|
ມື້ນີ້ແມ່ນມື້ສັງຂານລ່ວງ,ໃນໂອກາດບຸນສົງການ ປີໃໝ່ລາວ,ໃນລາຍການມື້ນີ້,ກ່ອນອື່ນຂ້າພະເຈົ້າ,ອຸດົມຂໍຕາງໜ້າພະນັກງານໝົດທຸກຄົນໃນພາກພາສາລາວວິທະຍຸcriຖາມສະບາຍດີປີໃໝ່ນຳເພິ່ອນມິດຜູ້ຟັງທີ່ຮັກແພງທັງຫຼາຍ,ອວຍພອນໃຫ້ບັນດາທ່ານຈົ່ງມີຄວາມເບີກບານມ່ວນຊື່ນ,ມີສຸຂະພາບເຂັ້ມແຂງ,ແລະສົມຫວັງທຸກປະການໃນປີໃໝ່ນີ້,ແລະອວຍພອນໃຫ້ທ່ານຈົ່ງໄດ້ຮັບຜົນສຳເລັດໃຫຍ່ຫຼວງກວ່າເກົ່າໃນປີໃໝ່.
ຫວ່າງມໍ່ໆນີ້,ພວກເຮົາໄດ້ຮັບຈົດໝາຍຂອງທ່ານເຈ້ຍຢ່າງ ມິດລາຍການຈາກແຂວງຊຽງຂວາງ,ໃນຈົດໝາຍຂອງທ່ານຂຽນວ່າ,ຫວັງຢາກຊອກຮູ້ສະພາບຊົນເຜົ່າສ່ວນໜ້ອຍຂອງຈີນ,ໂດຍສະເພາະແມ່ນປະຊາກອນແລະຄວາມເປັນມາຂອງຊົນເຜົ່າມົ້ງແລະຊົນເຜົ່າໄທລື້ຂອງຈີນຫຼາຍກວ່າເກົ່າ,ໃນລາຍການ"ເພື່ອນມິດຜູ້ຟັງ"ພາກນີ້,ພວກເຮົາຂໍແນະນຳເນື້ອໃນດ້ານນີ້ສູ່ທ່ານຟັງ,ຖ້າວ່າທ່ານຍັງຢາກຮູ້ສະພາບກ່ຽວກັບຊົນເຜົ່າສ່ວນໜ້ອຍຂອງຈີນຫຼາຍກວ່າເກົ່າ,ກໍ່ເຊີນທ່ານຕິດຕາມຮັບຟັງລາຍການ"ຊົນເຜົ່າສ່ວນໜ້ອຍຂອງຈີນ"ທີ່ອອກອາກາດໃນທຸກວັນອົງຄານ,ຫຼືເຂົ້າເວັບໄຊຂອງພວກເຮົາ,ຄື la.chinabroadcast.cn.
ຈີນແມ່ນປະເທດເອກະພາບກັນທີ່ມີຫຼາຍຊົນເຜົ່າມາແຕ່ບູຮານນະການ.ຫຼັງຈາກປະເທດຈີນໃໝ່ສ້າງຕັ້ງຂຶ້ນແລ້ວ,ຜ່ານຈາກການຈຳແນກແລ້ວລັດຖະບານກາງຮັບຮອງວ່າມີ56ຊົນເຜົ່າ.ຍ້ອນວ່ານອກຈາກເຜົ່າຮັ້ນແລ້ວ,55ຊົນເຜົ່າອື່ນມີປະຊາກອນຂ້ອນຂ້າງໜ້ອຍ,ສະນັ້ນຈິ່ງເອີ້ນກັນວ່າ"ຊົນເຜົ່າສ່ວນໜ້ອຍ".ຈຸດພິເສດດ້ານການຢອງຢາຍຂອງບັນດາຊົນເຜົ່າຈີນແມ່ນ:ບັນດາເຜົ່າຕັ້ງພູມລຳເນົາຢູ່ຢ່າງສັບປົນຄົນເລກັນໃນທົ່ວປະເທດ,ບາງເຜົ່າຕ່າງຕັ້ງພູມລຳເນົາຢູ່ຈຸ້ມກັນໃນຂອບເຂດແຄບ.ຢູ່ເຂດເຜົ່າຮັ້ນມີຊົນເຜົ່າສ່ວນໜ້ອຍຈຸ້ມກັນຢູ່,ເຂດຊົນເຜົ່າສ່ວນໜ້ອຍກໍມີເຜົ່າຮັ້ນອາໄສຢູ່.ສະຖານະການຢອງຢາຍດັ່ງກ່າວແມ່ນຈໍ່ຕົວຂຶ້ນຍ້ອນບັນດາເຜົ່າໄປມາຫາສູ່ກັນແລະຍົກຍ້າຍໃນຂະບວນວີວັດປະຫວັດສາດເປັນເວລາຍາວນານ.ຜົນການສຳຫຼວດປະຊາກອນທົ່ວປະເທດຄັ້ງທີ5ສະແດງໃຫ້ເຫັນວ່າ,ນັບມາຮອດວັນທີ1ພະຈິກປີ2000,ປະຊາກອນຊົນເຜົ່າສ່ວນໜ້ອຍຂອງຈີນມີ106ລ້ານ4ແສນ3ໝື່ນຄົນ.
ຕໍ່ໄປນີ້ຂໍແນະນຳເຜົ່າມົ້ງສູ່ທ່ານຟັງກ່ອນ.
ເຜົ່າມົ້ງຂອງຈີນຕົ້ນຕໍຢອງຢາຍກັນຢູ່ແຂວງກຸ້ຍໂຈ່ວ,ແຂວງຫູນານ,ແຂວງຢຸນນານ,ແຂວງເຊສວນ,ເຂດກວາງຊີ,ແຂວງຫູເປແລະແຂວງໄຫຫຼຳເປັນຕົ້ນ.ຢູ່ພາກຕາເວັນອອກສຽງໃຕ້ຂອງແຂວງກຸ້ຍໂຈ່ວແລະເຂດແດນຕໍ່ແດນລະຫວ່າງແຂວງຫູນານ,ແຂວງຫູເປ,ແຂວງເຊສວນແລະແຂວງກຸ້ຍໂຈ່ວ,ມີເຂດຕັ້ງພູມລຳເນົາຢູ່ຈຸ້ມກັນຂະໜາດໃຫຍ່.ຢູ່ພູຕ້າມຽວຂອງເຂດກວາງຊີເຜົ່າຈ້ວງປົກຄອງຕົນເອງ,ເຂດແດນຕໍ່ແດນລະຫວ່າງແຂວງຢຸນນານ,ແຂວງກຸ້ຍໂຈ່ວແລະເຂດກວາງຊີແລະເຂດແດນຕໍ່ແດນລະຫວ່າງແຂວງເຊສວນ,ແຂວງກຸ້ຍໂຈ່ວແລະແຂວງຢຸນນານ,ພ້ອມດ້ວຍແຂວງໄຫຫຼຳກໍ່ມີເຂດຕັ້ງພູມລຳເນົາຢູ່ຈຸ້ມກັນຂະໜາດນ້ອຍ.ສ່ວນຊາວເຜົ່າມົ້ງຢູ່ເຂດອື່ນໆກໍ່ອາໄສຢູ່ສັບກັນກັບເຜົ່າອື່ນໆ.ບ້ານເຜົ່າມົ້ງຢ່າງໜ້ອຍມີສີ່ຫ້າຄອບຄົວຫຼືສິບກວ່າຄອບຄົວ,ຢ່າງຫຼາຍມີຮ້ອຍກວ່າຄອບຄົວຫືຼພັນກວ່າຄອບຄົວ.ສິ່ງແວດລ້ອມເພິ່ງພາອາໄສຢູ່ເຂດຕ່າງໆກໍແຕກຕ່າງກັນຫຼາຍ,ແຕ່ສ່ວນຫຼາຍຢູ່ເປິ້ນພູຫຼືຕີນພູທີ່ຂ້ອນຂ້າງຮາບພຽງ,ຢູ່ເຂດພູດອຍທີ່ທັງສູງທັງໜາວກໍ່ມີ.ຕາມສະຖິຕິຂອງການສຳຫຼວດປະຊາກອນທົ່ວປະເທດຈີນຄັ້ງທີ່5ໃນປີ2000ສະແດງໃຫ້ເຫັນວ່າ,ເຜົ່າມົ້ງມີປະຊາກອນ8ລ້ານ9ແສນ4ໝື່ນ116ຄົນ.ເຜົ່າມົ້ງເວົ້າພາສາມົ້ງ,ເຊິ່ງຂຶ້ນກັບສາຂາພາສາມົ້ງໝວດພາສາມົ້ງຢາວຕະກຸນພາສາຈີນຕິເບດ.
ເຜົ່າມົ້ງມີປະຫວັດວັດທະນະທຳຍາວນານ,ເມື່ອ4000ກວ່າປີກ່ອນ,ຈາກລ້ອງແມ່ນ້ຳເຫຼືອງຮອດລ້ອງແມ່ນ້ຳຢາງເຊພ້ອມດ້ວຍທິດໃຕ້ຍ່ານກາງແມ່ນ້ຳຢາງເຊ,ມີຫຼາຍເຄືອຍາດແລະກົກເຫຼົ່າຕັ້ງພູມລຳເນົາຢູ່.ບາງຄົນເຫັນວ່າເຈົ້າຊື້ຢີ໋ວໃນປະຫວັດບູຮານທີ່ເລົ່າລືກັນແມ່ນບັນພະບຸລຸດທີ່ເຜົ່າມົ້ງເຄົາລົບນັບຖືໃນປັດຈຸບັນ,ສະນັ້ນອາດຈະແມ່ນຕະກຸນດຽວກັບເຜົ່າມົ້ງ.ກໍ່ມີຄົນເຫັນວ່າເຜົ່າມົ້ງປັດຈຸບັນອາດຈະແມ່ນລູກຫຼານເຫຼັນຫ້ຼອນຂອງຊາວເມືອງມາວລາຊະວົງໂຈ່ວ,ມີຄວາມເຫັນຫຼາຍຊະນິດຢ່າງ. ໃນວົງການປະຫວັດສາດ ຄວາມໂຕ້ຖຽງກັນຕ່າງໆກ່ຽວກັບກົກເຄົ້າເຜົ່າມົ້ງ,,ຈົນຮອດປັດຈຸບັນຍັງບໍ່ມີຄຳວິນິດໄສແນ່ນອນເທື່ອ,ແຕ່ໄດ້ມີຂໍ້ມູນປະຫວັດສາດອັນພຽງພໍສາມາດຢັ້ງຢືນວ່າ,ໃນສະໄໝລາຊະວົງຊີນແລະຮັ້ນເມື່ອ2000ປີກ່ອນ,ບັນພະບຸລຸດຂອງເຜົ່າມົ້ງກໍ່ໄດ້ຕັ້ງພູມລຳເນົາຢູ່ພາກຕາເວັນຕົກຂອງແຂວງຫູນານແລະພາກຕາເວັນອອກຂອງແຂວງກຸ້ຍໂຈ່ວເຊິ່ງຈົນຮອດຍັງແມ່ນເຂດຕັ້ງພູມລຳເນົາຢູ່ຈຸ້ມກັນຂອງພວກເຂົາເຈົ້າ,ໃນສະໄໝນັ້ນ,ເຂດເຫຼົ່ານີ້ເອີ້ນວ່າ"ອູຊີ່".ສະນັ້ນກໍເອີ້ນຊົນເຜົ່າສ່ວນໜ້ອຍຕ່າງໆ ເຊິ່ງລວມທັງບັນພະບຸລຸດຂອງເຜົ່າມົ້ງທີ່ອາໄສຢູ່ເຂດດັ່ງກ່າວເປັນ"ອູຊີ່ມານ".ຫຼັງຈາກນັ້ນ,ພວກເຂົາເຈົ້າໄດ້ຍ້າຍໄປສູ່ທິດຕາເວັນຕົກ,ແລ້ວຄ່ອຍໆຈໍ່ຕົວເປັນສະຖານະການແຈກຢາຍກັນໃນປັດຈຸບັນ.
ຕໍ່ໄປພວກເຮົາຂໍແນະນຳເຜົ່າໄທລື້ຂອງຈີນ.
ເຜົ່າໄທລື້ຂອງຈີນຕົ້ນຕໍຢອງຢາຍກັນຢູ່ກິ່ງແຂວງສິບສອງພັນນາເຜົ່າໄທລື້ປົກຄອງຕົນເອງ,ກິ່ງແຂວງເຕີຮົງເຜົ່າໄທລື້ເຜົ່າຈີງໂຜ່ປົກຄອງຕົນເອງ,ເມືອງຕີມາເຜົ່າໄທລື້ເຜົ່າຫວາປົກຄອງຕົນເອງແລະເມືອງລຽບເຜົ່າໄທລື່ເຜົ່າລ່າກູເຜົ່າຫວາ ປົກຄອງຕົນເອງແຂວງຢຸນນານ.ນອກນີ້,ຍັງຢອງຢາຍຕັ້ງພູມລຳເນົາຢູ່30ກວ່າເມືອງຂອງແຂວງຢຸນນານ,ເຊັ່ນ,ເມືອງຊີ່ນພີງ,ເມືອງຢວນຈ່ຽງແລະເມືອງຈີ່ນພີງເປັນຕົ້ນ.ເຜົ່າໄທລື້ອາໄສຢູ່ເຂດທົ່ງພຽງລະຫວ່າງພູເຂົາຢູ່ເຂດມໍ່ແຖບຮ້ອນ.ຕາມສະຖິຕິຂອງການສຳຫຼວດປະຊາກອນທົ່ວປະເທດຈີນຄັ້ງທີ5ໃນປີ2000ສະແດງໃຫ້ເຫັນວ່າ,ປະຊາກອນເຜົ່າໄທລື້ມີ1ລ້ານ1ແສນ5ໝື່ນ8989ຄົນ.ເວົ້າພາສາໄທລື້,ຂຶ້ນກັບສາຂາພາສາຈ້ວງແລະໄທລື້ ໝວດພາສາຈ້ວງແລະຕົ້ງ ຕະກຸນພາສາຈີນຕິເບດ.ເຜົ່າໄທລື້ນັບຖືພຸດທະສາສະໜານິກາຍຫິນະຍານ.
ໃນປະຫວດສາດຈີນ,ເຜົ່າໄທລື້ມີຊື່ຫຼາຍຢ່າງ,ຫຼັງຈາກສະຖາປະນາປະເທດຈີນໃໝ່ແລ້ວ,ອີງຕາມຄວາມປາຖະໜາຂອງປະຊາຊົນເຜົ່າໄທລື້,ຈິ່ງປ່ຽນຊື່ເປັນ"ໄທລື້"ຢ່າງເປັນທາງການ.
ເຜົ່າໄທລື້ມີປະຫວັດຍາວນານ,ໃນປື້ມປະຫວັດສາດຕົວໜັງສືຮັ້ນສະຕະວັດທີ1ກ່ອນຄ.ສ.ກໍ່ໄດ້ບັນທຶກເນື້ອໃນກ່ຽວກັບບັນພະບຸລຸດຂອງເຜົ່າໄທລື້. ປີ109ກ່ອນຄ.ສ.,ເຈົ້າຊີວິດອູ່ຕີ້ລາຊະວົງຮັ້ນໄດ້ຕັ້ງລັດອີ້ໂຈ່ວ,ເຂດເຜົ່າໄທລື້ກໍຢູ່ໃນບໍລິເວນລັດອີ໋ໂຈ່ວ.ຈົນຮອດສະໄໝລາຊະວົງມີງແລະເຊັ່ງໄດ້ໃຫ້ເຈົ້າໜ້າທີ່ຊົ່ວຄາວປົກຄອງເຂດຊົນເຜົ່າສ່ວນໜ້ອຍ,ເຂດເຜົ່າໄທລື້ຈຶ່ງຄ່ອຍໆຂຶ້ນກັບລັດຖະບານກາງໂດຍກົງ.ໃນສະໄໝສາທາລະນະລັດຈີນ,ຢູ່ເຂດເຜົ່າໄທລື້ໄດ້ສ້າງຕັ້ງເມືອງ.
ບຸນສົງການແມ່ນມື້ບຸນທີ່ມີສີສັນພິເສດຂອງຊົນເຜົ່າໄທລື້,ແມ່ນປີໃໝ່ຂອງຊາວເຜົ່າໄທລື້,ວັນເລລາແລະພິທີສະຫຼອງລ້ວນແຕ່ຄ້າຍຄືບຸນສົງການຂອງລາວ,ເນື່ອງໃນໂອກາດປີໃໝ່ລາວພຸດທະສັງກາດວຽນມາເຖິງນີ້,ພວກເຮົາໄດ້ຈັດຫາເອົາເພງທີ່ປະຊາຊົນເຜົ່າໄທລື້ສະຫຼອງປີໃໝ່ມາມອບເປັນຄວາມມ່ວນຊື່ນແດ່ທ່ານ,ເພັງນີ້ຊື່ວ່າ"ຄວາມອວຍພອນບຸນສົງການ",ທ່ານລອງຟັງເບິ່ງດູ,ຄ້າຍຄືບຸນສົງການຂອງລາວບໍ່？
|
