|
ຄວນດື່ມນ້ຳຈອກທຳອິດໃນມື້ໜຶ່ງແນວໃດ
cri
|
ຮ່າງກາຍທີ່ແຂງແຮງຕ້ອງຮັກສາໃຫ້ມີນ້ຳຫຼໍ່ລ້ຽງຢ່າງດຸນດ່ຽງກັນ, ໃນມື້ໜຶ່ງ, ຄົນເຮົາຄວນດື່ມນ້ຳ7ຫາ8ຈອກ. ຍາມສຳຄັນກວ່າໝູ່ຂອງມື້ໜຶ່ງແມ່ນຢູ່ນຳຕອນເຊົ້າ, ນ້ຳຈອກທຳອິດທີ່ພວກເຮົາດື່ມໃນຕອນເຊົ້າແມ່ນສຳຄັນທີ່ສຸດ. ທ່ານອາດຈະຊິນເຄີຍກັບການທີ່ດື່ມນ້ຳຈອກໜຶ່ງພາຍຫຼັງຕື່ນນອນແລ້ວ, ແຕ່ທ່ານເຄີຍຄິດບໍ່ວ່າ, ຄວນດື່ມນ້ຳຈອກນີ້ແນວໃດ.
ໜຶ່ງ, ດື່ມຫຍັງ?
ນ້ຳຮ້ອນແມ່ນດີທີ່ສຸດ. ນ້ຳຕົ້ມແມ່ນນ້ຳສະອາດ, ຈຸລິນຊີໃນນ້ຳຖືກດັບເຊື້ອໃນເວລານ້ຳຟົດ, ສ່ວນທາດການຊີອົມແລະທາດມາເຍຊີອົມໃນນ້ຳຕົ້ມນັ້ນພັດມີຜົນດີຫຼາຍຕໍ່ສຸຂະພາບ. ມີການຄົ້ນຄວ້າສະແດງໃຫ້ເຫັນວ່າ, ນ້ຳທາດແຂງທີ່ມີທາດການຊີອົມແລະທາດມາເຍຊີອົມມີບົດບາດປ້ອງກັນບໍ່ໃຫ້ມີພະຍາດເສັ້ນເລືອດຫົວໃຈ.
ມີຄົນບໍ່ໜ້ອຍເຫັນວ່າດື່ມນ້ຳເກືອຈາງມີຜົນດີຕໍ່ສຸຂະພາບ, ເລີຍດື່ມນ້ຳເກືອຈາງພາຍຫຼັງຕື່ນນອນ, ຄວາມຮັບຮູ້ດັ່ງກ່າວແມ່ນຜິດພາດ. ການຄົ້ນຄວ້າເຫັນວ່າ, ໃນເວລານອນໝົດຄືນ, ຄົນເຮົາບໍ່ໄດ້ດື່ມນ້ຳ, ແຕ່ການຫາຍໃຈ, ຂັບເຫື່ອແລະການຂັບຖ່າຍປັດສາວະຍັງດຳເນີນຢູ່, ການເຄື່ອນໄຫວສະລີລະລາດເຫຼົ່ານີ້ຕ້ອງເປືອງທາດນ້ຳຫຼາຍ. ເມື່ອຕື່ນນອນໃນຍາມເຊົ້າ, ຖ້າດື່ມນ້ຳຮ້ອນ, ຈະເຮັດໃຫ້ເລືອດຈາງໄດ້ໄວ, ດັດປັບການຂາດນ້ຳໃນຍາມກາງຄືນ. ສ່ວນດື່ມນ້ຳເກືອພັດພາໃຫ້ການຂາດນ້ຳຮ້າຍແຮງຕື່ມອີກ, ເຮັດໃຫ້ຄົນເຮົາຄໍແຫ້ງກວ່າເກົ່າ. ອີກດ້ານໜຶ່ງ, ໃນຍາມເຊົ້າ, ຄວາມດັນເລືອດຂອງຄົນເຮົາໄດ້ສູງຮອດຈຸດສູງສຸດເທື່ອທຳອິດ, ຖ້າດື່ມນ້ຳເກືອຈະເຮັດໃຫ້ຄວາມຫັນເລືອດສູງກວ່າເກົ່າ.
ເມື່ອຕື່ນເຊົ້າ, ນ້ຳຈອກທຳອິດດີທີ່ສຸດບໍ່ຄວນດື່ມນ້ຳໝາກໄມ້, ໂກລາ, ນ້ຳອັດລົມ, ກາເຟແລະນ້ຳນົມງົວເປັນຕົ້ນ. ເພາະວ່າເຄື່ອງດື່ມປະເພດອາຊິດກາໂບນິກເຊັ່ນນ້ຳອັດລົມແລະໂກລາເປັນຕົ້ນມີກົດສົ້ມຫຼາຍ, ໃນການປ່ຽນຖ່າຍນັ້ນຈະເລັ່ງລັດການຂັບຖ່າຍການຊີອົມ, ເຮັດໃຫ້ປະລິມານການຊີອົມໃນເລືອດຫຼຸດໜ້ອຍລົງ, ເມື່ອດື່ມເຄື່ອງດື່ມປະເພດນີ້ເປັນເວລາດົນນານຈະພາໃຫ້ຮ່າງກາຍຂາດທາດການຊີອົມ. ສ່ວນເຄື່ອງດື່ມອີກຈຳນວນໜຶ່ງພັດພາໃຫ້ຍ່ຽວດຸ, ດື່ມໃນຕອນເຊົ້າບໍ່ພຽງແຕ່ບໍ່ສາມາດຕື່ມນ້ຳໃຫ້ຮ່າງກາຍເທົ່ານັ້ນ, ຫາກຍັງເຮັດໃຫ້ຮ່າງກາຍຕ້ອງການນ້ຳຫຼາຍຂຶ້ນ, ເຮັດໃຫ້ຮ່າງກາຍຄົນເຮົາຂາດນ້ຳ.
ສອງ, ອຸນຫະພູມນ້ຳສູງປານໃດຈິ່ງຈະດີ?
ມີບາງຄົນເມື່ອຕື່ນເຊົ້າແລ້ວ, ມັກດື່ມນ້ຳເຢັນໃນຕູ້ເຢັນ, ເຫັນວ່າດື່ມນ້ຳປະເພດນີ້ເຮັດໃຫ້ຮ່າງກາຍສົດຊື່ນ. ທີ່ຈິງແລ້ວ, ຕອນເຊົ້າດື່ມນ້ຳປະເພດນີ້ແມ່ນບໍ່ເໝາະສົມ, ເພາະວ່າໃນຄາວນັ້ນທ້ອງແລະໄສ້ເປົ່າຫວ່າງ, ນ້ຳເຢັນໂພດຫຼືຮ້ອນໂພດຈະກະຕຸກໄສ້ແລະກະເພາະອາຫານ, ເຮັດໃຫ້ກະເພາະອາຫານຮູ້ສຶກບໍ່ສະບາຍ. ຕື່ນເຊົ້າມາ, ເມື່ອດື່ມນ້ຳ, ຄວນດື່ມນ້ຳຮ້ອນທີ່ມີອຸນຫະພູມເທົ່າທຽມກັບອຸນຫະພູມໃນຫ້ອງແມ່ນດີທີ່ສຸດ, ເມື່ອຍາມໜາວຄວນດື່ມນ້ຳອຸ່ນ, ຫຼີກລຽງບໍ່ໃຫ້ກະຕຸກກະເພາະອາຫານແລະລຳໄສ້. ການຄົ້ນຄວ້າສະແດງໃຫ້ເຫັນວ່າ, ເມື່ອຕົ້ມນ້ຳຟົດແລ້ວໃຫ້ຫຼຸດອຸນຫະພູມລົງຮອດ20ຫາ25ອົງສາ, ຈະແຊກຊຶມເຂົ້າເຍືອຈຸລັງໄດ້ງ່າຍ, ແລະຊຸກຍູ້ການປ່ຽນຖ່າຍ, ເພີ່ມພູມຄວາມຕ້ານທານຂອງຮ່າງກາຍ, ຜູ້ທີ່ມີຄວາມຊິນເຄີຍດື່ມນ້ຳອຸ່ນນັ້ນ, ການປ່ຽນຖ່າຍຈະດີ, ກົດນົມໃນກ້າມຊີ້ນຈະຫຼຸດໜ້ອຍລົງ, ບໍ່ຮູ້ສຶກເມື່ອງ່າຍ, ຖ້າຕົ້ມນ້ຳໄວ້ກ່ອນນອນຕ້ອງອັດຝາໃຫ້ດີ, ຖ້າບໍ່ດັ່ງນັ້ນ, ນ້ຳຟົດຈະຂາດຄວາມຊີວິດຊີວາ.
ສາມ, ດື່ມນ້ຳຫຼາຍປານໃດ?
ຜູ້ທີ່ມີສຸຂະພາບແຂງແຮງມື້ໜຶ່ງຢ່າງໜ້ອຍຕ້ອງດື່ມນ້ຳ7ຫາ8ຈອກ(ປະມານ2.5ລິດ), ໃນເວລາຫັດກາຍຫຼາຍຫຼືອາກາດຮ້ອນນັ້ນ, ກໍຕ້ອງດື່ມນ້ຳຫຼາຍຂຶ້ນ. ເມື່ອຕື່ນເຊົ້າມາແມ່ນໄລຍະຂໍກະແຈໃນການຕື່ມນ້ຳໃຫ້ຮ່າງກາຍ, ໃນເວລານັ້ນດື່ມນ້ຳ300ມີລີລິດແມ່ນດີທີ່ສຸດ.
ສີ່, ດື່ມແນວໃດ?
ດື່ມນ້ຳໃນຕອນເຊົ້າຕ້ອງດື່ມໃນເວລາທ້ອງຫວ່າງ, ໝາຍຄວາມວ່າຕ້ອງດື່ມນ້ຳກ່ອນປັ້ນເຂົ້າເຊົ້າ, ຖ້າບໍ່ດັ່ງນັ້ນ, ຈະບໍ່ໄດ້ຮັບຜົນທີ່ເຮັດໃຫ້ເລືອດໄຫຼວຽນໄດ້ແລະເຮັດອະນາໄມກະເພາະອາຫານແລະລຳໄສ້, ດີທີ່ສຸດແມ່ນດື່ມເທື່ອລະເລັກລະໜ້ອຍ, ເພາະວ່າດື່ມໄວໂພດແມ່ນມີຜົນຮ້າຍຫຼາຍຕໍ່ຮ່າງກາຍ, ອາດຈະເຮັດໃຫ້ຄວາມດັນຂອງເລືອດຕົກຕ່ຳລົງແລະນ້ຳເຂົ້າສະໝອງ, ພາໃຫ້ເຈັບຫົວ, ປຸ້ນທ້ອງຫຼືຮາກອອກ.
|
|
