|
|
 |
| (GMT+08:00)
2006-04-18 15:34:02
|
 |
|
ຜູ້ຍິງທີ່ມີອຳນາດຫຼາຍກວ່າໝູ່ຂອງຈີນ
cri
|
ໃນລາຍການພາກນີ້,ພວກເຮົາຈະແນະນຳທ່ານນາງກູ້ຊິ້ວລຽນ ຜູ້ຍິງທີ່ມີອຳນາດຫຼາຍກວ່າໝູ່ຂອງຢູ່ຈີນ.
ການທີ່ວ່າທ່ານນາງກູ້ຊິ້ວລຽນແມ່ນຜູ້ຍິງທີ່ມີອຳນາດຫຼາຍທີ່ຫຼາຍກວ່າໝູ່ຂອງຈີນ ນັ້ນ,ມີສອງຄວາມໝາຍ,ຄື ໜຶ່ງ,ສະພາປະຊາຊົນແຫ່ງຊາດຈີນແມ່ນອົງການອຳນາດສູງສຸດແຫ່ງຊາດຈີນ,ທ່ານນາງກູ້ຊິ້ວລຽນແມ່ນຮອງປະທານຂອງຄະນະປະຈຳສະພາ;ສອງ,ສະຫະພັນແມ່ຍິງແຫ່ງຊາດຈີນແມ່ນອົງການຈັດຕັ້ງມະຫາຊົນສັງຄົມທີ່ປະກອບດ້ວຍແມ່ຍິງໃນວົງການແລະຊົນເຜົ່າຕ່າງໆຂອງຈີນ,ທ່ານນາງກູ້ຊິ້ວລຽນແມ່ນປະທານຜູ້ນຳສູງສຸດຂອງອົງການດັ່ງກ່າວ.
ຕອນບ່າຍມື້ໜຶ່ງຂອງລະດູບານໃໝ່,ແສງແດດແຈ້ງສະຫວ່າງ,ໃນຫໍຮັບແຂກຂອງຄະນະປະຈຳສະພາປະຊາຊົນແຫ່ງຊາດຈີນ,ທ່ານນາງກູ້ຊິ້ວລຽນໄດ້ຕ້ອນຮັບການເຂົ້າສຳພາດໂດຍຈຳເພາະຂອງນັກຂ່າວວິທະຍຸພວກເຮົາ.ທ່ານນາງໄດ້ນຸ່ງຊຸດສາກົນສີແກ່ພໍດີງາມ ຈົ່ງພົມສັ້ນ ຮູບຮ່າງບໍ່ສູງບໍ່ຕ່ຳ,ເຮັດໃຫ້ຄົນຮູ້ສຶກວ່າທ່ານນາງເປັນຄົນຊຳນານງານແລະເປີດອົກເປີດໃຈ.
ເມື່ອ20ກວ່າປີກ່ອນທ່ານນາງກູ້ຊ້ຽວລຽນເປັນເຈົ້າແຂວງແຂວງຈ່ຽງຊູ່,ເມື່ອ10ກວ່າປີກ່ອນ,ເປັນລັດຖະມົນຕີກະຊວງອຸດສາຫະກຳເຄມີ,ແລ້ວເປັນຮອງປະທານຄະນະປະຈຳສະພາປະຊາຊົນແຫ່ງຊາດຈີນແລະປະທານສະຫະພັນແມ່ຍິງແຫ່ງຊາດຈີນໃນສະຕະວັດໃໝ່.ປັດຈຸບັນ,ທ່ານນາງກູ້ຊິ້ວລຽນພວມທຸ່ມເທກຳລັງກາຍແລະໃຈທັງໝົດເຂົ້າໃນການເອົາໃຈໃສ່ນຳແມ່ແລະເດັກ.ພໍພົບກັນ,ທ່ານນາງກໍທັງຍິ້ມທັງເວົ້າເຖິງສະພາບການພັດທະນາພາລະກິດແມ່ແລະເດັກຂອງຈີນ.
ລັດຖະບານພວກເຮົາເອົາໃຈໃສ່ຫຼາຍນຳບັນຫາແມ່ຍິງ,ໄດ້ໃຊ້ມາດຕະການຢ່າງເປັນລະບົບ,ໄດ້ມີການຮັບປະກັນໃນດ້ານກົດໝາຍນະໂຍບາຍ ອົງການຈັດຕັ້ງແລະກົນໄກໝູນເດີນ,ລ້ວນແຕ່ໄດ້ຊຸກຍູ້ຄວາມສະເໝີພາບກັນລະຫວ່າງຍິງຊາຍແລະການພັດທະນາຂອງແມ່ຍິງ,ແລະໄດ້ຮັບໝາກຜົນ.
ທ່ານນາງກູ້ຊິ້ວລຽນເວົ້າວ່າ,ລະບົບກົດໝາຍທີ່ປົກປ້ອງສິດປະໂຫຍດຂອງແມ່ຍິງແລະຊຸກຍູ້ການພັດທະນາຂອງແມ່ຍິງນັ້ນຖືລັດຖະທຳມະນູນເປັນພື້ນຖານແລະຖືກົດ ໝາຍວ່າດ້ວຍການປົກປ້ອງສິດແລະຜົນປະໂຫຍດຂອງແມ່ຍິງເປັນຕົ້ນຕໍ,ໄດ້ເປັນຮູບເປັນຮ່າງຂຶ້ນຢູ່ຈີນໃນຂັ້ນພື້ນຖານແລ້ວ,ໃນເຂດແລະເມືອງ90%ຂຶ້ນໄປໃນທົ່ວປະເທດລ້ວນແຕ່ໄດ້ສ້າງອົງການປົກປ້ອງແມ່ແລະເດັກ,ອົງການປົກຄອງທຸກຂັ້ນໄດ້ກຳນົດແຜນການພັດທາະນາແມ່ຍິງຈາກຂັ້ນເທິງລົງຮອດຂັ້ນລຸ່ມ.ການພັດທະນາດັ່ງກ່າວໄດ້ເຮັດໃຫ້ພາລະກິດແມ່ຍິງຂອງຈີນຢູ່ໃນຖານະນຳໜ້າໃນປະເທດພວມພັດທະນາ,ທັງມີທ່າແຮງພິເສດເມື່ອທຽບກັບປະເທດພັດທະນາ.
ສະພາປະຊາຊົນແຫ່ງຊາດຈີນແມ່ນອົງການອຳນາດສູງສຸດຂອງຈີນ,ກໍແມ່ນອົງການນິຕິບັນຍັດສູງສຸດຂອງລັດ,ເພື່ອຊຸກຍູ້ການກໍ່ສ້າງລະບອບກົດໝາຍທີ່ປົກປ້ອງແມ່ແລະເດັກ,ທ່ານນາງກູ້ຊິ້ວລຽນມັກລົງໄປສຳຫຼວດຄົ້ນຄວ້າຢູ່ທ້ອງຖິ່ນເລື້ອຍໆ,ຫຼັງ ຈາກຊອກຮູ້ສະພາບຕົວຈິງແລ້ວກໍເຮັດວຽກຊຸກຍູ້ອັນລະອຽດຈຳນວນໜຶ່ງ.ທ່ານນາງໂມ້ເວິນຊິ້ວ ຜູ້ແທນສະພາປະຊາຊົນແຫ່ງຊາດຈີນເວົ້າວ່າ,
ໃນດ້ານປົກປ້ອງສິດແລະຜົນປະໂຫຍດຂອງແມ່ຍິງດ້ວຍກົດໝາຍ,ທ່ານນາງມີສາຍຕາເຫັນກວ້າງມອງໄກທີ່ສຸດ.ຕົວຢ່າງຄືການດັດແກ້ ກົດໝາຍວ່າດ້ວຍການປົກປ້ອງສິດແລະຜົນປະໂຫຍດຂອງແມ່ຍິງ,ເລີ່ມແຕ່ປີ2002,ທ່ານນາງກໍໄດ້ລົງໄປຮາກຖານເພື່ອສຳຫຼວດສະພາບການປົກປ້ອງສິດແລະຜົນປະໂຫຍດຂອງແມ່ຍິງພາຍຫຼັງປະກາດໃຊ້ກົດໝາຍດັ່ງກ່າວແລ້ວ,ແລະໄດ້ກຳນົດຫຼັກການພື້ນຖານແລະແລວຄວາມຄິດຂອງ ການດັດແກ້.
ເມື່ອເວົ້າເຖິງນະໂຍບາຍພື້ນຖານແຫ່ງຊາດຄືຍິງຊາຍສະເໝີພາບກັທີ່ໄດ້ຮັບໝາກຜົນເທື່ອລະກ້າວຢູ່ຈີນ,ທ່ານນາງກູ້ຊິ້ວລຽນບອກນັກຂ່າວວ່າ,ຊູ່ມື້ນີ້,ໃນປະຊາກອນທີ່ປະກອບອາຊີບຢູ່ຕົວເມືອງແລະຊົນນະບົດ,ແຕ່ລະຮ້ອຍຄົນໃດກໍໄດ້ມີແມ່ຍິງ40ກວ່າຄົນ.ແຕ່ເມື່ອເວົ້າເຖິງສະພາບພັດທະນາຂອງແມ່ແລະເດັກໃນຊົນນະບົດ,ທ່ານນາງເຫັນວ່າ,ຢູ່ບາງເຂດຊົນນະບົດ,ແນວຄິດທີ່ຖືໜັກລູກຊາຍຖືເບົາລູກສາວນັ້ນຍັງຄົງໜັກໜ່ວງຢູ່,ເດັກຍິງເຂົ້າໂຮງຮຽນບໍ່ໄດ້ຍ້ອນຄອບຄົວທຸກຍາກ,ເງື່ອນໄຂດຳລົງຊີວິດຂອງແມ່ຍິງໃນເຂດຂາດນ້ຳພາກຕາເວັນຕົກບໍ່ດີແລະອື່ນໆ,ເລື່ອງເຫຼົ່ານີ້ທ່ານນາງໄດ້ຄິດຮອດເຖິງຢູ່ທຸກເວລາ.
ຜູ້ທີ່ລຶ້ງກັບທ່ານນາງກູ້ຊິ້ວລຽນລ້ວນແຕ່ຮູ້ວ່າ,ເພິ່ນເປັນຄົນໃຈເດັດ,ບໍ່ເຄີຍຂໍຄວາມຊ່ວຍເຫຼືອຈາກຜູ້ອື່ນຈັກເທື່ອ,ມີແຕ່ເທື່ອດຽວທໍ່ນັ້ນເພື່ອຫ້າງຫາເງິນສ້າງໂຄງການ"ຂຸມນ້ຳມານດາ",ໂຄງການດັ່ງກ່າວລິເລີ່ມປະຕິບັດໂດຍສະຫະພັນແມ່ຍິງທົ່ວປະເທດໃນປີ2000,ແມ່ນໂຄງການກຸສົນເພື່ອສ້າງຂຸມນ້ຳໃຫ້ຊາວກະສິກອນໃນເຂດແຫ້ງແລ້ງພາກຕາເວັນຕົກຂອງຈີນ.ຢູ່ເຂດເຫຼົ່ານັ້ນ,ຍ້ອນວ່າຂາດນ້ຳ,ຜູ້ຊາຍສ່ວນຫຼາຍໄປອອກແຮງງານຢູ່ຕ່າງຖິ່ນ,ແມ່ຍິງແລະເດັກນ້ອຍຢູ່ເຮືອນ,ເງື່ອນໄຂຢູ່ລອດແລະສາທາລະນະສຸກຂີ້ ຮ້າຍທີ່ສຸດ.ຖ້າບໍລິຈາກ1000ກວ່າຢວນກໍສາມາດສ້າງຂຸມເກັບໂຮມນ້ຳຝົນຂຸມໜຶ່ງ,ຊຶ່ງສາມາດແກ້ໄຂບັນຫານ້ຳໃຊ້ໃນການດຳລົງຊີວິດແລະຜະລິດຂອງຄອບຄົວສີ່ຄົນ.
ໃນໄລຍະແພ່ເງິນພໍດີມີງານວາງສະແດງອຸດສາຫະກຳເຄມີຈັດຂຶ້ນຢູ່ປັກກິ່ງ,ໃນນາມເປັນອະດີດລັດຖະມົນຕີກະຊວງອຸດສາຫະກຳເຄມີ,ທ່ານນາງກູ້ຊິ້ວລຽນໄດ້ເຂົ້າຮ່ວມກອງປະຊຸມດັ່ງກ່າວ,ໃນກອງປະຊຸມ,ທ່ານນາງໄດ້ເວົ້າຕໍ່ຜູ້ຮັບຜິດຊອບວິສາຫະກິດອຸດສາຫະກຳເຄມີຈຳນວນໜຶ່ງວ່າ:ຂ້າພະເຈົ້າຢາກຂໍເງິນນຳພວກທ່ານ,ເພື່ອສ້າງຂຸມນ້ຳໃຫ້ເຂດຂາດນ້ຳໃນພາກຕາເວັນຕົກ,ຂໍໃຫ້ພວກທ່ານຈົ່ງສະໜັບສະໜູນ.ຜູ້ຮັບຜິດຊອບເຫຼົ່ານັ້ນລ້ວນແຕ່ຕື່ນຕັນໃຈທີ່ສຸດ,ໃຜກໍເວົ້າວ່າ,ຂໍໃຫ້ອະດີດລັດຖະມົນຕີໄວ້ໃຈເດີ້,ພວກເຮົາລ້ວນແຕ່ສະໜັບສະໜູນ.
ກິດຈະການ"ຂຸມນ້ຳມານດາ" ກິດຈະການ"ລົດດ່ວນສຸຂະພາບມານດາ"ທີ່ສົ່ງແພດແລະຢາໃຫ້ແມ່ຍິງຊົນນະບົດ "ແຜນການດອກໄມ້ລະດູບານໃໝ່"ທີ່ອຸດໜູນເດັກຍິງທຸກຍາກທີ່ເຖິງໄວກະສຽນເຂົ້າໂຮງຮຽນ,ກິດການຊ່າງເຕັກນິກໃຫ້ແກ່ເດັກຍິງຜູ້ໃຫຍ່ທີ່ຮ່ວມມືກັບຕ່າງປະເທດແລະກິດຈະການອື່ນໆ.ແຕ່ທ່ານນາງກູ້ຊິ້ວລຽນດຳລົງຕຳແໜ່ງຜູ້ຮັບ ຜິດຊອບສະຫະພັນແມ່ຍິງເປັນຕົ້ນມາ,ໄດ້ເປັນປະທານຈັດຕັ້ງປະຕິບັດວຽກງານລະອຽດ ລະບົບໜຶ່ງທີ່ເຮັດໃຫ້ແມ່ຍິງແລະເດັກນ້ອຍຫຼວງຫຼາຍໄດ້ຮັບຜົນປະໂຫຍດຕົວຈິງ,ເຮັດໃຫ້ມວນຊົນຮາກຖານຮູ້ສຶກຕື່ນຕັນໃຈຢ່າງເລິກເຊິ່ງ.
ເພື່ອຊຸກຍູ້ພາລະກິດແມ່ຍິງໃຫ້ມີການພັດທະນາ,ສະຫະພັນແມ່ຍິງແຫ່ງຊາດຈີນທີ່ນຳໂດຍທ່ານນາງກູ້ຊິ້ວລຽນໄດ້ຮ່ວມມືປະຕິບັດໂຄງການກັບອົງການຈັດຕັ້ງຝ່າຍທາງການແລະຝ່າຍພົນລະເຮືອນຂອງ10ກວ່າປະເທດແລະເຂດແຄວ້ນ ເຊັ່ນການາດາ ອົສຕຼາລີແລະອາເມລິກາເປັນຕົ້ນ.ໂຄງການຮ່ວມມືມີ1000ກວ່າໂຄງການ,ຊຶ່ງໄດ້ກ່ຽວພັນເຖິງຂົງເຂດຕ່າງໆ ເຊັ່ນການບຳບັດຄວາມທຸກຍາກ ການສຶກສາ ສາທາລະນະສຸກ ການປະກອບອາຊີບ ການປົກປ້ອງສິດແລະຜົນປະໂຫຍດຂອງແມ່ຍິງເປັນຕົ້ນ.
ໃນເວລາອຳລາຄາຈາກ,ທ່ານນາງໄດ້ເວົ້າຢ່າງມີຊີວິດຊີວາວ່າ,ຖ້າຢູ່ທະເລຊາຍ,ເດັກນ້ອຍໄດ້ພົບເສືອໃຫຍ່ໂຕໜຶ່ງ,ຄວາມເວົ້າທຳອິດຈະແມ່ນ ແມ່ເອີຍ ຫາກບໍ່ແມ່ນ ພໍ່ເອີຍ.ທັງນີ້ກໍສະແດງໃຫ້ເຫັນຢ່າງເຕັມທີ່ເຖິງຄວາມສຳຄັນຂອງແມ່ຍິງຫຼາຍປານໃດ.ຢູ່ຈີນທີ່ເອົາໃຈໃສ່ນຳການພັດທະນາຂອງແມ່ຍິງໃນລະດັບສູງ,ແມ່ຍິງສາມາດສ້າງຜົນງານຫຼາຍກວ່າເກົ່າ.ທ່ານນາງເວົ້າວ່າ,
ພັກແລະລັດຂອງປະເທດພວກເຮົາລ້ວນແຕ່ເອົາໃຈໃສ່ນຳແມ່ຍິງພວກເຮົາຫຼາຍທີ່ສຸດ.ພວກເຮົາຄວນດຸໝັ່ນແລະທຳຄວາມພະຍາຍາມໃນຕຳແໜ່ງຂອງຕົນ,ຂໍແຕ່ດຸໝັ່ນພະຍາຍາມແລ້ວກໍຈະໄດ້ຮັບໝາກຜົນ,ມີໝາກຜົນແລ້ວກໍໝາຍຄວາມວ່າໄດ້ປະກອບສ່ວນໃຫ້ແກ່ປະເທດຊາດ.ຫວັງໃຫ້ຊາວໜຸ່ມໂດຍສະເພາະແມ່ນຍິງໜຸ່ມແຮ່ງຫຼາຍສາມາດລື່ນກາຍຮຸ້ນຄົນພວກຂ້າພະເຈົ້າ.
|
|
|
