|
ຕາມຂ່າວສານຊິນຮວາ: ໃນຫຼາຍມື້ມານີ້, ຊາວຈີນພົ້ນທະເລໄດ້ເອົາໃຈໃສ່ໃນລະດັບສູງຕໍ່ການໄຂເວທີປາໄສເສດຖະກິດການຄ້າລະຫວ່າງສອງຝັ່ງຊ່ອງແຄບໄຕ້ຫວັນ, ແລະໄດ້ຕີລາຄາສູງ.
ວັນທີ 17 ເມສາ, ທ່ານໂຈ່ວຜິງຢ້າວ ເລຂາທິການສະມາຄົມຊຸກຍູ້ໂຮມຈີນເຂົ້າເປັນເອກະພາບກັນອັງກິດກ່າວວ່າ, ໃນເວທີປາໄສເສດຖະກິດການຄ້າສອງຝັ່ງຊ່ອງແຄບເທື່ອນີ້, ນະໂຍບາຍແລະມາດຕະການ 15 ລາຍທີ່ຝ່າຍແຜ່ນດິນໃຫຍ່ສະເໜີອອກມາເພື່ອຊຸກຍູ້ການແລກປ່ຽນແລະການຮ່ວມມືລະຫວ່າງສອງຝັ່ງແລະມີຜົນປະໂຫຍດຕໍ່ພີ່ນ້ອງຮ່ວມຊາດໄຕ້ຫວັນນັ້ນ, ໄດ້ສອດຄ່ອງກັບຄວາມຮຽກຮ້ອງຕ້ອງການຂອງປະຊາຊົນໄຕ້ຫວັນຢ່າງສົມບູນ, ນີ້ສະແດງໃຫ້ເຫັນວ່າ ລະຫວ່າງສອງຝັ່ງມີແຕ່ຂະຫຍາຍການພົວພັນອັນມີໄມຕີຈິດຕໍ່ກັນທໍ່ນັ້ນ, ປະຊາຊົນຈຶ່ງຈະມີຊີວິດການເປັນຢູ່ທີ່ສະຫງົບສຸກ.
ທ່ານຫຼຽງເວິຍຫົງ ປະທານສະມາຄົມຊຸກຍູ້ໂຮມຈີນເຂົ້າເປັນເອກະພາບກັນຂອງການາດາກ່າວວ່າ, ທ່ານຫູຈິນທາວ ປະທານປະເທດຈີນໄດ້ສະເໜີຂໍ້ສະເໜີໃໝ່ 4 ຂໍ້ທີ່ມີລັກສະນະລ້ຳໜ້າກ່ຽວກັບການຂະຫຍາຍການພົວພັນລະຫວ່າງສອງຝັ່ງ, ນີ້ຍ່ອມຈະມີຜົນສະທ້ອນອັນເລິກເຊິ່ງຍາວໄກຕໍ່ການປົກປັກຮັກສາສັນຕິພາບແລະສະຖຽນລະພາບຢູ່ຊ່ອງແຄບໄຕ້ຫວັນ ຊຸກຍູ້ການແລກປ່ຽນແລະການຮ່ວມມືລະຫວ່າງສອງຝັ່ງ.
ຫວ່າງມໍ່ໆນີ້ ສະມາຄົມຊຸກຍູ້ໂຮມຈີນເຂົ້າເປັນເອກະພາບກັນໂດຍສັນຕິຂອງໂອຊີອານີແລະອົສຕຼາລີກໍ່ອອກຖະແຫຼງການ ຊົມເຊີຍເວທີປາໄສເສດຖະກິດການຄ້າສອງຝັ່ງໄດ້ຮັບຜົນສຳເລັດອັນເຕັມເມັດເຕັມໜ່ວຍ, ແລະກ່າວວ່າ ຍິນດີທຳຄວາມພະຍາຍາມຈົນສຸດຄວາມສາມາດ, ບຸກບືນສູ້ຊົນເພື່ອຄັດຄ້ານການແບ່ງແຍກໃຫ້ໄຕ້ຫວັນເປັນເອກະລາດ ຊຸກຍູ້ການໂຮມເຂົ້າເປັນເອກະພາບກັນ ແລະພັດທະນາໂດຍສັນຕິ.
|
