ຕາມຂ່າວສານຊິນຮວາ: ວັນທີ 10 ເມສາ, ທ່ານຊຸຍທ່ຽນຄາຍ ຜູ່ຊ່ອຍລັດຖະມົນຕີ​ກະ​ຊວງ​ການ​ຕ່າງ​ປະ​ເທດ​ຈີນ​ທີ່​ພວມ​ນຳພາ​ຄະນະ​ຜູ່​ແທນ​ຈີນ​ເຂົ້າຮ່ວມ​ກອງ​ປະຊຸມ​ລະດັບ​ລັດ​ຖະ​ມົນຕີ​ຂອງ​ກອງ​ປະຊຸມ​ປະຈຳ​ປີ​ອົງການ​ແອ​ສ​ແຄັບສະຫະ​ປະຊາ​ຊາດຄັ້ງທີ 62 ​ທີ່​ຈັດ​ຂຶ້ນຢູ່​ທີ່​ຢາ​ກາກ​ຕານັ້ນ ​ໄດ້​ກ່າວ​ຄຳ​ປາ​ໄສ​ວ່າ, ບັນດາ​ປະ​ເທດໃນ​ພາກ​ພື້ນ​ອາຊີ​ປາຊີ​ຟິກ​ຕ້ອງ​ຖື​ໜັກ​​ບັນ​ຫາພື້ນຖານໂຄງລ່າງ​ອ່ອນ​ແອໄດ້​ທ້າ​ທາຍ​ກັບການ​ພັດທະນາ​ຂອງ​ຕົນ, ພະ​ຍາຍາມ​ເພີ່ມ​ທະວີ​ການ​ຮ່ວມ​ມື​ໃນພາກ​ພື້ນ, ພ້ອມ​ກັນ​ຊຸກ​ຍູ້​ການ​ສ້າງສາ​ພື້ນຖານໂຄງລ່າງ.

ທ່ານ​ສະ​ເໜີ​ໃຫ້​ລົງມື​ໃນ 4 ​ຂົງ​ເຂດ​ຈຸດ​ໜັກ: ໜຶ່ງ; ​ເພີ່ມ​ທະວີ​ການ​ສົນທະ​ນາ, ​ແລກ​ປ່ຽນ​ບົດຮຽນ; ສອງ ສ້າງ​ແທ່ນ​ແຫ່ງ​ການ​ຮ່ວມ​ມື​ດ້ານ​ການ​ເມືອງ​ແລະ​ວິ​ສາ​ຫະ​ກິດ; ສາມ ບຸກ​ເບີກ​ຊ່ອງ​ທາງ ​ໃຫ້​​ໄດ້ລາຍ​ຮັບ​​ເພີ່ມຂຶ້ນ; ສີ່ ​ເຮັດໃຫ້ນະ​ໂຍ​ບາຍ​ປະກອບ​ຄົບ​ຊຸດ, ຕິດ​ຕໍ່​ພົວພັນກັນ​ຢ່າງ​ສະດວກ.

​ໃນ​ເວລາ​ກ່າວ​ຄຳ​ປາ​ໄສ, ທ່ານ​ຊຸຍ​ທ່ຽນ​ຄາຍ​ຍັງ​ໄດ້​ແນະນຳ​ແຜນກຳນົດ​ພັດທະ​ນາ​ເສດ​ຖະ​ກິດ​ແຫ່ງ​ຊາດ​ແລະ​ສັງຄົມ​ໄລຍະ 5 ປີ​ຄັ້ງທີ 11 ທີ່​ຈີນ​ວາງ​ອອກ​ໃນ​ຫວ່າງ​ບໍ່​ດົນ​ນີ້; ​ແລະ​ກ່າວ​ເນັ້ນວ່າ ​ໃນ​ຂະນະ​ທີ່​ຊຸກ​ຍູ້​ການ​ພັດທະນາ​ຂອງ​ຕົນ​ເອງ, ຈີນ​ມີ​ເຈດ​ຈຳນົງ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ, ຜ່ານ​ຈາ​ກການ​ຮ່ວມ​ມື​ໃນທົ່ວ​ໂລກ​ແລະ​ພາກ​ພື້ນ, ​ໃຫ້​ປະ​ເທດ​ຕ່າງໆ​ໃນ​ໂລກ​ພັດ​ທະນາ​ແລະ​ຈະ​ເລີ​ນຮຸ່ງ​ເຮືອງ​ພ້ອມ​ກັນ.