|
ຕາມຂ່າວສານຊິນຮວາ: ເວທີປາໄສເສດຖະກິດການຄ້າລະຫວ່າງສອງຝັ່ງໄດ້ສິ້ນສຸດລົງຢ່າງໄດ້ຮັບຜົນເຕັມເມັດເຕັມໜ່ວຍ, ຝ່າຍແຜ່ນດິນໃຫຍ່ໄດ້ປະກາດນະໂຍບາຍແລະມາດຕະການ 15 ລາຍເພື່ອຊຸກຍູ້ການຮ່ວມມືແລະການແລກປ່ຽນລະຫວ່າງສອງຝັ່ງ ແລະໃຫ້ພີ່ນ້ອງຮ່ວມຊາດໄຕ້ຫວັນໄດ້ຮັບຜົນປະໂຫຍດ. ທັງນີ້ໄດ້ພາໃຫ້ມີປະຕິກິລິຍາຢ່າງໃຫຍ່ພາຍໃນເກາະໄຕ້ຫວັນ, ວົງການຕ່າງໆໃນສັງຄົມລ້ວນແຕ່ໄດ້ຕີລາຄາສູງ.
ໃນເວລາໃຫ້ສຳພາດຕໍ່ສື່ມວນຊົນ, ທ່ານມາອິງຈິວ ປະທານພັກກົກມິນຕັງຈີນກ່າວວ່າ, ເວທີປາໄສເສດຖະກິດການຄ້າລະຫວ່າງສອງຝັ່ງໄດ້ດຶງດູດນັກທຸລະກິດໄຕ້ຫວັນຫຼວງຫຼາຍມາເຂົ້າຮ່ວມ, ແມ່ນ "ທ່ວງທ່າຂະຫຍາຍຕົວໃຫຍ່ ແລະຖືກໃຈຄົນ".
ທ່ານຈ່າງສຽນຢ້າວ ຫົວໜ້າສູນຄົ້ນຄວ້ານະໂຍບາຍຂອງພັກຊິ່ນມິນກ່າວວ່າ, ຝ່າຍແຜ່ນດິນໃຫຍ່ປະກາດມາດຕະການ 15 ລາຍນັ້ນມີເຈດຕະນາດີ ແລະມີຜົນປະໂຫຍດຫຼາຍຕໍ່ໄຕ້ຫວັນ, ໄດ້ສະແດງໃຫ້ເຫັນການເຮັດແທ້ທຳຈິງຂອງຝ່າຍແຜ່ນດິນໃຫຍ່. ຈາກນີ້ສາມາດຄາດຄະເນວ່າ, ການແລກປ່ຽນແລະການໄປມາຫາສູ່ກັນລະຫວ່າງສອງຝັ່ງຈະມີການບຸກທະລຸແລະຄວາມຄືບໜ້າຫຼາຍກວ່າເກົ່າ.
|
