|
ສະບາຍດີທ່ານຜູ່ຟັງທີ່ໂຄລົບ, ຫວ່າງບໍ່ດົນນີ້, ງານແຂ່ງຂັນໝາກເສິກສາກົນເພດຍິງຊີງຊະນະເລີດໂລກປີ 2006 ໄດ້ສິ້ນສຸດລົງ. ນາງສິຢີ້ຮວາ ນັກກິລາຈີນຊີງໄດ້ແຊມປຽນ, ເລີຍກາຍເປັນລາຊີນີໝາກເສິກສາກົນລະດັບໂລກຜູ່ທີ 3 ຂອງຈີນ ເຊິ່ງຖັດຈາກນາງເຊ້ຈິ່ນແລະນາງຈູ່ເສິນ. ໃນລາຍການໂລກກິລາພາກນີ້, ພວກເຮົາຈະສະເໜີນັກກິລາໝາກເສິກສາກົນທີ່ຄົນທັງຫຼາຍຍັງບໍ່ທັນຮູ້ຈັກປານໃດຜູ່ນີ້ສູ່ທ່ານຟັງ.
ວັນທີ 25 ມີນາ, ໃນງານແຂ່ງຂັນໝາກເສິກສາກົນເພດຍິງຊີງຊະນະເລີດໂລກທີ່ຈັດຂຶ້ນຢູ່ເອຄາເຕຣິນບວກແຫ່ງຣັດເຊຍ, ນາງສິຢີ້ຮວາ ນັກກິລາຈີນໄດ້ເອົາຊະນະນັກກິລາລະດັບໂລກ 6 ຄົນຢ່າງຕໍ່ເນື່ອງ, ແລ້ວຊີງໄດ້ແຊມປຽນ. ເລື່ອງທີ່ຕ້ອງກ່າວເຖິງນັ້ນແມ່ນ ໃນເວລາເຂົ້າຮ່ວມການແຂ່ງຂັນເທື່ອນີ້, ນາງສິຢີ້ຮວາໄດ້ຖືພາມາ 4 ເດືອນກວ່າແລ້ວ, ນີ້ເຮັດໃຫ້ການຊີງເອົາແຊມປຽນຂອງນາງຍິ່ງມີສີສັນອັດສະຈັນ.
ນາງສິຢີ້ຮວາເກີດຢູ່ແຂວງເຈີ້ຈ່ຽງ ທາງພາກຕາເວັນອອກສຽງໃຕ້ຂອງຈີນ, ມີນິໄສງຽບທຸ່ນທ່ຽງ. ໃຕ້ຜົນສະທ້ອນຂອງພໍ່, ນາງສິຢີ້ຮວາເລີ່ມຮ່ຳຮຽນໝາກເສິກສາກົນເມື່ອອາຍຸ 6 ຂວບ, ໃນເວລາບໍ່ດົນປານໃດ ນາງກໍໄດ້ສະແດງໃຫ້ເຫັນພອນສະຫວັນລື່ນຄົນອື່ນ, ອາຍຸ 13 ປີ, ນາງກໍ່ໄດ້ຖືກເລືອກເຂົ້າທີມຝຶກແຫ່ງຊາດຈີນ.
ຜູ່ລື້ງກັບນາງສິຢີ້ຮວາລ້ວນແຕ່ຮູ້ວ່າ, ນາງສິຢີ້ຮວາມົວເມົານຳການຫຼິ້ນໝາກເສິກສາກົນທີ່ສຸດ, ນີ້ກໍ່ແມ່ນສາເຫດທີ່ນາງຍຶດໝັ້ນເຂົ້າຮ່ວມງານແຂ່ງຂັນຊີງຊະນະເລີດໂລກໃຕ້ກໍລະນີນາງຖືພາມາຫຼາຍເດືອນແລ້ວ. ຕໍ່ການຕົກລົງທີ່ມີຄວາມສ່ຽງດັ່ງກ່າວ, ຄອບຄົວຂອງນາງໄດ້ໃຫ້ການສະ ໜັບສະໜູນອັນມະຫາສານ. ທ່ານລິວຊິ່ງ ສາມີຂອງນາງສິຢີ້ຮວາໄດ້ທວນຄືນວ່າ: ກ່ອນອື່ນ ເພິ່ນເອງຢາກໄປເຂົ້າຮ່ວມການແຂ່ງຂັນທີ່ສຸດ, ສອງ ພວກຂ້າພະເຈົ້າໄດ້ຂໍຄວາມເຫັນນຳທ່ານໝໍຫຼາຍທ່ານ, ທ່ານໝໍລ້ວນແຕ່ກ່າວວ່າໃນຊ່ວງໄລຍະນີ້ບໍ່ມີບັນຫາ, ເພາະວ່າຖືພາມາ 4 ເດືອນປາຍ ຍັງຢູ່ໃນໄລຍະປອດໄພ, ພວກຂ້າພະເຈົ້າກໍ່ເຫັນວ່າຄວນໃຫ້ເພິ່ນໄປສູ້ຊົນເອົາ.
ເມື່ອທຽບກັບນາງເຊ້ຈິ່ນແລະນາງຈູ່ເສິນ ລາຊີນີໝາກເສິກສາກົນຂອງຈີນອີກສອງຄົນແລ້ວ, ຄຸນນະທຳປະຈຳຕົວຂອງນາງສິຢີ້ຮວາແຕກຕ່າງກັນກັບພວກເພິ່ນຫຼາຍ, ນາງເຊ້ຈິ່ນ ລາຊີນີໝາກເສິກສາກົນລະດັບໂລກຂອງຈີນຜູ່ທຳອິດໄດ້ຮັບຄວາມນິຍົມຊົມຊອບຈາກຊາວຈີນ ອັນໄພສານດ້ວຍກິລິຍາວາຈາອັນອ່ອນນ້ອມສຸພາບ. ສ່ວນນາງຈູ່ເສິນ ລາຊີນີໝາກເສິກສາກົນລະດັບໂລກຂອງຈີນອີກຜູ່ໜຶ່ງ ຫົວໄວຄ່ຽມຄົມແລະພິກໄຫວ ມີພາບປະທັບໃຈທີ່ເປັນຜູ່ມີຄວາມຮູ້ຄວາມສາມາດສຳລັບສາທາລະນະຊົນ. ສ່ວນນາງສິຢີ້ຮວາພັດບໍ່ມັກປາກມັກເວົ້າ. ແຕ່ທີ່ຈິງແລ້ວ, ໃນຫຼາຍປີມານີ້ ນາງສິຢີ້ຮວາໄດ້ຍຶດໝັ້ນແຕ່ງບົດໂດຍຕະຫຼອດ, ແລະຕັ້ງຄໍລຳຂອງຕົນໃນໜັງສືພິມແລະວາລະສານຫຼາຍສະບັບ. ທ່ານເຢ້ຈ່ຽງສ່ວນ ຄູຝຶກໃຫຍ່ທີມໝາກເສິກສາກົນແຫ່ງຊາດຈີນເວົ້າວ່າ: ນາງສິຢີ້ຮວາເກີດຢູ່ໃນຄອບຄົວນັກຮຽນຮູ້, ພໍ່ຂອງນາງແມ່ນຄູ. ໃນພາບປະທັບໃຈຂອງຂ້າພະເຈົ້າ, ນາງສິຢີ້ຮວາບໍ່ຊ່າງເວົ້າ, ແຕ່ແຕ່ງບົດດີຫຼາຍ, ແມ່ນນັກກິລາໝາກເສິກສາກົນທີ່ດຶກໃນ.
ເຖິງວ່າກ່ອນໜ້ານີ້ ນາງສິຢີ້ຮວາບໍ່ມີຊື່ດັງເໝືອນກັນກັບນາງເຊ້ຈິ່ນແລະນາງຈູ່ເສິນທີ່ຢູ່ລຸ້ນດຽວກັນກໍ່ຕາມ, ແຕ່ຜົນງານທີ່ນາງຍາດມາໄດ້ນັ້ນຍັງດີກວ່າເຂົາເຈົ້າສອງຄົນ. ພາຍຫຼັງນາງສິຢີ້ຮວາຊີງໄດ້ແຊມປຽນງານແຂ່ງຂັນໝາກເສິກສາກົນເພດຍິງຊີງຊະນະເລີດໂລກເທື່ອນີ້ແລ້ວ, ນາງກໍ່ກາຍເປັນນັກກິລາໝາກເສິກສາກົນຈີນຜູ່ທຳອິດທີ່ຊີງໄດ້ແຊມປຽນຄົບຊຸດຂອງງານແຂ່ງຂັນໝາກເສິກສາກົນທີ່ສຳຄັນ. ເມື່ອປີ 2000, ນາງສິຢີ້ຮວາກໍ່ຊີງໄດ້ແຊມປຽນງານແຂ່ງຂັນໝາກເສິກສາກົນເພດຍິງຊີງຂັນໂລກແລ້ວ; ຫຼັງຈາກນັ້ນສອງປີ, ນາງຊີງໄດ້ແຊມປຽນງານແຂ່ງຂັນດັ່ງກ່າວອີກເທື່ອໜຶ່ງ. ນາງສິຢີ້ຮວາຍັງຮ່ວມມືກັບເພື່ອນຮ່ວມທີມ, ເປັນສະມາຊິກທີມນັກກິລາເພດຍິງຈີນຊີງໄດ້ແຊມປຽນງານແຂ່ງຂັນໝາກເສິກສາກົນໂອລິມປິກໝູ່ຄະນະເພດຍິງລະດັບໂລກ 3 ເທື່ອລຽນຕິດ.
ໃນຖານະເປັນນັກກິລາໝາກເສິກສາກົນ, ນາງສິຢີ້ຮວາຍັງຍຶດໝັ້ນຮ່ຳຮຽນ. ປັດຈຸບັນ, ນາງໄດ້ສຳເລັດການສຶກສາວິຊາກົດໝາຍພາກ 4 ປີໃນມະຫາວິທະຍາໄລປັກກິ່ງແລ້ວ. ຈະຊຳລະການພົວພັນລະຫວ່າງການຮຽນກັບການຫຼິ້ນໝາກເສິກສາກົນແນວໃດນັ້ນ, ນາງສິຢີ້ຮວາມີຄວາມຊາບຊືມອັນດີງາມ, ນາງເຫັນວ່າມັນບໍ່ມີຄວາມຂັດແຍ່ງກັນ. ນາງເວົ້າວ່າ: ຂ້າພະເຈົ້າເຫັນວ່າ ການຮ່ຳຮຽນອາດຈະຂັດແຍ່ງກັບການຫຼິ້ນໝາກເສິກສາກົນ ແຕ່ກໍ່ມີການຊ່ອຍເຫຼືອ, ຕ້ອງເບິ່ງວ່າຈະໝູນໃຊ້ເວລາແນວໃດ, ແລະເຮັດແນວໃດປະສານການຮຽນກັບການຫຼິ້ນໝາກເສິກສາກົນ.
ຍ້ອນຖືພາ ນາງສິຢີ້ຮວາຈະບໍ່ຕາງໜ້າທີມເພດຍິງແຫ່ງຊາດຈີນເຂົ້າຮ່ວມງານແຂ່ງຂັນໝາກເສິກສາກົນໂອລິມປິກໝູ່ຄະນະເພດຍິງລະດັບໂລກທີ່ຈະຈັດຂຶ້ນໃນທ້າຍປີນີ້, ແຕ່ວ່າ ນາງສິຢີ້ຮວາທີ່ເປັນລາຊີນີໝາກເສິກສາກົນຜູ່ໃໝ່, ຈະໄດ້ຮັບຄວາມສົນໃຈຈາກຄົນທັງຫຼາຍນັບມື້ນັບຫຼາຍໃນພາຍໜ້າຢ່າງບໍ່ຕ້ອງສົງໄສ.
|
