ສະບາຍດີທ່ານຜູ່ຟັງທີ່ໂຄລົບ, ໃນຫຼາຍປີມໍ່ໆມານີ້, ຄຽງຄູ່ກັບເສດຖະກິດຈີນໄດ້ພັດທະນາຢ່າງສືບເນື່ອງແລະໝັ້ນທ່ຽງ, ປີໃດກໍ່ມີວິສາຫະກິດໃໝ່ຕັ້ງຂຶ້ນເປັນຈຳນວນຫຼວງຫຼາຍ, ໃນນັ້ນ ມີວິສາຫະກິດງວດໜຶ່ງທີ່ເຕີບໂຕໄວແລະຈະໄດ້ຜົນກຳໄລດີໃນອະນາຄົດແລະມີອະນາຄົດກວາງໄກແຫ່ງການພັດທະນານັ້ນ ໄດ້ຮັບຄວາມຊົມຊອບຈາກອົງການລົງທຶນແບບສ່ຽງຂອງຈີນແລະຕ່າງປະເທດ, ຕົວຢ່າງຄື ບໍລິສັດເຄືອຂ່າຍໄປຕູ້ ເຊິ່ງເປັນເຄືອຂ່າຍຊ່ອຍຊອກທາງພາສາຈີນທີ່ມີຊື່ສຽງດົ່ງດັງ ແລະບໍລິສັດເອເລັກໂຕຼນິກຈົ່ງຊິ່ງທີ່ຄົ້ນຄວ້າແຜ່ນຊິບ ສາລະພັດສື່ດີຈີຕອນເປັນຕົ້ນລ້ວນແຕ່ໄດ້ທຶນຈາກຜູ່ລົງທຶນແບບສ່ຽງຂອງຈີນແລະຕ່າງປະເທດ. ໃນລາຍການແຈ້ງຂ່າວເສດຖະກິດຈີນພາກນີ້, ພວກເຮົາຈະສະເໜີສະພາບການຜູ່ລົງທຶນແບບສ່ຽງຂອງຈີນແລະຕ່າງປະເທດລົງທຶນໃນວິສາຫະກິດເຕີບໂຕໄວຂອງຈີນ.
ເຂດວິທະຍາສາດເຕັກໂນໂລຢີຈົ່ງກ່ວນຊຸນປັກກິ່ງແມ່ນສູນປະດິດສ້າງວິທະຍາສາດເຕັກໂນໂລຢີທີ່ສຳຄັນກວ່າໝູ່ຂອງຈີນ. ປັດຈຸບັນ, ຢູ່ເຂດຈົ່ງກ່ວນຊຸນມີວິສາຫະກິດ 1 ໝື່ນ 7000 ແຫ່ງ, ໃນນັ້ນ ສ່ວນຫຼາຍຢູ່ໃນໄລຍະປະດິດສ້າງຂັ້ນຕົ້ນຫຼືຢູ່ໃນໄລຍະເຕີບໂຕ. ໃນວິສາຫະກິດເຕີບໂຕໄວກວ່າໝູ່ 50 ແຫ່ງຂອງຂະແໜງການວິທະຍາສາດເຕັກໂນໂລຢີແຜ່ນດິນໃຫຍ່ຈີນ, ມີ 40% ຂຶ້ນໄປແມ່ນຢູ່ໃນເຂດວິທະຍາສາດເຕັກໂນໂລຢີຈົ່ງກ່ວນຊຸນ.
ໃນເວລາໃຫ້ສຳພາດຕໍ່ນັກຂ່າວ, ທ່ານໂກຫົງ ຮອງປະທານຄະນະກຳມະການຄຸ້ມຄອງເຂດວິທະຍາສາດເຕັກໂນໂລຢີຈົ່ງກ່ວນຊຸນກ່າວວ່າ, ໃນ 2 ປີຜ່ານມາ, ເຂດນີ້ມີວິສາຫະກິດຕັ້ງຂຶ້ນໃໝ່ 4000 ແຫ່ງຕໍ່ປີ, ໃນນັ້ນ ວິສາຫະກິດລາຍຮັບຈາກການຈຳໜ່າຍລື່ນກາຍ 100 ລ້ານຢວນທີ່ເພີ່ມຂຶ້ນໃໝ່ນັ້ນ ມີເຖິງ 100 ແຫ່ງສະເລ່ຍຕໍ່ປີ, ວິສາຫະກິດລາຍຮັບຈາກການຈຳໜ່າຍລື່ນກາຍ 100 ລ້ານຢວນນັ້ນ ມີປະມານ 600 ແຫ່ງ, ຜົນງານທຸລະກິດຂອງວິສາຫະກິດເຕີບໂຕໄວໄດ້ເພີ່ມຂຶ້ນຢ່າງວ່ອງໄວ, ນີ້ໄດ້ດຶງດູດອົງການລົງທຶນແບບສ່ຽງຂອງຕ່າງປະເທດມາລົງທຶນ. ທ່ານໂກຫົງເວົ້າຕໍ່ນັກຂ່າວວ່າ: ຕົວເລກໃນບົດລາຍງານກ່ຽວກັບການລົງທຶນຕັ້ງວິສາຫະກິດໃໝ່ຂອງຈີນໄດ້ສະແດງໃຫ້ເຫັນວ່າ, ປີກາຍນີ້, ປັກກິ່ງມີວິສາຫະກິດ 72 ແຫ່ງໄດ້ດຶງດູດທຶນຕັ້ງວິສາຫະກິດຈາກຕ່າງປະເທດ 378 ລ້ານໂດລາສະຫະລັດ, ຄອງອັນດັບໜຶ່ງຂອງຈີນ.
ໃນຫຼາຍປີມໍ່ໆມານີ້, ອິນເຕີເນັດ ໂທລະຄົມເຄື່ອນທີ່ແລະຊອຟແວຂອງຈີນໄດ້ມີການພັດທະນາຢ່າງວ່ອງໄວ, ໃນນັ້ນວິສາຫະກິດເຕີບໂຕໄວທີ່ປະກົດຕົວຢ່າງຫຼວງຫຼາຍນັ້ນໄດ້ດຶງດູດສາຍຕາຂອງອົງການລົງທຶນແບບສ່ຽງຂອງຕ່າງປະເທດ, ກາຍເປັນຈຸດໜັກການລົງທຶນຂອງພວກເຂົາເຈົ້າ. ໂດຍໄດ້ມອງເຫັນອະນາຄົດອັນດີງາມທີ່ຈະໄດ້ຮັບການຕອບແທນອັນມະຫາສານ, ອົງການລົງທຶນແບບສ່ຽງຂອງຕ່າງປະເທດໄດ້ພາກັນເຂົ້າສູ່ຕະຫຼາດຈີນ, ສະແຫວງຫາວິສາຫະກິດທີ່ມີຄວາມສາມາດບົ່ມຊ້ອນໃນການພັດທະນາ.
ກຸ່ມຕົວເລກສາກົນອາເມລິກາຫຼື IDG ແມ່ນອົງການລົງທຶນແບບສ່ຽງສາກົນທີ່ເຂົ້າຕະ ຫຼາດຈີນກ່ອນໝູ່. ຕັ້ງແຕ່ເຂົ້າສູ່ຕະຫຼາດຈີນເມື່ອປີ 1992 ເປັນຕົ້ນມາ, ບໍລິສັດດັ່ງກ່າວໄດ້ລົງທຶນໃສ່ວິສາຫະກິດຈີນ 150 ກວ່າແຫ່ງ, ຕົ້ນຕໍລົງທຶນໃນຂົງເຂດເຕັກໂນໂລຢີຂໍ້ມູນຂ່າວສານທີ່ເຕີບໂຕໄວ. ທ່ານລີຈ້ຽນກວ່າງ ຮອງປະທານມູນນິທິລົງທຶນປະດິດສ້າງເຕັກໂນໂລຢີຂອງກຸ່ມ IDG ເວົ້າຕໍ່ນັກຂ່າວວ່າ: ຂົງເຂດລົງທຶນຂອງພວກຂ້າພະເຈົ້າຕົ້ນຕໍແມ່ນຂົງເຂດ IT. ຂົງເຂດທີໜຶ່ງແມ່ນອິນເຕີເນັດ. ຂົງເຂດທີສອງແມ່ນທຸລະການທີ່ມີມູນຄ່າເພີ່ມໃນເຄືອຂ່າຍໂທລະຄົມເຄື່ອນທີ່. ຂົງເຂດທີສາມແມ່ນຊອຟແວ. ຂົງເຂດທີສີ່ແມ່ນການບໍລິການແລະເຕັກໂນໂລຢີດ້ານໂທລະຄົມ. ແຕ່ກ່ອນ ກອງທຶນພວກຂ້າພະເຈົ້າມີ 90% ຂຶ້ນໄປໄດ້ລົງທຶນໃນ 4 ຂົງເຂດດັ່ງກ່າວ.
ທ່ານລີຈ້ຽນກວ່າງກ່າວວ່າ, ການລົງທຶນແບບສ່ຽງຢູ່ຈີນ ອັດຕາຄ່າຕອບແທນສູງເຖິງ 40%, ສູງກວ່າການລົງທຶນຂອງກຸ່ມ IDG ຢູ່ອາເມລິກາຫຼາຍເຕີບ. ໃນ 3-4 ປີຂ້າງໜ້າ, ກຸ່ມ IDG ຍັງຈະລົງທຶນຢູ່ຈີນ 500 ລ້ານຮອດ 600 ລ້ານໂດລາສະຫະລັດອີກ.
ປັດຈຸບັນ ອົງການລົງທຶນແບບສ່ຽງສາກົນທີ່ດຳເນີນທຸລະກິດຢູ່ຈີນມີປະມານ 30 ກວ່າແຫ່ງ, ກຸ່ມວີຮາເປີ ຊອຟແບງຍີ່ປຸ່ນແລະກຸ່ມໂກນດ໌ແມນຊາສ໌ກໍ່ມີທຸລະກິດອ່າວຄຶກຄັກ. ພວກເຂົາເຈົ້າເຄື່ອນໄຫວຢູ່ເຂດເສດຖະກິດອ່າວຄຶກຄັກແລະເຂດວິທະຍາສາດເຕັກໂນໂລຢີຂອງຈີນ, ລົງທຶນແລະເອົາໃຈໃສ່ໂຄງການທີ່ມີອະນາຄົດການພັດທະນາດີ. ຈີນໄດ້ກາຍເປັນປະເທດທີ່ອົງການລົງທຶນແບບສ່ຽງສາກົນເຫີ່ກັນມາລົງທຶນແລ້ວ.
ວິສາຫະກິດເຕີບໂຕໄວຂອງຈີນບໍ່ພຽງແຕ່ໄດ້ດຶງດູດການລົງທຶນແບບສ່ຽງຈາກຕ່າງປະເທດທໍ່ນັ້ນ, ຍັງມີກຳລັງແຮງອັນມະຫາສານທີ່ດຶງດູດຜູ່ລົງທຶນແບບສ່ຽງຂອງຈີນອີກດ້ວຍ. ບໍລິສັດອິນໂຟເທັກສ໌ລົງທຶນຕັ້ງວິສາຫະກິດຈຳກັດແມ່ນບໍລິສັດລົງທຶນແບບສ່ຽງແຫ່ງໜຶ່ງຂອງຈີນທີ່ສ້າງຕັ້ງຂຶ້ນເມື່ອປີ 2000, ລົງທຶນສະເພາະແຕ່ຂົງເຂດຂໍ້ມູນຂ່າວສານເຕັກໂນໂລຢີ ເຊັ່ນ ວົງຈອນໄຟຟ້າ IC ຊອຟແວ ຊີກສ່ວນແລະອາໄຫຼ່ເປັນຕົ້ນ. ໃນເວລາໃຫ້ສຳພາດຕໍ່ນັກຂ່າວ, ທ່ານໂຈ່ວ ນິງ ຮອງຜູ່ອຳນວຍການໃຫຍ່ບໍລິສັດດັ່ງກ່າວເວົ້າວ່າ: ທາງບໍລິສັດໄດ້ລົງທຶນເຂົ້າໃນບາງໂຄງການແລ້ວ, ໃນນັ້ນມີໂຄງການໜຶ່ງໄດ້ເຂົ້າຕະຫຼາດຫຼັກຊັບນາສ໌ດາກຢ່າງສຳເລັດຜົນໃນປີກາຍ, ໂຄງການນັ້ນແມ່ນບໍລິສັດອອກແບບແຜ່ນຊິບ, ບໍລິສັດນີ້ແມ່ນບໍລິສັດອອກແບບແຜ່ນຊິບຈີນແຫ່ງທຳອິດທີ່ເຂົ້າຕະຫຼາດຫຼັກຊັບນາສ໌ດາກ.
ບໍລິສັດແຜ່ນຊິບທີ່ບໍລິສັດອິນໂຟເທັກລົງທຶນຕັ້ງຂຶ້ນນັ້ນ ກໍແມ່ນບໍລິສັດເອເລັກໂຕຼນິກຈົ່ງຊິ່ງທີ່ເຂົ້າຕະຫຼາດຫຼັກຊັບນາສ໌ດາກອາເມລິກາໃນທ້າຍປີກາຍ, ແຜ່ນຊິບສາລະພັດສື່ດີຈີຕອນທີ່ບໍລິສັດດັ່ງກ່າວຄົ້ນຄວ້າຜະລິດນັ້ນ ໄດ້ຮັບລາງວັນວິທະຍາສາດເຕັກໂນໂລຢີກ້າວໜ້າລະດັບຊາດຊັ້ນທີໜຶ່ງຂອງຈີນໃນປີ 2004, ແມ່ນບໍລິສັດຕົວແທນຂອງວິສາຫະກິດເຕີບໂຕໄວຂອງຈີນ. ຕັ້ງແຕ່ສ້າງຕັ້ງຂຶ້ນເມື່ອປີ 1999 ເປັນຕົ້ນມາ, ຜະລິດຕະພັນຂອງບໍລິສັດດັ່ງກ່າວໄດ້ກວມໂກຕາໃນຕະຫຼາດໂລກ 70% ຂຶ້ນໄປ.
ປັດຈຸບັນ, ອົງການລົງທຶນແບບສ່ຽງຂອງຈີນແລະຕ່າງປະເທດພວມຕັ້ງໜ້າຊອກໂອກາດລົງທຶນຢູ່ນອກຂົງເຂດເຕັກໂນໂລຢີຂໍ້ມູນຂ່າວສານ, ແລະພາກັນປັບປຸງຍຸດໂທບາຍແລະທ່າອ່ຽງຂອງການລົງທຶນ. ຕົວຢ່າງຄື ກຸ່ມ IDG ນອກຈາກສືບຕໍ່ລົງທຶນໃນຂະແໜງການເຕັກໂນໂລຢີຂໍ້ມູນຂ່າວສານແລ້ວ, ໃນ 2 ປີມານີ້ ຍັງໄດ້ຂະຫຍາຍຂອບເຂດລົງທຶນໄປຮອດຂະແໜງການລື້ນເລີງເປັນຕົ້ນ, ສ່ວນບໍລິສັດລົງທຶນອິນໂຟເທັກກໍ່ເລີ່ມໃສ່ໃຈນຳໂຄງການຈຳນວນໜຶ່ງໃນຂົງເຂດພະລັງງານໃໝ່ ອຸປະກອນໃໝ່ແລະຢຸກຢາຊີວະພາບເປັນຕົ້ນ.
ໃນຂະນະທີ່ຜູ່ລົງທຶນແບບສ່ຽງຊົມຊອບວິສາຫະກິດຈີນນັ້ນ, ເຂດອຸດສາຫະກຳໄຮເທັກຈີນຫຼາຍແຫ່ງກໍ່ພວມພະຍາຍາມດຶງດູດການລົງທຶນແບບສ່ຽງໃຫ້ໄດ້ຫຼາຍກວ່າເກົ່າ. ກໍ່ຄືກັນກັບເຂດວິທະຍາສາດເຕັກໂນໂລຢີຈົ່ງກ່ວນຊຸນປັກກິ່ງ, ເຂດວິທະຍາສາດໄຮເທັກຊຽງໄຮ້ກໍ່ພວມຄົ້ນຄວ້າແລະຊອກຫາຊ່ອງທາງລົງທຶນແບບສ່ຽງໃນການສ້າງສາພັດທະນາ, ເພີ່ມທັດສະນະຄະຕິລົງທຶນແບບສ່ຽງ, ສ້າງສະພາບແວດລ້ອມໃຫ້ການລົງທຶນແບບສ່ຽງ. ນອກຈາກຕັ້ງໜ້າດຶງດູດການ ລົງທຶນແບບສ່ຽງແລ້ວ, ຊຽງໄຮ້ແລະປັກກິ່ງຍັງຕັ້ງໜ້າດຶງດູດມູນນິທິປະດິດສ້າງວິສາຫະກິດຂະໜາດກາງແລະຂະໜາດນ້ອຍແຫ່ງຊາດ ກອງທຶນປະດິດສ້າງທ້ອງຖິ່ນແລະສ້າງຕັ້ງບໍລິສັດລົງທຶນຕັ້ງວິສາຫະກິດ, ສະໜັບສະໜູນການພັດທະນາຂອງວິສາຫະກິດວິທະຍາສາດເຕັກໂນໂລຢີໃນຫຼາຍດ້ານ.
|