|
|
 |
| (GMT+08:00)
2006-04-17 17:40:42
|
 |
|
ພະຍາຍາມຮັບຜິດຊອບຕໍ່ໂຊກຊະຕາຂອງຕົນ(ສຽງ)
cri
Author: min
|
ມີນັກວິທະຍາສາດຜູ້ໜຶ່ງເຄີຍສະເໜີຫຼັກສູດໄປສູ່ຄວາມສຳເລັດຜົນດັ່ງນີ້ວ່າ: ຜົນສຳເລັດເທົ່າກັບພອນສະຫວັນບວກຄວາມດຸໝັ່ນບວກກາລະໂອກາດ, ສາມຢ່າງນີ້ຂາດອັນໃດກໍ່ບໍ່ໄດ້, ແລະໃນສາມຢ່າງນີ້, ກຳຍາກທີ່ສຸດແມ່ນໂອກາດ, ໂອກາດນັ້ນ, ອາດຈະພົບພໍ້ຢ່າງບັງເອີນ, ແຕ່ຢ່າຫວັງຈະຊອກພົບໄດ້ໃນເວລາແຫວງຫາ. ແຕ່ພ້ອມນີ້, ຄຳບູຮານຈີນກໍເວົ້າວ່າ: ໂລກນີ້ບໍ່ມີເລື່ອງຍາກສຳລັບຄົນຕັ້ງໃຈ, ວ່າແຕ່ຕັ້ງອົກຕັ້ງໃຈ, ເລື່ອງຫຍັງກໍເປັນໄປໄດ້.
ກ່ອນອື່ນ, ພວກເຮົາຈະເລົ່າເລື່ອງໜຶ່ງສູ່ຟັງ.
ແຕ່ກ່ອນ ເຄີຍມີນັກແຕ້ມຜູ້ໜຸ່ມນ້ອຍຜູ້ໜຶ່ງ, ມີພູມປັນຍາພົ້ນເດັ່ນ, ແຕ່ໃນເວລາທຳມາຫາກິນຢູ່ເມືອງປາຣີນັ້ນ, ເຂົາບໍ່ມີຊື່ສຽງ, ທັງທຸກຍາກທີ່ສຸດ. ຮູບແຕ້ມຂອງເຂົາຂາຍບໍ່ອອກຈັກແຜ່ນ, ຍ້ອນວ່າ, ຮ້ານຂາຍຮູບແຕ້ມຢູ່ປາຣີຂາຍແຕ່ຮູບແຕ້ມຂອງນັກແຕ້ມທີ່ມີຊື່ສຽງ, ນັກແຕ້ມໜຸ່ມແມ່ນບໍ່ມີໂອກາດເອົາຮູບແຕ້ມຂອງຕົນໄປຂາຍຢູ່ໃນຮ້ານເຫຼົ່ານີ້ເລີຍ.
ຜົນສຳເລັດບາງທີເບິ່ງຄືວ່າຢູ່ຕໍ່ໜ້າ, ທີ່ຈິງແລ້ວ ພັດໄກກັນຕັ້ງແສນໂບດ. ແຕ່ເວລາຜ່ານໄປບໍ່ດົນ, ກໍມີເລື່ອງມ່ວນເລື່ອງໜຶ່ງເກີດຂຶ້ນ. ຄື: ເຈົ້າຂອງຮ້ານຮູບແຕ້ມຜູ້ໜຶ່ງໄດ້ພໍ້ລູກຄ້າໜຸ່ມຈຳນວນໜຶ່ງທີ່ເຂົ້າມາໃນຮ້ານ ຖາມຊື້ຮູບແຕ້ມຂອງນັກແຕ້ມໜຸ່ຜູ້ນັ້ນ, ແຕ່ເຈົ້າຂອງຮ້ານບໍ່ມີ, ໃນທີ່ສຸດ, ເຈົ້າຂອງຮ້ານມີແຕ່ເບິ່ງລູກຄ້າທີ່ຜິດຫວັງເຫຼົ່ານີ້ຍ່າງອອກຮ້ານໄປດ້ວຍຄວາມເສຍດາຍ.
ຫຼັງຈາກນັ້ນເດືອນປາຍ, ຊື່ນັກແຕ້ມຜູ້ນີ້ກໍ່ໄດ້ຊ່າລືກັນໃນຮ້ານຮູບແຕ້ມນ້ອຍໃຫຍ່ໃນທົ່ວປາຣີ, ເຈົ້າຂອງຮ້ານເລີ່ມຮູ້ສຶກກິນແໜງນຳຄວາມຜິດພາດຂອງຕົນທີ່ບໍ່ໄດ້ຮັບຊື້ຮູບແຕ້ມຂອງນັກແຕ້ມໜຸ່ມຜູ້ນັ້ນໄວ້, ແລະຫວັງຢາກພົບນັກແຕ້ມໜຸ່ມຜູ້ນັ້ນອີກ.
ໃນເວລານີ້, ນັກແຕ້ມໜຸ່ມໄດ້ປະກົດຕົວຢູ່ຕໍ່ໜ້າເຈົ້າຂອງຮ້ານນັ້ນ, ເຂົາໄດ້ຂາຍຮູບແຕ້ມຂອງຕົນຢ່າງສຳເລັດຜົນແລະມີຊື່ສຽງໃນທັນທີ.
ທີ່ຈິງແລ້ວ, ໃນເວລາທີ່ໃນກະເປົ໋າຂອງນັກແຕ້ມຜູ້ດີເດັ່ນທີ່ສຸດຜູ້ນີ້ມີເງິນເຫຼືອແຕ່ສິບກວ່າຫຼຽນນັ້ນ, ເຂົາໄດ້ຄິດວິທີອັນສະຫຼາດ, ຄືໄດ້ໃຊ້ເງິນທີ່ເຫຼືອຈ້າງນັກສຶກສາຫຼາຍຄົນ, ໃຫ້ເຂົາເຈົ້າໄປເລາະຮ້ານຮູບແຕ້ມນ້ອຍໃຫຍ່ຢູ່ປາຣີສູ່ມື້. ໃນເວລາຈະອອກຈາກຮ້ານ, ຜູ້ໃດກໍ່ຖາມເຈົ້າຂອງຮ້ານວ່າ ມີຮູບແຕ້ມຂອງນັກແຕ້ມຜູ້ນັ້ນບໍ່, ໄປຊື້ຢູ່ໃສຈະມີ? ວິທີນີ້ເຮັດໃຫ້ນັກແຕ້ມຜູ້ນີ້ມີຊື່ສຽງດັງຂຶ້ນຢ່າງໄວວາ.
ມີຄົນເວົ້າວ່າ, ຖ້າແມ່ນຄຳ, ປະໄວ້ໃສມັນກໍ່ສົ່ງແສງເຫຼື້ອມມາບໆ. ແຕ່ວ່າບາງທີ, ຄຳກໍ່ອາດຈະຖືກຝັງຢູ່ໃຕ້ດິນ, ສະນັ້ນ ບໍ່ແມ່ນວ່າຄຳກ້ອນໃດປະໄວ້ໃສມັນກໍສົ່ງແສງເຫຼື້ອມໄດ້ໝົດດອກ, ເຊັ່ນດຽວກັນ, ຜູ້ທີ່ມີພູມປັນຍາກໍບໍ່ແມ່ນວ່າໄດ້ຜົນສຳເລັດດີເລີດທັງໝົດ, ໃນຊີວິດຂອງຄົນເຮົາມີຫຼາຍສິ່ງຫຼາຍຢ່າງແມ່ນຕ້ອງພະຍາຍາມ, ແຕ່ກໍ່ບໍ່ແມ່ນອາໄສແຕ່ຄວາມພະຍາຍາມຂອງສ່ວນຕົວກໍ່ຈະໄດ້ຮັບຜົນສຳເລັດໂລດ. ມີປັດໄຈຫຼາຍຢ່າງພວກເຮົາແມ່ນບໍ່ສາມາດຄວບຄຸມໄດ້, ແຕ່ຢ່າທໍ້ຖອຍໃຈຕໍ່ຊີວິດຂອງຕົນເອງຍ້ອນມູນເຫດດັ່ງກ່າວ, ລອງໃຊ້ທ່າທີອັນຕັ້ງໜ້າໄປຍາດແຍ່ງເອົາ, ເຖິງວ່າ ບາງທີພະຍາຍາມຍາດແຍ່ງແລ້ວແຕ່ກໍບໍ່ໄດ້ຜົນ, ແຕ່ວ່າຢ່າງໜ້ອຍ, ພວກເຮົາໄດ້ພະຍາຍາມແລ້ວ, ພວກເຮົາບໍ່ກິນແໜງ.
ສັງຄົມປະຈຸບັນແມ່ນສັງຄົມທີ່ເຕັມໄປດ້ວຍຜູ້ມີພູມປັນຍາ, ແມ່ນສັງຄົມທີ່ເຕັມໄປດ້ວຍການແກ່ງແຍ່ງ, ພວກເຮົາບໍ່ຄວນມີແຕ່ນັ່ງຖ້າໂອກາດມາຫາພວກເຮົາ, ຕິພຸ້ນຕິພີ້ແມ່ນບໍ່ມີປະໂຫຍດຫຍັງ. ພວກເຮົາຄວນໃຊ້ທ່າທີອັນຕັ້ງໜ້າ, ຮັບຜິດຊອບຕໍ່ໂຊກຊະຕາຂອງຕົນເອງ, ທຳຄວາມພະຍາຍາມເລື້ອຍໄປ, ໃນຊີວິດຂອງເຮົາເອງ, ບໍ່ວ່າຜົນສຸດທ້າຍຈະເປັນແນວໃດ, ຢ່າງໜ້ອຍເມື່ອຮອດໄວຊະລາແລ້ວ, ໃນຄວາມຊົງຈຳຂອງພວກເຮົາຈຶ່ງບໍ່ມີກິນແໜງ.
|
|
|
