາເປັນເວລາຫຼາຍປີ, ດຽວນີ້ ສະມາຊິກທີມຫຼິ້ນດາບໄທເກັກນີ້ໄດ້ເພີ່ມຂຶ້ນຮອດປະມານ 80 ຄົນແລ້ວ. ເວລາກ່າວເຖິງການເຕີບໃຫຍ່ຂະຫຍາຍຕົວຂອງທີມຫຼິ້ນດາບໄທເກັກ, ນາງລິວຊິ້ວມິງທີ່ຖືກຄົນທັງຫຼາຍເອີ້ນເປັນ "ຄູຝຶກໃຫຍ່" ໄດ້ເວົ້າຢ່າງພາກພູມໃຈວ່າ: ຄົນທັງຫຼາຍມີຄວາມຫ້າວຫັນຫຼາຍ. ຜູ່ເຂົ້າຮ່ວມການຫຼິ້ນດາບນັ້ນ, ອາຍຸຊ່ຳໃດກໍ່ມີ, ມີອາຍຸ 70 ເຖິງ 80 ປີ, ຜູ່ໜຸ່ມມີອາຍຸພຽງ 20 ກວ່າປີ, ເຂົາເຈົ້າມາຫຼິ້ນດາບໄທເກັກຢູ່ນີ້. ເມື່ອໄດ້ຫຼິ້ນມາເປັນເວລາ 7 ປີແລ້ວ, ຮູ້ສຶກວ່າສຸຂະພາບໄດ້ແຂງແຮງຫຼາຍ.
ທ່ານຫວາງໂປຮວາເປັນຫົວໜ້າທີມ ຮັບຜິດຊອບຈັດຕັ້ງການຫຼິ້ນດາບໄທເກັກ, ທ່ານກ່າວວ່າ, ໃນທີມຫຼິ້ນດາບໄທເກັກນີ້, ຄົນເຖົ້າແກ່ຊະລາຫຼາຍຄົນສຸຂະພາບບໍ່ດີໃນເມື່ອກ່ອນ, ບາງຄົນຄວາມດັນເລືອດສູງ, ບາງຄົນຍາມກາງຄືນນອນບໍ່ຫຼັບ. ເມື່ອໄດ້ຫັດຫຼິ້ນດາບໄທເກັກແລ້ວ, ດຽວນີ້ບໍ່ພຽງແຕ່ສຸຂະພາບດີ, ຈິດໃຈກໍ່ເບີກບານ. ທ່ານຫວາງໂປຮວາເວົ້າວ່າ: ເມື່ອໄດ້ຫຼິ້ນດາບໄທເກັກມາເປັນເວລາ 7-8 ປີ, ດຽວນີ້ ພວກເຂົາເຈົ້າສຸຂະພາບດີຂຶ້ນ ກິນອາຫານແຊບ ນອບກໍຫຼັບດີ, ຜູ່ເປັນພະຍາດຄວາມດັນເລືອດສູງໃນເມື່ອກ່ອນ ດຽວນີ້ບາງຄົນບໍ່ຕ້ອງກິນຢາອີກແລ້ວ. ຄົນທັງຫຼາຍຮູ້ສຶກວ່າໄດ້ຜົນແທ້ໆ.
ນອກຈາກຫຼິ້ນດາບໄທເກັກແລ້ວ, ໄທເມືອງຢູ່ເຂດຄຸ້ມໜົງກວ່າງຕົງລີຍັງມັກຫຼິ້ນກິລາອື່ນໆ ເຊັ່ນ ເຕະໝາກເຕະ ຟ້ອນຢັ່ງເກີແລະຕີປິ່ງປ່ອງເປັນຕົ້ນ. ລາຍການກິລາອຸດົມສົມບູນທີ່ສຸດ, ຄົນທັງຫຼາຍມີສຸຂະພາບແຂງແຮງ ຈິດໃຈຫັນຫ້າວ. ນາງເຈຍຈິ້ນນິງ ພະນັກງານເຂດຄຸ້ມເຮືອນຢູ່ໜົງກວ່າງຕົງລີທີ່ຮັບຜິດຊອບລາຍການວັດທະນະທຳແລະການກິລາເຫັນວ່າ, ສິລະປະວັນນະຄະດີແລະການກິລາໄດ້ດຶງດູດຄວາມສົນໃຈຂອງຄົນທັງຫຼາຍ, ເຮັດໃຫ້ພວກເຂົາເຈົ້າຫ່າງເຫີນອອກຈາກການເຄື່ອນໄຫວທີ່ບໍ່ຈົມບໍ່ງາມ ຄື ການພະນັນເປັນຕົ້ນ, ຍັງມີບົດບາດສາມັກຄີຄົນທັງຫຼາຍອີກດ້ວຍ. ນາງເຈຍຈິ້ນນິງເວົ້າວ່າ: ຂ້າພະເຈົ້າເຫັນວ່າລາຍການສິລະປະແລະລາຍການກິລາຍັງມີຜົນດີອີກອັນໜຶ່ງ ນັ້ນກໍ່ຄື ຄົນທັງຫຼາຍຫຼິ້ນຢູ່ນຳກັນ, ເມື່ອຜູ່ໃດມີຄວາມຫຍຸ້ຍາກແລ້ວ, ຄົນອື່ນກໍ່ຊ່ອຍແກ້ໄຂໃຫ້ຕົກໄດ້, ສະນັ້ນ ລາຍການສິລະປະແລະລາຍການກິລາມີບົດບາດຫຼາຍສົມຄວນຕໍ່ຄວາມສາມັກຄີໃນເຂດຄຸ້ມ.
ການຫຼິ້ນກິລາຫັດກາຍຢູ່ເຂດຄຸ້ມໜົງກວ່າງຕົງລີໄດ້ດຳເນີນມາຢ່າງຟົດຟື້ນທີ່ສຸດ, ແຕ່ກໍ່ຖືກຈຳກັດຍ້ອນສະໜາມແລະອຸປະກອນກິລາເປັນຕົ້ນ. ນາງລິວຊິ້ວມິງ ຄູຝຶກດາບໄທເກັກກ່າວວ່າ, ພວກຂ້າພະເຈົ້າເຫັນວ່າບ່ອນເປົ່າຫວ່າງແຄບໂພດ ຈົນວ່າຫຼິ້ນດາບບໍ່ສະດວກ, ຫວັງໃຫ້ທາງລັດລົງທຶນຫຼາຍກວ່າເກົ່າ, ເອົາໃຈໃສ່ຫຼາຍກວ່າເກົ່າອີກ.
ທີ່ຈິງແລ້ວ, ຄວາມດີໃຈແລະອຸກໃຈຂອງມວນຊົນໃນເຂດຄຸ້ມໜົງກວ່າງຕົງລີ ເປັນສະພາບຫຍໍ້ຂອງເຂດຄຸ້ມເຮືອນຢູ່ແຫ່ງອື່ນໆຂອງປັກກິ່ງ. ຂໍ້ຂັດແຍ່ງລະຫວ່າງຄວາມຫ້າວຫັນອອກກຳລັງກາຍຂອງໄທເມືອງກັບການຂາດເຂີນສະໜາມແລະອຸປະກອນອອກກຳລັງກາຍ, ກໍ່ແມ່ນໜຶ່ງໃນບັນຫາຈຸດໜັກທີ່ອົງການປົກຄອງນະຄອນປັກກິ່ງຈະແກ້ໄຂເພື່ອມວນຊົນ. "ກົດຂໍ້ກຳນົດການຫັດກາຍທົ່ວປວງຊົນນະຄອນປັກກິ່ງ" ທີ່ເລີ່ມມີຜົນບັງຄັບໃຊ້ແຕ່ວັນທີ 1 ມີນາປີນີ້ເປັນຕົ້ນໄປ, ໄດ້ສະໜອງຂອບການປົກຄອງດ້ວຍກົດໝາຍໃຫ້ແກ່ການຫັດກາຍທົ່ວປວງຊົນ. ຄຽງຄູ່ກັບວຽກງານກະກຽມງານກິລາໂອລິມປິກປັກກິ່ງປີ 2008 ໄດ້ດຳເນີນໄປຢ່າງສະດວກ, ເຊື່ອວ່າສິ່ງກໍ່ສ້າງກິລາຢູ່ເຂດຄຸ້ມເຮືອນຢູ່ໃນນະຄອນປັກກິ່ງກໍ່ຈະໄດ້ຮັບການປົວແປງໃຫ້ດີຂຶ້ນຢ່າງຈະແຈ້ງ.
|
