|
|
 |
| (GMT+08:00)
2006-04-18 17:20:28
|
 |
|
ເສັ້ນທາງປະດິດສ້າງຢ່າງເປັນເຈົ້າຕົນເອງຂອງຂະແໜງການຜະລິດລົດຍົນຈີນ
cri
|
ການຜະລິດລົດຍົນຂອງຈີນໄດ້ພັດທະນາຢ່າງໄວພະລັນ,ປັດຈຸບັນ, ໄດ້ກາຍເປັນອຸດສາຫະກຳເສົາຄ້ຳໜຶ່ງຂອງຈີນແລ້ວ.ແຕ່ວ່າ,ໃນຫຼາຍປີມານີ້, ລົດຍົນທີ່ຈີນຜະລິດນັ້ນຍີ່ຫໍ້ຈີນຊ້ຳພັດໜ້ອຍ,ສ່ວນຫຼາຍໄດ້ຕິດປ້າຍລົດຍົນຂອງຕ່າງປະເທດ. ຂະແໜງການຜະລິດລົດຍົນຈີນຈະປ່ຽນແປງສະພາບເກີ້ເຂີນແນວໃດ? ແລ້ວໄຂເສັ້ນທາງປະດິດສ້າງຢ່າງເປັນເຈົ້າຕົນເອງ?
ປີ 2005, ຈີນລວມມີລົດໃໝ່ 80 ກວ່າຊະນິດປ້ອນເຂົ້າຕະຫຼາດ,ສະເລ່ຍແລ້ວ, 4ມື້ໃດກໍມີລົດຊະນິດໃໝ່ເຂົ້າຕະຫຼາດ.ແຕ່ວ່າ,ໃນນັ້ນ,ລົດຍົນທີ່ມີຍີ່ຫໍ້ຂອງຈີນພັດບໍ່ຫຼາຍ.ໃນເວລາອະທິບາຍສະພາບການດັ່ງກ່າວ, ທ່ານລິວຊື້ຈິນ ຮອງຫົວໜ້າສູນ ຄົ້ນຄວ້າການພັດທະນາຂອງຄະນະລັດຖະບານຈີນເຫັນວ່າ,ຕົ້ນທຶນຫຼາຍຄວາມສ່ຽງສູງແມ່ນມູນເຫດສຳຄັນທີ່ວິສາຫະກິດຫຼວງຫຼາຍບໍ່ກ້າໄປຄົ້ນຄວ້າຜະລິດລົດຍົນຢ່າງເປັນເຈົ້າຕົນເອງ.
"ໃນເວລາຂະແໜງການຜະລິດລົດຍົນຍັງຢູ່ໃນໄລຍະພັດທະນາຂັ້ນຕົ້ນນັ້ນ, ມີຄວາມຕ້ອງການຂອງຕະຫຼາດຫຼາຍ,ດັ່ງນັ້ນການນຳເຂົ້າເຕັກນິກທຳມະດາຈາກ ຕ່າງປະເທດ,ກໍສາມາດຜະລິດລົດຍົນທີ່ຂ້ອນຂ້າງສຸກງອມ,ແລ້ວປ້ອນເຂົ້າຕະ ຫຼາດກໍສາມາດໄດ້ເງິນ.ນີ້ແມ່ນການຄັດເລືອກຢ່າງໜຶ່ງ.ອີກຢ່າງໜຶ່ງກໍແມ່ນຕົນເອງຄົ້ນຄວ້າຜະລິດ,ແຕ່ຂາດເງິນທຶນ ນັກວິຊາການແລະເຕັກນິກ, ໃຕ້ກໍລະນີດັ່ງກ່າວ, ວິສາຫະກິດສ່ວນຫຼາຍແມ່ນຢາກຍຶດເອົາໂກຕາຂອງຕະຫຼາດກ່ອນ, ຫາກບໍ່ແມ່ນຄົ້ນຄວ້າຜະລິດ."
ທ່ານລິວຊື້ຈິນເຫັນວ່າ, ອາໄສນຳເຂົ້າເຕັກນິກຂອງຕ່າງປະເທດມາຮັບປະກັນການຂາຍດິບຂາຍດີ, ນີ້ແມ່ນວິທີຊົ່ວຄາວທໍ່ນັ້ນ,ການພັດທະນາຂອງຂະແໜງການຜະລິດລົດຍົນຈີນໃນອະນາຄົດຕ້ອງເດີນຕາມເສັ້ນທາງປະດິດສ້າງຢ່າງເປັນເຈົ້າຕົນເອງ, ມີລົດຍົນຊະນິດຕ່າງໆທີ່ປະດິດຜະລິດໂດຍຕົນເອງແລະເຕັກນິກການຜະລິດຂອງຕົນເອງ.ລັດຖະບານຈີນໄດ້ຮັບຮູ້ຄວາມສຳຄັນດັ່ງກ່າວນີ້ແລ້ວ. ເດືອນເມສາປີ 2005,ພາກສ່ວນຕ່າງໆຄືກົມໃຫຍ່ພາສີຈີນແລະກະຊວງການຄ້າຈີນເປັນຕົ້ນໄດ້ຮ່ວມກັນປະກາດກົດຂໍ້ກຳນົດ,ຍົກພາສີນຳເຂົ້າອາໄຫຼ່ຂອງລົດໃຫ້ສູງຂຶ້ນຢ່າງຫຼວງຫຼາຍ.ການປະກາດໃຊ້ກົດຂໍ້ກຳນົດດັ່ງກ່າວ,ໄດ້ເຮັດໃຫ້ວິສາຫະກິດຜະລິດລົດຍົນຈີນຮັບຮູ້ຢ່າງຈະແຈ້ງວ່າ, ຍຸກສະໄໝທີ່ປະກອບລົດເກັ໋ງຄັນໜຶ່ງກໍສາມາດໄດ້ເງິນຫຼາຍນັ້ນໃກ້ຈະສິ້ນສຸດລົງແລ້ວ.
ໃນເວລາວິສາຫະກິດຜະລິດລົດຍົນຈີນສ່ວນຫຼາຍຍັງມົວເມົາແຕ່ຜະລິດລົດຍີ່ຫໍ້ຕ່າງປະເທດນັ້ນ, ກໍມີວິສາຫະກິດສ່ວນໜ້ອຍທີ່ສຸດຜີກຕະຫຼາດລົດຍົນຊັ້ນກາງແລະຊັ້ນສູງທີ່ເປັນຍີ່ຫໍ້ຕ່າງປະເທດຫຼາຍທັງແກ່ງແຍ່ງກັນຢ່າງດຸເດືອດ,ແລ້ວສຸມໃສ່ການຄົ້ນຄວ້າຜະລິດລົດຍົນທີ່ລະບາຍອາຍເສຍໜ້ອຍທັງລາຄາຖືກ.ປີກາຍນີ້, ປະລິມານຈຳໜ່າຍລົດຍົນຍີ່ຫໍ້ເຊ້ຍລີ້ທີ່ບໍລິສັດທຽນສິນອີຊີຜະລິດລົດຍົນຫຸ້ນສ່ວນຈຳກັດຜະລິດນັ້ນໄດ້ບັນລຸ 2 ແສນຄັນ, ກວມໂກຕາຕະຫຼາດ 30% ໃນລົດຍົນປະເພດດຽວກັນ. ທ່ານວາງກາງ ຜູ້ອຳນວນການໃຫຍ່ບໍລິສັດທຽນສິນອີຊີຜະລິດລົດຍົນຫຸ້ນສ່ວນຈຳກັດບອກນັກຂ່າວວ່າ, ການຍຶດໝັ້ນພັດທະນາລົດຍົນທີ່ມີຍີ່ຂໍ້ຕົນເອງເປັນເວລາຍາວນານນັ້ນແມ່ນມູນເຫດສຳຄັນທີ່ພາໃຫ້ພວກເຂົາເຈົ້າໄດ້ຮັບຜົນສຳເລັດ.
ຢ່າງໜ້ອຍມີ15ປີແລ້ວ "ພວກຂ້າພະເຈົ້າອາໄສລະບົບຄົ້ນຄວ້າພັດທະນາ, ລະບົບການຜະລິດ ແລະລະບົບການຄຸ້ມຄອງຂອງຕົນຄ້ຳຢັນວິສາຫະກິດພວກຂ້າພະເຈົ້າ,ແລ້ວຄ່ອຍໆຂະຫຍາຍຈົນສູ່ມື້ນີ້.ປັດຈຸບັນ,ພວກຂ້າພະເຈົ້າໄດ້ມີໂຮງ ງານຜະລິດໂມເຕີແລະຫ້ອງຈັກຜະລິດຊີກສ່ວນປ່ຽນຄວາມໄວຢ່າງເປັນເຈົ້າຕົນເອງໝົດ,ຍັງມີລະບົບເຄືອຂ່າຍທີ່ຈັດຊື້ແລະຈຳໜ່າຍທີ່ຄົບຖ້ວນ."
ເສັ້ນທາງຄົ້ນຄວ້າພັດທະນາຢ່າງເປັນເຈົ້າຕົນເອງຂອງບໍລິສັດດັ່ງກ່າວບໍ່ສະດວກ.ໃນທ້າຍຊຸມປີ 90 ສະຕະວັດທີແລ້ວແລະຕົ້ນສະຕະວັດນີ້, ຍ້ອນຍີ່ຫໍ້ເຊ້ຍລິ້ຄົນຮູ້ໜ້ອຍ,ລົດເກັ໋ງຍີ່ຫໍ້ເຊ້ຍລີ້ຕີເຂົ້າຕະຫຼາດຍາກ.ແຕ່ໃນເວລານັ້ນ,ບໍລິສັດບໍ່ໄດ້ປະລະຄວາມພະຍາຍາມ,ກົງກັນຂ້າມ,ຍັງໄດ້ເພີ່ມການລົງທຶນເຂົ້າໃນການ ຄົ້ນຄວ້າ,ພະຍາຍາມອອກແບບຜະລິດລົດເກັ໋ງທີ່ປະຢັດພະລັງງານທັງອະນຸລັກສິ່ງແວດລ້ອມ, ໃນທີ່ສຸດໄດ້ຮັບຄວາມຮັບຮອງຈາກຜູ້ບໍລິໂພກ. ປັດຈຸບັນ, ບໍລິສັດດັ່ງກ່າວໄດ້ວາງແຜນຮອດປີ 2010,ບັນລຸຈຸດໝາຍຈຳໜ່າຍລົດເກັ໋ງທີ່ມີຍີ່ຫໍ້ເປັນເຈົ້າຕົນເອງ 1 ລ້ານຄັນ.
ເມື່ອໄດ້ເຫັນຜົນສຳເລັດຂອງບໍລິສັດທຽນສິນອີຊີຜະລິດລົດຍົນຫຸ້ນສ່ວນຈຳ ກັດ,ວິສາຫະກິດຜະລິດລົດຍົນຂອງຈີນນັບມື້ນັບຫຼາຍເລີ່ມຖືການຄົ້ນຄວ້າພັດທະນາຢ່າງເປັນເຈົ້າຕົນເອງເປັນຈຸດໜັກພັດທະນາໃນອະນາຄົດ. ທ່ານນາງວາງເຟິ້ງອິງ ຜູ້ອຳນວຍການໃຫຍ່ຂອງສາງເສີງຈີນຜະລິດລົດຍົນຫຸ້ນສ່ວນຈຳກັດເຫັນວ່າ,
ປັດຈຸບັນ,ຕະຫຼາດສາກົນຮັບຮູ້ລົດຍົນຈີນ,ນອກຈາກທ່າແຮງດ້ານລາຄາແລ້ວ, ຄວາມກ້າວໜ້າດ້ານເຕັກນິກແລະຄຸນນະພາບຍົກສູງຂຶ້ນກໍເຮັດໃຫ້ຄົນຕົກໃຈຫຼາຍ. ເຖິງວ່າລົດຍົນຍີ່ຫໍ້ຈີນບໍ່ແມ່ນລະດັບຍອດຢ້ຽມ,ແຕ່ໃນຂົງເຂດລົດຍົນຊັ້ນກາງນັ້ນ, ຄວນເວົ້າວ່າ,ລົດຍົນຈີນຍັງມີຊ່ອງຫວ່າງໃຫຍ່.
ເພື່ອບັນລຸການປະດິດສ້າງຢ່າງເປັນເຈົ້າຕົນເອງໂດຍໄວ, ວິສາຫະກິດຜະລິດລົດຍົນຂອງຈີນພວມໃຊ້ຫຼາຍວິທີມາເພີ່ມຄວາມສາມາດໃນການຄົ້ນຄວ້າພັດທະນາ.ເດືອນກຸມພາປີ2005,ກຸ່ມຜະລິດລົດຍົນນານກິ່ງຈີນໄດ້ຮັບຊື້ບໍລິສັດລົດຍົນໂລເວີອັງກິດທີ່ມີປະຫວັດສາດຮ້ອຍປີແລະພາກສ່ວນການຜະລິດເຄື່ອງໂມເຕີຂອງເຂົາຢ່າງສຳເລັດຜົນ, ຜ່ານການຮັບຊື້ລະຫວ່າງຊາດໄດ້ຮັບແທ່ນຄົ້ນຄວ້າພັດທະນາລົດຍົນທີ່ມີລະດັບສາກົນ. ນອກນີ້, ວິສາຫະກິດຜະລິດລົດຍົນຈຳນວນໜຶ່ງພວມຫາລືໂຮມເຂົ້າກັນເພື່ອເປັນຂະໜາດຂ້ອນຂ້າງໃຫຍ່,ເພື່ອສຳເລັດແຜນການຜະລິດລົດຍົນຍີ່ຫໍ້ຢ່າງເປັນເຈົ້າຕົນເອງ.
ຜູ້ຊ່ຽວຊານກ່າວເນັ້ນວ່າ, ການປະດິດສ້າງຢ່າງເປັນເຈົ້າຕົນເອງຈະສຳເລັດໃນບາດດຽວບໍ່ໄດ້, ຫາກຄວນເພີ່ມການລົງທຶນເຂົ້າໃນການຄົ້ນຄວ້າເທື່ອລະກ້າວໂດຍອີງຕາມຈຸດພິເສດຂອງຜະລິດຕະພັນ ສະພາບການສະໜອງກັບຄວາມຕ້ອງ ການໃນຕະຫຼາດ ແລະລະດັບຊັບພະຍາກອນເຕັກນິກຂອງວິສາຫະກິດຜະລິດລົດຍົນ.ພ້ອມກັນນັ້ນ,ຜູ້ຮັບຜິດຊອບຂອງວິສາຫະກິດຜະລິດລົດຍົນກໍຕ້ອງມີສາຍ ຕາຍຸດທະສາດ,ບໍ່ຄວນສະແຫວງຫາແຕ່ປະສິດທິຜົນໄລຍະສັ້ນ.
ປັດຈຸບັນ, ລັດຖະບານຈີນໄດ້ຈັດເອົາລົດເກັ໋ງຍີ່ຫໍ້ຈີນຫຼາຍຊະນິດເຂົ້າໃນບັນຊີລາຍຊື່ຜະລິດຕະພັນລັດຖະບານກາງຈັດຊື້,ແລະສົ່ງເສີມໃຫ້ວິສາຫະກິດຜະລິດລົດຍົນໂຮມເຂົ້າກັນ.ໃນແຜນກຳນົດພັດທະນາເສດຖະກິດແລະສັງຄົມຈີນໃນ 5 ປີຂ້າງໜ້າທີ່ຫາກໍ່ປະກາດບໍ່ດົນນັ້ນ, ລັດຖະບານຈີນກໍໄດ້ສະເໜີອອກມາອີກວ່າ, ຕ້ອງເພີ່ມຄວາມສາມາດປະດິດສ້າງຢ່າງເປັນເຈົ້າຕົນເອງຂອງອຸດສາຫະກຳລົດຍົນ, ເລັ່ງລັດພັດທະນາເຄື່ອງໂມເຕີ ເຄື່ອງເອເລັກໂຕຼນິກ,ອາໄຫຼ່ລົດທີ່ມີສິດຊັບສິນທາງປັນຍາຂອງຕົນ;ຍົກອັດຕາສ່ວນກວມຕະຫຼາດຂອງລົດຍີ່ຫໍ້ຈີນໃຫ້ສູງຂຶ້ນ, ຈໍ່ຕົວຂຶ້ນເປັນວິສາຫະກິດຜະລິດລົດຍົນຂະໜາດຫຼາຍລ້ານຄັນບໍ່ເທົ່າແຫ່ງ.ອາດຄາດຄະເນໄດ້ວ່າ, ວິສາຫະກິດຜະລິດລົດຍົນຂອງຈີນທີ່ເດີນຕາມເສັ້ນທາງປະດິດສ້າງຢ່າງເປັນເຈົ້າຕົນເອງນັ້ນຈະນັບມື້ນັບຫຼາຍຂຶ້ນ.
|
|
|
