|
|
 |
| (GMT+08:00)
2006-04-20 17:02:48
|
 |
|
ຈີນເອົາໃຈໃສ່ໃຫ້ການສຶກສາທາງເພດແກ່ຊາວໜຸ່ມເຍົາວະຊົນ(ສຽງ)
cri
Author: shuo
|
ປະຈຸບັນນີ້ຈີນມີຊາວໜຸ່ມເຍົາວະຊົນທີ່ມີອາຍຸແຕ່10ປີຫາ24ປິແລະຊາວໜຸ່ມຍິງຊາຍຜູ້ຍັງໂສດປະມານ300ລ້ານຄົນ,ຄຽງຄູ່ກັບເສດຖະກິດສັງຄົມຂອງຈີນພັດທະນາຢ່າງວ່ອງໄວແລະລະດັບຊີວິດການເປັນຢູ່ຂອງປະຊາຊົນຍົກສູງຂຶ້ນ,ອາຍຸສຸກງອມດ້ານສະລີລະສາດຂອງຊາວໜຸ່ມເຍົາວະຊົນຈີນໄດ້ໜຸ່ມນ້ອຍກວ່າເກົ່າ,ແຕ່ອາຍຸແຕ່ງດອງພັດຊ້າລົງ.ສະນັ້ນຢູ່ຈີນໄດ້ປະກົດມີບັນ ຫາທີ່ອາຍຸຜູ້ມີເພດສຳພັນຄັ້ງແລກນ້ອຍລົງແລະຜູ້ມີເພດສຳພັນກ່ອນແຕ່ງດອງຫຼາຍຂຶ້ນເປັນຕົ້ນ.ຈະແກ້ໄຂບັນຫາເຫຼົ່ານີ້ແນວໃດ,ໂດຍສະເພາະແມ່ນຈະຮັກສາສຸຂະພາບທາງ ກາຍແລະໃຈຂອງຊາວໜຸ່ມເຍົາວະຊົນແນວໃດ?ວົງການຕ່າງໆໃນສັງຄົມຈີນໃຫ້ຄຳຕອບວ່າ,ຕ້ອງເພີ່ມທະວີການສຶກສາທາງເພດ.
ໃນໂມງຮຽນສຸຂະພາບຍາມໄວຄະນອງທີ່ໂຮງຮຽນມັດທະຍົມ171ນະຄອນປັກກິ່ງຈັດຂຶ້ນ,ຄູແລະນັກຮຽນໄດ້ສົນທະນາກັນ.ຄູເວົ້າວ່າ: "ຂໍໃຫ້ນັກຮຽນທັງຫຼາຍຟັງເລື່ອງໜຶ່ງທີ່ພວກເຮົາໄດ້ພົບໃນເວລາໃຫ້ຄຳປຶກສາ.ບຸກຄົນໃນເລື່ອງນີ້,ຄູໄດ້ປ່ຽນຊື່ໃຫ້ແລ້ວ.ນາງເຢ້ເຢ້ແມ່ນນັກຮຽນມ.4,ໃນການເຄື່ອນໄຫວຄັ້ງໜຶ່ງຂອງໂຮງຮຽນ,ນາງໄດ້ຮູ້ຈັກກັບທ້າວຫຼີຊຽງ ນັກຮຽນຊາຍມ.6ທີ່ເຈົ້າຊູ້.ທຳອິດພວກເຂົາເຈົ້າມັກລົມກັນກ່ຽວກັບເລື່ອງທີ່ເກີດຂຶ້ນໃນໂຮງ ຮຽນ,ຫຼືລົມເລື່ອງມ່ວນໆຂອງເພື່ອນຮຽນ,ພາຍຫຼັງມາ,ພວກເຂົາເຈົ້າໄດ້ຝາກຂໍ້ຄວາມສັ້ນຫຼື ໂທລະສັບລົມກັນຊູ່ມື້,ຕໍ່ມາກໍເລີ່ມເຂົ້າໆອອກໆຢູ່ໂຮງຮຽນນຳກັນ.ແຕ່ວ່າ,ເວລານີ້,ນາງເຢ້ ເຢ້ຮູ້ສຶກກະວົນກະວາຍ,ສະນັ້ນ,ມີມື້ໜຶ່ງນາງຈຶ່ງໄດ້ຍ່າງເຂົ້າຫ້ອງໃຫ້ຄຳປຶກສາດ້ານຈິດໃຈ,ແລະຖາມຄູຈິດຕະສາດວ່າ,ນ້ອງບໍ່ແມ່ນໄດ້ຮັກເຂົາແລ້ວຫວະ?"ຫຼັງຈາກຟັງແລ້ວ,ນັກຮຽນທັງຫຼາຍກໍພາກັນຫົວອິກໆ.ຄູເວົ້າຕໍ່ໄປວ່າ:"ນາງເຢ້ເຢ້ຍັງຖາມວ່າ,ຄູວ່າພວກເຮົາຈະຮັກກັນຊົ່ວນິລັນດອນບໍ່? ພວກນ້ອງທັງຫຼາຍເຈົ້າຄິດວ່າ,ເຂົາເຈົ້າຈະຮັກກັນຊົ່ວນິລັນດອນບໍ່?"ນັກ ຮຽນທັງຫຼາຍມິດງຽບ,ໃຜກໍບໍ່ເວົ້າຫຍັງຈັກຄວາມ.
ຢູ່ຫຼາຍໂຮງຮຽນທີ່ປັກກິ່ງແລະ10ກວ່າຕົວເມືອງອື່ນພ້ອມດ້ວຍເຂດຊົນນະບົດສ່ວນໜຶ່ງ,ລ້ວນແຕ່ໄດ້ຕັ້ງຫຼັກສູດທີ່ຄ້າຍຄືກັນນີ້.ຫຼັກສູດດັ່ງກ່າວຈັດໂດຍສະມາຄົມວາງແຜນຄອບຄົວຈີນ,ແມ່ນເນື້ອໃນສຳຄັນໜຶ່ງຂອງໂຄງການສຸຂະພາບໄວຄະນອງທີ່ດຳເນີນການສຶກສາດ້ານສຸຂະພາບທາງເພດແລະການສືບພັນຕໍ່ຊາວໜຸ່ມເຍົາວະຊົນ.
ແຕ່ກ່ອນ,ຊາວໜຸ່ມເຍົາວະຊົນຂອງຈີນສ່ວນຫຼາຍແມ່ນຮຽນຄວາມຮູ້ພື້ນຖານຈຳນວນໜຶ່ງໃນດ້ານອະນາໄມໄວຄະນອງໃນຫຼັກສູດອະນາໄມສະລີລະສາດຂອງໂຮງຮຽນ,ຮູບການສຶກສາຂອງໂຮງຮຽນມີແຕ່ເປັນແບບງ່າຍໆ,ເນັ້ນໜັກການສິດສອນຄວາມຮູ້ອະນາໄມດ້ານສາລີລະສາດ,ແຕ່ພັດປະໝາດການຊັກນຳໃນດ້ານອາລົມຈິດແລະຈິດຕະສາດເປັນຕົ້ນ.ສ່ວນຫຼັກສູດສຸຂະພາບໄວຄະນອງທີ່ຈັດຕັ້ງປະຕິບັດໂດຍສະມາຄົມວາງແຜນຄອບຄົວຂອງຈີນໄດ້ຕາບຈູນຄວາມບໍ່ພຽງພໍໃນດ້ານທີ່ກ່າວມາ,ປາກົດວ່າຍິ່ງຖືກຕາມຫັຼກວິທະຍາສາດກວ່າເກົ່າ,ແລະເຮັດໃຫ້ຊາວໜຸ່ມເຍົາວະຊົນຮັບເອົາໄດ້ງ່າຍກວ່າເກົ່າ.
ຍົກຕົວຢ່າງຄື ໂມງຮຽນດັ່ງກ່າວຂອງໂຮງຮຽນມັດຖະຍົມ171ທີ່ພວກເຮົາກ່າວມາຂ້າງເທິງນີ້.ຫົວຂໍ້ຂອງໂມງຮຽນນີ້ແມ່ນຊາວໜຸ່ມເຍົາວະຊົນເພດຕ່າງກັນຄວນໄປມາຫາສູ່ກັນແນວໃດ.ກ່ອນອື່ນ,ຄູໄດ້ເລົ່າເລື່ອງທີ່ນັກຮຽນຍິງຊາຍຄູ່ໜຶ່ງເກີດມີອາລົມຈິດຮັກກັນທີ່ເຫັນພໍເປັນເງົາຊື່ໆ,ແລ້ວໃຊ້ຮູບການທີ່ໃຫ້ນັກຮຽນທັງຫຼາຍສົມມຸດຕົນເປັນຕົວສະແດງໃນເລື່ອງ,ແລ້ວປຶກສາຫາລືກັນ,ຊ່ອຍນັກຮຽນຮັບຮູ້ປະກົດການໄວຄະນອງຈາກຫຼາຍດ້ານ ເຊັ່ນສະລີລະສາດ ຈິດຕະສາດແລະສັງຄົມເປັນຕົ້ນ,ໃຫ້ນັກຮຽນຮູ້ຈັກວິທີໄປມາຫາສູ່ກັນກັບເພດກົງກັນຂ້າມ,ຮຽນຮູ້ການໂຄລົບນັບຖືຜູ້ອື່ນ,ແລະຄວບຄຸມຕົນເອງ.ຄູຍັງບອກນັກຮຽນວ່າ,ເພດຈະໄປນຳຄົນຕະຫຼອດຊີວິດ,ໃຊ້ທ່າທີວິທະຍາສາດແລະສຸຂຸມຮອບຄອບຕໍ່ເພດແມ່ນການກະ ທຳທີ່ສະຫຼາດ;ສຸດທ້າຍ,ຄູຍັງໃຫ້ນັກຮຽນທັງຫຼາຍສະແດງຄວາມຮູ້ສຶກຕໍ່ໂມງຮຽນນີ້ດ້ວຍຮູບແຕ້ມ.ນາງຊູ່ໝິນ ນັກຮຽນອາຍຸ16ປີສົນໃຈຫຼາຍຕໍ່ຫຼັກສູດແບບນີ້.ນາງເວົ້າວ່າ:"ຄູໃຫ້ພວກນ້ອງຮູ້ຈັກຢ່າງເຕັມທີ່ວ່າ,ການໄປມາຫາສູ່ກັນຢ່າງເປັນປົກກະຕິລະຫວ່າງນັກຮຽນຍິງຊາຍຄວນເປັນແນວໃດ.ນ້ອງຄິດວ່າຮຽນຫຼັກສູດນີ້,ໃຜໆກໍ່ດີໃຈຫຼາຍ,ເພາະວ່າ,ພວກເຮົາໄດ້ແລກປ່ຽນຄວາມຄິດໃນໃຈຢ່າງເຕັມທີ່."
ການໄປມາຫາສູ່ກັນລະຫວ່າງເພດຕ່າງກັນພຽງແຕ່ແມ່ນເນື້ອໃນສ່ວນໜຶ່ງຂອງຫຼັກສູດສຸຂະພາບໄວຄະນອງ,ຫຼັກສູດນີ້ຍັງລວມທັງເນື້ອໃນຫຼາຍດ້ານ ເຊັ່ນການສືບພັນກັບການຄຸມກຳເນີດ ການປ້ອງກັນໂຣກເອດສ໌ ເພດກັບເພດສຳພັນເປັນຕົ້ນ.ເພື່ອເຮັດວຽກງານລາຍນີ້ໃຫ້ດີ,ສະມາຄົມວາງແຜນຄອບຄົວຂອງຈີນໄດ້ຮຽບຮຽງແບບຮຽນຢ່າງຫຼວງຫຼາຍ,ແລະໄດ້ຄັດເລືອກ ອົບຮົມຄູສອນ.ເພື່ອຮັບປະກັນຄຸນນະພາດຂອງຄູສອນ,ຄູສອນຫຼັກສູດສຸຂະພາບໄວຄະນອງລ້ວນແຕ່ແມ່ນເລືອກເອົາຈາກຜູ້ອາສາສະໝັກວິຊາສະເພາະ ເຊັ່ນຄູ ນາຍໝໍແລະແພດຈິດຕະສາດເປັນຕົ້ນ.
ຫຼັກສູດສຸຂະພາບໄວຄະນອງໄດ້ຮັບຄວາມຊົມເຊີຍຫຼາຍ.ປະຈຸບັນນີ້,ຫຼັກສູດທີ່ກ່ຽວຂ້ອງໄດ້ກາຍເປັນຫຼັກສູດຄົງທີ່ຂອງໂຮງຮຽນເກືອບ300ຫຼັງໃນແຫ່ງຕ່າງໆຂອງຈີນ.ຕົວຢ່າງຄື,ໃນຫ້ອງປີ4 ປີ5ຂອງໂຮງຮຽນມັດທະຍົມອຸດົມເລກ54ປັກກິ່ງ,ອາທິດໜຶ່ງມີຫຼັກສູດສຸຂະພາບໄວຄະນອງຊົ່ວໂມງໜຶ່ງ.ນັກຮຽນຂອງໂຮງຮຽນເລກ54ຍັງໄດ້ຕັ້ງເວັບໄຊທີ່ກ່ຽວຂ້ອງຂອງຕົນເອງ.ໃນເວັບໄຊນີ້,ນອກຈາກໄດ້ແນະນຳຄວາມຮູ້ຕ່າງໆກ່ຽວກັບສຸຂະພາບດ້ານເພດໃນໄວຄະນອງແລ້ວ,ຍັງໄດ້ຕັ້ງຄໍລຳທີ່ໃຫ້ນັກຮຽນທັງຫຼາຍແລກປ່ຽນຄວາມເຫັນກັນ,ເຮັດໃຫ້ນັກຮຽນສາມາດແລກປ່ຽນຄວາມຮູ້ສຶກໃນການຮຽນຕື່ມອີກ.ພໍເປີດເວັບໄຊດັ່ງກ່າວກໍໄດ້ຮັບຄວາມຊົມເຊີຍຈາກນັກຮຽນທັງຫຼາຍ.ຄູທັງຫຼາຍກໍສະໜັບສະໜູນທີ່ສຸດຕໍ່ເລື່ອງນີ້.
ໂຄງການສຸຂະພາບໄວຄະນອງທີ່ສະມາຄົມວາງແຜນຄອບຄົວຈີນປະຕິບັດນັ້ນ,ນອກຈາກໄດ້ຕັ້ງຫຼັກສູດທີ່ກ່ຽວຂ້ອງແລ້ວ,ຍັງໄດ້ດຳເນີນການເຄື່ອນໄຫວຕ່າງໆເພື່ອຊຸກຍູ້ສຸຂະພາບໄວຄະນອງຂອງຊາວໜຸ່ມເຍົາວະຊົນ.ຕົວຢ່າງຄື,ເຊື້ອເຊີນເຈົ້າໜ້າທີ່ທີ່ກ່ຽວຂ້ອງ ຄູສອນ ແລະພໍ່ແມ່ນັກຮຽນເຂົ້າຟັງໂມງຮຽນ,ໃຫ້ພວກເຂົາເຈົ້າຮັບຮູ້ຄວາມໝາຍຂອງການສຶກສາທາງເພດຢ່າງແທ້ຈິງ,ແລະສ້າງບັນຍາກາດທີ່ດີງາມໃນສັງຄົມເພື່ອດຳເນີນການສຶກສາກ່ຽວກັບສຸຂະພາບທາງເພດແລະການສຶບພັນຕໍ່ຊາວໜຸ່ມເຍົາວະຊົນຕື່ມອີກ.ໃນເວລາໃຫ້ສຳພາດຂອງນັກຂ່າວວິທະຍຸCRIພວກເຮົາ,ທ່ານນາງຫຼີອ້ຽນຊິ່ວ ເລຂາທິການໃຫຍ່ສະມາຄົມວາງແຜນຄອບຄົວຈີນກ່າວວ່າ,ແຕ່ປະຕິບັດໂຄງການສຸຂະພາບໄວຄະນອງ5ປີມານີ້,ໄດ້ຮັບຜົນສຳເລັດອັນໃຫຍ່ຫຼວງ.ນາງເວົ້າວ່າ:"ເມື່ອໄດ້ອົບຮົມແລ້ວ,ຢູ່ເຂດທີ່ປະຕິບັດໂຄງການນີ້ລ້ວນແຕ່ໄດ້ປະກົດມີສະພາບທີ່ຊາວໜຸ່ມເຍົາວະຊົນມີຄວາມສາມາດວິນິໄສສູງຂຶ້ນ, ມີຄວາມເປັນເຈົ້າການຫຼາຍກວ່າເກົ່າໃນການສະແຫວງຫາການຮັບໃຊ້ດ້ານສຸຂະພາບທາງ ເພດແລະການສືບພັນ;ເພດສຳພັນກ່ອນແຕ່ງດອງຫຼຸດໜ້ອຍລົງ,ການທຳແທ້ງກ່ອນແຕ່ງ ດອງຫຼຸດໜ້ອຍລົງ,ແລະຄວາມອັນຕະລາຍທີ່ຕິດກາມມະໂຣກແລະໂຣກເອດສ໌ຫຼຸດໜ້ອຍລົງເປັນຕົ້ນ."
ທ່ານນາງຫຼີອ້ຽນຊິ່ວຊີ້ອອກວ່າ,ສະມາຄົມວາງແຜນຄອບຄົວຍັງຈະສືບຕໍ່ເຮັດວຽກງານສຶກສາໃຫ້ແກ່ຊາວໜຸ່ມເຍົາວະຊົນໃນໄວຄະນອງ,ແລະມີແຜນຈະຂະຫຍາຍຂະໜາດຂອງໂຄງການສຸຂະພາບໄວຄະນອງໃຫ້ກວ້າງອອກໜຶ່ງເທົ່າໃນ5ປີຂ້າງໜ້າ.
|
|
|
