|
ຕາມຂ່າວCRI: ວັນທີ 10 ເມສາ ກະຊວງສາທາລະນະສຸກຈີນກ່າວວ່າ, ເມື່ອໄດ້ພະຍາຍາມມາເປັນເວລາຫຼາຍປີ, ອັດຕາການຕາຍຂອງແມ່ມານ ແມ່ຍິງອອກລູກແລະອັດຕາເປັນພະຍາດບາດທະຍັກຂອງເດັກແດງຢູ່ພາກກາງແລະພາກຕາເວັນຕົກຂອງຈີນໄດ້ຫຼຸດລົງຢ່າງຫຼວງຫຼາຍ, ລະດັບສຸຂະພາບຂອງແມ່ແລະເດັກໄດ້ຍົກສູງຂຶ້ນຢ່າງເດັ່ນຊັດ.
ເລີ່ມແຕ່ປີ 2001 ເປັນຕົ້ນມາ, ຈີນໄດ້ຈັດຕັ້ງປະຕິບັດໂຄງການຫຼຸດອັດຕາການຕາຍຂອງແມ່ມານແລະແມ່ອອກລູກ ແລະລົບລ້າງພະຍາດບາດທະຍັກຂອງເດັກແດງ, ເຈາະຈົງແນໃສ່ເຂດເສດຖະກິດຫຼ້າຫຼັງຢູ່ພາກກາງແລະພາກຕາເວັນຕົກ. ລັດຖະບານຈີນໄດ້ລົງທຶນຫຼວງຫຼາຍເຂົ້າໃນໂຄງການດັ່ງກ່າວ, ພຽງແຕ່ປີກາຍປີດຽວ ກໍ່ໄດ້ລົງທຶນ 440 ລ້ານຢວນ. ໃຕ້ການຊີ້ນຳຂອງໂຄງການ, ແມ່ມານແລະແມ່ອອກລູກຂອງຄອບຄົວທຸກຍາກຈຳນວນໜຶ່ງໄດ້ຮັບການຊ່ອຍເຫຼືອ, ຜູ່ຊ່ຽວຊານປິ່ນປົວບົວລະບັດຈຳນວນຫຼວງຫຼາຍຍັງລົງຊົນນະບົດອົບຮົມນາຍໝໍແລະພະນັກງານບົວລະບັດແມ່ແລະເດັກ.
ຕາມສະເໜີວ່າ, ປັດຈຸບັນ ໂຄງການດັ່ງກ່າວໄດ້ແຜ່ຂະຫຍາຍໄປຮອດເຂດບໍລິຫານຂັ້ນແຂວງ 23 ແຂວງຂອງຈີນແລ້ວ, ກວມເຂດພາກກາງແລະພາກຕາເວັນຕົກຂອງຈີນທີ່ເສດຖະກິດດ້ອຍພັດທະນາໝົດທຸກເຂດໂດຍພື້ນຖານ.
|
